ایمز ٹی وی (لاہور) لاہورہائیکورٹ کی جانب سے گاڑیوں کی توڑ پھوڑ کے جرم میں گلو بٹ کی سزا کے خلاف دائر درخواست اعتراض لگا کر واپس کردی گئی۔ تفصیلات کے مطابق گلو بٹ کی جانب سے لاہورہائیکورٹ میں سزا کے خلاف دائر درخواست میں موقف اختیار کیا گیا کہ میرے ڈنڈے سے کسی کا جانی نقصان نہیں ہوا صرف گاڑیوں کے شیشے ٹوٹے ہیں اور گاڑیوں کے شیشے توڑنے پر 11 سال کی سزا انصاف کے منافی ہے۔ درخواست گزار کی جانب سے موقف اختیار کیا گیا جرم چھوٹا لیکن اس کی سزا بڑی دی گئی ہے اس لئے سزا میں کمی کی جائے۔ دوسری طرف گلو بٹ کے دستخط نہ ہونے پرعدالت نے درخواست واپس کرتے ہوئے گلو بٹ کے وکیل کو اپنا تصدیق شدہ وکالت نامہ جمع کرانے کی ہدایت کی ۔ یاد رہے کہ 17 جون کو لاہور کے علاقے ماڈل ٹاؤن میں شہریوں کے املاک کو نقصان پہنچانے کے جرم میں انسداد دہشتگردی کی خصوصی عدالت کی جانب سے مجرم گلو بٹ کو 11 سال 3 ماہ قید کی سزا سنائی گئی تھی۔
ایمز ٹی وی (اسلام آباد) پاکستان تحریک انصاف کے ممبر قومی اسمبلی سراج محمد خان نے سپیکر قومی اسمبلی سے اپنا استعفی قبول نہ کرنے کی استدعا کر دی ہے ۔ نوشہر ہ کے حلقے این اے 6سے منتخب ہونیوالے ممبر قومی اسمبلی نے سپیکر قومی اسمبلی سردار ایاز صادق سے استدعا کی ہے کہ انکی جانب سے جمع کروائے گئے استعفی کو منظور نہ کیا جائے کیوں کہ وہ اسمبلی سے استعفی نہیں دینا چاہتے ہیں۔ سپیکر قومی اسمبلی نے سراج خان کی استدعا منظور کرتے ہوئے ان کا استعفی نا منظور کر دیا ہے ۔
ایمز ٹی وی( فارن ڈیسک)-ترکی کی ایک کمپنی نے غیر ضروری بالوں سے نجات دلانے والی پروڈکٹ کے اشتہار میں نادانستہ طور پر القاعدہ کے رہنما خالد شیخ محمد کی تصویر استعمال کی ہے۔ خالد شیخ محمد کے بارے میں کہا جاتا ہے کہ وہ ستمبر 2001 میں امریکہ پر حملوں کے ماسٹر مائنڈ ہے۔ ترکی کی کامیٹک کی کمپنی نے اس تصویر کے نیچے لکھا ہے ’یہ بال خود بخود نہیں جھڑیں گے‘۔ اس کمپنی کا کہنا ہے کہ اس نے اس تصویر کا انتخاب شدت پسندی میں ملوث ہونے پر نہیں بلکہ جسم پر بہت زیادہ بال ہونے کے باعث کیا۔ کمپنی کے ترجمان کا کہنا ہے ’ہمیں نہیں معلوم تھا کہ یہ شخص ایک دہشت گرد ہے۔ ۔‘ ترجمان کا مزید کہنا تھا کہ کمپنی نے یہ تصویر سماجی رابطے کی ویب سائٹ سے اٹھائی تھی جہاں پر یہ تصویر کئی بار استعمال ہوئی اور اس پر بڑے دلچسپ کیپشن بھی دیے گئے۔ خالد شیخ محمد اس وقت گونتانامو بے میں زیر حراست ہیں۔
ایمز ٹی وی:(دبئی) انٹرنیشنل کرکٹ کونسل کی جانب سے سال کے بہترین کھلاڑی کے اعزاز سے نوازنے کے لئے کرکٹ فارمیٹس کے لحاظ سے کھلاڑیوں کی مختلف فہرستوں کا اعلان کیا گیا ہے جس کے مطابق ٹیسٹ کرکٹرآف دی ایئر کے لئےمچل جانسن، انجیلو میتھیوز اور ڈیوڈ وارنر کے نام شامل ہیں۔ ون ڈے کرکٹر آف دی ایئرکے لئے اے بی ڈیولیرز، مہندر سنگھ دھونی، کوئٹن ڈی کوک،ویرات کوہلی،اور ڈیل اسٹین کے نام فہرست میں شامل ہیں، اس کے علاوہ ٹی 20 کے لئے گیری بیلنس ،رنگنا ہیراتھ، یرون فیچ،ایلکس ہیلز،کورے اینڈریسن جمی نیشم اور بین اسٹروکس شامل ہیں۔
آئی سی سی کی جانب سے 2004 سے سال کے بہترین کھلاڑیوں اور امپائرز کو ایوارڈز دیئے جاتے ہیں تاہم اب تک پاکستان کی جانب سے محمد یوسف، عمر گل اور امپائر علیم ڈار کو ہی اس کا مستحق قرار دیا گیا ہے۔
ایمز ٹی وی (لاہور) واہگہ بارڈر سے ملنےوالی خود کش جیکٹ سے فنگر پرنٹس حاصل کر لیے گئے،حملہ آور اور پنجاب میں لاپتہ افراد کے خاندان کے ڈی این اے ٹیسٹ کروانے کا فیصلہ کیا گیا ہے تاکہ واقعے کی جڑ تک پہنچا جا سکے ، اس سلسلے میں حساس اداروں نے مختلف شہروں میں چھاپے مارے ہیں اور 3 مشکوک افراد کو گرفتار بھی کیا ہے، یاد رہے کہ واہگہ بارڈر پر پرچم اتارنے کی تقریب کے بعد ہونے والے خودکش دھماکے میں 60 سے زائد افراد شہید اور متعدد زخمی ہو گئے تھے۔
ایمز ٹی وی (کراچی) پاکستان پیپلزپارٹی کے چیئرمین بلاول بھٹوزرداری نے کہا ہے کہ حکومت احتساب میں سنجیدہ ہے تو گھر سے احتساب شروع کرے۔ انھوں نے کہا ہے کہ نیب کو ختم کرکے اس کی جگہ انٹرنل اکاؤنٹیبلٹی بیورو بنایا جائے۔ حکومت پاکستان اگر واقعی احتساب کیلئے سنجیدہ ہے تو احتساب کا آغاز گھر سے شروع کرے۔ اپنے ٹوئٹر پیغام میں بلاول بھٹو نے کہا کہ حکومت سیاسی متاثرین بمقابلہ سیاسی مخالفین پرعمل کے بجائے اپنے وزرا کا احتساب کرے بصورت دیگرپی پی پی نے صحیح معنوں میں لانگ مارچ کیا تو پورا پاکستان گو نواز گو اور گو ضیاء کے بچے گو کے نعرے لگائے گا۔
ایمز ٹی وی:(کراچی) صوبائی وزیر ٹرانسپورٹ اورسندھ بس اونرز کے عہدیداران کے درمیان کامیاب مذاکرات کے بعد انٹرسٹی بسوں کے کرایوں میں کمی کا اعلان کیا گیا جس کےتحت کراچی سے اندرون ملک جانے والی بسوں کے کرایوں میں 7 فیصد کمی کردی گئی ہے۔
صدر سندھ بس اونرز کے مطابق کل سے اے سی اور بغیر اے سی بسوں کے نئے کرائے لیے جائیں گے جس میں کراچی سے حیدرآباد کے لیے اے سی بس کا کرایہ 20 روپے کمی کےبعد 265 روپے وصول کیا جائے گا جبکہ کراچی سے حیدرآباد کے لیے نان اے سی بسوں کے کرائے میں 12 روپے کمی کردی گئی ہے جس کے بعد اس کا کرایہ 158 روپے ہوگیا ہے۔
حکومت اور پبلک ٹرانسپورٹرز کے درمیان کرایوں کے کمی پر ڈیڈ لاک برقرار ہے جس کے بعد کرایوں میں کمی کا معاملہ مزید تاخیر کا شکار ہوگیا ہے جبکہ کراچی ٹرانسپورٹ اتحاد کے صدر ارشاد بخاری کا کہنا ہےکہ 2011 سے پبلک ٹرانسپورٹ کے کرائے نہیں بڑھائے گئے ہیں جس کےبعد اصولاً ہمیں کرائے کم نہیں کرنے چاہئیں تاہم کل ٹرانسپورٹرز کے جنرل باڈی اجلاس میں اس سے متعلق فیصلہ کیا جائے گا۔
ایمز ٹی وی (فارن ڈیسک) آرمی چیف جنرل راحیل شریف ایک روزہ دورے پر افغانستان پہنچ گئے ہیں جہاں وہ افغان صدراورچیف ایگزیکٹو سے ملاقات کریں گے۔ آرمی چیف جنرل راحیل شریف نے افغان ہم منصب جنرل کریمی سے ملاقات کی ہے ملاقات میں دو طرفہ امور پرتبادلہ خیال کیاجارہاہے۔ آئی ایس پی آر کے مطابق آرمی چیف دورے کے دوران افغان صدر اشرف غنی، چیف ایگزیکٹو عبداللہ عبداللہ، وزیر دفاع اور قومی سلامتی کے مشیر سمیت اعلیٰ فوجی حکام سے بھی ملاقاتیں کریں گے۔ واضح رہے کہ نیٹو کے سیکریٹری جنرل غیر اعلانیہ دورے پر افغانستان کے دارالحکومت کابل پہنچ گئے جہاں وہ افغانستان کے رہنماؤں اور سیکیوریٹی فورسز سے ملاقات کریں گے۔
ایمز ٹی وی (فارن ڈیسک )افریقی ملک سیئرا لیون میں ۔ فری ٹاؤن کے غریب علاقے میں لوگوں کا خیال ہے کہ کابو اپنی نئی نوکری کی وجہ سے علاقے میں ایبولا کا وائرس پھیلا دیں گی۔ چھ بچوں کی 37 سالہ ماں کابو کہتی ہیں: ’وہ میرا مذاق اڑاتے ہیں، مجھے گالیاں دیتے ہیں۔ اور کبھی کبھار مجھ پر حملہ بھی کر دیتے ہیں۔‘ سیئرا لیون کے ایک اور علاقے واٹر لو میں ان کے سپروائزر کا کہنا ہے کہ ایبولا کے ہاتھوں دو افراد کی ہلاکت ہوئی ہے۔ یہ علاقہ ایبولا سے بری طرح متاثر ہوا ہے۔ ٹیم کے ایک اہلکار نے کہا: ’ہم یہاں صرف ہلاک ہونے والے افراد کے لیے آئے ہیں۔ مریض کے لیے آپ کو ہاٹ لائن پر اطلاع دینی ہو گی۔کابو اور ان کی ٹیم کے ارکان کو دس منٹ گلابی سوٹ، دستانے اور عینکیں پہننے میں لگے۔ کابو کا کہنا ہے: ’اس سوٹ میں بہت گرمی لگتی ہے۔ مجھے بہت پسینہ آتا ہے۔ میں بہت پانی پیتی ہوں، لیکن اب مجھے عادت ہو گئی ہے۔ مجھے یہ کام کرتے ہوئے ڈر نہیں لگتا کیونکہ یہ سوٹ محفوظ ہیں۔‘
ایمز ٹی وی(فارن ڈیسک)امریکہ میں وسط مدتی انتخابات کے بعد سینیٹ کے نئے ریپبلکن رہنما اور صدر براک اوباما، دونوں نے اس سیاسی تعطل کو ختم کرنے کا وعدہ کیا ہے-سینیٹ کے نو منتخب رہنما میچ میک کونل نے کہا کہ وہ غیر موثر سینیت کو فعال بنائیں گے اور بل پاس کرائیں گے۔صدر براک اوباما نے بھی کہا ہے کہ وہ ’ آئندہ دو سالوں کو زیادہ سے زیادہ کار آمد بنانے کے لیے نئے کانگریس کے ساتھ کام کرنے کے لیے تیار ہیں۔‘صدر اوباما نے وائٹ ہاؤس میں پریس کانفرنس کے دوران کہا کہ دونوں جماعتوں ڈیموکریٹ اور ریپبلکن کو عوامی خدشات کو دور کرنا چاہیے لیکن انھوں نے اس بات کا بھی اعتراف کیا کہ ’صدر کی حیثیت سے یہ ان کی مخصوص ذمہ داری ہے کہ کام نکلوانے کی کوشش کریں۔‘صدر براک اوباما جعمے کو وائٹ ہاؤس میں ڈیموکریٹ اور ریپبلکن پارٹی کے رہنماوؤں کی اجلاس کی میزبانی کریں گے۔