ایمز ٹی وی (پشاور) پشاورکےعلاقے نوتہیہ میں بجلی کی اووربلنگ کے خلاف سڑک بند کرکے احتجاجی مظاہرہ کیا گیا ،مظاہرے کے باعث ٹریفک جام ہوگیا اور گاڑیوں کی دور تک قطاریں لگ گئیں۔اس موقع پر مظاہرین نے ٹائر نذر آتش کئے اور انتظامیہ کیخلاف نعرے بازی کی ۔مظاہرین کا کہناتھا کہ اضافی بلز بھیجنے کا سلسلہ تاحال بند نہیں کیا گیا ۔ وزیراعلیٰ خیبرپختونخوا کے مشیرعارف یوسف اور پولیس حکام نے مظاہرین سے مذاکرات کئے ۔اس موقع پر عارف یوسف کا کہناتھاکہ ایس ڈی او خالد دفتر میں نہیں تاہم انہوں نے ٹیلی فون پریقین دہانی کرائی ہے کہ جن کی بجلی کاٹ دی ہے وہ بحال کریں گے۔مذاکرات کے بعد مظاہرہ ختم اور سنہری مسجد روڈ ٹریفک کیلئے کھول دیا گیا۔

ایمز ٹی وی(نیوز ڈیسک) صوبہ پنجاب کے ضلع قصور کے نواحی علاقے کوٹ رادھاکشن میں توہین مذہب کے نام پر تشدد کے خلاف اقلیتی برادریاں مظاہرے کر رہی ہیں-توہین مذہب کے نام پر ہلاک کیے جانے والے میاں بیوی کے مقدمے میں مقامی پولیس نے 30 سے زائد فراد کو گرفتار کر لیا-اس مقدمے کے تفتیشی افسر محمد مقبول نےکہا کہ ملزموں کے خلاف قتل، بلوے اور انسداد دہشت گردی کی دفعات کے تحت مقدمہ درج کیا گیا ہے۔تفتیشی افسر کے مطابق عدالت سے ان میں سے بعض ملزمان کو جوڈیشل ریمانڈ پر جیل بھیجنے کی استدعا کی جائے گی جبکہ بعض ملزمان کا جسمانی ریمانڈ حاصل کیا جائے گا۔پولیس افسر کے مطابق عینی شاہدین کا کہنا ہے کہ جس وقت ان دونوں میاں بیوی کو آگ میں پھینکا گیا تو اس وقت وہ نیم مردہ حالت میں تھے-پولیس اہلکار کا کہنا تھا کہ جس وقت یہ واقعہ رونما ہوا تو اُس وقت بھٹے کا مالک یوسف گجر وہاں پر موجود تھا۔ وزیر اعلیٰ پنجاب میاں شہباز شریف نے اس واقعہ کا نوٹس لیتے ہوئے اس کی جامع تحقیقات کرنے کا حکم دیا ہے۔

ایمز ٹی وی (اسلام آباد) قائم مقام چیف جسٹس جسٹس جواد ایس خواجہ کی سربراہی میں 3 رکنی بینچ وزیراعظم کی نااہلی سے متعلق چوہدری شجاعت حسین، گوہر نواز اور اسحاق خاکوانی کی جانب سے دائر درخواستوں کی سماعت کی۔ سماعت کے دوران سپریم کورٹ نے اٹارنی جنرل سے 4 سوالات پر معاونت طلب کی جس میں کہا گیا کہ اگر کسی ممبر اسمبلی کے نااہل ہونے کی درخواست آتی ہے تو مجاز فورم کون سا ہے؟، اگر طے ہوتا ہے کہ معاملہ عدالت سنے گی تو کون سی مجاز عدالت ہوگی؟، نااہلی کے لئے مجوزہ طریقہ کار کیا ہوگا؟ اور آخری سوال یہ کہ نااہلی کے لئے مجوزہ طریقہ کار کے لئے ثبوت کیا ہوں گے۔ اس موقع پر جسٹس جواد کا کہنا تھا کہ کسی کے صادق ہونے کا تعین عدالت نے کرنا ہے جبکہ اسپیکر نے بھی درخواست گزاروں کی درخواستیں مسترد کی تو وہ کہاں جائیں اور درخواست گزاروں کو بھی ذہن میں رکھنا چاہیئے کہ آئین کا آرٹیکل 10 اے بھی موجود ہے تاہم اس سے کوئی سروکار نہیں کہ وزیراعظم اور وزیرداخلہ نااہل ہوجائیں لیکن ہمیں آئین کے مطابق فیصلہ کرنا ہے۔