ایمز ٹی وی (ایجوکیشن) جامعہ کراچی کے وائس چانسلر پروفیسر ڈاکٹر محمد قیصر نے کہا کہ16دسمبر کا دن پاکستان کی تاریخ کا سیاہ ترین دن ہے ،جب ارض پاک کے معصوم گوشہ جگروں کو شہید کیا گیا ۔دنیا کی تاریخ میں ایسی بربریت کی کوئی مثال نہیں ملتی جہاں معصوم بچوں کو اتنی بے دردی سے شہید کیا گیا ہو۔میں جامعہ کراچی کی طرف سے ان تمام شہداء پاک وطن کو خراج تحسین پیش کرتاہوں۔ان بچوں کی شہادت نے ہماری پوری قوم کو متحد کردیا ہے۔ہم دشمنوں کو بتادینا چاہتے کہ انہوں نے جو بزدلانہ وارکیاوہ نہایت شرمناک عمل ہے ،ان دہشت گردوں کو چن چن کر کیفر کردار تک پہنچانا پوری قوم کا نصب العین ہے۔

ان خیالات کا اظہار انہوں نے سانحہ آرمی پبلک اسکول ،پشاور کی یاد میں منعقدہ واک سے خطاب کرتے ہوئے کیا۔واک شیخ الجامعہ پروفیسر ڈاکٹر محمد قیصر کی قیادت میں پوسٹ آفس تا ایڈمنسٹریشن بلاک منعقد ہوئی۔ اس موقع پر انہوں نے جامعہ کراچی میں ٹاپ کرنے والے طالب علم کو سالانہ جلسہ تقسیم اسناد میں دیا جانے والا گولڈ میڈل اور شعبہ پبلک ایڈمنسٹریشن کی لائبریری کو شہداء آرمی پبلک اسکول پشاور کے شہید طلبہ کے نام سے منسوب کرنے کا اعلان کیا۔