لاہور: پنجاب بھر میں موسم سرما کی اسکول چھٹیوں کانوٹیفکیشن جاری کردیا۔

حکومت نے پنجاب کے تعلیمی اداروں میں چھٹیوں کو 2 مختلف فیز میں تقسیم کیاہے جسکا باقاعدہ نوٹیفیکیشن لاہور ہائیکورٹ میں جمع کروادیا گیاہے۔

پنجاب کے 24 اضلاع میں 23 دسمبر سے 6 جنوری تک چھٹیاں ہوں گی جبکہ 12 بارہ اضلاع میں 3 جنوری سے 13 جنوری تک چھٹیاں ہوں گی۔

23 دسمبر سے 6 جنوری تک چھٹیوں والے اضلاع میں فیصل آباد، ساہیوال، قصور، سیالکوٹ، نارووال، گجرات، گوجرانوالہ، پاکپتن، شیخوپورہ، اوکاڑہ، وہاڑی، خانیوال، لاہور، خوشاب، حافظ آباد، ملتان، ٹوبہ ٹیک سنگھ، بہاولپور، بہاولنگر، سرگودھا، منڈی بہاؤالدین، لودھراں، ننکانہ صاحب اور جھنگ شامل ہیں۔

3 جنوری سے 13 جنوری تک چھٹیوں والے اضلاع میں لیہ، راجن پور، جہلم، میانوالی، اٹک، مظفر گڑھ، چکوال، بھکر، راولپنڈی، رحیم یارخان، ڈی جی خان، چنیوٹ شامل ہیں

دوحا: قطر میں جاری فیفا ورلڈکپ 2022 میں ارجنٹائن کےخلاف زخمی ہونے والے سعودی فٹبالر یاسر الشھرانی کو واپس وطن بھجوادیا گیا۔

سعودی میڈیا رپورٹس کے مطابق گرین فالکنز کے ٹوئٹر پر پوسٹ کیے گئے ایک بیان میں کہا گیا کہ فٹبالر یاسر الشھرانی کو حمد میڈیکل سٹی سے ریاض کے نیشنل گارڈ اسپتال منتقل کردیا گیا ہے جہاں ان کی سرجری کی گئی۔

یاسر الشھرانی نے ایک ویڈیو پیغام جاری کرتےہوئے کہا ہے کہ میں خیریت سے ہوں اللہ تعالی آپ سب کو صحت و عافیت سے رکھے، آپ لوگوں کی دعائیں میرے لیے بڑا سرمایہ ہیں سعودی عوام کو ارجنٹائن سے فتح مبارک ہو۔

ارجنٹائین کے خلاف میچ کے دوران یاسر الشھرانی سعودی گول کیپر محمد العویس سے ٹکرا گئے تھے جس کے نتیجے میں ان کا جبڑا اور بائیں چہرے کی ہڈیاں ٹوٹ گئی تھیں جس کا علاج تاحال جاری ہے۔

واضح رہے کہ فیفا ورلڈکپ کے گروپ سی کے میچ میں سعودی عرب نے ارجنٹینا کو ایک کے مقابلے 2 گول سے اَپ سیٹ شکست دیدی تھی۔

دوحا: جرمن پلیئرزنےجاپان کیخلاف میچ کے موقع پرانوکھا احتجاج کیا۔

متنازع ’’ون لو’‘ آرم بینڈ پر فیفا کی جانب سے عائد پابندی پر جرمن پلیئرز نے جاپان کیخلاف میچ کے موقع پر انوکھا احتجاج کیا۔

کھلاڑیوں نے اپنے منہ ہاتھ سے ڈھانپ رکھے تھے، انھوں نے کہا کہ آرم بینڈ پر پابندی ہمارے بولنے کے حق پر پابندی کے مترادف ہے۔

فیفا نے دھمکی دی کہ متنازع آرم بینڈ استعمال کرنے پر کھلاڑیوں کیخلاف ایکشن لیا جائیگا۔

قبل ازیں خلیفہ انٹرنیشنل اسٹیڈیم میں کھیلے گئے میگا ایونٹ کے 10 ویں میچ میں جاپان نے جرمنی کو 1 کے مقابلے میں 2 گول سے شکست دی۔

اسلام آباد: ملک بھر میں میٹرک اور انٹر کی سطح پر گریڈنگ سسٹم تبدیل کر کے 10؍ نکاتی نیا گریڈنگ سسٹم متعارف کرایا جارہا ہے جس کے تحت پاسنگ مارکس 33؍ فیصد سے بڑھا کر 40؍ فیصد کردئیے جائیں گے جبکہ فیل یعنی F گریڈ ختم کرکے U گریڈ یعنی ان سیٹسفائی گریڈ متعارف کرایا جارہا ہے۔

اسی طرح A ون گریڈ 100 تا 80 فیصد کے درمیان فرق کو ختم کر کے A پلس پلس 96 تا 100، A پلس91 تا 95؍ اور 86 تا 90کو A گریڈ کیا جارہا ہے۔

اس دس نظامی گریڈنگ سسٹم کی منظوری ملک بھر کے تمام تعلیمی بورڈ کے سربراہوں کے اجلاس (آئی بی سی سی ) میں دی جائے گی ۔ اجلاس میں چیئرمین ایچ ای سی ڈاکٹر مختار کو بھی خصوصی طور پر شرکت کی دعوت دی گئی ہے۔

اجلاس میں 81؍ تا 85فیصد نمبروں کو B پلس اور 76 تا 81 نمبروں B گریڈ کردیا جائے گا۔ اسی طرح میٹرک اور انٹر کے طلبہ کو نمبروں کے بجائے جامعات کی طرز پر گریڈنگ پوائنٹ ایورج (جی پی اے) دینے پر بھی غور ہوگا۔

اجلاس میں اس بات کی بھی منظوری دی جائے گی اپریل مئی میں میٹرک اور انٹر کے امتحانات اور اگست تک نتائج جاری ہوجائیں۔

صوبائی وزیر بورڈز و جامعات اسماعیل راہوکی صدارتسندھ حکومت نے صوبے کی سرکاری جامعات میں طلبہ یونین کی بحالی کے لیے 27 جامعات کے وائس چانسلرز کا اجلاس 28 نومبر کو 12 بجے طلب کرلیا۔

اجلاس میں جامعات میں طلبہ یونینز کی بحالی کے فیصلے کے نفاذ کا طریقہ کار طے کیا جائے گا۔

یاد رہے کہ صوبائی کابینہ اور سندھ اسمبلی طلبہ یونین بحالی کا بل منظور کر چکی ہیں تاہم 1984 سے قبل قائم ہونے والی تمام جامعات جن کی تعداد 7 سے بھی کم ہے کہ ایکٹ میں طلبہ یونین اور ان کے عہدیداروں سے متعلق شق موجود ہے تاہم اب جامعات کی تعداد 27 ہوگئی ہے لیکن ان 20 جامعات کے ایکٹ میں طلبہ یونین کا ذکر ہی نہیں ہے۔

یہ بھی یاد رہے کہ 9 فروری 1984 میں جنرل ضیاء الحق نے طلبہ یونینز پر پابندی عائد کردی تھی پابندی سے قبل جامعہ کراچی کی سنڈیکیٹ میں طلبہ یونین کے دو اراکین ہوتے تھے جن میں ایک جامعہ کراچی کا صدر اور دوسرا الحاق شدہ کالجوں کا صدر ہوتا تھا۔ 1984 سے جامعہ کراچی کے سنڈیکیٹ میں طلبہ کی نمائندگی نہیں ہے۔

پاکستان انگلینڈ ٹیسٹ سیریز کے لیے میچ آفیشلز کا اعلان کردیاگیا۔

مشتمل آفیشلز کا پینل مجموعی طور پر 7 امپائرزپر ترتیب دیاگیاہے جس میں راشد ریاض، احسن رضااور آصف یعقوب بھی میچ آفیشلز کا حصہ ہیں۔

کراچی اورراولپنڈی ٹیسٹ میں حسن رضا اورجو ولسن فیلڈ امپائرنگ کے فرائض سر انجام دیں گے جب کہ ماریس ایراسمس اور علیم ڈار ملتان ٹیسٹ میں فیلڈ امپائرنگ کے فرائض سر انجام دیں گے۔

انگلینڈ کے دورہ پاکستان کے تینوں ٹیسٹ میچوں میں اینڈی پائکرافٹ کو ریفری نامزد کیا گیا ہے۔

جامعہ این ای ڈی کے شعبہ آرکیٹکچر اینڈ پلاننگ کے زیرِاہتمام چھٹی دو روزہ عالمی کانفرنس " Cities and the Poor عنوان سے جامعہ کے سٹی کیمپس میں منعقد کی گئی، جس کا محور خطِ غربت سے نیچے زندگی گزارے والے افراد تھے.

معین الجامعہ این ای ڈی پروفیسر ڈاکٹر محمد طفیل کا دو روزہ کانفرنس سے خطاب کرتے ہوئے کہنا تھا کہ پالیسی کیا ہے؟ اور کیا ہونی چاہیے؟ غریب اور متوسط شہری کی زندگی بہتر کیسے بنائی جاسکتی ہے، ان اہم سوالات کے جواب ہمیں دنیا بھر کے تحقیقی مقالوں سے ملتا ہے.

پالیسی پر بات ہونا پہلا قدم اور اطلاق دوسرا اقدام ہے، دونوں کے ذریعے ہی شہری کی زندگی آسان بنائی جاسکتی ہے. میں سمجھتا ہوں کہ پالیسی بنانے اور اس کا اطلاق کروانے والوں کو لازمی کانفرنس میں شریک ہونا چاہیے.

اس موقعے پر پیغام دیتے ہوئے ڈین فیکلٹی آف آرکیٹکچر اینڈ مینجمنٹ سائنسز پروفیسر ڈاکٹر نعمان احمد کا کہنا تھا کہ ہمارا نظام شہری کو باوقار زندگی نہیں دے رہا ہے. معاملات پر سیر حاصل بحث و تمحیص سے مسائل کا حل ممکن ہے.

استقبالیہ سے خطاب کرتے ہوئے چیئرپرسن شعبہ آرکیٹیکچر اینڈ پلاننگ پروفیسر ڈاکٹر انیلہ نعیم کا کہنا تھاکہ کانفرنس اکیڈمیا، تحقیق کار، حکومت اور مختلف اسٹیک ہولڈرز کے لیے بہترین پلیٹ فارم ہے.

بین الاقوامی کی نوٹ اسپیکر ڈاکٹر جوزفین بیل (لندن اسکول آف اکنامکس) سمیت 3 بین الاقوامی اور 5 قومی ماہرین نے کانفرنس سے خطاب کیا جب کہ آے آر عارف حسن اور ان کی ٹیم کی رکن امل ہاشم نے پریزینٹیشن کے ذریعے غریب افراد کا احوال دکھایا. اختتامی کلمات ادا کرتے ہوئے کانفرنس کنوینر فریحہ تحسین نے ٹیم سمیت مہمانوں کا شکریہ ادا کیا.جامعہ ترجمان کے مطابق ڈین فیکلٹی آف آرکیٹکچر اینڈ مینجمنٹ سائنسز پروفیسر ڈاکٹر نعمان احمد، رجسٹرار سید غضنفر حسین سمیت بڑی تعداد میں اساتذہ اورطالب علم کانفرنس میں شریک ریے.

دوحا: فیفا ورلڈکپ کے گروپ سی کےمیچ میں سعودی عرب نے ارجنٹینا کو ایک کے مقابلے 2 گول سے اَپ سیٹ شکست دیدی۔

لوسیل اسٹیڈیم میں کھیلے گئے میچ میں ارجنٹینا کے کپتان لیونل میسی نے 9 ویں منٹ میں گول اسکور کیا ۔

جس کے بعد 2 بار گیند کو جال میں پہنچایا تاہم امپائرز نے دونوں گولز کو فاؤل قرار دیا۔

سعودی عرب نے دوسرے راؤنڈ میں جارحانہ کھیل پیش کیا اور ارجنٹینا کی سبقت کو ختم کرتے ہوئے 48 منٹ میں صالح الشہری گول بناکر میچ برابر کردیا تاہم 5 منٹ کے وقفے سے سلیم الدواسری دوسرا گول داغ کر سعودی عرب کی ٹیم کو سبقت دلادی جو میچ کے اختتام تک برقرار رہی۔

قبل ازیں گزشتہ روز امریکا اور ویلز کے درمیان میچ ایک ایک گول سے برابر ہوگیا تھا۔

کراچی: بورڈ آف انٹرمیڈیٹ اینڈ سیکنڈری ایجوکیشن فیصل آباد نے انٹرمیڈیٹ پارٹ ون و پارٹ ٹو دوسرے سالانہ امتحان 2022 کے انعقاد کے شیڈول کا اعلان کردیا ہے

جس کے مطابق مذکورہ امتحان کیلئے پیپرز یکم دسمبر بروز جمعرات سے شروع ہوں گے۔بورڈ آف انٹرمیڈیٹ اینڈ سیکنڈری ایجوکیشن فیصل آباد کے ترجمان ساجد نقوی نے بتایا کہ یہ امتحانات پارٹ ٹو اکیڈمک اورپارٹ ون اکیڈمک سیشن2018-2020 اور 2020-2022کے طلباو طالبات کے لئے ہیں۔

انہوں نے بتایا کہ پہلے گروپ کا پرچہ روزانہ صبح ساڑھے 8 بجے اور سیکنڈ گروپ کا پرچہ دوپہر ڈیڑھ بجے شروع ہوگاتاہم جمعہ کے روز سیکنڈ گروپ کے پیپر کے اوقات دوپہر اڑھائی بجے ہوں گے۔انہوں نے بتایا کہ امیدواران کو رول نمبر سلپیں ان کے اداروں اور پرائیویٹ امیدواروں کو ان کے داخلہ فارمز پر تحریر کئے گئے۔

پتوں پر ارسال کی جارہی ہیں لہٰذاجن امیدواروں،طلبا و طالبات کو27 نومبر تک رول نمبر سلپیں نہ ملیں وہ فیصل آباد بورڈ کی انٹر برانچ سے رابطہ کرسکتے ہیں۔

کراچی: جامعہ کراچی میں سسٹین ایبل کریکولم ڈیولپمنٹ کےسلسلے میں ملک کی مختلف جامعات کے وائس چانسلر کا اجلاس23 نومبر کو ہوگا۔

جامعہ کراچی کے شعبہ پبلک ایڈمنسٹریشن کے زیر اہتمام اورجارج میسن یونیورسٹی امریکہ کے اشتراک اور امریکی حکومت کی معاونت سے دوروزہ قومی کانفرنس بعنوان: ”سسٹین ایبل کریکولم ڈیولپمنٹ“ کی افتتاحی تقریب 23 نومبر 2022 ء کو شام 4:00 بجے ایچ ای جے جامعہ کراچی کی سماعت گاہ میں منعقد ہوگی،جبکہ کانفرنس کے افتتاح سے قبل پائیدار نصاب کی ترقی کے سلسلے میں ملک بھر کی مختلف جامعات کے وائس چانسلر زکا اجلاس 23 نومبرکوصبح 10:00 بجے وائس چانسلر سیکریٹریٹ جامعہ کراچی میں منعقد ہوگا۔کانفرنس میں پائیدارترقی سے وابستگی میں درپیش چیلنجز اور مواقعوں اور پاکستان میں ہائر ایجوکیشن کمیشن کے توقعات اور اعلیٰ تعلیمی اداروں کی ترجیحات کی ایک جائزہ رپورٹ بھی پیش کی جائے گی۔

کانفرنس سے جارج میسن یونیورسٹی امریکہ کے جیمزویٹی،نشیت سہائے،سابق چیئرمین ہائر ایجوکیشن کمیشن پاکستان پروفیسر ڈاکٹر عطاالرحمن،جامعہ کراچی کے وائس چانسلر پروفیسر ڈاکٹر خالد محمودعراقی ودیگر خطاب کریں گے۔