ایمز ٹی وی (پشاور) پولیس نے پشاور کے نواحی علاقوں میں غیر قانونی طورپر مقیم افغانیوں کیخلاف سرچ آپریشن شروع کر دیاہے۔آئی جی کے پی کے ناصر درانی نے بتایا کہ شہید ہونے والے بچوں کا خون ہم پر قرض ہے جسے ہم نے دہشت گردوں کا پاک سر زمین سے خاتمہ کر کے اتارنا ہے ۔انہوں نے کہا ہے کہ پشاور حملے کی کڑیاں سرحد پار مل رہی ہیں لیکن ہمیں اس وقت ہوش اور جوش سے کام لینا ہو گا اس کے لیے تمام اداروں کو مل کر کام کرنا ہو گا۔ان کا کہنا تھا کہ دہشت گردوں کابچوں پر حملہ شرمناک فعل ہے اگر لڑنا تھا تو ہم سے لڑتے ہم ان کو جواب دیتے لیکن بچوں پر حملہ کرکے انہوں نے انسانیت کی توہین کی ہے ۔دہشت گردوں کا آخری دم تک پیچھا کریں گے اور ان کا خاتمہ کر کے ہی دم لیں گے ۔

 ایمز ٹی وی (پشاور) پشاور سکول پر حملہ کرکے معصوم بچوں کو شہید کرنے والے سفاک دہشت گردوں نے جدید  ہتھیار استعمال کئے،ان تصاویر میں ان درندوں کو اسلحہ پکڑ کر بیٹھے ہوئے دکھایا گیا ہے۔ بائیں جانب سے بیٹھے پہلے شخص نے روسی ساخت AK-47 پکڑ رکھی ہے، اس کے ساتھ بیٹھے شخص نے جرمن ساخت ایم پی 5، تیسرے لعنتی نے روسی ساخت PKM، چوتھے خبیس نے آسٹرین ساخت سٹائیر رائفل اور پانچویں روسی ساخت گرینیڈ لانچر RPG7 پکڑی ہوئی ہے۔

ایمز ٹی وی (اسلام آباد) حساس ادارے نے قانون نافذ کرنے والے اداروں کو مطلع کیا ہےکہ  دہشتگرد پشاور کے بعد اب لاہور کو نشانہ بنانے کا ارادہ رکھتے ہیں۔ انٹیلی جنس ذرائع کے مطابق ایک فون کال ٹریس کی گئی ہے جس سے اس بات کی مبینہ طور پر تصدیق ہوئی ہے کہ آرمی پبلک سکول پشاور پر حملہ کرنے والے دہشت گردوں کے ساتھی اور بارود سے بھری ہوئی گاڑی بھی لاہور میں موجود ہے۔دہشت گردوں کا نشانہ کیا ہوسکتا ہے یہ ابھی واضح نہیں ہے تاہم حساس ادارے نے لاہور میں سیکیورٹی ریڈ الرٹ رکھنے کی ہدایت کی ہے۔یاد رہے کہ ماضی میں بھی لاہور میں دہشت گردی کے بڑے واقعات ہو چکے ہیں جن میں ایف آئی اے، آئی ایس آئی، پولیس سینٹر مناواں کو دہشت گردی کو نشانہ بنایا گیا تھا جبکہ سری لنکا کی کرکٹ ٹیم پر بھی لبرٹی گول چکر کے پاس حملہ ہوا تھا۔ اس کے علاوہ آر اے بازار اور مون مارکیٹ اقبال ٹاؤن میں بھی خوفناک دھماکے کئے گئے تھے۔

 ایمز ٹی وی (پشاور) سانحہ پشاور کی تفتیش میں پیش رفت ہوئی ہے جس سے مطابق   آرمی پبلک اسکول پر حملے کی منصوبہ بندی پاک افغان سرحدی علاقے میں ہوئی جب کہ حملے میں ملوث 7 خود کش بمباروں کو خیبرایجنسی میں تربیت دی گئی، آرمی پبلک اسکول پر حملے کی منصوبہ بندی پاک افغان سرحدی علاقے میں طالبان کے اہم اجلاس میں کی گئی جس میں کالعدم تحریک طالبان پاکستان کے سربراہ ملا فضل اللہ سمیت 16 طالبان کمانڈر شریک ہوئے تھے ۔ پولیس کا کہنا ہے کہ اسکول پر حملے کی منصوبہ بندی کرنے والے طالبان کا تعلق باجوڑ،شمالی وزیرستان، اورکزئی اور صوابی سے ہے۔پولیس کے مطابق اسکول پر حملے کے لیے منصوبہ بندی میں طالبان شمالی وزیرستان کا امیر حافظ گل بہادر، سربراہ لشکر اسلام منگل باغ اور اس کا بیٹا بھی شامل تھا جب کہ حملے کا فیصلہ کالعدم تحریک طالبان کے امیر ملا فضل اللہ، شیخ حقانی، حافظ سعید، حافظ دوست اور قاری سیف اللہ نے کیاتھا ۔ جبکہ آرمی پبلک اسکول پر ۔ ابو ذر، عمر، عمران، یوسف، قاری عزیر اور چمنے نامی خود کش حملہ آوروں نے حملہ کیا تھا۔