ایمزٹی وی (فارن ڈیسک) متحدہ قومی موومنٹ کے قائد الطاف حسین نے کہا ہے کہ سانحہ پشاورکے بعد اب پوری قوم پاک فوج کے سربراہ جنرل راحیل شریف کی طرف دیکھ رہی ہے۔ سانحہ پشاور کے حوالے سے خصوصی انٹرویو میں اظہارِ خیال کرتے ہوئے الطاف حسین نے کہا کہ جنرل راحیل شریف شہریوں کی جان ومال کے تحفظ اورپورے ملک کو دہشت گردوں سے پاک کرنے کیلئے ٹھوس اقدامات کریں۔ پشاورکے قومی سانحہ نے پوری قوم کو متحد کردیا ہے، قوم دہشت گردی کے خلاف ایک ہوگئی ہے۔ الطاف حسین نے کہا کہ آرمی پبلک اسکول پر ہونے والے حملے میں طالبان دہشتگردوں کو اندر کے کچھ  لوگوں کی مدد اور رہنمائی حاصل تھی، آئی ایس آئی کے سربراہ جنرل رضوان اختر اسکی تحقیقات کرائیں۔ الطاف حسین نے کہا کہ وہ ایسا پاکستان چاہتے ہیں جہاں ہرفقہ، ہر مسلک حتیٰ کہ غیرمسلموں کی عبادت گاہ بھی محفوظ ہو۔ الطاف حسین نے آرمی چیف اور آئی ایس آئی کے سربراہ سے اپیل کی کہ اصغرعباس جعفری، بائو محمد انور اور محترمہ طاہرہ آصف کے قاتلوں کو گرفتار کیا جائے ۔

ایمزٹی وی (اسلام آباد) وزیراعظم نوازشریف سے وزیر داخلہ چودھری نثارعلی خان نے ملاقات کی ہے، ذرائع کے مطابق گزشتہ روز پارلیمانی سیاسی جماعتوں کے اجلاس میں بنائی جانے والی کمیٹی کے امور پر غور کے علاوہ سانحہ پشاور کے بعد ملک کی امن و امان کی صورتحال پر بھی غور کیا گیا۔ کمیٹی کو تمام جماعتوں کی جانب سے دیے جانے والے مینڈیٹ کے امور پرمشاورت کی گئی۔ وزیر اعظم اور وزیر داخلہ کے مابین ملاقات میں پارلیمانی جماعتوں کی نمایندگی سے متعلق رابطوں کے امور پر بھی بات چیت کی گئی جبکہ پھانسی کی سزا پر عملدر آمد سے متعلق وزارت داخلہ کے آیندہ کے لائحہ عمل پرغورکیا گیا ۔

ایمزٹی وی(اسلام آباد) وزیراعظم کی طرف سے پھانسی کی سزا پرعمل درآمد کی پابندی ختم ہونے کے بعد ملک بھر کی جیلوں میں سزا یافتہ 55 دہشت گردوں کو پھانسی دینے کی تیاریاں مکمل کرلی گئی ہیں، ایک رپورٹ کے مطابق دہشت گردی اور سنگین جرائم میں پھانسی کی سزا پانے والے 522 افراد پنجاب، سندھ، خیبرپختونخوا اور بلوچستان کی جیلوں میں بند ہیں۔ ان میں سے 11 افراد کو فوجی عدالتوں میں کورٹ مارشل سے موت کی سزا دی گئی تھی، پھانسی کی سزا پانے والوں میں سب سے زیادہ پنجاب سے تعلق رکھتے ہیں جنکی تعداد 465 ہے، سندھ کے14 خیبرپختونخوا کے30 اور بلوچستان کی جیلوں میں 13 افراد سنگین جرائم اور دہشت گردی کے الزامات میں موت کی سزا کے منتظر ہیں۔ وزارت داخلہ کے ذرائع کے مطابق دہشت گردی اورسنگین جرائم میں سزائے موت پانے والے 55 افراد کی اپیلیں سپریم کورٹ اور صدر مملکت نے بھی مسترد کردی ہیں۔ پشاور میں سیاسی اور فوجی قیادت کی ملاقات میں دہشت گردوں کو قرار واقعی سزائیں دینے کے معاملے پر بات ہوئی جس میں یہ بات نوٹ کی گئی کہ سزائے موت پرعمل درآمد نہ ہونے سے دہشت گردوں کی حوصلہ افزائی ہوئی، جس سے عدالتیں بھی دہشت گردوں کو سزائیں دینے سے گریزاں تھیں۔ اس موقع پرفیصلہ کیا گیا کہ یورپی ایجنڈے کو نظر انداز کر کے ہمیں اپنے حالات و واقعات کو پیش نظر رکھنا ہوگا، اور سزائے موت پر عمل درآمد کا فیصلہ واپس لینا ہوگا چنانچہ سیاسی اور فوجی قیادت کی اتفاق رائے سے فیصلہ کیا گیا اور فیصلے کے نتیجے میں دہشت گردی اور سنگین جرائم میں ملوث سزا یافتہ 55 افراد کو پھانسی دینے کی تیاریاں مکمل کرلی گئی ہیں جنکی تمام عدالتوں اور صدر مملکت سے رحم کی اپیلیں مسترد ہوچکی ہیں ان میں 8 بڑے دہشت گرد بھی شامل ہیں ۔

ایمزٹی وی (فارن ڈیسک) برطانیہ میں ہونے والی ایک تحقیق میں کہا گیا ہے کہ دنیا بھر میں اوسط انسانی عمراکہتراعشاریہ پانچ برس ہوگئی ہے۔ ایک اسٹڈی رپورٹ کے مطابق 1990 کے مقابلے میں 2013 میں انسانی عمر میں تقریباً چھ برس اضافہ ہوا ہے۔ لندن میں ایک تحقیقی رپورٹ میں کہا گیا ہے کہ 1990 میں اوسط انسانی عمر 65 اعشاریہ 3 برس تھی۔ 1990 سے 2013 کے درمیان عالمی سطح پر مردوں کی اوسط عمر میں 5 اعشاریہ 8 برس جبکہ خواتین میں 6.6 برس اضافہ ہوا۔ تحقیق میں اوسط عمر میں اضافے کی بڑی وجہ کینسر اور دل کے امراض کے باعث ہونے والی ہلاکتوں کی تعداد میں کمی کو قرار دیا گیا ہے۔ اس عرصے کے دوران دنیا میں کینسر کی وجہ سے اموات کی شرح میں 15 فیصد اور دل کی بیماریوں کے سبب ہونے والی اموات کی شرح میں 22 فیصد کمی ہوئی ہے۔ سب صحارا کے افریقی ممالک میں اوسط عمر میں اضافہ نہیں ہو سکا جہاں ایچ آئی وی اور ایڈز کی وجہ سے اموات کےسبب اوسط عمر میں پانچ برس تک کمی ہوئی ہے۔ رپورٹ میں بتایا گیا ہے کہ بعض بیماریوں کے سبب ہلاکتوں کی تعداد میں اضافہ ہو رہا ہے جن میں ہیپاٹائٹس سی سے ہونے والے جگر کے کینسر میں 1990 کے مقابلے میں 125 فیصد اضافہ ہوا، نشہ آور ادویات سے ہونے والی بیماریوں میں 63 فیصد، گردوں کی بیماریوں میں37 فیصد، ذیابیطس نو فیصد اور لبلبے کے کینسر میں سات فیصد اضافہ شامل ہیں ۔