ھفتہ, 04 فروری 2023


جے ایس ایم یو، ڈی پی ٹی داخلہ ٹیسٹ، 100 نشستوں کیلئے 1200 امیدوار شریک

کراچی: جناح سندھ میڈیکل یونیورسٹی میں ڈاکٹرآف فزیکل تھراپی(ڈی پی ٹی) میں داخلے کیلئے ٹیسٹ کا انعقاد کیا گیا۔

جس میں 1200 امیدواروں نے شرکت کی۔ ڈائریکٹر ایڈمیشنز ڈاکٹر فاطمہ عابد نے بتایا کہ جناح سندھ میڈیکل یونیورسٹی کے تحت ڈاکٹر آف فزیکل تھراپی(ڈی پی ٹی) 5 سالہ پروگرام کی 100 نشستوں پر داخلے کیلئے 2 ہزار 200 خواہشمندامیدواروں نے درخواستیں جمع کروائیں ۔

جن میں سے 1211 امیدوار اہل قرار پائے، انٹری ٹیسٹ میں 40 ایم سی کیوز سوالات بائیولوجی، 20 کیمسٹری، 20 فیزکس اور 20 انگریزی سے پوچھے گئے تھے، 100 نشستوں میں سے 90 پر اوپن میرٹ اور 10 پر سیلف فنانس پر داخلے دیئے جائیں گے۔

داخلہ ٹیسٹ کے موقع پر رجسٹرار ڈاکٹر اعظم خان، آئی پی ٹی آر کے ڈائریکٹر ڈاکٹر محمد خان، ڈائریکٹرایڈمیشنز ڈاکٹر فاطمہ عابد، ناظم امتحانات ڈاکٹر انیتا شاہ، قاضی شبیر و دیگر نے مختلف شعبوں میں قائم امتحانی مراکز کا دورہ کیا اور امیدواروں کو دی جانے والی سہولتوں اور انتظامات کا جائزہ لیا.

وائس چانسلر پروفیسر امجد سراج میمن نے امیدواروں کیلئے نیک خواہشات کا اظہار کرتے ہوئے کہا کہ طلبا صرف ڈگری کیلئے نہیں بلکہ انسانی خدمت کے جذبے کیساتھ اس پروفیشن میں قدم رکھیں، ڈی پی ٹی کی اہمیت وقت کےساتھ ساتھ بڑھتی جارہی ہے، طلبا اچھی تعلیم حاصل کرکے معاشرے کیلئے کارآمد شہری ثابت ہوسکتے ہیں۔

پرنٹ یا ایمیل کریں

Leave a comment