یمز ٹی وی (تجارت) پاکستان دنیا کے مضبوط ترین ممالک کی صف میں شامل ہو گیا ہے۔ امریکہ کی نیوز اینڈ ورلڈ رپورٹ ’’بیسٹ کنٹریز‘‘ کے مطابق پاکستان دنیا کا 23 واں مضبوط ترین ملک ہے۔ رپورٹ کے مطابق بعض اقتصادی اور سیاسی مسائل کے باوجود پاکستان دنیا میں تیزی سے ابھرنے والا مستحکم ملک بن رہا ہے جس کا دفاعی بجٹ اور تیزی سے ترقی کرتی ہوئی معیشت اس کو عالمی برادری میں اہم مقام دلا رہی ہے۔

رپورٹ کے مطابق امریکہ کا شمار دنیا کے سب سے مضبوط ملک کے طور پر کیا جاتا ہے جبکہ دوسرے نمبر پر روس، تیسرے نمبر پر چین اور چوتھے نمبر پر برطانیہ کا شمار کیا جاتا ہے۔ رپورٹ میں دنیا کی تیزی سے ترقی کرتی ہوئی 80 بڑی معیشتوں کا جائزہ پیش کیا گیا ہے جس میں ان ممالک کی ثقافتی تاریخ، شہری سہولیات کی فراہمی اور معیار زندگی کی بنیاد پر ان ممالک کی درجہ بندی کی گئی ہے۔ جس کے تحت پاکستان کو دنیا بھر میں 23 ویں مستحکم ملک کے طور پر تسلیم کیا گیا ہے۔ جو پاکستان کی موجودہ حکومت کی دانشمندانہ اقتصادی پالیسیوں اور معاشی ترقی کے اہداف کے حصول کے سلسلے میں کی جانے والی اصلاحات کی عکاسی کرتی ہے۔

یمز ٹی وی (اسلام آباد)پاکستان کی پہلی خاتون سیکریٹری خارجہ تہمینہ جنجوعہ نے اپنے عہدے کا چارج سنبھال لیا ۔ ذرائع کےمطابق سیکریٹری خارجہ تہمینہ جنجوعہ گزشتہ روز جنیوا سےاسلام آباد پہنچیں اور دفتر خارجہ میں اپنے نئے عہدے کا چارج سنبھالا۔ تہمینہ جنجوعہ اس سے قبل جنیوا میں پاکستان کی مستقل مندوب کی حیثیت سے فرائض انجام دے رہی تھیں ۔

ذرائع کا کہناہےکہ فرخ عامل کوجنیوا میں پاکستان کامستقل مندوب تعینات کیاگیا ہےجو جلد اپنےعہدے کا چارج سنبھالیں گے۔ فرخ عامل اس سے قبل جاپان میں پاکستانی سفیر کے فرائض سرانجام دے رہےتھے ۔

ایمز ٹی وی (تعلیم ) میٹرک کے امتحانات میں نقل مافیا کا قلع قمع کرنے کیلئے عملی اقدامات کرنے ہونگے،ثانوی بورڈ کو رواں سال امتحانات میں اسٹینڈنگ کمیٹی کے فیصلوں پر عملدرآمد یقینی بنانا ہونگے۔ ثانوی امتحانات کے شیڈول میں تبدیلی کے فیصلے پر تحفظات ہیں،ان خیالات کا اظہار پیک پرائیویٹ اسکولز ایسوسی ایشن سندھ کے صدر سید شہزاد اختر نے پیک کے مرکزی آفس ڈی ایچ اے میں اجلاس کی صدارت کرتے ہوئے کیا، اجلاس میں4سو سے زائد اسکولز کے منتظمین نے شرکت کی۔

اجلاس میں ثانوی بورڈ کی جانب سے میٹرک کے امتحانی شیڈول میں تبدیلی اور نقل کی روک تھام کے حوالے سے تبادلہ خیال کیا گیا۔ اس موقع پر صدر پیک کا کہنا تھا کہ اسٹینڈنگ کمیٹی نے فیصلہ کیاتھا کہ امتحانی مراکز بڑے اور بہتر سہولیات فراہم کرنیو الے اسکولز میں قائم کئے جائیں گے لہٰذا ثانوی بورڈبچوں کی فیسوں میں اضافہ کرنے کے بجائے اسٹینڈنگ کمیٹی کے فیصلے پر عمل کرے ۔

اس موقع پر ممبر میٹرک بورڈ غلام عباس بلوچ نے ثانوی بورڈ میں مستقل کنٹرولر اور سیکرٹری کی تعیناتی نہ ہونے پرتشویش کا اظہار کرتے ہوئے کہا کہ اس طرح کے اقدامات سے بورڈ میں طلبہ و طالبات کے امتحانی فارم سمیت دیگر اہم معاملات التواء کا شکار ہوجاتے ہیں۔ اجلاس میں پیک کے عہدیداران جواد حیدر نقوی،غلام محی الدین، شاہ جہاں، نصیر الدین، ملک سجاد، ظفر، رفیق، احمد خان، امتیاز، وقاص، اعجاز، مزمل شاہ، وارث شاہ، شکیل، طاہر، خلیق، رشید، اسلم، یونس بلوچ،رضا آفریدی، فرحان، ہدایت اللہ سمیت دیگر نے شرکت کی۔

ایمز ٹی وی (کراچی)گورنر سندھ محمد زبیر نے پاکستان ہندو کونسل کے زیر اہتمام ہندو جوڑوں کی اجتماعی شادی کی تقریب میں شرکت کی اور شادی شدہ جوڑوں کو مبارکباد دی ۔وائی ایم سی اے میں منعقدہ اس تقریب میں 62 جوڑے ازدواجی بندھن میں منسلک ہوئے ۔گورنر سندھ نے اس موقع پر کہا کہ پاکستان ہندو کونسل کی جانب سے منعقدہ یہ تقریب قابل تحسین ہے ۔ گورنر سندھ نے مزید کہا کہ اس قسم کی تقریبات سے فضول خرچی اور شادی پر کئے جانے والے غیر ضروری اخراجات سے محفوظ رہا جا سکتا ہے جبکہ والدین پر غیر ضروری اخراجات کا بوجھ کم کرنے میں بھی اجتماعی شادیاں اہم کردار ادا کرسکتی ہیں ۔ انہوں نے کہا کہ وسائل کی کمی،جہیز کی لعنت اور بے جا رسم و رواج کے باعث ہمارے معاشرے میں سیکڑوں لڑکیاں شادی کے بندھن سے محروم ہیں جو انتہائی افسوسناک امر ہے ۔ا نہوں نے کہا کہ پاکستان ہندو کونسل کی جانب سے اجتماعی شادیوں کا مسلسل انعقاد پورے معاشرے کے لئے قابل تقلید مثال ہے کیونکہ ان کے ذریعہ نہ صرف وسائل نہ رکھنے والے جوڑے ازدواجی زندگی گزارنے کے قابل ہو رہے ہیں بلکہ والدین اپنی لڑکیوں کے فرض سے سبکدوش ہو پا رہے ہیں۔

ایمز ٹی وی (کراچی/سندھ) صوبہ سندھ میں نئی موٹر سائیکلوں کی خریداری میں زائد قیمتوں کی وصولی کا انکشاف ہوا ہے ، موٹر سائیکل ڈیلرز نئی سی جی 125 موٹر سائیکل کی خریداری پر فی موٹر سائیکل 10 ہزار روپے زائد وصول کرر ہے ہیں ۔ اس حوالے سے معلوم ہوا ہے کہ مارکیٹ میں اس وقت دستیاب نئی 125 موٹر سائیکل کی کمپنی کی جانب سے مقررہ کردہ قیمت ایک لاکھ 5 ہزار 5 سو روپے مقرر کی گئی ہے لیکن ڈیلرز کی جانب سے فی موٹر سائیکل ایک لاکھ 15 ہزار روپے وصول کئے جارہے ہیں ، ستم ظریفی یہ کہ اس حوالے سے کسی ادارے نے تاحال کوئی کارروائی نہیں کی ۔ ذرائع کا مزید یہ کہنا ہے کہ ملک میں اس وقت روزانہ ایک ہزار سے زائد 125 موٹر سائیکلیں فروخت کی جا رہی ہیں اور ان کی فروخت کی مد میں صارفین سے ہزاروں روپے زائد کی وصولی کی جا رہی ہے مگر کسی حکومتی ادارے نے کوئی ایکشن نہیں لیا جو قابل افسوس امر ہے ۔

ایمز ٹی وی (سندھ ،کراچی) چیئرمین اینٹی کرپشن غلام قادر تھیبو نے بدین اور مٹھی میں اینٹی کرپشن دفاتر کا دورہ کیا۔ اس موقع پر ان کا کہنا تھا اینٹی کرپشن کی حالیہ کارروائیوں سے عوام کا اعتماد بحال ہوا۔ صحت، تعلیم اور محکمہ خوراک کے خلاف متعدد شکایات موصول ہوئیں۔ شکایات کے ازالے کیلئے جلد کارروائیاں کی جائیں گی۔ غلام قادر تھیبو نے اینٹی کرپشن کے اہلکاروں کو بغیر کسی خوف کے کرپشن کیخلاف کارروائی کی ہدایت کی۔ ان کا مزید کہنا تھا بہت جلد سندھ کے تمام سرکل دفاتر کا سرپرائز دورہ کروں گا۔

ایمز ٹی وی (تعلیم /کراچی) وفاقی ہائرایجوکیشن کمیشن نےوفاقی اردویونیورسٹی کو اسلام آباد کیمپس کے لیے فوری طور پر این او سی لینے کی ہدایت کردی ہے. کمیشن کے ڈائریکٹر جنرل ڈاکٹر رفیق بلوچ نے اس حوالے سے وائس چانسلر اردو یونیورسٹی کو خط تحریرکردیا ہے جس میں کہا گیا ہے کہ وفاقی اردو یونیورسٹی نے اسلام آباد کیمپس قائم کرنے کے لیے این او سی نہیں لیا. جبکہ کیمپس میں کوئی پروفیسر نہیں صرف ایک ایسوسی ایٹ پروفیسر ہے۔

قاعدے کے مطابق ایک پروفیسر اور دو ایسوسی ایٹ پروفیسرز کا ہونا ضروری ہے، بزنس ایڈمنسٹریشن ، قانون اور آئی ٹی کے پروگرام رجسٹرڈ نہیں جبکہ یونیورسٹی کے ایکٹ کے مطابق وائس چانسلر کا دفتر (پرنسپل سیٹ) اسلام آباد میں ہونا چاہیئے . لیکن ایسا نہیں ہے اور یہ کراچی میں ہے۔ خط میں کہا گیا ہے کہ ایچ ای سی کی علمی سرقہ پالیسی اور تمام گائیڈ لائنز فوری اختیار کی جائیں۔

ایمز ٹی وی(سندھ ِ/کراچی )چین کی کمپنی کے نمائندوں نے کراچی اسلام آباد اور لاہور کے ایئر پورٹس کا کنٹرول سنبھالنے کا فیصلہ کرلیا ہے اور بولی دینے کے لئے تینوں ایئرپورٹس کے ارتقاء اور معائنہ کا کام مکمل کرلیا ۔ کراچی ایئرپورٹ اور اسلام آباد کی پرائیو یٹائزیشن کے لئے چین کی کمپنی کے نمائندوں نے 9 مارچ اور 11 مارچ کو دورہ کیا۔ یہ کمپنی اب 21 مارچ کو سی اے اے کو پیشکش دے گی اور دوسری کمپنیوں نے پیش کش جمع نہیں کرائی تو ٹھیکہ چین کی کمپنی کو دیدیا جائے گا کراچی ایئرپورٹ 14ہزار ایکڑ پر لاہور 13 سو ایکڑاور اسلام آباد ایئر پورٹ 35 سو ایکڑ پر محیط ہے ان ایئرپورٹ کی زمین کئی سو ارب ڈالر مالیت کی ہے۔

ایمز ٹی وی (تجارت ) ڈراپ اری گیشن نظام آبپاشی سے پانی کی 40 تا 60 فیصد بچت کی جا سکتی ہے ۔ جبکہ اس نظام سے کھاد پانی کے ساتھ حل ہو کر پودوں کی جڑوں تک پہنچتی ہے جس سے کھاد کے ضیاع میں نمایاں کمی واقع ہوتی ہے۔ ہارون احمد خان نے اپنی تحقیقی رپورٹ میں کہا ہے کہ ڈراپ اری گیشن کے نظام سے کھاد کی کھپت میں 50 فیصد کمی لائی جا سکتی ہے۔

اس کے علاوہ جڑی بوٹیوں کے اگاؤ میں بھی کمی واقع ہوتی ہے۔ جبکہ فصلوں کی آبپاشی کے جدید نظام سے فصلوں کو سیراب کرنے کے دورانیے اور پانی کی کھپت میں بھی نمایاں کمی کی جا سکتی ہے جس سے زرعی مداخلات میں کمی سے کاشتکار کی آمدنی میں نمایاں حد تک اضافہ کیا جا سکتا ہے۔

رپورٹ کے مطابق ملک بھر اور بالخصوص بارانی علاقوں میں ڈرپ اری گیشن کے نظام کی ترقی سے زرعی شعبہ کی کارکردگی میں نمایاں اضافہ کے ذریعے دیہی معیشت کی ترقی میں مدد حاصل کی جا سکتی ہے۔