Reporter SS
واشنگٹن: ٹرمپ انتظامیہ نے غیر ملکی طلبہ کو امریکہ بدر کرنے کی پالیسی واپس لے لی۔
ٹرمپ انتظامیہ کی جانب سے غیر ملکی طلبہ کے لیے گذشتہ ہفتے نئی ویزا پالیسی کا اعلان کیا گیا تھا تاہم ہارورڈ اور ایم آئی ٹی سمیت کئی دیگر یونیورسٹیوں کی جانب سے مقدمات کے بعد اب یہ فیصلہ واپس لے لیا گیا ہے۔ فیصلے میں کہا گیا تھا کہ کہ جن طلبا کے آن لائن کورسز جاری ہیں وہ اپنے اپنے ملکوں کو واپس چلے جائیں۔
امریکہ میں 10 لاکھ غیر ملکی طلبہ زیر تعلیم ہیں جن کی جانب سے دی جانے والی فیس کے سبب کالجز اور یونیورسٹیز کا بجٹ چلتا ہے، صدر ٹرمپ کے آن لائن کلاسز والے طلبہ کو ملک بدر کرنے سے ان کالجز کی انتظامیہ میں تشویش کی لہر دوڑ گئی تھی تاہم اب نئے حکم نامے کے بعد غیر ملکی طلبہ اور کالجز، یونیورسٹیوں کی انتظامیہ نے بھی سکون کا سانس لیا ہے۔
مانیٹرنگ ڈیسک: گوگل نے بھارت میں 10 ارب ڈالر کی سرمایہ کاری کرنے کا اعلان کیا ہے۔
گوگل کے چیف ایگزیکٹو سندر پچائی نے سرمایہ کاری کرنے کا اعلان بھارت میں کمپنی کے سالانہ ایونٹ کے دوران خطاب میں کیا۔
ایونٹ میں گوگل فار انڈیا ڈیجیٹائزیشن فنڈ کے قیام کا اعلان کیا گیا جس کے تحت اگلے 5 سے 7 سال کے دوران یہ کمپنی 10 ارب ڈالر کی سرمایہ کاری کرے گی۔
حالیہ کچھ ماہ کے دوران بڑی ٹیکنالوجی کمپنیوں نے بھارت میں سرمایہ کاری میں اضافہ کیا ہے۔
چینی موبائل کمپنی اوپو جلد ہی دنیا کی تیز ترین چارجنگ ٹیکنالوجی متعارف کروانے والی ہے۔
ٹیکنالوجی ویب سائٹ جی ایس ایم ارینا کے مطابق ابھی کسی فون میں سب سے فاسٹ چارجنگ ٹیکنالوجی 65 واٹ کی ہے مگر اوپو کی جانب سے 15 جولائی کو جو ٹیکنالوجی متعارف کرائے جائے گی وہ 125 واٹ سپر فلیش چارج ہوگی۔
اس نئی ٹیکنالوجی کو متعارف کروانے کے حوالے سے چین میں بدھ کو اوپو کمپنی کی جانب سے ڈیمو بھی دیا جائے گا اور تمام معلومات سے آگاہ بھی کیا جائے گا۔
واضح رہے کہ 65 واٹ کی فاسٹ چارجنگ سے اوپو رینو ایس کی 4000 ایم اے ایچ بیٹری 10 منٹ میں 48 فیصد تک چارج ہوجاتی ہے تاہم ممکن ہے کہ 125 واٹ فاسٹ چارجنگ ٹیکنالوجی سے فون کی بیٹری صرف 15 منٹ کے اندر صفر سے 100 فیصد تک چارج ہوسکتی ہے۔
ملتان: نشتر میڈیکل یونیورسٹی کے وائس چانسلر ڈاکٹر مصطفیٰ کمال پاشا کورونا کے باعث انتقال کر گئے۔
ذرائع کے مطابق ملتان کی نشتر میڈیکل یونیورسٹی کے وائس چانسلر ڈاکٹر مصطفیٰ کمال پاشا گزشتہ ماہ کورونا کا شکار ہوئے تھے اور اسپتال میں زیر علاج تھے۔
طبی حکام کا کہنا ہے کہ 3 روز قبل ڈاکٹر مصطفیٰ کمال پاشا کو دوران علاج ہی سانس لینے میں شدید تکلیف ہوئی جس پر انہیں وینٹی لیٹر پر منتقل کردیا گیا۔ اس دوران ان کے پھیپھڑوں سے خون بہنا شروع ہوا اور بدھ کی علی الصبح خالقِ حقیقی سے جا ملے۔
وزیر صحت پنجاب ڈاکٹر یاسمین راشد نے ڈاکٹر مصطفی کمال کے انتقال پر افسوس کا اظہار کرتے ہوئے کہا ہے کہ پروفیسر ڈاکٹر مصطفی کمال پاشا کورونا وائرس کے خلاف جنگ میں صفحہ اول کے سپاہی تھے، حکومت مصطفی کمال پاشا کی کورونا کے خلاف جنگ میں نمایاں خدمات کو سراہتی ہے، اللہ پاک مرحوم کے درجات بلند کرے اور اُن کے اہل خانہ کو صبر جمیل عطاء فرمائے۔
کراچی: پرائیویٹ اسکولز مینجمنٹ ایسو سی ایشن (پسما) کے وائس چیئرمین اسلام الحق ملک نے کہا ہے کہ اگر تعلیمی ادارے اسی طرح بند رہے تو اس کی وجہ سے ناخواندگی میں زبر دست اضافہ ہو جائےگا۔ اپنے ایک بیان میں انہوں نے مزید کہا کہ ہر قسم کا کاروبار اور ادارے کھولے جا چکے ہیں، حکومت کو چاہیے کہ اپنی ہٹ دھرمی ختم کرے اوراسکولوں کو ایس او پیز کے تحت کھولنے کی اجازت دے ۔
خطرہ ہے بچے حصول تعلیم سے مزید دور رہے تو کہیں جرائم پیشہ نہ بن جائیں۔ گزشتہ 5 ماہ سے اسکول بند ہیں، جس کی وجہ سے تعلیمی عمل بری طرح متاثر ہو رہا ہے ۔
اساتذہ اور عملے کے دیگر ارکان بے روزگاری کی وجہ سے انتہائی کسمپرسی کا شکار ہو گئے ہیں، کیوں کہ 30 فیصد سے زائد نجی اسکول مکمل طور پر بند ہو چکے ہیں۔
اسلام الحق ملک نے کہا کہ سب سے زیادہ نواحی بستیوں میں قائم کم فیس لینے والے اسکول تباہی کا شکار ہو گئے ہیں۔
کورونا وائرس کی آڑ میں ملک کے اندر جہالت کے اندھیروں کو پھیلا دیا گیا ہے، معلوم نہیں کہ حکمرانوں نے تعلیم کی بربادی کے لیے کیا سوچ رکھا ہے۔
حکومتی ہٹ دھرمی کے نتیجے میں ملک میں مزید ابتری آ جائے گی۔ نجی تعلیمی ادارے طلبہ کو زیور تعلیم سے آراستہ کرنے کے علاوہ معیار تعلیم کو بلند کرنے میں اہم کردار ادا کر رہے ہیں۔
کراچی : انسٹی ٹیوٹ آف بزنس ایڈ منسٹریشن (آئی بی اے) کراچی نے کوویڈ 19 کے پھیلاؤ کے باعث انڈر گریجویٹ و پوسٹ گریجویٹ پروگراموں کے داخلوں کیلئے ٹیسٹ کا شیڈول متبادل معیار کے مطابق تبدیل کر دیا ہے۔
داخلہ ٹیسٹ 19اور 26جولائی2020کو ہوں گے ۔امیدواروں کو داخلہ کمیٹی کے ذریعے بیان کردہ معیارات کی بنیاد پر انٹرویو کے لئے شارٹ لسٹ کیا جائے گا ۔
ایگزیکٹو ڈائریکٹر ڈاکٹر ایس اکبر زیدی نے بتایا کہ آئی بی اے کراچی نے کوویڈ19کے باعث درپیش چیلنجز سے کامیابی کے ساتھ نمٹا ہے ۔