ایمز ٹی وی (لاہور) مسلم لیگ ن کے رہنما رانا ثناءا للہ کا لاہور میں میڈیا سے گفتگو کرتے ہوئے کہنا تھا کہ وہ حلفیہ کہتے ہیں کہ سانحہ ماڈل ٹاؤن کے حوالے سے کوئی منصوبہ بندی کی نا ہی کوئی سازش ۔ یہ واقعہ منہاج القرآن کے کارکنوں اور موقع پرموجود پولیس اہلکاروں کے درمیان تصادم کے باعث پیش آیا۔ انہوں نے کہا کہ طاہر القادری کو قانوناً حق حاصل ہے کہ انہیں وارنٹ کے باوجود گرفتار نہ کیا جائے، رانا ثناء اللہ کا اس موقعہ پر مزید کہنا تھا کہ اگر طاہر القادری کو جے آئی ٹی پر کوئی اعتراض ہے تو وہ عدالت میں جائیں اور اس کی فارمیشن کو مزید بہتر بنوائیں۔

انھوں نے کہا کہ ابھی نوٹس موصول نہیں ہوئے کہ مدعی اور ملزمان کو جے آئی ٹی میں طلب کیا جائے گا، وزیراعظم اور وزیراعلیٰ سمیت ایف آئی آر میں شامل تمام افراد جے آئی ٹی میں پیش ہوں گے۔

ایمز ٹی وی (اسلام آباد) ترجمان دفتر خارجہ تسنیم اسلام کا ہفتہ وار بریفنگ کے دوران کہنا تھا کہ رواں ماہ نیپال میں ہونے والی سارک سربراہی کانفرنس میں وزیراعظم نواز شریف کی سیکیورٹی اور پروٹوکول کی ذمہ داری پاکستان خود اٹھائے گا، وہاں کسی دوسرے ملک کی گاڑی استعمال نہ کرنے کا فیصلہ وزیراعظم کے سیکیورٹی اسٹاف نے کیا ہے تاہم  نیپال میں وزیراعظم نواز شریف کو بھارتی گاڑی کے استعمال کی پیشکش نہی کی گئی تھی۔ دورہ نیپال کے دوران وزیراعظم صرف میزبان ملک کی قیادت سے ملاقاتیں کرینگے لیکن وہ بھارتی ہم منصب سے ملاقات نہیں کریں گے۔

تسنیم اسلم کا کہنا تھا کہ مسئلہ کشمیر پاکستان اور بھارت کے درمیان دیرینہ مسئلہ ہے، پاکستان نے ورکنگ باؤنڈری اور لائن آف کنٹرول پر بھارتی اشتعال انگیزی کا معاملہ عالمی برادری میں اٹھایا ہے، اقوام متحدہ کے مبصرین نے ایل اوسی کا دورہ کیا اور ہم نے بھارتی جارحیت سے متاثرہ علاقوں کا دورہ کروایا، گزشتہ دو ہفتوں سے ایل او سی پر بھارت کی جانب سے منظم حملے نہیں ہوئے۔

ترجمان دفتر خارجہ کا کہنا تھا کہ پاکستان دہشتگردی سے متاثرہ ملک ہے، خطے میں معاشرتی عدم مساوات، غربت اور بےروزگاری سمیت دیگر مسائل نے دہشت گردی کو ہوا دی تاہم پاکستان غربت کے خاتمے کے لئے کوششیں کررہا ہے۔ مسلح افواج نے آپریشن ضرب عضب شروع کررکھا ہے جس میں دہشت گردوں کے خلاف بلا امتیاز کارروائی کی جارہی ہے۔ پاکستان خطے میں امن اور استحکام کے لئے افغانستان کے ساتھ خوشگوار تعلقات کا خواہاں ہے اور افغان صدر اشرف غنی کا حالیہ دورہ پاکستان انتہائی کامیاب رہا ہے۔ پاکستان اور روس کے درمیان تعاون میں اضافہ ہورہا ہے اور تعلقات میں بہتری عروج کی جانب گامزن ہے۔ روسی وزیرِ دفاع کے حالیہ دورۂ پاکستان سے دونوں ممالک کے مابین باہمی تعاون کو فروغ دینے میں مدد ملے گی۔

ایمز ٹی وی (لاہور) نامور افسانہ نگار‘ شاعر‘ ناقد‘ کالم نگار‘ محقق‘ مترجم اور صحافی جناب احمد ندیم قاسمی کی آج سالگرہ ہے۔ احمد ندیم قاسمی ایک ہمہ جہت ادبی شخصیت تھے ان کی تصانیف کا دائرہ ہر صنف ادب تک پھیلا ہوا ہے، ان کا اصل نام احمد شاہ تھا اور وہ 20 نومبر 1916ءکو انگہ ضلع خوشاب میں پیدا ہوئے تھے۔ احمد ندیم قاسمی کا شمار انجمن ترقی پسند مصنّفین کے بانیوں میں ہوتا تھا اور اس حوالے سے انہوں نے کئی مرتبہ قید و بند کی صعوبت بھی برداشت کی۔ حکومت پاکستان کی جانب سے انہیں صدارتی تمغہ برائے حسن کارکردگی ‘ ستارہ امتیاز اور نشان امتیاز سے نوازا گیا۔ پاکستان رائٹرز گلڈ نے انہیں تین مرتبہ آدم جی ادبی انعام عطا کیا تھا۔ بزم فروغ اردو ادب قطر نے انہیں اپنے ایوارڈ سے نوازا تھا اور اکادمی ادبیات پاکستان نے انہیں 1997ءکا کمال فن ایوارڈ اور2007ءمیں شائع ہونے والے بہترین شعری مجموعے کا علامہ محمد اقبال ایوارڈ عطا کیا تھا۔انہیں پنجاب کا پریم چند بھی کہا جاتا تھا۔ ان کے شعری مجموعوں میں دھڑکنیں‘ رم جھم‘ جلال و جمال‘ شعلہ گل‘ دشت وفا‘ محیط‘ دوام، لوح خاک‘جمال اور ارض وسما، افسانوی مجموعوں میں چوپال‘ بگولے‘ طلوع و غروب‘ آنچل‘ آبلے‘ آس پاس‘ درودیوار‘ سناٹا‘ بازار حیات‘ برگ حنا‘ سیلاب و گرداب،گھر سے گھر تک‘ کپاس کا پھول‘ نیلا پتھراور کوہ پیما‘ تنقیدی مضامین کے مجموعوں میں تہذیب و فن،پس الفاظ اور معنی کی تلاش اور خاکوں کے دو مجموعے میرے ہم سفراور میرے ہم قدم شامل ہیں۔ وہ پھول‘ تہذیب نسواں‘ ادب لطیف‘ نقوش‘ سویرا‘ فنون اور روزنامہ امروز کے مدیر رہے اورمتعدد اخبارات میں کالم نگاری بھی کرتے رہے۔ 1974ءسے اپنی وفات تک مجلس ترقی ادب کے ناظم کی حیثیت سے خدمات انجام دےتے رہے۔

جناب احمد ندیم قاسمی کی وفات 10جولائی 2006ءکولاہور میں ہوئی اورلاہور ہی میں ملتان روڈ پر ملت پارک کے نزدیک شیخ المشائخ قبرستان میں ان کا جسد خاکی دفنا یا گیا۔

ان کا ایک شعر ملاخطہ فرمائیں

"زندگی شمع کی مانند جلاتاہوں ندیمؔ 

بجھ تو جاؤں گا مگر صبح تو کر جاؤں گا"

(ایمز ٹی وی) پیپلز میگزین نے کرس ہیمز ورتھ کو رواں برس کے لیے دنیا کا سب سے پُرکشش مرد قرار دے دیا ہے، ہولی وڈ تھور سیریز سے شہرت حاصل کرنے والے آسٹریلین اداکار کے لیے اس اعزاز کا اعلان منگل کو ایک ٹی وی شو جمی کمیل لائیو کے دوران کیا گیا۔

جب ان سے پوچھا گیا کہ اس موقع پر کس کا شکریہ ادا کرنا چاہیں گے تو انہوں نے اپنے والدین کا نام لیتے ہوئے کہا کہ ان کی وجہ سے ہی میں اس مقام پر ہوں۔

اس اعزاز کے بعد وہ بریڈلے کوپر، ریان رینولڈز، بریڈ پٹ، جارج کلونی، سین کونری، بین ایفلک اور میل گبس جیسے ہولی وڈ سپر اسٹارز کی صف میں شامل ہوگئے ہیں جو اس سے پہلے دنیا کے پُرکشش ترین مرد کے خطاب پر قبضہ جما چکے ہیں۔

دلچسپ بات یہ ہے کہ کرس کی اپنی عمر 31 اور ان کی اہلیہ ایلسا پتکاکے جو فاسٹ اینڈ فیوریس سکس میں جلوہ گر ہوئی تھیں 38 سال کی ہیں، تاہم دونوں خوش باش زندگی گزار رہے ہیں، ان کے چھوٹے بھائی لیام 'دی ہنگر گیمز کیچنگ فائر' میں نظر آئے تھے۔

کرس کا کہنا ہے کہ میں اپنا یہ اعزاز اپنی بیوی کے نام کرتا ہوں اور یاد رکھیں ایسا لوگ سمجھتے ہیں تو مجھے اس پر فخر کرنے کی ضرورت نہیں اور نہ ہی خود کو بدلوں گا۔

ہیمز ورتھ کو ایوارڈ کے طور پر ایک شیشہ دیا گیا، جس میں باآسانی وہ دنیا کے پُر کشش شخص کو دیکھ سکیں گے۔