پشاور: خیبر پختونخوا کے سرکاری اسپتالوں میں ڈاکٹروں اور پیرا میڈیکل اسٹاف کی ہڑتال چوتھے روز بھی جاری ہے۔
ذرائع کے مطابق خیبر پختونخوا کے سرکاری اسپتالوں میں ڈاکٹروں اور پیرا میڈیکل اسٹاف کی ہڑتال چوتھے روز بھی جاری ہے، جس کی وجہ سے او پی ڈی سروس، آپریشن تھیٹر اور دیگر سہولیات کی فراہمی معطل ہے۔
دوسری جانب سرکاری ڈاکٹروں اور پیرا میڈیکل اسٹاف کی نمائندہ گرینڈ ہیلتھ الائنس کا کہنا ہے کہ 15 کے قریب ڈاکٹرز کو گرفتار کیا گیا ہے جو ابھی تک جیل میں ہیں، حکومت جلد از جلد تمام ڈاکٹرز اور میڈیکل اسٹاف کو رہا کرے۔ اگر حکومت نے تمام مطالبات پورے نہ کیے تو احتجاج کا دائرہ پورے ملک تک پھیلائیں گے۔
واضح رہے کہ گزشتہ روز لیڈی ریڈںگ اسپتال میں ڈاکٹروں اور پیرا میڈٰکل اسٹاف پر پولیس کی لاٹھی چارج اور شیلنگ سے متعدد ڈاکٹرز شدید زخمی ہوئے تھے۔
لاہور: پنجاب میں ڈینگی سے متعلق ایک سال کی تفصیلات جاری کردی گئیں، پنجاب میں رواں سال ڈینگی کے کل 3 ہزار 377 مریض سامنے آئے۔
محکمہ صحت پنجاب نے ڈینگی سے متعلق ایک سال کی تفصیلات جاری کردیں۔ سالانہ ڈینگی تفصیلات میں اسلام آباد کا ڈیٹا شامل نہیں۔ اسلام آباد کو پنجاب کے روز کی ڈینگی تفصیل سے علیحدہ کر دیا گیا۔
رپورٹ کے مطابق پنجاب میں رواں سال ڈینگی کے کل 3377 مریض سامنے آئے، گزشتہ 24 گھنٹے میں پنجاب میں ڈینگی کے 199 کیس رپورٹ ہوئے۔ 24 گھنٹے میں پنجاب کے مختلف اسپتالوں سے 119 مریض ڈسچارج کیے گئے۔
رپورٹ میں کہا گیا کہ ڈینگی کے 6 مریض انتہائی نگہداشت میں زیر علاج ہیں۔
رپورٹ کے مطابق پنجاب میں رواں سال یکم جنوری سے 27 ستمبر تک ڈینگی سے 8 اموات ہوئیں، وفات پانے والے 8 افراد کا تعلق راولپنڈی سے تھا۔
گزشتہ روز ڈینگی لاروا کی موجودگی اور غفلت پر 76 مقدمات بھی درج کیے گئے، 17 افراد کو گرفتار کیا گیا اور 740 افراد کو انتباہ کیا گیا۔ 9 مقامات کو سیل بھی کیا گیا۔
کراچی: وفاقی وزیر برائے بحری امور علی زیدی کا کہنا ہے کہ کراچی میں سڑکوں کی صورتحال بہت خراب ہے، بڑے صنعتکاروں نے کراچی میں سائٹ ایریا جانا چھوڑ دیا ہے۔
وفاقی وزیر برائے بحری امور علی زیدی نے فیڈریشن آف پاکستان چیمبرز آف کامرس کی تقریب سے خطاب کرتے ہوئے کہا کہ میری ٹائم کا معیشت سے گہرا تعلق ہے، دنیا کہاں پہنچ گئی اور ہم وہیں کھڑے ہیں۔
علی زیدی نے کہا کہ اپنی وزارت کو ڈیجیٹل کرنے کی طرف لے جا رہے ہیں، اگلے ہفتے سے فائلز کو ای فائل پر منتقل کرنے جا رہے ہیں۔ کراچی کا انفرا اسٹرکچر تباہ اور جگہ جگہ کچرا پڑا ہے۔ کراچی کے انفرا اسٹرکچر میں تمام انتظامی امور آتے ہیں۔ پاکستان کو آگے لے جانے کے لیے نئی چیزوں کے بارے میں سوچنا ہوگا۔
انہوں نے کہا کہ شہر پورٹ نہیں چلاتے بلکہ پورٹ شہر چلاتے ہیں، معیشت تب تک درست نہیں ہوسکتی جب تک مسائل حل نہ ہوں۔ انرجی، فیول، درآمد اور برآمدات کا تعلق پورٹ سے ہوتا ہے۔ کنٹینر کی اسکینر پر 5 ڈالر کی وصولی روک دی ہے۔
علی زیدی نے کہا کہ ایف ڈبلیو او کے تعاون سے نالوں کی صفائی کا کام سنبھالا، اگلے دن ڈی ایم سی کھڑی ہوجاتی ہے کہ ہم کچرا اٹھائیں گے۔ کچرا کنڈیوں کو ٹھیکے پر فروخت کیا جاتا ہے۔ کچرےمیں لوہے کا سامان، تاریں وغیرہ ہوتی ہیں۔
انہوں نے کہا کہ کراچی میں سڑکوں کی صورتحال بہت خراب ہے، صنعتکاروں نے گھروں سے فیکٹریاں چلانا شروع کردیں۔ بڑے صنعتکاروں نے کراچی میں سائٹ ایریا جانا چھوڑ دیا ہے۔ معاشی حالات بہتر کرنے سے روزگار کے مواقع ملیں گے۔
وزیر اعظم کی اقوام متحدہ میں تقریر کے بارے میں ان کا کہنا تھا کہ وزیر اعظم نے تقریر میں پاکستان اور اسلام کا دفاع کیا، مغرب نہیں سمجھتا ہمارے ناموس رسالت پر کیا جذبات ہیں۔ ہم ہولو کاسٹ پر بات کرتے تھے تو وہ بہت مشکل میں آتے تھے۔ وزیر اعظم نے تقریر میں کشمیر پر ہونے والے مظالم پر بات کی۔
کراچی: شہر میں گزشتہ 24 گھنٹوں کے دوران مزید 91 افراد میں ڈینگی وائرس کی تصدیق ہوگئی۔
انسداد ڈینگی سیل کےمطابق کراچی میں ڈینگی وائرس سے متاثرہ ایک اور شخص انتقال کرگیا جب کہ گزشتہ 24 گھنٹوں کے دوران مزید 91 افراد میں وائرس کی تصدیق سے متاثرہ افراد کی تعداد 2866 ہوگئی ہے۔
ترجمان انسداد ڈینگی سیل نےمزید بتایا کہ رواں سا ل شہر میں ڈینگی سے ہلاکتوں کی تعداد 11 ہوگئی۔
کراچی:جامعہ این ای ڈی میں 190واں سنڈیکیٹ اجلاس وائس چانسلر پروفیسر ڈاکٹر سروش حشمت لودھی کی صدارت میں منعقد ہوا، جس میں تعلیمی، انتظامی اور مالی اُمورکا تفصیلی جائزہ لیا گیا۔ اس موقعے پر سنڈیکیٹ کے گزشتہ اجلاس کی سفارشات منظوری،سالانہ اکاونٹ کلوزنگ برائے سال 2018-2019جب کہ ریوائز بجٹ برائے سال2019-2020 کی منظوری دی گئی۔
حکومتِ سندھ کے نوٹیفیکشن کے تحت مستقل ملازمین کے لیے تنخواہ اور پنشن میں 15فی صد اضافے کی منظوری جب کہ سلیکشن بورڈ کی سفارشات کی بھی منظوری دی گئی۔جامعہ ترجمان کے مطابق سنڈیکیٹ اجلاس میں تھر انسٹی ٹیوٹ آف انجینئرنگ، سائنس اینڈ ٹیکنا لوجی، این ای ڈی یونی ورسٹی کے تھرکیمپس کے لیے پروفیسر ڈاکٹر رضا مہدی کو پہلا پرنسپل مقرر کیا گیا جب کہ تھر اسامیوں سے متعلق سفارشات برائے لیکچرار، آئی ٹی مینیجر، اسسٹنٹ رجسٹرار، اسسٹنٹ ڈائریکٹر فنانس اور اسسٹنٹ لائبریرین کی تقرری کی بھی منظوری دی۔سنڈیکیٹ اجلاس میں ایک جانب پروفیسر ڈاکٹراسدرحمان کو چیئرمین سول انجینئرنگ جب کہ پروفیسر ڈاکٹر آصف احمد شیخ کی انوائرمینٹل انجینئرنگ کے
چیئرمین کی حیثیت سے توسیع دی گئی۔سنڈیکیٹ ی میں ایچ ای سی نیشنل ڈیٹا بیس سینٹر، فوٹو والٹک (پی وی) ٹیسٹسنگ لیب، سینٹرفار اسمارٹ گرٹ اسٹڈیز، ٹریفک لیب فار انلاٹیکس اینڈ سمولوشن لیب
کے قیام کی منظوری بھی شامل تھی۔اس اجلاس میں پرووائس چانسلر پروفیسر ڈاکٹر محمد طفیل، سیکریٹری سنڈیکیٹ و رجسٹرارسید غضنفر حسین سمیت پندرہ اراکین نے شرکت کی
اجلاس میں تھر کے حوالے سے کاوشوں پر ڈپٹی رجسٹرارمخدوم خالد ہاشمی کی خدمات کو بھی سراہا گیا
کراچی: اوگرا نے پیٹرولیم مصنوعات کی قیمتوں میں کمی کی سمری وزارتِ پیٹرولیم کو بھیج دی ہے۔
میڈیاذرائع کے مطابق اکتوبر میں عوام کے لئے اوگرا کی جانب سے خوشخبری ملنے کا امکان ہے، اوگرا (آئل اینڈ گیس ریگولیٹری اتھارٹی) نے پیٹرولیم مصنوعات کی قیمتوں میں کمی کی سمری تیار کرلی ہے، جس کے مطابق یکم اکتوبر سے پیٹرول کی قیمت میں 2 روپے 55 پیسے کمی کی سفارش کی گئی ہے۔
اوگرا کی جانب سے تیارکی جانے والی سمری منظور ہونے کی صورت میں پیٹرول کی قیمت میں 2 روپے 55 پیسے، ہائی اسپیڈ ڈیزل کی قیمت میں 3 روپے 23 پیسے فی لیٹر، لائٹ ڈیزل میں 2 روپے 41 پیسے اور مٹی کا تیل 1 روپے 19 پیسے فی لیٹر تک کمی کا امکان ہے۔
ذرائع کے مطابق سمری وزارت پٹرولیم کو ارسال کردی گئی ہے، پٹرولیم مصنوعات کی قیمتوں کی حتمی منظوری حکومت دے گی، جب کہ نئی قیمتوں کا اطلاق یکم اکتوبر سے ہوگا۔
نیویارک: وزیراعظم عمران خان نے کہا ہے کہ مقبوضہ کشمیر کے حالات مزید بگڑے تو نہ میرے اور نہ ہی امریکی صدر کے قابو میں آئیں گے۔
وزیراعظم عمران خان نے امریکی نیوز چینل کو انٹرویو دیتے ہوئے کہا کہ دنیا مقبوضہ کشمیر کی کشیدہ صورتحال کو سمجھنے سے قاصر ہے، 50 روز سے زائد ہوگئے ہیں اور 80 لاکھ افراد لاک ڈاؤن کا شکار ہیں، مقبوضہ کشمیر میں جو ہو رہا ہے وہ بد سے بدتر ہوتا جائے گا اور یہ انتہائی خطرناک ہے، لیکن مسئلہ یہ ہے کہ دنیا کو درست طور پر سمجھ نہیں آرہی کہ کشمیر میں ہو کیا رہا ہے۔
عمران خان نے کہا کہ جب سے نریندر مودی کی حکومت آئی کشمیریوں پر جبر مزید بڑھا دیا گیا ہے، کشمیری کئی سال سے حق خوداردیت کا مطالبہ کر رہے ہیں، جب کرفیو ہٹے گا تو وادی کے حالات کھل کر دنیا کے سامنے آجائینگے، بھارتی فورسز اور کشمیریوں کے درمیان تصادم ہوگا، مجھے خطرہ ہے کہ بھارتی فورسز کے ہاتھوں بڑے پیمانے پر کشمیریوں کا قتل عام ہوگا، اگر حالات مزید بگڑ گئے تو نہ میرے اور نہ ہی امریکی صدر کے قابو میں آئیں گے۔
عمران خان نے کہا کہ بھارتی وزیراعظم نریندر مودی ہندوؤں کی اجاداری پر یقین رکھتے ہیں اور انتہا پسند افراد بھارت کو یرغمال بنا کر وہاں حکومت کر رہے ہیں، افسوس کے ساتھ عالمی رہنما بھارت کو ایک ارب 20 کروڑ کی مارکیٹ دیکھتے ہیں، وہ معیشت اور تجارت کو انسانوں پر ترجیح دے رہے ہیں۔
عمران خان نے افغان مسئلہ اور امریکا طالبان مذاکرات کے بارے میں کہا کہ افغانستان میں امریکی جنگ کی ناکامی کا ذمہ دار پاکستان کو ٹھہرایا جا رہا ہے حالانکہ یہ سراسر غلط ہے، افغانستان میں حالات پہلے سے بھی خراب ہیں، امن مذاکرات کی ناکامی مایوس کن ہے، پاکستان ایک بار پھر افغانستان امن مذاکرات میں مدد کرنے کی کوشش کر رہا ہے۔
وزیراعظم نے ایران امریکا کشیدگی کے معاملے پر کہا کہ امریکی صدر ڈونلڈ ٹرمپ نے ایران کے معاملے پر پاکستان کی مدد مانگی ہے کیونکہ وہ خود ایران کے ساتھ جنگ کے خلاف ہیں، اس معاملے پر ایرانی صدر حسن روحانی سے بات ہوئی ہے، جو ہوسکا کروں گا۔
نیویارک: وزیر اعظم عمران خان کا طیارہ تکنیکی خرابی کا شکار ہوگیا جس کے باعث طیارے کی دوبارہ نیویارک میں ایمرجنسی لینڈنگ کرنی پڑی، وزیر اعظم آج رات نیویارک میں ہی قیام کریں گے۔
وزیر اعظم عمران خان نیویارک میں اقوام متحدہ کی جنرل اسمبلی اجلاس سے خطاب کے بعد وطن واپسی کے لیے روانہ ہوئے تو ان کا طیارہ تکنیکی خرابی کا شکار ہوگیا جس کے باعث طیارے کو ٹورنٹو سے واپس موڑنا پڑا۔
وزیر اعظم کے طیارے نے دوبارہ نیویارک میں لینڈ کیا جس کے بعد وزیر اعظم وفد سمیت امریکی سیکیورٹی اسکواڈ کے ہمراہ روز ویلٹ ہوٹل دوبارہ پہنچ گئے، وزیر اعظم کی آمد کے بعد روز ویلٹ ہوٹل کی سیکیورٹی دوبارہ بڑھا دی گئی۔
ذرائع کے مطابق طیارے کے نیوی گیشن سسٹم میں خرابی پر طیارے کو ٹورنٹو سے دوبارہ نیویارک کی طرف موڑا گیا اور ایمرجنسی لینڈنگ کرنی پڑی، وزیر اعظم کا طیارہ اس وقت جان ایف کینیڈی ایئرپورٹ پر موجود ہے اور امریکی ایوی ایشن حکام طیارے کا نیوی گیشن سسٹم ٹھیک کر رہے ہیں۔
ذرائع کا کہنا ہے کہ وزیر اعظم کے طیارے کا دوران پرواز الیکٹرک سسٹم فیل ہوگیا تھا، الیکٹرک سسٹم فیل ہونے سے لینڈنگ میں انتہائی دشواری کا سامنا کرنا پڑا۔
ابتدا میں طیارے کو جلد ہی اڑانے کا ارادہ ظاہر کیا گیا تاہم سسٹم کی درستگی کا کام وقت لینے لگا تو وزیر اعظم امریکی سیکیورٹی اسکواڈ کے ہمراہ واپس ہوٹل کی جانب روانہ ہوگئے۔
وزیر اعظم کے معاون خصوصی نعیم الحق نے سماجی رابطے کی ویب سائٹ ٹویٹر پر ٹویٹ کرتے ہوئے بتایا کہ طیارے میں تکنیکی خرابی کے باعث وزیر اعظم آج رات نیویارک کے ہوٹل میں ہی قیام کریں گے۔
خیال رہے کہ وزیر اعظم گزشتہ کئی روز سے جنرل اسمبلی اجلاس میں شرکت کے لیے نیویارک میں موجود تھے۔ گزشتہ روز انہوں نے جنرل اسمبلی سے اپنا تاریخی خطاب کیا جس میں انہوں نے مقبوضہ کشمیر میں بھارتی بربریت کا پردہ چاک کردیا تھا۔
لاہور : پولیس نے تعلیمی اداروں کے اطراف منشیات فروشوں کیخلاف کارروائیاں کرتے ہوئے150سے زائد منشیات فروش گرفتار کرلیے، ملزمان سے بھاری مقدار میں چرس اور ہیروئن برآمد کی گئی ہے۔
ڈی سی پولیس اور ضلعی انتظامیہ نے نوجوان نسل کو منشیات سے بچانے کے لیے ہر ممکن اقدام کرنے کی ٹھان لی ہے۔
وزیراعلیٰ پنجاب سردار عثمان بزدار کی ہدایت ہر صوبے بھر کے تعلیمی اداروں میں منشیات فروش کرنے والی مافیا کے کارندوں کو حراست میں لے لیا گیا۔
لاہور میں تعلیمی اداروں کے اطراف میں پولیس نے مختلف کارروائیوں کے دوران ڈیڑھ سو سے زائد منشیات فروشوں کو گرفتار کرلیا۔
پولیس اور ضلعی انتظامیہ کے مطابق کارروائیوں میں مزید تیزی لائی جائے گی۔ اس حوالے سے ڈی آئی جی آپریشنز لاہور اشفاق احمد کا کہنا ہے کہ لاہورمیں منشیات فروشوں نے تعلیمی اداروں کے اطراف ڈیرے جما رکھے تھے۔
پولیس نے بڑا کریک ڈاون کرکے تین دن میں ڈیڑھ سو افراد کو گرفتار کرلیا۔ ضلعی انتظامیہ کے مطابق تعلیمی اداروں کے اطراف میں منشیات فروشوں کو سی سی ٹی وی کیمروں سے مانیٹر کیا جا رہا ہے۔
صوبہ سندھ کے دارالحکومت کراچی میں آج بھی بارش کا امکان ہے، لگاتار کئی دنوں کی بارش نے شہر کی سڑکوں کا برا حشر کردیا ہے اور سندھ حکومت کی نااہلی کے سبب ابر رحمت شہریوں کے لیے زحمت بن گیا۔
شہر قائد میں روز کی طرح آج بھی نصف دن تک موسم مرطوب رہے گا، تاہم دوپہر ڈھلے گرج چمک کے ساتھ بارش متوقع ہے۔
محکمہ موسمیات کا کہنا ہے کہ شہر قائد میں آج موسم دن میں گرم اور مرطوب رہنے کا امکان ہے، بھارتی گجرات میں ہوا کا کم دباؤ اس وقت بھی موجود ہے۔
محکمہ موسمیات کا کہنا ہے کہ کراچی میں آج بھی گرج چمک کے ساتھ بارش کا امکان ہے۔
خیال رہے کہ کراچی میں گزشتہ کئی روز سے گرج چمک کے ساتھ تیز بارشیں ہورہی ہیں، مسلسل بارشوں سے نشیبی علاقے زیر آب آگئے ہیں جبکہ کئی علاقوں میں جگہ جگہ پانی کھڑا ہوگیا۔
بارشوں سے درخت اور پول گرنے کے واقعات بھی ہوئے ہیں، بارشیں شروع ہوتے ہی بجلی بھی غائب ہے، متعدد علاقوں میں کے الیکٹرک کے ٹرانسفارمرز خرابی کا شکار ہوگئے۔
بارشوں کے دوران کرنٹ لگنے سے 5 افراد جاں بحق بھی ہوئے۔