Reporter SS
ایمزٹی وی(صحت)ویسے تو چائے پینے کے لیے کسی جواز کی ضرورت نہیں تاہم اگر آپ اسے پسند نہیں کرتے تو جان لیں کہ یہ گرم مشروب دماغی صحت کے لیے فائدہ مند ہے۔
یہ دعویٰ سنگاپور میں ہونے والی ایک طبی تحقیق میں سامنے آیا۔
نیشنل یونیورسٹی آف سنگاپور کی تحقیق میں بتایا گیا کہ روزانہ کم از کم ایک کپ چائے پینا دماغی تنزلی یا یوں کہہ لیں دماغی مرض ڈیمینشیا کا خطرہ نمایاں حد تک کم کرتا ہے۔
اس تحقیق کے دوران 55 سال سے زائد عمر کے 957 افراد کی چائے نوشی کی عادت کا جائزہ بارہ سال تک لیا گیا۔
تحقیق کے دوران ہر دو برس بعد رضاکاروں کے دماغی افعال کا جائزہ لیا جاتا ہے جبکہ محققین نے ان کے طرز زندگی، طبی عوارض اور جسمانی سرگرمیوں کی معلومات بھی اکھٹی کی۔
تحقیق میں بتایا گیا کہ دنیا بھر میں مقبول اس مشروب کا روزانہ استعمال عمر بڑھنے کے ساتھ دماغ کو لاحق ہونے والے اس مرض کا خطرہ 50 فیصد تک کم کردیتا ہے۔
تحقیق کے مطابق سبز یا ہو سیاہ چائے اس سے کوئی فرق نہیں پڑتا، یہ دونوں ہی دماغ پر یکساں انداز سے مثبت اثرات مرتب کرتی ہیں۔
اینٹی آکسائیڈنٹس سے بھرپور چائے ورم کش ہوتی ہے جو کہ دماغ کی رگوں کو پہنچنے والے نقصان اور دماغی تنزلی سے تحفظ دیتی ہے۔
محققین کا کہنا تھا کہ تحقیق کے نتائج سے یہ معلوم ہوتا ہے کہ یہ عام اور ہر جگہ آسانی سے دستیاب مشروب ڈیمینیشا اور پارکنسن امراض سے درمیانی عمر میں بچانے میں مددگار ثابت ہوتا ہے۔
انہوں نے کہا کہ موجودہ عہد کی ترقی کے باوجود دماغی امراض جیسے ڈیمینشیا تاحال چیلنج سے کم نہیں اور اس کی روک تھام کی موجودہ حکمت عملیاں اطمینان بخش نہیں۔
تاہم محقین کا کہنا تھا کہ اس حوالے سے مزید تحقیق کی ضرورت ہے تاکہ واضح جوابات سامنے آسکیں۔
یہ تحقیق طبی جریدے دی جرنل آف نیوٹریشن، ہیلتھ اینڈ ایجنگ میں شائع ہوئی۔
ایمز ٹی وی(مانیٹرنگ ڈیسک) کئی برس کے تجربات کے بعد آخرکار سام سنگ کی جانب سے فولڈ ہوجانے والے اسمارٹ فون بہت جلد حقیقت بن کر سامنے آنے والے ہیں، جنھیں رواں سال متعارف کرا دیا جائے گا۔
رپورٹ کے مطابق رواں سال کے آخر تک اس فون کو تیار کرکے پیش کردیا جائے گا۔
تاہم پہلے اس ڈیوائس کا پروٹوٹائپ ماڈل تیار کیا جائے گا جنھیں یہ کمپنی اپنے شراکت داروں کو دے گی اور صارفین میں اس کی ڈیمانڈ کا جائزہ لے گی۔
ابتداء میں اس کے چند ہزار ماڈلز تیار کیے جائیں گے جبکہ عوامی طور پر فروخت کے لیے اسے 2018 میں متعارف کرائے جانے کا امکان ہے۔
اس سے قبل ایک اور رپورٹ میں یہ عندیہ دیا گیا تھا کہ سام سنگ کا یہ سب سے منفرد فون رواں سال کی تیسری سہ ماہی کے دوران متعارف کرایا جائے گا۔
سام سنگ نے اس ڈیوائس کا ابتدائی پروٹوٹائپ فروری میں ہونے والی موبائل ورلڈ کانگریس کے دوران بڑی موبائل نیٹ ورکس کمپنیوں کو دکھایا تھا جسے پراجیکٹ ویلی اور گلیکسی ایکس کا نام دیا گیا ہے۔
ابھی تک یہ واضح نہیں کہ فون دیکھنے میں کیسا ہوگا یا اس کا فولڈ کیسے کام کرے گا مگر یہ کوئی راز نہیں کہ سام سنگ فولڈ ایبل اسکرین ٹیکنالوجی پر برسوں سے کام کررہی ہے۔
سام سنگ نے گزشتہ سال نومبر میں ایک فون کا پیٹنٹ بھی فائل کیا تھا جس کی اسکرین فولڈ ہوسکتی ہے اور اسے صارفین کسی ونڈو بلائنڈ کی طرح کھول سکتے ہیں۔
ایمز ٹی وی ( تجارت ) کلکٹر کسٹمز (اپریزمنٹ) جمیل ناصر نے کہا ہے کہ کاروباری برادری کے مسائل جلد اور میرٹ پر حل کیے جائیں گے۔
تجارتی اشیاء کی جلد سے جلد کلیئرنس ان کی ترجیحات میں شامل ہے کیونکہ تاخیر سے کاروباری لاگت میں اضافہ ہوتا ہے۔
انہوں نے ان خیالات کا اظہار لاہورچیمبر کے نائب صدر محمد ناصر حمید خان سے لاہور چیمبر میں ملاقات کے موقع پر کیا۔
عزیز الرحمن چن، چودھری خادم حسین، ذیشان خلیل اور ناظم حسین شاہ بھی اس موقع پر موجود تھے۔
کلکٹر کسٹمز نے کہا کہ میں ایک دوسرے پر اعتماد کرنا ہوگا جس سے معاملات بہتر ہونگے، ڈیکلریشن سسٹم بہتر ہونے سے انڈرانوائسنگ کے خاتمے میں مدد ملے گی۔
انہوں نے کہا کہ تاجروں کے بہت سے مسائل کی وجہ معلومات کا فقدان بھی ہے جسے دور کرنے کے لیے محکمہ آفیسران کا تقر رکرنے کو تیار ہے جو تاجروں کو آگہی دیں گے۔
چیمبر کے نائب صدر ناصر حمید خان نے کہا کہ ایف بی آر کی پالیسیوں کا مقصد موجودہ ٹیکس دہندگان پر مزید بوجھ لادنا نہیں بلکہ ٹیکس نیٹ کو وسعت دینا ہونا چاہیے۔
انہوں نے کہا کہ کسٹمز ڈیپارٹمنٹ رپورٹس پر سکینرز نصب کرے کیونکہ غیرضروری تاخیر کی وجہ سے امپورٹرز کو ڈیمرج چارجز برداشت کرنا پڑتے ہیں۔
انہوں نے کہا کہ اس وقت نیشنل بینک کی مخصوص برانچز ہی کسٹمز ڈیوٹی وصول کرتی ہیں، یہ اجازت تمام برانچز کو دی جائے۔
انہوں نے کہا کہ وی بوک سسٹم اگرچہ بہتر قدم ہے لیکن اگر انٹری میں کوئی غلطی ہوجائے تو اسے درست کرنے کا اختیار بہت محدود ہے لہٰذا اس مسئلے پر توجہ دی جائے۔
ناصر حمید خان نے کہا کہ تجارتی بینک ایران کے لیے آئی فارم جاری نہیں کررہے کیونکہ ایران کے ساتھ بینکاری کے معاملات ابھی طے نہیں ہوسکے، ایف بی آر یہ مسئلہ حل کرنے کے لیے متعلقہ حکام سے بات کرے۔
انہوں نے کہا کہ تجارتی اشیاء مکمل چھان بین کے بعد ملک میں داخل ہوتی ہیں لہذا درآمد کنندگان کو پوسٹ آڈٹ ریکوری نوٹسز کے اجراء سے گریز کیا جائے۔ مزید برآں سمگلنگ کی حوصلہ شکنی کے لیے سمگلنگ کے لیے کشش رکھنے والی اشیاء پر کسٹمز ڈیوٹی کم کی جائے۔
ایمز ٹی وی( تعلیم / کراچی) ڈاؤ یونیورسٹی کے قائم مقام وائس چانسلر مسعود حمید کو فوری طور پر عہدے سے برطرف کردیا گیا ہے اور پرووائس چانسلر ڈاکٹر خاور جمالی کو عہدے کا چارج دے دیا گیا ہے جب کہ ڈاؤ یونیورسٹی کے مالی اور انتظامی معاملات کی تحقیقات کے ساتھ ہی دوسرے پرووائس چانسلر ڈاکٹر محمد مسرور کے خلاف بھی تحقیقات شروع کردی گئی ہے جب کہ ڈائو یونیورسٹی کے مستقل وائس چانسلر کے لئے گورنر ہاؤس نے وزیر اعلیٰ ہاؤس سے نام بھی مانگ لیا ہے۔
گورنر ہاؤس کے ذرائع کے مطابق مسعود حمید کے پاس خلاف ضابطہ طور پر وائس چانسلر کا ایڈیشنل چارج تھا جب کہ ان کی بطور پروفیسر کی مدت ملازمت میں کی گئی توسیع بھی ختم ہو گئی تھی جس کا علم ہوتے ہی گورنر ہاؤس نے ان کو فوری طور پر عہدے سے ہٹادیا جبکہ دوسرے پرووائس چانسلر محمد مسرور کی مدت میں غیرقانونی توسیع دینے کے معاملات کی تحقیقات بھی شروع کردی گئی ہے،امکان ہے کہ ڈاکٹر سعید قریشی کو ڈاؤ یونیورسٹی کا مستقل وائس چانسلر مقرر کردیا جائے گا کیونکہ تلاش کمیٹی نے دونوں مرتبہ انھیں پہلے نمبر پر رکھا تھا جبکہ پہلی مرتبہ میں دوسرے نمبر پر ڈاکٹر نوشاد شیخ اور تیسرے نمبر پر ڈاکٹر عمر فاروق تھے، دوسری مرتبہ میں ڈاکٹر عمر فاروق کا دوسرا نمبر ہوگیاتھا اور ڈاکٹر سراج میمن تیسرے نمبر پر تھے۔
ایمز ٹی وی(صحت) سندھ میں ایچ آئی وی ایڈز کے مریضوں کی تعداد سے متعلق آئی بی بی ایس سروے مکمل ہو گیا ہے جس کے نتائج اگلے ماہ جاری کیے جائیں گے ۔
5سال قبل کیے گئےسروے میں سندھ میں ایڈز کے مریضوں کی امکانی تعداد 35سے 42ہزار سامنے آئی تھی جس میں اضافے کا امکان ہے ۔ سندھ ایڈز کنٹرول پروگرام نے 1995سے اب تک صوبے میں 11464مریضوں میں ایچ آئی وی ایڈز کی تشخیص کی ہے جن میں 6757مریض رجسٹرڈ ہیں اور ان کا علاج کیا جارہا ہے تاہم سروے کےنتائج کے 30ہزار مریضوں کو تلاش کرنا باقی ہے تاکہ صوبے میں ایڈز کو پھیلنے سے روکا جاسکے ۔
ان خیالات کا اظہار سندھ ایڈز کنٹرول پروگرام کے مینیجر ڈاکٹر یونس چاچڑ نے صحافیوں کےلئے منعقد آگہی سیشن سے خطاب کے دوران کیا۔ سیشن سے ڈاکٹر سکندر اقبال، ڈاکٹر ثاقب شیخ اور ڈاکٹر آفتاب نے بھی خطاب کیا
ایمز ٹی وی (تعلیم /کراچی) فرانس کے اعلیٰ تعلیمی اداروں کے نمائندوں پر مشتمل ایک وفد نے اقراء یونیورسٹی کراچی کے مین کیمپس کا دورہ کیا ۔ فرانسیسی وفد میں ای ایس سی ٹرویز گروپ کی ایزبیل بیاجارڈ بلیگیور، یو پی ای سی کے ایرک اتھنوٹ اورکیمپس فرانس کے حیلیے جیری شامل تھے۔ اس دورے کا انعقاد ہائیر ایجوکیشن کمیشن آف پاکستان اور فرنچ ہائیر ایجوکیشن کمیشن نے مشترکہ طور پر کیا تھا ، جس کا مقصد دو طرفہ تعلیمی معاہدے تھے۔ دورے کے دوران فرانسیسی وفد کو طلباء کو تعلیم کے دوران فراہم کی جانے والی ٹیکنالوجی، غیر نصابی اور دیگر سرگرمیوں کے حوالے سے آگاہ کیا گیا۔
ایمز ٹی وی (صحت /کراچی )ہمدرد لیباریٹریز پاکستان کے منیجنگ ڈائریکٹر محمد اسامہ قریشی اور ڈائریکٹر لیگل افیئرز سید ضیاء الدین نے وزارت نیشنل ہیلتھ سروسز کے سیکریٹری محمد ایوب شیخ ، ڈرگ ریگولیٹری اتھارٹی کےڈاکٹر اسلم افغانی سے ملاقات کی۔
ملاقات میں وزارت کے جوائنٹ سیکریٹری کے علاوہ ڈاکٹر خالد محموداور ڈاکٹر زبیر نے بھی شرکت کی۔ اس ملاقات میں یونانی دواساز اداروں کے مسائل اور ان کے حل پر تبادلہ خیال کیا گیا
ایمز ٹی وی(اسپورٹس) فٹنس کیمپ فٹ کھلاڑیوں کو ان فٹ کردیتا ہے۔ لالہ دور کی کوڑی لے آئے۔ کہتے ہیں دو تین لڑکوں کی خاطر پوری ٹیم کو فٹنس کیمپ میں شامل نہیں کرنا چاہیے۔
شاہد آفریدی نے میچ فکسنگ روکنے کا حل بھی بتا دیا۔ بولے فکسنگ کرنے والوں پر پوری زندگی کے لیے پابندی لگائی جائے۔ کھلاڑیوں کو معلوم ہے کہ تین چار سال کی سزا کاٹ کر پھر واپس آجائیں گے اسی لیے وہ فکسنگ کرتے ہیں۔ بوم بوم نے یہ بھی کہا کہ اظہر علی کو ویسٹ انڈیز لے جانا چاہئے تھا۔
ایمز ٹی وی( تجارت)سابق چیئر مین آل پاکستان کاٹن پاور لومز ایسوسی ایشن رانا اخلاق احمد نے کہا ہے کہ موجودہ حکومت کا چین کے ساتھ تجارتی ومعاشی تعاون کو فروغ دینے کافیصلہ درست ہے اس سے دونوں ممالک کے ما بین دوستانہ و تجارتی تعلقات مزید مستحکم ہونگے اور پاکستان کے تاجروں صنعتکاروں کو بے حد فائدہ ہو گا اور وہ اپنی تیار کردہ مصنوعات کے ذریعے ملک کیلئے قیمتی زرمبادلہ کما سکیں گے ۔
انہوں نے کہا کہ موجودہ حکومت کی بدولت پاک چین اکنامک کاریڈور کی صورت میں بہترین موقع میسر آیا ہے اسے گنوانا نہیں چاہیئے بلکہ معیشت کے استحکام کیلئے اس سے بھر پور فائدہ اٹھایا جائے ایسے مواقع بار بار میسر نہیں آتے ۔
انہوں نے مطالبہ کیا کہ معاشی ترقی ،صنعتوں کے استحکام اورملکی تاجروں صنعتکاروں کی حوصلہ افزائی کیلئے پاک چین اکنامک کاریڈور کا روٹ تبدیل کئے بغیر اسے اصل منصوبہ کے مطابق مکمل کرے۔
انہوں نے ریلوے کے کرایہ میں اضافہ کرنے کی نوید سنانے پر گہر ی تشویش کا اظہا ر کرتے ہوئے وزیر اعظم میاں محمد نواز شریف سے مطالبہ کیا کہ کرایہ میں ہرگز اضافہ نہ کیا جائے۔
ایمز ٹی وی(تعلیم /کراچی ) جامعہ این ای ڈی کے وائس چانسلر کے انتخاب کے لئے تلاش کمیٹی نے 8امیدواروں میں سے چار امیدواروں کو پیر 20 مارچ کو انٹرویو کے لیے طلب کرلیا ہے۔ تلاشی کمیٹی نے جن چار افراد کو انٹرویو کے لئے بلایا ہے ان میں موجودہ وائس چانسلر ڈاکٹر افضل حق، ڈاکٹر سروش لودھی، ڈاکٹر میو اور ڈاکٹر سرفراز احمد ملک شامل ہیں۔
یہ انٹرویو سندھ ہائر ایجوکیشن کمیشن کے دفتر واقع کلفٹن میں ہوں گے۔
موجودہ وائس چانسلر ڈاکٹر افضل حق کی مدت 17 مارچ کو ختم ہو رہی ہے انہوں نے اپنے دور میں جامعہ این ای ڈی کو بدترین مالی خسارے سے نکالا ہے۔
پیر کو تاحکم ثانی ان کی مدت ملازمت میں توسیع کا امکان ہے تاہم سینئر ڈین ڈاکٹر سروش لودھی کو بھی قائم مقام وائس چانسلر کے عہدے کا چارج دیا جا سکتا ہے۔
تلاش کمیٹی کے چار مستقل اراکین میں جسٹس دیدار شاہ، سید انوار حیدر، سیکرٹری سندھ ہائر ایجوکیشن کمیشن شامل اور مظہرالحق صدیقی شامل ہیں ۔
باقی دو ماہرین میں ڈاکٹر عبدالقدیر راجپوت اور ڈاکٹر ایس اے رفیقی شامل ہیں ۔یاد رہے کہ جامعہ این ای ڈی، دائود انجینئرنگ یونیورسٹی اور لاء یونیورسٹی تینوں جامعات کے وائس چانسلر کی چار سالہ مدت رواں سال بالترتیب 17مارچ، 18 مارچ اور 19 مارچ کو ختم ہو رہی ہے اور پیر 20مارچ تک ان تینوں جامعات میں وائس چانسلر کی مدت میں تاحکم ثانی توسیع کا ماکان ہے ۔