Reporter SS
ایمز ٹی وی(تجارت) پاک افغان باڈر بند ہونے پر کراچی بندرگاہ پر کسٹم نے گوسلو پالیسی اختیار کرلی ۔ افغان ٹرانزٹ ٹریڈ کی مد میں ماہانہ 3 ہزار سے ساڑے تین ہزار کنٹینرز اور یومیہ سو سے زائد کنٹینرز کی آمد ورفت ہوتی ہے ۔
کسٹم حکام کا کہنا ہے کہ اتنی بڑی تعداد میں باڈر پر کنٹینرز کو رکھنے اور ان کے حفاظت کا بڑا مسئلہ ہے ۔ کراچی پورٹ سے افغان ٹرانزٹ ٹریڈ کے کنٹینرز کو ’’گو سلو ‘‘ پالیسی کے تحت چلایا جائے گا ۔
افغان ٹرانزٹ ٹریڈ کے کراچی کسٹم ایجنٹس ایسوسی ایشن کے سینئر ممبر قاضی زاہد کا کہنا ہے کہ افغان ٹرانزٹ ٹریڈ پر ماہانہ3 ہزار سے 3500 ہزار کنٹینرز کی آمد و رفت ہوتی ہے ، افغان ٹرانزٹ کا 40 فیصد کارگو کراچی، کوئٹہ اور چمن سے جاتا ہے ۔60 فیصد افغان ٹرانزٹ کا کارگو پشاور ،تورخم سے جاتا ہے ۔ افغانی تاجروں کی شپمنٹ بھی پائپ لائن میں ہے، مزید مال بھی آنے والا ہے ۔
دوسری جانب افغانستان سے واپس خالی آنے والے کنٹینرز بھی باررڈ پر رکے ہوئے ہیں ۔کسٹم ایجنٹس کے سنیئر ممبر کا کہنا ہے کہ پورٹ پر مال روکنے پر بھاری کرایہ اور ٹرمینل چارجز لگتے ہیں ۔
40 فٹ کے ایک کنٹینر پر 5 ہزار روپے یومیہ اور 20 فٹ کنٹینر پر 2500 روپے تک کرایہ دینا پڑتا ہے جبکہ شپنگ لائن کے کنٹینرز پر ڈٹینشن کی مد میں سو سے دو سو ڈالر وصول کیا جاتا ہے ۔بارڈ بند ہونے پر کوئی بھی کنٹینر لے جانے کے لئے بھی تیارنہیں ہے۔
ایمزٹی وی(کوئٹہ)بلوچستان کے محکمہ جیل کا کہنا ہے کہ سزائے موت کے منتظر قیدیوں کی تعداد 104ہوگئی ہے جبکہ 2سال میں 7 مجرموں کو پھانسی بھی دی جاچکی ہے۔
تفصیلات کے مطابق محکمہ جیل خانہ جات کا کہنا تھا کہ سزائے موت کے 92قیدیوں کی اپیلیں عدالتوں میں زیر سماعت ہیں جبکہ8 قیدیوں کو فوجی عدالتوں سے اب تک سزائے موت سنائی جاچکی ہے۔ چار قیدیوں کی رحم کی آخری اپیل صدر مملکت کے پاس ہے۔
ایمزٹی وی(خیبرپختونخواہ)پشاور شہر کے مختلف علاقوں میں سیکیورٹی فورسز نے کومبنگ آپریشن کرتے ہوئے سے زائدمشتبہ افراد کو گرفتار کرکے ان سے اسلحہ بر آمد کرلیا۔
ذرائع کے مطابق پولیس نے سیکیورٹی خدشات کے پیش نظر تھانہ پہاڑی پورہ، پشتخرہ اورانقلاب چوکی سمیت شہر کے مختلف علاقوں میں کومبنگ آپریشن کرتے ہوئے80 سے زائد افراد کو حراست میں لے لیا۔
پولیس کے مطابق حراست میں لئے گئے افراد میں غیرقانونی طور پر مقیم افغانیوں سمیت جرائم میں ملوث افراد بھی شامل ہیں جن کے قبضے سے اسلحہ بھی برآمد گیا ہے،گرفتار افراد کو مزید تفتیش کے لیے متعلقہ تھانوں میں منتقل کردیا گیا ہے۔
ایمز ٹی وی(تجارت) قومی اسمبلی کی قائمہ کمیٹی برائے خزانہ کے اجلاس میں اپوزیشن اراکین نے حکومت کو ایمنسٹی اسکیم متعارف کرانے پر شدید تنقید کا نشانہ بنایا۔
کیمٹی کے اجلاس کی صدارت پاکستان مسلم لیگ (ن) کے قیصر احمد شیخ کررہے تھے، انھوں نے ملک میں دولت واپس لانے اور جائیدادوں کی قیمتیں مقرر کرنے کے حوالے سے کمیٹی اراکین کے درمیان ہونے والی کشیدگی کو کم کرنے کی کوشش کی۔
حکومتی اراکین کو سب سے پہلی مزاحمت کا سامنا اس وقت کرنا پڑا جب فیڈرل بورڈ آف ریونیو کی جانب سے جائیداد کی قیمت اور اس پر ٹیکس مقرر کرنے کے حوالے سے ذیلی کمیٹی کی ایک رپورٹ پیش کی گئی۔
ذیلی کے کمیٹی کی صدارت پاکستان مسلم لیگ (ن) کے میاں عبدالمنان کررہے تھے، مذکورہ کمیٹی کو جائیداد پر ٹیکس ریٹ مقرر کرنے کا اختیار دیا گیا تھا، تاہم انھیں پاکستان پیپلز پارٹی (پی پی پی) اور پاکستان تحریک انصاف (پی ٹی آئی) کی جانب سے سخت تنقید کا سامنا کرنا پڑا۔
پی پی پی کے سید نوید قمر کا کہنا تھا کہ 'ملک کے مختلف علاقوں میں جائیداد کی مارکیٹ قیمت مقرر کرنا پارلیمانی باڈی کا کام نہیں ہے، یہ متعلقہ محکمہ کی ذمہ داری ہے'۔
پی ٹی آئی کے اسد عمر کا کہنا تھا کہ ذیلی کمیٹی کی رپورٹ کا مقصد غیر قانونی ذرائع سے حاصل کی گئی آمدن کو متعارف کرانے کی اجازت دینا ہے۔
ان کا کہنا تھا کہ 'ہمیں عام شہری کیلئے عملی اقدامات اور ہمدری دکھانی ہوگی، ایک سیدھا سادہ اور ایماندار شہری جو ایمانداری سے زندگی گزار رہا ہے ملک میں اب 10 مرلے کا پلاٹ خریدنے کی گنجائش نہیں نکال سکتا، تو ہم کن کو سہولت فراہم کرنے کی کوشش کررہے ہیں؟'
دونوں جانب کے اراکین نے اس بات کو تسلیم کیا کہ ملک بھر میں جائیداد کی قیمتیں بہت بڑھ چکی ہیں اور انتظامیہ اس کو درست کرنے میں ناکام ہوئی ہے۔
اس کے بعد کمیٹی کے اراکین نے ایف بی آر کو تشخیص ٹیبل میں موجود بے ضابطگیوں کو نکالنے کی ہدایت کی، یہ ہدایت ذیلی کمیٹی کی تجاویز پر دی گئی تھی اور انھیں دوبارہ کمیٹی کے سامنے پیش کرنے کا حکم دیا گیا تھا۔
کمیٹی کے چیئرمین نے ایف بی آر کو یہ ہدایت بھی جاری کی کہ وہ کمیٹی کے اراکین کے ساتھ بیٹھ کر پالیسی ترتیب دیں، جو آئندہ کے مالی سال کے بجٹ میں شامل کی جائیں گی۔
کمیٹی نے ایف بی آر کو نئی ایمنسٹی اسکیم کے حوالے سے نئی تجاویز پیش کرنے کا بھی کہا، جو ایسے پاکستانیوں کیلئے پیش کی جائے گی جو ملک میں رہائش پذیر نہیں تاکہ وہ اپنی دولت ملک میں واپس لاسکیں۔
عبدالمنان نے کمیٹی کو بتایا کہ وزیراعظم نے تاجر برادری کے مطالبات سے اصولی اتفاق کیا تھا اور وفاقی وزیر خزانہ اسحاق ڈار کو اس قسم کی اسکیم متعارف کرانے کی ہدایت کی تھی۔
تاہم اس بیان کو اسد عمر کی جانب سے سخت مخالفت کا سامنا کرنا پڑا، جن کا کہنا تھا کہ ٹیکس ایمنسٹی اسکیم ملک میں جی ڈی پی میں ٹیکس کے کم تناسب کی ذمہ دار ہے۔
ایف بی آر کی آڈٹ پالیسی پر بحث کرتے ہوئے ان کا کہنا تھا کہ ادارے کی آڈٹ پالیسی تاجر برادری کو ہراساں کررہی ہے، کمیٹی کے تمام اراکین نے اس موقف کی تائید کی۔
قیصر احمد شیخ نے ایف بی آر کے چیئرمین ڈاکٹر محمد ارشد کو مخاطب کرتے ہوئے کہا کہ 'آپ کی آڈٹ پالیسی ٹیکس دہندہ کیلئے مسائل پیدا کررہی ہے اور ٹیکس کی ادائیگی میں کمی کا باعث ہے'۔
تاہم ایف بی آر کے چیئرمین نے دفاع کرتے ہوئے جی ڈی پی میں ٹیکس کے کم تناسب کا ذمہ دار 2000 میں متعارف کرائی گئی سیلف اسسمنٹ سکیم کو قرار دیا۔
انھوں نے کہا کہ ٹیکس دہندہ کی آڈٹ کا کام 8 سال بعد شروع کیا گیا ہے۔
اس موقع پر مردم شماری کے چیف کمشنر آصف باجوہ نے بھی کمیٹی کو بریف کیا اور ایم کیو ایم، فاٹا کے اراکین کے سوالات کے جوابات دیے۔
کمیٹی نے تجویز پیش کی کہ فاٹا کے آئی ڈی پیز سے متعلق مردم شماری کا مسئلہ فاٹا کے اراکین کی مشاورت سے حل ہونا چاہیے جس پر آصف باجوہ کا کہنا تھا کہ اس حوالے سے فاٹا سیکریٹریٹ میں 28 فروری کو ایک ملاقات پہلے سے طے ہے۔
ایمز ٹی وی(تجارت) لاہور سمیت پنجاب کے پانچ اضلاع میں حکومت پنجاب نے سیکیورٹی فارورکنگ ویمن منصوبے میں تبدیلی کر دی ہے اور اب ورکنگ خواتین کوسیکیورٹی کے بجائے اٹلس ہونڈا موٹر سائیکلیں دی جائیں گی ۔
صوبائی محکمہ پلاننگ اینڈ ڈویلپمنٹ کے صوبائی ترقیاتی فورم نے خواتین کو موٹر سائیکلیں دینے کیلئے 90 ملین روپے کی منظوری دے دی ہے۔ سیکیورٹی کو در آمد کرنے پر زیادہ اخراجات آنے کی وجہ سے حکومت نے ہونڈا موٹر سائیکل دینے کا منصوبہ بنایا ہے۔ منصوبے کے مطابق پنجاب کے پانچ اضلاع جن میں لاہور فیصل آباد، راولپنڈی ، ملتان اور گوجرانوالہ شامل ہیں میں بیس ہزار خواتین کو گلابی رنگ کی موٹر سائیکلیں دی جائیں گی ۔
حکومت پنجاب کے اس قدم سے جہاں ورکنگ خواتین کو سفری سہولیات میسر ہونگی وہیں پر عدم تحفظ کا شکار خواتین کی مشکلات میں بھی کمی واقع ہو گی۔ مختلف شعبہ جات میں کام کرنے والی خواتین کو موٹر سائیکلیں ملنے کی صورت میں انہیں کام کی جگہ پر آنے اور جانے میں آسانی رہے گی اور خود انحصار و تحفظ میں بھی اضافہ ہو گا۔ حکومت نے خواتین کیلئے مختص اس منصوبے میں موٹرسائیکلوں کا رنگ خصوصی طور پر گلابی رکھا ہے جبکہ اب رقم کی منظوری کے بعد اس پر جلد عملدرآمد ممکن ہو گا۔
ایمزٹی وی(بلوچستان)خیبر ایجنسی طورخم بارڈر پر پاکستانی سیکیورٹی حکام نے جذبہ خیر سگالی کے تحت پھنس گئی نئی نویلی دلہن کو افغانستان جانے کی اجازت دیدی۔
سیکیورٹی خدشات کے پیش نظر طورخم بارڈر بند کرنے کی وجہ سے افغانستان لے جانے والی بارات میں دلہن بھی پھنس گئی جس کے رشتہ دار وں میں تشویش کی لہر دوڑ گئی تھی۔
دلہن بارڈر بند ہونے سے لنڈی کوتل گاگرہ میں گزشتہ چار دنوں سے مہمان تھی، جذبہ خیر سگالی کے تحت افغانستان جانے کی اجازت پر وہ افغانستان روانہ ہوگئی۔ دلہن اور ان کے رشتہ داروں نے پاکستانی حکام کا شکریہ بھی ادا کیا۔
ایمز ٹی وی(اسپورٹس) نیوزی لینڈ نے روس ٹیلر کی عمدہ سنچری کی بدولت جنوبی افریقہ کو دوسرے ایک روزہ میچ میں سنسنی خیز مقابلے کے بعد چھ رنز سے شکست دے کر مہمان ٹیم کی لگاتار 12 فتوحات کا سلسلہ بھی ختم کردیا۔
نیوزی لینڈ نے ٹاس جیت کر پہلے فیلڈنگ کا فیصلہ کیا تو ٹالیتھم کی شکل میں انہیں ابتدا میں ہی کامیابی مل گئی جبکہ اسکور 53 تک پہنچا تو دوسرے اوپنر ڈین براؤن لی بھی پویلین لوٹ گئے۔
اس موقع پر کیویز کی سب سے تجربہ کار جوڑی روس ٹیلر اور کین ولیمسن وکٹ پر اکٹھے ہوئے اور سنچری شراکت قائم کر کے ٹیم کو اچھے اسکور کیلئے بنیاد فراہم کی۔
ولیمسن 69 رنز بنانے کے بعد پویلین لوٹے تو چند رنز کے اضافے سے نیل بروم نے بھی واپسی کی راہ لی۔
چار وکٹیں گرنے کے بعد ٹیلر کا ساتھ نبھانے جمی نیشام آئے اور دونوں نے 123 رنز جوڑ کر نیوزی لینڈ کو 289 رنز کے معقول مجموعے تک رسائی دلائی۔
روس ٹیلر نے عمدہ کھیل پیش کرتے ہوئے 102 رنز کی ناقبل شکست اننگز کھیلی جبکہ نیشام نے 71 رنز بنائے۔
جواب میں جنوبی افریقہ کی ٹیم ابتدا میں ہاشم آملا کی وکٹ گرنے کے بعد سے مستقل مشکلات سے دوچار رہی اور کسی بھی موقع پر کوئی بڑی شراکت قائم کرنے میں ناکام رہی۔
ایک موقع پر جنوبی افریقہ کی آٹھ وکٹیں 214 رنز پر گر گئی تیں لیکن ڈیوین پریٹوریس نے اندیل فلکوایو کے ساتھ مل کر ایک عمدہ شراکت قائم کی اور اپنی ٹم کو ہدف کے انتہائی قریب پہنچا دیا۔
پروٹیز کو آخری دو اوورز میں فتح کیلئے 20 رنز درکار تھے لیکن ٹرینٹ بولٹ نے عمدہ 49واں اوور کرتے ہوئے تمام چھ گیندیں یارکر کی اور اوورز کی آخری گیند پر پریٹوریس کی مزاحمت 50 رنز پر ختم کردی اور اور اگلے اوور کی آخری دو گیندوں پر چوکے کے باوجود جنوبی افریقہ کی ٹیم مقررہ اوور میں 283 رنز بنا سکی۔
کوئنٹن ڈی کوک57، اے بی ڈی ویلیئرز 45، جین پال ڈومینی 34 اور فلکوایو نے 29 رنز بنائے۔
اس میچ میں چھ رنز سے فتح کے ساتھ ہی جنوبی افریقہ کی لگاتار 12 فتوحات کا سلسلہ بھی تمام ہو گیا اور سیریز بھی 1-1 سے برابر ہو گئی۔
روس ٹیلر کو سنچری پر میچ کا بہترین کھلاڑی چنا گیا جبکہ دونوں ٹیموں کے درمیان پانچ ایک روزہ میچوں کی سیریز کا تیسرا میچ ویلنگٹن میں کھیلا جائے گا۔
ایمزٹی وی(کوئٹہ)سیہون شریف کے شہداءکے لواحقین سے اظہار یکجہتی کیلئے سالانہ سبی میلہ ملتوی کر دیا گیا ۔ میڈیا ذرائع کے مطابق وزیر اعلیٰ بلوچستان نواب ثناءاللہ زہری نے سانحہ سیہون شریف کے شہداءکے لواحقین سے یکجہتی کیلئے سالانہ سبی میلہ ملتوی کر دیا جس کی اگلی تاریخوں کا اعلان کابینہ سے مشاورت کے بعد کیا جائے گا۔
ذرائع کا کہنا ہے کہ وزیراعلیٰ بلوچستان کی زیر صدارت اجلاس منعقد ہوا جس میں صوبائی کابینہ نے سانحہ سیہون شریف اور دہشتگردی کے حالیہ واقعات کے شہداءکے لواحقین سے یکجہتی اور ہمددری کے اظہار کے طور پر23فروری سے شروع ہونے والے 5روزہ سالانہ سبی میلہ ملتوی کردیا ہے جس کی اگلی تاریخوں کا اعلان بعد میں کیا جائے گا ۔
ایمز ٹی وی(مانیٹرنگ ڈیسک) گوگل کی ویڈیو شیئرنگ سروس یوٹیوب نے صارفین کی آسانی کے لیے ویڈیوز کو فون میں محفوظ کرنے کا آپشن کچھ عرصہ قبل ہی فراہم کیا تھا جبکہ اب ایک بار پھر یوٹیوب صارفین کی آسانی کے لیے ایک اہم اپڈیٹ لانے والا ہے۔
گیجٹس ناؤ کیرپورٹ کے مطابق یوٹیوب نے اپنی ویب سائٹ میں ویڈیو سرفنگ کے دوران اچانک آنے والے اشتہارات کے حوالے سے اہم فیصلہ کرلیا ہے۔ یوٹیوب ویڈیوز کے درمیان آنے والے اشتہارات صارفین کے لیے ناپسندیدگی اور جھنجھلاہٹ کا باعث بننے کی اہم وجہ ہیں، خاص طور پر جب ان کے ساتھ 'اسکپ' (Skip) کا آپشن بھی موجود نہ ہو۔
تاہم یوٹیوب کی متوقع اپڈیٹ میں صارفین کے لیے 30 سیکنڈز کی طویل اور اسکپ نہ ہونے والے اشتہارات غائب ہونے والے ہیں۔ ویب سائٹ کی جانب سے ممکنہ طور پر کی جانے والی اس اپڈیٹ کا مقصد صارفین کے تجرے کو مزید بہتر بنانا ہے۔ گوگل کے ترجمان کی جانب سے سامنے آنے والے بیان کے مطابق عنقریب یوٹیوب ویڈیوز کے درمیان آنے والے 30 سیکنڈز کے اشتہارات کا سلسلہ ختم ہوجائے گا۔ تاہم چند رپورٹس کے مطابق 30 سیکنڈ سے کم دورانیے کے اشتہارات اس اپڈیٹ کے بعد اسکپ نہیں کیے جاسکیں گے۔
ایمز ٹی وی(مانیٹرنگ ڈیسک) ایپل کا نیا آئی فون سامنے آنے میں ابھی کئی ماہ باقی ہیں مگر اس کے حوالے رپورٹس مسلسل سامنے آرہی ہیں اور اس کا ایک فیچر دیگر اسمارٹ فونز کو پیچھے چھوڑ سکتا ہے۔
کے جی آئی سیکیورٹیز کی رپورٹ کے مطابق ایپل کا نیا آئی فون (سیون ایس یا ایٹ) ایسے جدید ترین فرنٹ کیمرے سے لیس ہوگا جو کہ تھری ڈی سیلفی لے سکے گا۔
آسان الفاظ میں یہ تھری ڈی فرنٹ کیمرہ ہوگا جو کہ چہرے کی شناخت کرنے والی اپلیکشنز کے لیے بھی استعمال کیا جاسکے گا۔
یہ فون تھری ڈی سیلفیز لینے میں مددگار ثابت ہوگا اور یہ ایسی ٹیکنالوجی ہے جو فی الحال کسی اسمارٹ فون میں نظر نہیں آتی۔
اس مقصد کے لیے ایپل کی جانب سے روایتی کیمرہ سنسر میں تبدیلیاں کی جائیں گی اور ایک انفراریڈ پراجیکٹر اور ریسیور رکھا جائے گا۔
یہ تینوں چیزیں آئی فون کے فرنٹ کیمرے کو منظر کی تفصیلی معلومات کھینچنے میں مدد دے گا۔
اسی طرح یہ کیمرہ آئی فون کو ان لاک کرنے کے لیے بھی مددگار ثابت ہوگا اور کسی کے لیے اس ڈیوائس کو استعمال کرنا ممکن نہیں ہوگا۔
رپورٹ کے مطابق یہ نیا سنسر گیمنگ کے لیے بھی استعمال کیا جاسکے گا تاہم ایسا کیسے ہوگا اس بارے میں وضاحت سامنے نہیں آسکی۔
دلچسپ بات یہ ہے کہ ایسا کیمرہ آئی فون کے بیک پر بھی نہیں ہوگا تاہم بتدریج اس ٹیکنالوجی کو وہاں بھی منتقل کیا جاسکتا ہے۔
آئی فون کے نئے ماڈل میں ہوم بٹن کو بھی ختم کیے جانے کا امکان ہے جبکہ اس سال دو کی بجائے تین ڈیوائسز بھی سامنے آسکتی ہیں۔
ایک 4.7 انچ، دوسرا 5.5 انچ کے ماڈلز تو ہوں گے مگر 5.8 انچ کا آئی فون بھی متعارف کرایا جائے گا جو کہ او ایل ای ڈی ڈسپلے سے لیس ہوگا۔
اسی طرح نئے آئی فون میں پہلی بار ایپل کی جانب سے وائرلیس چارجنگ کو متعارف کرائے جانے کا بھی امکان ہے۔