ایمزٹی وی(اسلام آباد) آرمی چیف جنرل راحیل شریف کا کہنا ہے کہ پاک فوج دہشت گردی کے خلاف جنگ کو منطقی انجام تک پہنچائے گی جب کہ ہم ہمسایہ ممالک سےعزت اوروقار کے ساتھ دوستانہ تعلقات چاہتے ہیں۔ واشنگٹن میں پاکستانی سفارتخانے میں آرمی چیف جنرل راحیل شریف کے اعزاز میں تقریب کا انعقاد کیا گیا جس میں دانشوراور ممتاز پاکستانی و امریکی باشندوں سمیت دیگر شعبہ زندگی سے تعلق رکھنے والے افراد نے شرکت کی جب کہ اس موقع پر آرمی چیف راحیل شریف نے پاک امریکا دفاعی اور انسداد دہشت گردی تعاون پراظہار کا اطمینان کیا۔ جنرل راحیل شریف کا اپنے دورہ امریکا کے حوالے سے کہنا تھا کہ دورے میں پاکستان اورامریکا نے اپنے مشترکہ مفادات کولاحق خطرات پرتبادلہ خیال کیا ہے۔ تقریب سےخطاب کرتے ہوئے جنرل راحیل شریف نے کہا کہ ملکی سلامتی کے لیے پاک فوج کا عزم غیر متزلزل ہے، پاک فوج اندرونی اوربیرونی خطرات سے نمٹنے کے لیے پرعزم ہے، ہم اپنے شہدا کی قربانیوں کو رائیگاں نہیں جانے دیں گے اور پاک فوج دہشت گردی کے خلاف جنگ کو منطقی انجام تک پہنچائے گی۔ آرمی چیف نے کہا کہ ہم ہمسایہ ممالک سےعزت اوروقار کے ساتھ دوستانہ تعلقات چاہتے ہیں۔

ایمزٹی وی(خانیوال) وزیر اعطم نواز شریف نے خانیوال میں موٹر وےکا افتتاح کردیا۔13 ارب روپے کی لاگت سے مکمل کیا گیا منصوبہ کراچی لاہور موٹروے منصوبے کا حصہ ہے۔ ملتان خانیوال موٹروے بلوچستان سے بذریعہ نیشنل ہائی وے آنے والی ٹریفک کو سہولت فراہم کرے گی۔افتتاحی تقریب سے خطاب کرتے ہوئے وزیراعظم نواز شریف کا کہنا تھا کہ ترقی کی دوڑ میں پاکستان بہت پیچھے رہ گیا ہے۔وزیراعظم کا کہنا تھا کہ ملک سے لوڈشیڈنگ دو ڈھائی سال میں بالکل ختم ہوجائے گی اور لوگ یاد کریں گے کہ کبھی لوڈشیڈنگ بھی ہوا کرتی تھی جب کہ موٹرویز اور میٹرو نہیں بجلی کے کارخانے بھی ملک میں لگ رہے ہیں، ہوا، دھوپ، کوئلے اور پانی سےبجلی پیداکرنےکےمنصوبے بنا رہے ہیں لیکن سابق حکمرانوں نے گھر گھر لوڈشیڈنگ کا تحفہ دیا، موٹروے بنانے تو دور کی بات ملک میں دہشتگردی اور لوڈشیڈنگ کا مسئلہ پیدا کردیا۔ کراچی آپریشن ہر صورت جاری رہے گا جہاں امن کے لئے لازوال قربانیاں دے رہے ہیں۔

ایمزٹی وی(ٓلاہور) فیصل آبادمیں سوشل میڈیا پر خطرناک ویڈیو دیکھ کر نوجوان نے جان ہتھیلی پر رکھ دی۔ نوجوان نے ٹرین کی آمد پر پٹڑی پر دیر تک بیٹھنے کی شرط لگائی اور نوجوان اس کی بھینٹ چڑھ گیا۔ اسے لاپرواہی کہیں غلطی یا بیوقوفی کہ ایسی خطرناک شرط لگائی جو جان لیوا ثابت ہوئی۔ 19 سالہ وحید کے ساتھ ہوا جس نے اپنے کزن عامر سے شرط لگائی کہ دیکھتے ہیں کہ ٹرین کی آمد پر زیادہ دیر تک ریلوے پٹڑی پر کون بیٹھتا ہے۔ پھر وہی ہوا جس کا ڈر تھا ٹرین سر پر آن پہنچی تو عامر جلدی سے اٹھ گیا لیکن وحید شرط پورا کرنے کی خاطر پٹڑی پر ہی بیٹھا رہا اور ٹرین اس کے اوپر سے گزر گئی۔ عینی شاہدین کا بھی یہی کہنا ہے کہ وحید ٹرین سر پر پہنچنے کے کے باوجود بھی پٹڑی پر بیٹھا رہا۔ سوشل میڈیا کی اچھی باتوں کا اثر ہو یا نہ ہو نوجوان ایسی منفی سرگرمیوں پر کان ضرور دھرتے ہیں جس کا انجام بھی اتنا ہی برا ہوتا ہے۔