ایمز ٹی وی (کراچی) ذرائع کے مطابق انسدادی دہشتگردی کی خصوصی عدالت کے جج بشیر احمد کھوسو نے 6 ماہ قبل گرفتار کئے گئے تحریک طالبان جند اللہ گروپ کے 5 ملزمان کو دستی بم حملے، اسلحہ رکھنے اور بھتہ طلب کرنے کے الزامات پر مقدمے کی سماعت کی جبکہ تمام گواہوں اور شواہد کی بناء پر جرم ثابت ہونے پرعدالت کی جانب سے مجرم یاسین عرف عاطف اورعطا الرحمان کو 28،28 سال قید جبکہ مجرم صدام، رفیق الاسلام اور ندیم کو 14،14 سال قید کی سزا کا حکم دے دیا گیا۔ عدالت کی جانب سے سزا سنائے جانے کے بعد ملزمان نے کمرہ عدالت میں ہلڑ بازی اور شدید نعرے بازی کی جبکہ پولیس نے پانچوں مجرموں کو جیل منتقل کردیا۔ یاد رہے کہ پانچوں مجرموں کو رواں سال 8 مارچ کو کورنگی انڈسٹریل ایریا سے گرفتار کیا گیا تھا جن کے قبضے سے بھاری اسلحہ برآمد ہوا۔
ایمزٹی وی: محکمہ صحت پنجاب کے مطابق گزشتہ 24 گھنٹوں کے دوران پنجاب کے مختلف اسپتالوں میں زیر علاج مزید 25 افراد میں ڈینگی وائرس کی تصدیق ہوئی ہے، ڈینگی کے تمام نئے مریضوں کا تعلق راولپنڈی اورگرد و نواح سے ہے جو شہر کے مختلف سرکاری اور نجی اسپتالوں میں زیر علاج ہیں۔
ڈینگی کے رجسٹرڈ مریضوں کی تعداد 445 تک پہنچ گئی ہے جن میں 335 کا تعلق راولپنڈی اور گرد و نواح کے علاقوں سے ہے جبکہ لاہور کے 50 اور شیخوپورہ میں 33 افراد اس مرض سے متاثر ہوئے ہیں۔
ایمز ٹی وی (کوئٹہ) کوئٹہ میں جمہوری وطن پارٹی کے سربراہ طلال بگٹی سے ملاقات کے بعد میڈیا سے بات چیت کرتے ہوئے امیر جماعت اسلامی سراج الحق کا کہنا تھا کہ ماضی کے حکمرانوں نے کبھی بلوچستان کےساتھ انصاف نہیں کیا جبکہ بلوچستان میں بےروزگاروں کو روزگار دینے کی بات کی گئی مگرعملدرآمد نہیں کیا اور صوبے میں اب بھی بے غربت اور بے روزگاری عروج پر ہے۔ ان کا کہنا تھا کہ بلوچستان کو دیوار سے لگانے کے بجائے دل سے لگانے کی ضرورت ہے،عدل و انصاف نہ ہونے کی وجہ سے پاکستان دو حصوں میں تقسیم ہوا اورآج بھی اسی حوالے سے خطرات درپیش ہیں۔
امیر جماعت اسلامی کا کہنا تھا کہ طلال بگٹی محب وطن اور وفاق پر یقین رکھنے والوں میں سے ہیں اور ملکی ترقی چاہتے ہیں، تمام سیاسی جماعتوں کے ساتھ مل کر ناراض بلوچوں کو منانے کی کوشش کریں گے کیوں کہ ڈنڈے کے زور پر کسی کا سر توڑا جاسکتا ہے مگر دل نہیں جیتے جاسکتے۔
ایمز ٹی وی (اسلام آباد) عالمی ادارہ برائے انسداد پولیو کی جاری کردہ رپورٹ کے مطابق پاکستان دنیا میں پولیو پھیلانے والے ممالک میں سرفہرست ہے، رواں سال پاکستان میں 200 سے زائد پولیو کیسز کے ساتھ 14 سالہ ریکارڈ بھی ٹوٹ گیا جبکہ عالمی ادارہ صحت نے پاکستان میں انسداد پولیو کیلئے اقدامات کو دوگنا کرنے کا فیصلہ کیا ہے۔ جبکہ ملک میں مزید 4 نئے کیسز سامنے آنے کے بعد ملک بھر میں پولیو مریضوں کی تعداد 235 ہوگئی۔
رپورٹ کے مطابق پاکستان میں انسداد پولیو کیلئے اقدامات کے سلسلے میں ریلوے اسٹیشن، ائیرپورٹ سمیت آمدورفت کے مختلف مقامات پر 1 کروڑ 10 لاکھ افراد کو پولیو سے بچاوٴ کے قطرے پلائے گئے جبکہ گذشتہ سال پولیو سے بچاوٴ کے قطرے پینے والوں کی تعداد 80 لاکھ تھی۔
عالمی ادارہ کی رپورٹ کے باوجود ملک میں مزید نئے کیسز سامنے آرہے ہیں جبکہ آج سامنے آنے والے 4 کیسز میں سے 3 کا تعلق بلوچستان اور ایک کیس فاٹا سے رپورٹ ہوا ہے۔
پولیو وائرس پھیلانے والے ممالک کی فہرست میں 12 کیسز کے ساتھ افغانستان کا دوسرا اور نائجیریا 6 پولیو کیسز کے ساتھ تیسرے نمبر پرہے۔
ایمز ٹی وی(فارن ڈیسک) برازیل کا فٹبال کلب کورنتھیئنز اپنے مداحوں کو یہ موقع دے رہا ہے کہ وہ اپنے پسندیدہ کھلاڑی کے قریب دفن ہو سکتے ہیں-واضح رہے کہ برازیل میں کورنتھیئنز کے مداحوں کی تعداد ڈھائی کروڑ ہے جو کہ تعداد کے لحاظ سے دوسرے نمبر پر ہے۔کورینتھیئنز اب ان چند فٹبال کلبوں میں شامل ہوگیا ہے جو اپنے مداحوں کو مخصوص قبرستان فراہم کرتے ہیں۔ ان میں ارجنٹائن کا کلب بوکا جونیئرز بھی شامل ہے-اس پراجکٹ کے چیف ایگزیکیوٹیو ریکارڈو پولیٹو نے بتایا کہ اس قبرستان میں، فنکشن روم کے علاوہ، باغات، ریستوران، جھیل اور ایک قدرتی پناہگاہ ہوں گے۔یاد رہے ساؤ پالو کے نزدیک قائم کیے جانے والے اس قبرستان ’کارنتھیئنز فارایور یعنی ’سدا کے لیے کارنتھیئنز میں مداحوں کے لیے 70،000 پلاٹ موجود ہیں۔
ایمز ٹی وی( فارن ڈیسک)اورکزئی ایجنسی میں سکیورٹی فورسز پر حملے میں 3 سے زائد افراد ہلاک ہوئے جبکہ متعدد زخمی ہوئے-پشاور میں ایک اعلی سرکاری اہلکار نے بتایا کہ درجنوں عسکریت پسندوں نے خیبر ایجنسی کے علاقے آکاخیل کی طرف سے اورکزئی ایجنسی میں داخل ہوکر فرنٹیر کور کی زوان نامی چیک پوسٹ پر بھاری اور خود کار ہتھیاروں سے حملہ کردیا۔ شدت پسندوں نے حملے کے بعد چند اہلکاروں کو یرغمال بناپیا اور اپنے ساتھ لے گئے- یاد رہے کہ لوئر اورکزئی ایجنسی کا علاقہ خیبر ایجنسی کی سرحد سے ملا ہوا ہے۔ اس علاقے میں کالعدم تنظیموں کے عسکریت پسند بہت پہلے سے سرگرم بتائے جاتے ہیں۔ خیبر ایجنسی میں سکیورٹی فورسز کی طرف سے شدت پسند تنظیموں کے خلاف جاری آپریشن خیبر ون کے باعث اطلاعات ہیں کہ عسکریت پسند بڑی تعداد میں اورکزئی ایجنسی اور دیگر علاقوں کی طرف فرار ہورہے ہیں۔
ایمزٹی وی: (اسلام آباد) سول ایوی ایشن حکام کا کہنا ہے کہ بے نظیر انٹر نیشنل ایئر پورٹ پر فلائنگ کلب کا سیسنا طیارہ ٹیک آف کرتے ہی رن وے کے قریب گرکر تباہ ہو گیا جس کے نتیجے میں پائلٹ حماد اور 2 معاون پائلٹ زخمی ہو گئے۔ طیارہ حادثے کے نتیجے میں زخمی ہونے والوں کو سول ایوی ایشن ایمبولنس کے ذریعے قریبی اسپتال منتقل کیا گیا۔
ایوی ایشن حکام کا کہنا ہے کہ طیارہ کس وجہ سے تباہ ہوا تحقیقات جاری بے۔
ایمز ٹی وی(فارن ڈیسک)ڈنمارک کی عدالت نے گوٹفرڈ وارگ کو ڈنمارک میں کمپیوٹر ہیک کرنے اور غیرقانونی طور پر ڈیٹا ڈاؤن لوڈ کرنے کے الزام میں جیل کا سامنا کرادیا-اس میں وارگ کو چھ برس قید کا سامنا ہو سکتا ہے۔ عدالت نے وارگ اور ان کے ایک ساتھی کو ٹیکنالوجی کمپنی سی ایس سی کے کمپیوٹر ہیک کرنے کا قصووار پایا۔ہیکنگ کا یہ واقعہ فروری 2012 میں پیش آیا تھا، جس کے دوران ان دونوں نے چھ ماہ تک حساس معلومات تک رسائی حاصل کیے رکھی تھی۔ایک اور مقدمے میں 2013 میں وارگ کو بینک کے کمپیوٹر ہیک کرنے کے جرم میں دو سال کی سزا سنائی گئی تھی۔وارگ کے وکلاء نے صٖٖفائی دیتے ہوئے کہا کہ یہ حملہ وارگ کے کمپیوٹر سے کیا گیا تھا لیکن انھوں نے فائلیں نہیں چرائیں، بلکہ ایک نامعلوم ہیکر نے ان کا کمپیوٹر استعمال کرتے ہوئے یہ واردات کی۔
ایمز ٹی وی(لاہور) وفاقی حکومت کےحکم نامےکےتحت رات12 بجےسے ملک بھر میں پٹرولیم مصنوعات نئی قیمتوں پر فروخت کی جانی تھی لیکن لاہور، فیصل آباد، گوجرانوالہ، راولپنڈی، ملتان اور بہاولپور سمیت پنجاب کے مختلف شہروں کے بیشتر پیٹرول پمپس پر پیٹرول اور ڈیزل کی فروخت بند کردی گئی ہے جس کی وجہ سے عوام کو شدید مشکلات کا سامنا کرنا پڑرہا ہے۔ پیٹرول پمپ مالکان کا کہنا ہے کہ پیٹرولیم مصنوعات کا موجودہ ذخیرہ پرانی قیمتوں میں خریدا گیا ہے جسے وہ نئی قیمتوں پر فروخت نہیں کرسکتے۔ اس لئے نئی قیمتوں کے مطابق پیٹرولیم مصنوعات کی ترسیل تک وہ اپنا کاروبار بند رکھیں گے۔
لاہور میں ضلعی انتظامیہ کے مطابق زائد قیمتوں پر پٹرولیم مصنوعات فروخت کرنے کےالزام میں 5 پٹرول پمپس سیل کردیئےگئے ہیں جبکہ 2 پیٹرول پمپس کے منیجر کو حراست میں لے لیا۔
ایمز ٹی وی(فارن ڈیسک)ورجن گلیکٹک اسپیس شپ دوم کرافٹ کیلیفورنیا کے صحرا میں تجرباتی پرواز کے دوران گر کر تباہ ہو گیا ہے جس کے نتیجے میں پائلٹ شدید زخمی -کمپنی کا کہنا ہے کہ اس کرافٹ کے پائلٹ کے بارے میں ابھی کچھ معلوم نہیں ہے۔کمپنی کے مطابق سپیس شپ دوم جہاز کے ساتھ جڑ کر فضا میں گیا اور وہاں سے یہ جہاز سے علیحدہ ہوا اور نچلے مدار میں داخل ہوا۔ورجن کے سربراہ نے اکتوبر میں کہا تھا کہ چند ماہ میں اسپیس کرافٹ نچلے مدار میں داخل ہونے کا تجربہ کرے گا۔یاد رہے پائلٹ کرافٹ کے تباہ ہونے سے قبل ایجیکٹ ہونے میں کامیاب ہو گیا تھا۔