حال ہی میں ملک و بیرون ملک مقبول ہونے والے پاکستانی ڈرامے ’کبھی میں کبھی تم‘ کے خوشگوار اختتام نے مداحوں کو خوش کردیا۔

ڈرامے کی آخری قسط 5 نومبر کو ٹی وی چینل سمیت ملک کے سینماؤں میں دکھائی گئی جب کہ یوٹیوب پر بھی اس کی آخری قسط کو براہ راست دکھایا گیا۔

’کبھی میں کبھی تم‘ کے ذریعے فہد مصطفیٰ نے جہاں ایک دہائی بعد ڈراموں میں واپسی کی تھی، وہیں وہ پہلی بار اسکرین پر ہانیہ عامر کے ساتھ دکھائی دیے۔
’کبھی میں کبھی تم‘ نہ صرف پاکستان بلکہ بھارت، بنگلہ دیش، متحدہ عرب امارات (یو اے ای) اور ان ممالک میں بھی مقبول رہا، جہاں اردو زبان سمجھنے والے افراد رہتے ہیں
فہد مصطفیٰ اور ہانیہ عامر نے ڈرامے میں میاں اور بیوی کا کردار ادا کیا، جن کے درمیان آخری اقساط میں غلط فہمیاں پیدا ہونے کی وجہ سے اختلافات شدت اختیار کرجاتے ہیں لیکن اختتام پر دونوں کو دوبارہ ایک ہوتے دکھایا گیا، جس پر شائقین خوش ہوئے۔

اسی طرح ڈرامے میں دوسرے کرداروں کی غلطیوں کو بھی سدھارا گیا اور تمام کرداروں کو ان کی غلطیوں کا احساس دلاکر ڈرامے کو ختم کیا گیا، جس پر شائقین نے ٹیم کی تعریفیں کیں۔
ڈرامے میں فہد مصطفیٰ اور ہانیہ عامر کے علاوہ جاوید شیخ، بشریٰ انصاری، نعیمہ بٹ، اریج چوہدری اور عماد عرفانی سمیت دیگر اداکاروں نے کام کیا۔

’کبھی میں کبھی تم‘ کی کہانی فرحت اشتیاق نے لکھی تھی جبکہ ہدایات بدر محمود نے دی تھیں۔

وزیراعلیٰ سندھ مراد علی شاہ نے میڈیکل اور ڈینٹل کالجز کے داخلہ ٹیسٹ سمیت تمام ٹیسٹ6 ہفتوں میں لینےکی ہدایت کردی

وزیراعلیٰ سندھ سید مراد علی شاہ کی زیر صدارت سندھ کابینہ کا اجلاس ہوا، اس دوران کابینہ کو بتایا گیا کہ ایم ڈی کیٹ کا ٹیسٹ 18-2017 سے لیا جارہا ہے۔

سندھ کابینہ کے اجلاس میں بتایا گیا کہ کراچی، حیدرآباد، نوابشاہ، سکھر اور لاڑکانہ میں ایم ڈی کیٹ کا ٹیسٹ لیا جاتا ہے جب کہ حالیہ امتحان میں پیپر لیک ہونے کا مقدمہ ہائی کورٹ میں زیر سماعت ہے۔

جس پر وزیر اعلیٰ سندھ کا کہنا تھا کہ پیپر لیک ہونا صرف بدنامی نہیں بلکہ اس سے بچوں کا مستقبل بھی خراب ہوتا ہے۔

مراد علی شاہ نے ایم ڈی کیٹ سمیت تمام ٹیسٹ میں شفافیت لانے کا حکم دیتے ہوئے6 ہفتوں میں ایم ڈی کیٹ کا ٹیسٹ لینے کی ہدایت کردی۔

وزیراعلی سندھ نے آئی بی اے سکھر کے ٹیسٹ کے لیے 23کروڑ 20 لاکھ روپے کی منظوری دے دی۔

واضح رہے کہ ملک بھر میں ہونے والے ایم ڈی کیٹ میں ایک لاکھ 60 ہزار امیدواروں نے شرکت کی تاہم 50 سے زائد طلبہ پر نقل کرنے کے الزامات میں مقدمات درج کیے گئے اور اس دوران 2 طلبہ کو گرفتار بھی کیا گیا۔

بعد ازاں، 15 امیدواروں نے مشترکہ طور پر سندھ ہائی کورٹ میں درخواست دائر کی جس میں مؤقف اپنایا گیا کہ ڈاؤ یونیورسٹی آف ہیلتھ سائنسز نے 22 ستمبر کو صوبے میں ایم ڈی کیٹ کا انعقاد کیا تھا جس میں مبینہ طور پر امتحان سے ایک دن پہلے متعدد پرچے منظر عام پر آئے تھے جس سے امتحانی عمل کی شفافیت پر شکوک و شبہات پیدا ہوئے۔

واٹس ایپ نے صارفین کے لئے تصویر کی حقیقت فوری طور پر جاننے کے لیے آن لائن سرچ کی سہولت فراہم کرنے کا اعلان کردیا

ذرائع کا کہنا ہے کہ واٹس ایپ میں ایک نئے فیچر ریورس امیج سرچ پر کام کیا جا رہا ہے۔یہ فیچر آپ کو کسی تصویر کی حقیقت فوری طور پر جاننے کے لیے آن لائن سرچ کی سہولت فراہم کرے گا۔

یعنی اگر آپ کو کسی دوست سے تصویر موصول ہوئی ہے تو اس کے مستند ہونے کے بارے میں جاننے کے لیے یہ فیچر مددگار ثابت ہوگا۔یہ فیچر ابھی اینڈرائیڈ ڈیوائسز کے لیے واٹس ایپ کے بیٹا (beta) ورژن میں سامنے آیا ہے۔یچر کو استعمال کرنے کا طریقہ بہت آسان ہے۔

جب کوئی تصویر آپ کو موصول ہوگی تو اس پر کلک کریں اور پھر اوپر دائیں جانب تھری ڈاٹ مینیو میں نئے سرچ آن ویب کے آپشن کا انتخاب کریں۔ایسا کرنے پر وہ تصویر گوگل پر اپ لوڈ ہو جائے گی اور سرچ انجن اس سے ملتی جلتی تصاویر کو پیش کرے گا۔

اس سے آپ کو یہ اندازہ لگانے میں مدد ملے گی کہ یہ تصویر کتنی قابل اعتبار ہے واٹس ایپ کی جانب سے ریورس امیج سرچ کو اس فیچر کی مدد سے زیادہ آسان بنایا جا رہا ہے۔

میٹا نے انسٹاگرام کے صارفین کی عمر کی تصدیق کے لیے آرٹی فیشل انٹیلی جنس ٹیکنالوجی کو استعمال کرنے کا فیصلہ کیا ہے۔

یہ اے آئی ٹول صارف کی حقیقی عمر کا تعین کرے گا، چاہے وہ اسے غلط ہی کیوں نہ بتائے۔

اگر صارف اپنی عمر کے بارے میں غلط بتائے گا تو اے آئی ٹیکنالوجی حقیقی عمر کا تعین کرکے 18 سال سے کم عمر افراد کو خودکار طور پر ٹین (teen) اکاؤنٹس میں ٹرانسفر کردے گی۔یہ اکاؤنٹس 13 سے 17 سال کے صارفین کے لیے ہیں اور کمپنی کی جانب سے نوجوانوں کے تحفظ کے لیے ایسے اکاؤنٹس میں مختلف پابندیاں عائد کی گئی ہیں۔

اب تک ایسا کوئی طریقہ کار نہیں تھا جس سے کمپنی کو معلوم ہوسکے کہ اس سروس کو استعمال کرنے والے کی حقیقی عمر کیا ہے۔
یہی وجہ ہے کہ میٹا کی جانب سے adult classifier نامی سافٹ وئیر ٹول تیار کیا گیا ہے۔

یہ ٹول صارفین کو 2 گروپس میں تقسیم کرنے کے لیے ڈیزائن کیا گیا ہے۔ایک گروپ 18 سال سے زائد عمر کے افراد کا ہوگا جبکہ دوسرا 18 سال سے کم عمر صارفین کا ہوگا۔

میٹا کی یوتھ اینڈ سوشل امپیکٹ ڈائریکٹر Allison Hartnet نے بتایا کہ یہ ٹول صارف کی پروفائل کو اسکین کرکے دیکھے گا کہ وہ کیسے مواد کو دیکھتا ہے جبکہ اس کے فالوور لسٹ کو بھی عمر کے تعین کے لیے دیکھا جائے گا۔

میٹا کی جانب سے ٹین اکاؤنٹس کو ستمبر 2024 میں متعارف کرایا گیا تھا۔اس ٹول کا استعمال 2025 میں شروع کیے جانے کا امکان ہے۔

آئی سی سی نے ٹیسٹ پلیئرزکی رینکنگ جاری کر دی۔

ٹیسٹ پلیئرز کی بیٹنگ رینکنگ میں جو روٹ کا پہلا نمبر برقرار ہے جب کہ انگلینڈ کے ہیری بروک ایک درجے ترقی کے بعد تیسرے نمبر پر آ گئے۔

بھارت کے رشبھ پنت پانچ درجے ترقی کے بعد چھٹے نمبر پر آ گئے ہیں۔ نیوزی لینڈ کے ڈیرل میچل 8 درجے ترقی کے بعد ساتویں نمبر پر آ گئے۔

اس کے علاوہ قومی کرکٹ ٹیم کے سابق کپتان بابر اعظم ایک درجے ترقی کے بعد 17 ویں نمبرسلمان آغا ایک درجے ترقی کے بعد 19 ویں نمبر پر آ گئے، محمد رضوان دو درجے ترقی کے بعد 20 ویں نمبر پر آ گئے۔

ٹیسٹ بولرز کی رینکنگ:
ٹیسٹ بولروں میں ساؤتھ افریقا کے کگیسو ربادا کا پہلا نمبر برقرار ہے۔ آئی سی سی ٹیسٹ پلیئرز رینکنگ میں پاکستان کے نعمان علی کی نویں پوزیشن ہے۔

بھارت کے رویندرا جڈیجا دو درجے ترقی کے بعد چھٹے نمبر پر آ گئے، کیشو مہاراج چار درجے ترقی کے بعد 19 ویں نمبر پر آ گئے۔

ٹیسٹ آل راؤنڈرز میں بھارت کے رویندرا جڈیجا کا پہلا نمبر ہے۔

واشنگٹن: صدارتی الیکشن جیتنے اور دوسری مرتبہ امریکی صدر منتخب ہونے پر ڈونلڈ ٹرمپ کووزیر اعظم شہباز شریف اور بلاول بھٹو نے مبارکباد کا پیغام جاری کردیا۔

وزیراعظم شہباز شریف نے سوشل میڈیا سائٹ ایکس پر ڈونلڈ ٹرمپ کو صدارتی الیکشن میں کامیابی پر مبارکباد دیتے ہوئے لکھا کہ نئی امریکی انتظامیہ کے ساتھ تعلقات مزید مستحکم کرنے کے لیے پرعزم ہوں۔

چیئرمین پیپلزپارٹی بلاول بھٹو زرداری نے ڈونلڈ ٹرمپ کو مبارکباد دیتےہوئے لکھا کہ امریکی عوام نے ٹرمپ اور ان کی ٹیم کو شاندار فتح دی، یہ جنگ مخالف مینڈیٹ اور کامیابی ہے۔

واضح رہے صدارتی الیکشن جیتنے اور دوسری مرتبہ امریکی صدر منتخب ہونے پربرطانوی وزیراعظم سر کیئر اسٹارمر، اطالوی وزیراعظم جارجیا میلونی اور بھارتی وزیراعظم نریندر مودی سمیت دیگر عالمی رہنماؤں کی جانب سے مبارک بعد اور نیک خواہشات کا اظہار کیا جارہا ہے

بالی ووڈ کے مشہور اداکار ابھیشیک بچن کی آنے والی فلم ’آئی وانٹ ٹو ٹاک‘ کا ٹریلر جاری کر دیا گیا۔

سوشل میڈیا پر شیئر کیے گئے فلم کے ٹریلر میں ابھیشیک بچن کو بطور والد کردار نبھاتے دیکھا جاسکتا ہے جو اپنی بیٹی کے ساتھ ملک سے باہر رہتے ہیں تاہم ان کا بیٹی کے ساتھ تعلق پیچیدہ ہے اور باپ بیٹی میں دوری دکھائی گئی ہے۔

فلم کے ٹریلر میں دیکھا جاسکتا ہے کہ ابھیشیک مختلف روپ میں دکھائی دے رہیں جس کو دیکھ کر مداح بھی حیران ہیں ابھشیک اس فلم میں موٹے دکھائی دے رہے ہیں جو انتہائی سادہ آدمی کا کردار کر رہے ہیں جو کسی بیماری میں بھی مبتلا ہے۔

سوشل میڈیا صارفین کا کہنا ہے کہ ابھیشیک اس فلم میں اپنی عمر سے زیادہ بڑے نظر آرہے ہیں جبکہ کئی صارفین نے فلم کو ریلیز سے قبل ٹریلر دیکھ کر ہی فلاپ قرار دے دیا ہے۔
ابھیشیک بچن کا کردار ایک ایسے شخص کا ہے جو بات کرنے کے لیے جیتا ہے زندگی کی مشکلات کو غیر متزلزل اور مثبت نقطہ نظر کے ساتھ قبول کرتا ہے۔ یہ ایک ایسے شخص کی کہانی ہے جو ہمیشہ زندگی کے روشن پہلو کو دیکھتا ہے، چاہے زندگی میں جتنے بھی چیلنجز ہوں۔

واضح رہے کہ ابھیشیک بچن کی یہ فلم 22 نومبررکو سنیما گھروں کی زینت بنے گی۔

کراچی:  اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت کامرس پرائیویٹ گروپس اور ڈپلومہ ان فزیکل ایجوکیشن کے سالانہ امتحانات برائے 2024ء کے نتائج کا اعلان کردیا ہے۔

ناظم امتحانات زرینہ راشدنے کامرس پرائیویٹ کے نتائج کی تفصیلات بتاتے ہوئے کہا کہ کامرس پرائیویٹ گروپ میں 2ہزار 223 امیدواروں نے رجسٹریشن حاصل کی، 2ہزار 116 امیدوار امتحانات میں شریک ہوئے جبکہ 973 امیدوار کامیاب ہوئے اس طرح کامیابی کا تناسب 45.98فیصد رہا۔

ناظم امتحانات زرینہ راشد نے بتایا کہ ڈپلومہ ان فزیکل ایجوکیشن کے امتحانات میں 10امیدواروں نے رجسٹریشن حاصل کی جبکہ 9امیدوار امتحانات میں شریک ہوئے جس میں سے صرف 2 امیدوار بی گریڈ کامیاب ہوئے اس طرح کامیابی کا تناسب 22.22فیصد رہا۔ نتائج بورڈ کی ویب سائٹ پر اپ لوڈ کردیئے گئے ہیں

اعلیٰ ثانوی تعلیمی بورڈ کراچی نے انٹرمیڈیٹ بارہویں جماعت آرٹس ریگولر، آرٹس پرائیویٹ کے سالانہ امتحانات برائے 2024ء کے نتائج کا اعلان کردیا ہے۔

ناظم امتحانات زرینہ راشد نے نتائج کی تفصیلات بتاتے ہوئے کہا کہ آرٹس ریگولر کے امتحانات میں 11ہزار 172امیدواروں نے رجسٹریشن حاصل کی، 10ہزار 551 امیدوارا متحانات میں شریک ہوئے جس میں سے 3ہزار 92 امیدوار کامیاب قرار پائے اس طرح کامیابی کا تناسب 29.31فیصد رہا۔

جبکہ آرٹس پرائیویٹ گروپ کے امتحانات میں 3ہزار 87 امیدواروں نے رجسٹریشن کروائی جبکہ 2ہزار 911 امیدواروں نے امتحانات میں شرکت کی جس میں سے 1ہزار 123امیدوار کامیاب ہوئے اس طرح کامیابی کا تناسب 38.58 فیصد رہا

آسٹن: امریکی انتخابات میں پاکستانی نژاد ڈیموکریٹ امیدوار سلمان بھوجانی دوبارہ ٹیکساس کی ریاستی اسمبلی کے رکن منتخب ہوگئے۔

اپنے سیاسی سفر میں انہوں نے تارکین وطن کے حقوق کی بھرپور حمایت کی اور صحت کی دیکھ بھال، تعلیم اور کاروباری ترقی جیسے اہم مسائل پر اپنی توجہ مرکوز کی۔

ان کی جیت کو امریکی سیاسی نمائندگی میں جنوبی ایشیا کی نمائندگی میں ایک اہم سنگ میل کے طور پر دیکھا جا رہا ہے۔

جہاں بھوجانی کی جیت پاکستانی امریکیوں کی بڑھتی ہوئی سیاسی شمولیت کو نمایاں کرتی ہے، وہیں کانگریس کے لیے انتخاب لڑنے والے واحد پاکستانی نژاد امریکی ریپبلکن امیدوار ہارون بشیر کو پنسلوانیا میں شکست کا سامنا کرنا پڑا۔