ایمزٹی وی (اسپورٹس) آسٹریلیا اور بھارت کے درمیان جاری بورڈر گاوسکر ٹیسٹ سیریز کے دوسرے میچ میں بھارت نے پہلے دن کا کھیل ختم ہونے پر چار وکٹ کے نقصان پر311 رنز بنا لیے ہیں۔ برزبین میں کھیلے جانے والے اس میچ میں بھارت کی جانب سے اوپنر مرلی وجے نے 22 چوکوں کی مدد سے 144 رنز کی تیز اننگز کھیلی۔ پہلے دن کے کھیل کے اختتام پر اجنکیا رہانے اور روہت شرما بالترتیب 75 اور 26 رنز پر کھیل رہے تھے۔ اس سے قبل بھارت نے ٹاس جیت کر پہلے بیٹنگ کا فیصلہ کیا اور اوپنروں نے اچھا آغاز کیا لیکن شیکھر دھون کو مچل مارش نے 56 کے سکور پر آؤٹ کر دیا۔ انھوں نے 24 رنز بنائے۔ اسکے بعد چیتیشور پجارا اور ویراٹ کوہلی بال ترتیب 18 اور 19 رنز بناکر ٹیسٹ کرکٹ میں اپنا پہلا میچ کھیلنے والے ہیزل وڈ کو اپنی وکٹ دے بیٹھے۔ ۔جبکہ مرلی وجے کو پہلے میچ کے ہیرو نیتھن لیون نے آؤٹ کیا۔ یہ سیریز کا دوسرا میچ ہے اور آسٹریلیا کو سیریز میں ایک صفر کی سبقت حاصل ہے۔ اس میچ میں بھارت کے مستقل کپتان مہندر سنگھ دھونی کی واپسی ہوئی ہے جبکہ آسٹریلیا کے کپتان کلارک پیٹھ میں تکلیف کی وجہ سے اس میچ میں نہیں ہیں اور انکی جگہ سٹیون سمتھ کپتانی کی ذمہ داری نبھا رہے ہیں۔ آسٹریلیا کی جانب سے جوش ہیزل وڈ اپنا پہلا میچ کھیل رہے ہیں۔ بھارت کی جانب سے محمد شامی کی جگہ آراشون کو ٹیم میں شامل کیا گیا ہے ۔

ایمزٹی وی(پشاور) سابق وفاقی وزیراطلاعات قمرزمان کائرہ نے کہا ہے کہ دہشت گردی کے خلاف پوری قوم متحد ہے، مسلح افواج قوم کے لئے قربانیاں دے رہی ہیں۔ سابق وفاقی وزیر قمرزمان کائرہ پشاور کے لیڈی ریڈنگ اسپتال میں زخمی بچوں کی عیادت کے بعد میڈیا سے گفتگو کررہے تھے۔ انکا کہنا تھا کہ وہ پشاور میں زخمی بچوں کی عیادت کے لئے آئے ہیں۔ دہشت گردی کے خلاف پوری قوم متحد ہے۔ قمرزمان کائرہ کا کہنا تھا کہ دہشت گردی ختم کرنے کے لئے تمام سیاسی جماعتوں کو مل کر بیٹھنا ہوگا اور اسکے سدباب کے لئے مشترکہ لائحہ عمل اختیار کرنا چاہئے ۔

ایمزٹی وی (فارن ڈیسک) نوبل انعام یافتہ پاکستانی طالبہ ملالہ یوسف زائی نے سانحہ پشاور کی مذمت کرتے ہوئے کہا ہے کہ دہشت گرد اپنے مذموم عزائم میں کبھی کامیاب نہیں ہوںگے۔ پشاور میں دہشتگردوں کے بزدلانہ اور سفاکانہ کارروائی سے میرے دل کو بہت دکھ پہنچا ہے اور میرا دل ٹوٹ گیا ہے۔ منگل کو ملالہ یوسف زائی نے پشاور میں ہونے والے دہشت گردی کے واقع کی شدید مذمت کی اور کہا کہ دہشت گرد جو مرضی کرلیں یہ کبھی بھی اپنے عزائم میں کامیاب نہیں ہوںگے۔ ملالہ نے کہا کہ حکومت اور فوج کی جانب سے دہشت گردوں کے خلاف کی جانے والی کارروائی کی حمایت کرتی ہوں، سانحہ پشاور نے دل توڑ دیا۔ پشاور میں بچوں کی ہلاکت پر سوگوار ہوں لیکن دہشتگردوں کو یہ پیغام دینا چاہتی ہوں کہ وہ ہمارے عزائم کو پست نہیں کرسکتے ۔

ایمزٹی وی (کوئٹہ) بلوچستان کی دو جیلوں میں 98 قیدی سزائے موت کے منتظر ہیں، محکمہ جیل خانہ جات ذرائع کا کہنا ہے کہ سزائے موت کے منتظرسب سے زیادہ ستانوے قیدی سینٹرل جیل مچھ میں ہیں جبکہ ایک قیدی ڈسٹرکٹ جیل کوئٹہ میں سزائے موت کا منتظر ہے۔ذرائع کا کہنا ہے کہ اِس وقت صوبے سے 14 قیدیوں کی رحم کی اپیلیں صدر مملکت کے پاس ہیں، جبکہ 41 قیدیوں کی اپیلیں سپریم کورٹ 42 کی بلوچستان ہائی کورٹ اور ایک کی اپیل شریعت کورٹ میں دائر ہے۔ بلوچستان میں آخری سزائےموت مچھ سینٹرل جیل میں جنوری 2008 میں دی گئی تھی ۔