کراچی: ہائرایجوکیشن کمیشن نے انڈر گریجویٹ پالیسی2020 (ایسوسی ایٹ ڈگری پروگرام) اورپی ایچ ڈی پالیسی کےنفاذکی مدت میں ایک سال توسیع کردی ہے۔

ڈپٹی ڈائریکٹر کوآرڈی نیشن ثمینہ درانی کے نوٹیفکیشن کےمطابق توسیع فال 2022تک کی گئی ہے تاہم جو جامعات ایچ ای سی انڈر گریجویٹ پالیسی اور پی ایچ ڈی پالیسی نافذ کرنے کا ارادہ رکھتی ہیں یا انہوں نے اس پالیسی کو اپنالیا ہے وہ اسے جاری رکھ سکتی ہیں۔

یاد رہے کہ ہائر ایجوکیشن کمیشن نے اگست 2020میں انڈر گریجویٹ پالیسی 2020 اور پی ایچ ڈی پالیسی منظور کی تھی جس کے تحت جامعات اور ملحقہ کالجوں سے بی اے، بی کام اور بی ایس سی ختم کرکے ایسوسی ایٹ ڈگری پروگرام/ چار سالہ ڈگری پروگرام متعارف کرانا تھا اور اس کا اطلاق جنوری 2021 سے ہونا تھا تاہم وائس چانسلرز کی اکثریت کے تحفظات کے باعث اب اس میں ایک سال کی توسیع کردی گئی ہے۔

یاد رہے کہ ہائر ایجوکیشن کمیشن نے ایچ ای سی انڈر گریجویٹ پالیسی2020 (ایسوسی ایٹ ڈگری پروگرام) کے لئے پروگرام اسپیشلسٹ اور پشاور یونویرسٹی کے سابق وائس چانسلر ذوالفقار گیلانی نے انڈر گریجویٹ پالیسی2020 کے تحت اس کے نفاذ کے سلسلے میں جامعات اور کالجز کے اساتذہ کو تربیت بھی فراہم کرنی تھی جو تاحال سندھ کی کسی جامعہ یا کالج اساتذہ کو فراہم نہیں کی گئی ہے۔

واضح رہے اس پالیسی میں پرائیویٹ تعلیم کا سلسلہ ہی ختم کردیا گیا ہے جس کے تحت بیرونی امیدوار، پرائیویٹ بی اے، بی کام اور ایم اے، ایم کام کے دروازے بند ہوگئے ہیں صرف جامعہ کراچی سے ہرسال ایک لاکھ امیدوار بی اے، بی کام اور ماسٹرز پرائیویٹ طور پر کرتے ہیں۔