K2 - Results from #7224

تفتیشی افسر نے متعلقہ دستاویزات عدالت میں جمع کرا دیں، سماعت 9 اکتوبر تک ملتوی

کراچی: سانحہ بلدیہ فیکٹری کیس میں تفتیشی افسر کا بیان قلمبند کرلیا گیا، لاشوں سے متعلق بیان دیتے ہوئے گواہ روپڑا جب کہ عدالت نے سماعت 9 اکتوبر تک ملتوی کردی۔

خصوصی عدالت نمبر7 کے روبرو سانحہ بلدیہ فیکٹری کیس کی سماعت ہوئی، جیل حکام نے مرکزی ملزمان رحمن بھولا اورزبیر چریا کو پیش کیا، اسپیشل پبلک پراسیکیوٹر ساجد محبوب شیخ اور گواہ تفتیشی افسر جہانزیب، رؤف صدیقی سمیت دیگر بھی عدالت میں پیش ہوئے۔

تفتیشی افسر انسپکٹر جہانزیب نے ڈھائی گھنٹے میں بیان قلمبند کراتے ہوئے کہاکہ مرنے والوں کی تعداد 264 تھی جس میں 259 لاشیں تھیں جبکہ باقی افراد2 کے ٹکرے، ایک کا موبائل فون، ایک کا جوتا اور ایک کے جوتے میں پاؤں ملا تھا جسے لاشیں تصور کیا گیا۔

لاشوں سے متعلق بیان دیتے ہوئے تفتیشی افسر رو پڑا، انسپکٹر ،جہانزیب نے کہا کہ رحمن بھولا اور رضوان قریشی کا پتہ کیا لیکن دونوں نہیں ملے، رضوان قریشی اور حماد صدیقی کا پتہ نہیں چل سکا، ملزم رضوان قریشی نے اپنی جے آئی ٹی میں رحمنٰ بھولا اور حماد صدیقی کو ملزم بتایا۔

تفتیشی افسر نے بیان میں مزید بتایاکہ فیکٹری مالکان کا نام ای سی ایل سے نکلوایا عدالتی حکم پر فیکٹری سے ملنے والی گاڑیاں مالکان کو واپس کیں، مقدمے میں دفعہ 302 کو 322 میں تبدیل کیاگیا، تفتیشی افسر نے متعلقہ دستاویزات عدالت میں جمع کرا دیں، آئندہ سماعت پر ملزمان کے وکلا جرح کریں گے۔

ملزم کے خلاف بچے کے قتل اور زیادتی کا مقدمہ درج

فیصل آباد: پولیس نے تھانہ ترکھانی کے علاقے میں 8 سالہ بچے سے زیادتی و قتل کے ملزم کو گرفتار کرلیا۔

فیصل آباد کے علاقے تھانہ ترکھانی میں 8 سالہ بچے سعد کو مبینہ بدفعلی کے بعد قتل کردیا گیا۔ پولیس نے فوری کارروائی کرتے ہوئے ملزم کو گرفتار کرلیا ہے۔ سعد گزشتہ شام کو گھر سے نکلنے کے بعد لاپتہ ہوگیا تھا۔

سی پی او اظہر اکرم اور ایس ایس پی آپریشنز علی رضا نے واقعے کا نوٹس لیتے ہوئے فوری کارروائی کا حکم دیا جس پر بروقت آپریشن کرتے ہوئے ملزم قاسم کو گرفتار کرلیا گیا۔

دوران تفتیش پتہ چلا کہ ملزم نے بچے کو درندگی کا نشانہ بنانے کے بعد لاش کھیتوں میں پھینک دی۔ پولیس نے ملزم قاسم کے خلاف بچے کے قتل اور زیادتی کا مقدمہ درج کر لیا ہے جس میں دہشت گردی ، قتل ، اور زیادتی کی دفعات شامل کی گئی ہیں۔

واضح رہے کہ تھانہ ترکھانی کے علاقہ میں اس سے قبل بھی بچوں کے ساتھ درندگی کے واقعات پیش آچکے ہیں۔

مردان اور پشاور میں طوفانی بارش اورژالہ باری سے تباہی مچ گئی

اسکردو: مردان اور پشاور میں طوفانی بارش اورژالہ باری سے تباہی مچ گئی۔چھتیں گرنے کے واقعات میں ایک ہی خاندان کے 4افراد سمیت 5 افرد ملبے تلے دب کرجاں بحق اور 3زخمی ہو گئے۔

ضلع مردان کے علاقوں شکر تنگی ساولڈھیر اور مضافات میں طوفانی بارش اور ژالہ باری نے تباہی مچا دی۔ چیچاڑ پرش میں مکان کی چھت گرنے سے ایک ہی خاندان کے چار افراد جاں بحق ہو گئے۔ جاں بحق ہونے والوں میں 27سالہ ذاکر حسین،ان کی اہلیہ اور 3سالہ 2 جڑواں بچے عبد الصمد اور سپنا شامل ہیں۔بارش سے مواصلاتی نظام بھی درہم برہم ہو گیااور کھڑی فصلیں تباہ ہو گئیں۔

ادھر پشاور کے علاقے گدر میں چھت گرنے سے 70سالہ قلندر شاہ جاں بحق اور ان کا 18سالہ نواسہ حمزہ شدید زخمی ہوگیا۔سکردو میں سیاحتی مقام دیوسائی میں موسم سرما کی پہلی برفباری ہوئی ہے جس سے اسکردو اور گردونواح کا موسم مزید سرد ہو گیا ہے ۔موسم کی مناسبت سے سیاحوں کیلئے 15اکتوبر سے دیوسائی کا راستہ بند کرنے کا فیصلہ کیاگیا ہے ۔انتظامیہ کی جانب سے خانہ بدوشوں کو مال مویشی کے ساتھ دیو سائی سے واپسی کا اشارہ بھی دیا گیا۔

علاوہ ازیں محکمہ موسمیات کا کہنا ہے کہ مغربی ہواؤں کا ایک اور سسٹم ملک میں داخل ہونے کا امکان ہے ۔ڈائریکٹر محکمہ موسمیات سردار سرفراز کے مطابق یہ سسٹم ملک کے شمالی حصوں سمیت سندھ میں بارش برسائے گا جبکہ بلوچستان کے 80 فیصد علاقوں میں اچھی بارشیں متوقع ہیں۔ شہر قائد میں 4 اور 5اکتوبر کو ہلکی بارش ہوسکتی ہے۔

محکمہ موسمیات کے مطابق راولپنڈی،اسلام آباد، کشمیر اور گلگت سمیت ملک کے مختلف علاقوں میں (آج) بدھ کو کہیں کہیں جبکہ چند مقامات پر گرج چمک کے ساتھ بارش کا بھی امکان ہے۔خیبرپختو نخوا ،جنوبی پنجاب اورآزادکشمیر کے بعض اضلاع، گلگت بلتستان اور بلوچستان میں کہیں کہیں جبکہ بالائی/وسطی پنجاب،بالائی سندھ کے اضلاع میں چند مقامات پر بارش کا امکان ہے۔

دینی طلبا کو جدید تعلیم سے بھی آراستہ کیا جائے گا، وزیر اعظم

اسلام آباد: وزیراعظم عمران خان کا کہنا ہے کہ انگریزوں کے تعلیمی نظام نے معاشرے میں طبقات پیدا کیے۔

اسلام آباد میں دینی مدارس میں زیرتعلیم طلبا کی تقریب تقسیم انعامات سے خطاب کرتے ہوئے وزیراعظم عمران خان کا کہنا تھا کہ نبی کریمﷺنے سب سے زیادہ زورتعلیم پردیا، مسلمانوں نےعلم سے ترقی کی، تلوارسے نہیں، انگریزوں نے سوچ سمجھ کرمسلمانوں کا تعلیم کا نظام ختم کیا، انگریز کے تعلیمی نظام نے طبقات پیدا کیے، اسلام ہمیں انسان بننا سکھاتا ہے۔

عمران خان نے کہا کہ دینی طلبا کو جدید تعلیم سے بھی آراستہ کیا جائے گا، دینی طلبا کو اقبالیات بھی ضرور پڑھائی جائے، علامہ اقبال پڑھے لکھے طبقے کو اسلام کی طرف لائے، انگریزی اردو نظام سے مدارس کو الگ کرنا ناانصافی ہے اور تعلیم کا مقصد صرف پیسہ کمانا نہیں۔

وزیراعظم کا کہنا تھا کہ ترکی، پاکستان اور ملائیشیا نےمشترکہ ٹی وی چینل چلانےکا فیصلہ کیا ہے، انگریزی چینل کا مقصد مسلمانوں کا مقصد سامنے لانا ہے، مسلمانوں کے انگریزی چینل سے دنیا کو مسلمانوں کا پیغام جائے گا اور انگریزی چینل کے ذریعے مسلمانوں کا تشخص اجاگر کرنے کے لیے فلمیں بنائی جائیں گی۔

لاہور میں بھی انٹرنیشنل کرکٹ کا میدان سجنےکوتیار

لاہور: لاہور میں پاک سری لنکا ٹوئنٹی 20سیریز کیلیے کڑا سیکیورٹی حصار قائم کر دیا گیا اور نشتر اسپورٹس کمپلیکس کے علاقے کو بدھ سے عوامی سرگرمیوں کیلیے مکمل طور پر بند کر دیا جائے گا۔

کراچی کے بعد لاہور میں بھی انٹرنیشنل کرکٹ کا میدان سجنے کو ہے، پاکستان اور سری لنکا کے درمیان5 اکتوبر سے شروع ہونے والی 3 ٹوئنٹی 20میچز پر مشتمل سیریز کے لیے انتظامات کو حتمی شکل دی جا رہی ہے۔

ذرائع کے مطابق نشتر اسپورٹس کمپلیکس کے علاقے کو بدھ سے عوام کے لیے مکمل طور پر بند کر دیا جائے گا، علاقے میں سرچ آپریشن کا آغاز بھی اسی روز ہوگا۔

قذافی اسٹیڈیم کے تین اطراف میں دکانیں، شادی ہالزاور ریسٹورنٹس موجود ہیں، ان سب کو بھی10 اکتوبر تک مکمل طور پر بند کر دیا جائے گا۔ اسٹیڈیم کے ارد گرد کی شاہراہوں کی صفائی ستھرائی کا کام پہلے ہی مکمل کیا جا چکا ہے۔ سیریز کے دوران کھلاڑیوں اور تماشائیوں کو ڈینگی سے بچانے کے لیے اسپرے بھی کیا ہوچکا۔

ذرائع کے مطابق کسی بھی ناخوشگوار واقعے سے بچنے کے لیے مجموعی طور پر 12ہزار پولیس اہلکاروں کی خدمات لی جائیں گی، پاک آرمی اور رینجرز کے چاک وچوبند دستے الگ ہوں گے۔ نیشنل ہاکی اسٹیڈیم میں موجود سیکیورٹی اینڈ ویجلینس سیل کے اہلکار درجنوں خفیہ کیمروں کی مدد سے ہر آنے جانے پر کڑی نظر رکھیں گے۔

قذافی اسٹیڈیم میں پچزکی تیاری کا کام بھی آخری مراحل میں ہے،مقابلوں کے دوران شائقین کی دلچسپی برقرار رکھنے کیلیے پی سی بی کی طرف سے سپورٹنگ پچز تیار کرنے کی ہدایت دی گئی ہے،اس اسٹیڈیم میں رنگ وروغن کا کام مکمل ہو چکا جبکہ خفیہ کیمروں کو بھی چیک کر لیا گیا ہے۔

فردوس جمال کی تنقیدپر بھولے کامحبت بھراجواب

کراچی: معروف اداکار فردوس جمال کے بھولا کی اداکاری سے متعلق کی گئی تنقید پر عمران اشرف کا رد عمل سامنے آگیا۔

عمران اشرف نے سوشل میڈیا پیچ پر فردوس جمال کی تنقید پر رد عمل میں کہا کہ وہ بہت ہی با کمال اداکار ہیں اور میں اُن کی رائے اور نظریے کا احترام کرتا ہوں کیوں کہ فردوس جمال صاحب ہماری انڈسٹری کے بڑے ہیں اور یقیناً اگر فردوس صاحب ’’ بھولے ‘‘ کا کردار ادا کرتے تو مجھ سے ہزار گناہ زیادہ بہتر کرتے۔

عمران اشرف نے سوشل میڈیا صارفین سے مطالبہ کرتے ہوئے کہا کہ کوئی بھی فردوس صاحب کی بات پر جذبات سے بھرا کمنٹ اور رائے کا اظہار نہیں کرے۔ جیسے گھر میں بڑے ہمیں سمجھانے کے لئے کچھ کہتے ہیں تو ہم بُرا نہیں مانتے ٹھیک اسی طرح فردوس جمال صاحب بھی ہمارے بڑے ہیں اور مجھے اُن کی بات کا بالکل بھی بُرا نہیں لگا بلکہ میں مزید سیکھنے کی کوشش کروں گا۔

واضح رہے کہ اداکارفردوس جمال نے عمران اشرف سے متعلق کہا تھا ڈرامہ ’’رانجھا رانجھا کردی‘‘ میں ان کی جانب سے ادا کیا گیا بھولے کا کرداربہترین اداکاری نہیں بلکہ محض دکھاوا تھا، اورایسا کردارپہلے بھی بہت سے فنکارادا کرچکے ہیں۔

بھولے کاکردار بہترین اداکاری نہیں دکھاوا تھا

لاہور:اپنی اداکاری سے سب کو محظوظ کرنے والے بھولے کو کس نے نہیں سراہا تاہم اداکارفردوس جمال نے ماہرہ خان کے بعد اب ایک بارپھرعمران اشرف پر وارکرنا شروع کر دیئے۔

پاکستانی اداکار فردوس جمال نے کچھ عرصے قبل اداکارہ ماہرہ خان پرتیربرسائے تھے اورکہا تھا کہ ماہرہ خان کو اب اداکارہ کا نہیں بلکہ ماں کا کردارادا کرنا چاہیئے جب کہ ان کے نزدیک ماہرہ خان ہیروئن بننے کے لائق نہیں ہیں، جس پرماہرہ خان نے بھی انہیں جواب دیا تھا جب کہ ماہرہ خان کے مداحوں کی جانب سے بھی فردوس جمال پرکڑی تنقید کی گئی تھی۔

اب اداکارفردوس جمال نے ایک بار پھرٹی وی شو کے دوران عمران اشرف کی طرف توپوں کا رخ موڑتے ہوئے کہا کہ ڈرامہ ’’رانجھا رانجھا کردی‘‘ میں ان کی جانب سے ادا کیا گیا بھولے کا کرداربہترین اداکاری نہیں بلکہ محض دکھاوا تھا، اورایسا کردارپہلے بھی بہت سے فنکارادا کرچکے ہیں اورعمران اشرف نے اُن جیسی ہی اداکاری کی۔ ان کا مزید کہنا تھا کہ پاکستان میں اس وقت کوئی ایک بھی ایسا اداکار نہیں جو آگے چل کر ایک اسٹاربن جائے۔

واضح رہے کہ اداکار فردوس جمال پرماہرہ خان کی اداکاری کرنے پربھی تنقید کی گئی تھی اور اب بھولے کی اداکاری پروار کرنے کے بعد انہیں ایک بار مداحوں کی جانب سے تنقید کا نشانہ بنایا جارہا ہے۔

گوگل کا چاکلیٹی ہیروکا زبردست خراج تحسین

لاہور: اپنے وقت کے نامورپاکستان کے چاکلیٹی ہیروکے نام سے مشہوراداکاروحید مراد کی سالگرہ پرگوگل ڈوڈل بھی ان کے رنگ میں رنگ گیا۔

گوگل ڈوڈل بھی آج پاکستان کے چاکلیٹی ہیرو وحید مراد کی 81 ویں سالگرہ کے دن ان کے رنگ میں رنگ گیا۔ گوگل ڈوڈل میں آج اداکارکی بہترین عکاسی کی گئی ہے جہاں فنکار کی گراں قدر خدمات کا اعتراف کیا گیا ہے۔

وحید مراد نے اپنی 23 سالہ فلمی زندگی میں اعلیٰ کارکردگی کی بناء پرمجموعی طور پر 32 ایوارڈ حاصل کیے۔ وحید مراد نے اپنی زندگی کے آخری لمحات اپنی منہ بولی بہن ممتازایوب کے گھر کراچی میں گزارے اوریہیں ان کا 23 نومبر 1983 کوانتقال ہوااور وہ خالق حقیقی سے جا ملے۔

پاکستان کے چاکلیٹی ہیرو وحید مراد کی 81 ویں سالگرہ

کراچی: آج پاکستان کے چاکلیٹی ہیرو وحید مراد کی 81 ویں سالگرہ ہے

2 اکتوبر 1938 کو پیدا ہونے والے پاکستان کے چاکلیٹی ہیرو وحید مراد نے ابتدائی تعلیم میری کلاسواسکول سے حاصل کی بعد ازاں انہوں نے انگلش ادب میں ایم اے کی ڈگری حاصل کی۔

وحید مراد نے اپنے فلمی کیرئیر کا آغاز 1959 میں فلم ’’ساتھی‘‘ سے کیا۔ 1962 میں انہیں ایس ایم یوسف کی فلم ’’اولاد‘‘ میں ایک اہم رول کے لیے کاسٹ کیا گیا اس فلم نے گولڈن جوبلی کا اعزاز حاصل کیا۔ وحید مراد کی شہرت میں فلم ’’ہیرا اور پتھر‘‘ سے مزید اضافہ ہوا۔ انہیں پاکستان کی پہلی پلاٹینیم جوبلی فلم ’’ارمان‘‘ کے لیے بیک وقت فلم ساز، مصنف اور ہیرو ہونے کا اعزاز حاصل ہے۔

چاکلیٹی ہیرو نے’’ اولاد‘‘ سے لے کر’’ زلزلہ‘‘ تک کل 125 فلموں میں کام کیا اور ان کا ہر کردار جانداررہا۔ ’’ اکیلے نہ جانا‘‘ سے لے کر دیگر گانوں نےانہیں لازوال شہرت دی۔ اُن کی پہلی فلم ’’اولاد‘‘ اورآخری ریلیز شدہ فلم ’’زلزلہ‘‘ تھی۔

انہوں نے ایک پشتو فلم ’’پختون پہ ولایت کے‘‘ میں بھی کام کیا، یہ اداکار آصف خان کی ذاتی فلم ’’کالا دھندا گورے لوگ ‘‘کا پشتو ورژن تھا۔ وحید مراد بیک وقت فلم ایکٹر، فلم پروڈیوسراوراسکرپٹ رائٹر بھی تھے۔ وحید مراد کی بہترین فلموں میں ’’ دل میرا دھڑکن تیری‘ ،’ہیرا اور پتھر‘ ،’ارمان‘ ،’عندلیب‘ ،’مستانہ ماہی‘، ’انسانیت‘ ،’دیور بھابھی‘وغیرہ شامل ہیں۔

کراچی والےہوجائیں تیار،بارشوں کےنئےسلسلےکاآغاز

کراچی: محکمہ موسمیات نے کہا ہے کہ دو اکتوبر کو مغرب سے پاکستان میں داخل ہونے والا بارش اور ہواؤں کا سلسلہ شہر میں ہلکی بارش کا سبب بن سکتا ہے۔

چیف میٹرو لوجسٹ سردار سرفراز کے مطابق 2 اکتوبر کو ایک نیا سلسلہ مغرب کی جانب سے ملک میں داخل ہونے کا امکان ہے، جس کے سبب کراچی میں پھوار اور ہلکی بارش کے ساتھ تیز سمندری ہوائیں چلنے کا بھی امکان ہے۔

چیف میٹرو لوجسٹ کے مطابق ہواؤں اور بارش کے اس نئے سلسلے کا مون سون سے کوئی تعلق نہیں، مون سون کی بارشیں اختتام کو پہنچ چکی ہیں، مغربی سسٹم کے اثرات کی وجہ سے اکتوبر کا پہلا ہفتے قدرے بہتر رہنے کا امکان ہے۔ سردارسرفراز کے مطابق شہر میں گذشتہ دنوں بارشوں کا سبب بننے والا ہوا کا کم دباو ہنوز گجرات پر موجود ہے جس کے اثرات کے نتیجے میں سمندر کی جنوب مغربی ہوائیں پھر معمولی متاثر ہوئیں۔

ان کا کہنا ہے کہ پیر کو صبح کے وقت شمال مغربی ہوائیں چلیں تاہم دوپہر کے بعد سمندری ہوائیں بحال ہوگئیں، یہ سلسلہ آئندہ دو سے تین روز تک برقرار رہنے کا امکان ہے کیونکہ ہوا کے دباؤ کا پھیلاو مشرقی اور شمالی علاقوں تک اب بھی پہنچ رہا ہے۔

محکمہ موسمیات کے مطابق پیر کو شہر میں گرمی کا پارہ 35.5 ڈگری سینٹی گریڈ ریکارڈ ہوا، صبح کے قت کم سے کم درجہ حرارت 26 ڈگری رہا، گذشتہ روز ہوا میں نمی کا تناسب معمول سے زیادہ 64 فیصد رہا جس کی وجہ سے حدت رہی اور گرمی کی شدت اصل درجہ حرارت سے زائد رہی۔

محکمہ موسمیات کا مزید کہنا ہے کہ آج (منگل) کو شہر کا مطلع گرم و مرطوب رہنے جبکہ زیادہ سے زیادہ درجہ حرارت 34 سے 36 ڈگری کے درمیان رہنے کا امکان ہے