کراچی: جامعہ کراچی نے ایل ایل بی سال آخراور بی اے ایل ایل بی کےنتائج کااعلان کردیا۔

ناظم امتحانات جامعہ کراچی ڈاکٹرسید ظفر حسین کے مطابق مطابق ایل ایل بی سال آخر کے امتحانات میں 93 طلبہ شریک ہوئے،12 طلبہ کو فرسٹ ڈویژن جبکہ 47 طلبہ کو سیکنڈ ڈویژن میں کامیاب قراردیاگیا۔

کامیابی کا تناسب 63.44 فیصدرہا۔ بی اے ایل ایل بی (آنرز) سال آخرکے امتحانات میں ایک طالبعلم شریک ہوااور کامیاب قرارپایا۔کامیابی کاتناسب 100.00 فیصدرہا۔

اسلام آباد: علامہ اقبال اوپن یونیورسٹی نے یکم ستمبر سے شروع ہونے والے امتحانات ملتوی کردیئے۔

ملک بھر میں طوفانی بارشوں اور سیلابوں کی صورتحال کے پیش نظرعلامہ اقبال اوپن یونیورسٹی نے یکم ستمبر سے شروع ہونے والے سمسٹر بہار 2022ئ کے میٹرک، ایف اے اور آئی کام پروگراموں کے امتحانات ری شیڈول کردئیے ہیں۔

شعبہ امتحانات کی جانب سے جاری کردہ مراسلے کے مطابق یکم ستمبر تا 10ستمبر تک کے پرچے اب4 
اکتوبرسے 13اکتوبرتک لئے جائیں گے۔

اِن امتحانات کی تاریخوں میں تبدیلی کے بارے میں طلبا و طالبات کوایس ایم ایس پر اطلاع دے دی گئی ہے اور یونیورسٹی کی ویب سائٹ پر ری شیڈول ایگزام کا لنک بھی اپ لوڈ کردیا گیا ہے۔

کنٹرولر امتحانات کے مطابق پہلے سے جاری کردہ رول نمبر سلپس،ا وقات کار، امتحانی مراکزنئی تاریخوں کے لئے کارآمد ہونگے یعنی اِن میں کوئی تبدیلی نہیں کی گئی ہے۔

میٹرک، ایف اے اور آئی کام پروگراموں کے باقی امتحانات پہلے سے جاری کردہ ڈیٹ شیٹ کے مطابق جاری رہیں گے۔

راولپنڈی : بورڈ آف انٹر میڈیٹ اینڈ سکینڈری ایجوکیشن راولپنڈی کے زیر اہتمام ثانوی جماعت دہم/ کمپوزٹ سالانہ 2022ء کےنتائج کااعلان ہوگیا۔

ترجمان بورڈ آف انٹر میڈیٹ اینڈ سکینڈری ایجوکیشن راولپنڈی کے مطابق نتائج تمام امیدواران کے داخلہ فارم پر دیئے گئے موبائل نمبر پر بذریعہ ایس ایم ایس ارسال کر دیئے گئے ہیں

طلبہ بورڈ کی ویب سائیٹ  www.biserawalpindi.edu.pk   پر بذریعہ رول نمبربھی ملاحظہ کئے جا سکتے ہیں تا ہم کسی بھی پریشانی یا معلومات کے لئے فون نمبر ز051ـ5450917ـ918 پر رابطہ کیا جا سکتا ہے ۔

رزلٹ گزٹ پی ڈی ایف فارمیٹ میں بورڈ کی ویب سائیٹ پر موجود ہوگاجہاں سے رزلٹ دیکھا اور پرنٹ کیا جاسکتا ہے۔

کراچی: این ای ڈی میں اسپیشل اسسٹنٹ ٹو پرائم منسٹر شازہ فاطمہ خواجہ(پی ایم یوتھ پروگرام) نے دورہ کیا۔شیخ الجامعہ این ای ڈی پروفیسر ڈاکٹر سروش حشمت لودھی نے نا صرف انہیں جامعہ کی اسپورٹس کی سہولتوں سے آگاہ کیا بلکہ ہائی پرفارمنس ریسرچ سینٹر اور اسپورٹس ری سورس سینٹر کے متعلق بھی آگاہ کیا۔

اسپیشل اسسٹنٹ ٹو پرائم منسٹر شازہ فاطمہ خواجہ نے این ای ڈی یونی ورسٹی کی اسپورٹس کے حوالے سے اور بالخصوص نوجوانوں کے لیے کی جانے والی کاوشوں کو سراہا۔ جاوید میمن ریجنل ڈائریکٹر، اور کںٹرولر اسٹوڈنٹ افیئرز ڈاکٹر علی حسن محمود بھی دورے میں شریک تھے.

اس موقعے پر شیخ الجامعہ پروفیسر ڈاکٹر سروش حشمت لودھی کا کہنا تھا کہ کھیل بہترین ورزش ہے کیوں کہ یہ ہماری ذہنی اور جسمانی نشوونما میں کردار ادا کرنے کے ساتھ پریشر جھیلنے کی تربیت بھی دیتا ہے۔دوسری جانب ڈائس انلاٹکس اور این ای ڈی کے مابین ایم او یو پر دستخط کیے گئے۔

اس موقعے پر شیخ الجامعہ پروفیسر ڈاکٹر سروش لودھی، معین الجامعہ پروفیسر ڈاکٹرمحمد طفیل، رجسٹرار سید غضنفر حسین، چیئرمین کمپیوٹر سسٹم انجینئرنگ ڈیپارٹمنٹ پروفیسر ڈاکٹر علی اسماعیل، چیئرمین سی ایس آئی ٹی ڈاکٹر مبشر خان، ٹیکنکل اسسٹنٹ ٹو دی وائس چانسلر دانش الرحمان خان جب کہ ڈائس انلاٹکس سے کو فاؤنڈر ڈائس عمر چوہدری، پروجیکٹ مینیجر ملیحہ رفیع سمیت دیگر نے شرکت کی۔

آن لائن گفتگو کرتے ہوئے عمر چوہدری کا کہنا تھا کہ اس مفاہمتی یاداشت پر دستخط کا مقصد ہے کہ ہمارا ادارہ این ای ڈی کے طالب علموں کو 20فی صد ڈسکاؤنٹ پر کورسز کروائے گا جب کہ ایک کورس میں داخل 30طالب علموں کی صورت میں ایک ٹیچر کو مفت ٹریننگ کروائی جائے گی۔ ان کا مزید کہنا تھا کہ ہم فائنل آیئر پروجیکٹس میں بھی مینٹور شپ دیں گے جب کہ گریجویٹس کو مختلف انڈسٹریز سے رابطہ کرنے میں مدد فراہم کریں گے. اس موقعے شیخ الجامعہ نے بھی انہیں مکمل تعاون کی یقین دہانی کروائی۔

اسلام آباد: وفاقی تعلیمی بورڈ نے نہم و دھم کے سال 2022 کےدوسرے مرحلے کے سالانہ امتحانات کے شیڈول کا اعلان کردیا ہے۔

اعلان کردہ شیڈول کے مطابق وفاقی تعلیمی بورڈ کے زیراہتمام نہم اور دہم کے سالانہ امتحانات 22 ستمبر سے شروع ہوں گے جو 13 اکتوبر تک جاری رہیں گے۔

سندھ : مہران یونیورسٹی آف انجینئرنگ اینڈ ٹیکنالوجی جامشورو میں کمپیوٹرائزڈ داخلہ ٹیسٹ تیسرے روز بھی جاری رہے۔

روزانہ دو شفٹوں میں 6سوامیدوار ٹیسٹ میں شریک ہو رہے ہیں ۔

شیخ الجامعہ جامعہ مہران پروفیسر ڈاکٹر طحہ حسین علی نے داخلہ ٹیسٹ کمیٹی کے ممبران کے ہمراہ ٹیسٹ مراکز کا دورہ کرتے ہوئے مہیا کردہ سہولیات اور انتظامات کا جائزہ لیا ۔

امیدواران کی جانب سے ٹیسٹ کے دوران مہیا کردہ سہولیات پر اظہارِ اطمینان کیا گیا ہے، سندھ میں جاری بارشوں کے باوجود بڑی تعداد میں امیدواران داخلہ ٹیسٹ میں حصہ لے رہے ہیں۔

کراچی: جامعہ کراچی نے ایم بی اے اورایم بی اے ایگزیکیٹو کی داخلہ فیس جمع کرانے کی تاریخ میں توسیع کردی۔

کراچی یونیورسٹی بزنس اسکول کے تحت ایم بی اے(ڈیڑھ سالہ اورڈھائی سالہ) اورایم بی اے ایگزیکیٹو(ڈھائی سالہ) پروگرامزکی داخلہ فیس جمع کرانے کی تاریخ میں 26 اگست تک توسیع کردی گئی ہے۔

ایسے طلباوطالبات جن کے نام جاری کردہ داخلہ فہرست میں آچکے ہیں وہ اپنی داخلہ فیس 26 اگست 2022 ء تک جمع کراسکتے ہیں۔

کراچی: آواز انسٹیٹیوٹ آف میڈیا اینڈ مینجمنٹ سائنس کے زیرِ اہتمام جلسہ تقسیم اسناد منعقد کیا گیا۔

ایمز انسٹیٹیوٹ کے سالانہ جلسہ تقسیم اسناد میں بی ایس ماس کمیونیکشن، بی بی اے(بی ایس بی اے) اور ایم ماس کمیونکیشن کے 59 طلباو طالبات میں ڈگریاں تفویض کی گئیں۔

سالانہ جلسہ تقسیم اسناد میں مہمانِ خصوصی سینیٹرنثار احمد کھوڑو،جامعہ کراچی کے وائس چانسلر ڈاکٹر خالد محمود عراقی، چیئرمین بورڈآف گورنر آواز انسٹیٹیوٹ نئیر علی،ر ضیاء الدین بورڈ کے ایگزیکٹو ڈائریکٹر ڈاکٹر ناصر انصار،ڈی جی چارٹر کمیٹی نعمان احسن، سیکرٹری الحاق کمیٹی ڈاکٹر انیلا امبر ملک۔ فیکلٹی ممبران،اساتذہ اورجامعہ کراچی شعبہ کمپیوٹر سائنس و سافٹ انجینئرنگ کےڈین ندیم محمود،ویژول اسٹڈیز کی انچارج تانیہ ناصر، شعبہ ابلاغ عامہ کی چیئرپرسن ڈاکٹرفوزیہ نازاورہیڈآف دی ڈیپارٹمنٹ بی بی اے ڈاکٹر دانش شریک ہوئے۔

سینیٹرنثار احمد کھوڑو:
تقریب سے خطاب کرتے ہوئے سینیٹر نثاراحمد کھوڑو نے کہا کہ ہمارے نوجوان اور بنیادی طور پر طلباء ہمارا اثاثہ ہیں کیونکہ انہیں مستقبل میں پاکستان کی ترقی کی قیادت کرنی ہے۔انہوں نے کہا کہ چھوٹے شہروں اور اضلاع کو بھی نجی شعبے کی توجہ کی ضرورت ہے کیونکہ ان میں جامعات نہیں ہیں اور ان کے لیے معیاری تعلیم حاصل کرنا مشکل ہے۔
انکا مزید کہنا تھا کہ اکثر اوقات چھوٹے شہروں اور اضلاع کے لوگوں کو اپنے آبائی شہر چھوڑ کر دوسرے شہروں میں جانا پڑتا ہےاس لئے میں پرائیوٹ سیکٹر کے عہدیداروں سے گزارش کرتا ہوں کہ وہ ہائر ایجوکیشن کے لئے بہتر سے بہتر اقدامات کرے ۔
سینیٹر نثار احمد کھوڑو نے کہا کہ ہم معیاری تعلیم کی فراہمی اور سب کو یکساں مواقع فراہم کرکے اور میرٹ کلچر کو فروغ دے کر معاشرے میں مثبت تبدیلیاں لاسکتے ہیں۔انہوں نے کہا تعلیم دنیامیں نام کرنے کےلئے محنت کرنا ضروری ہے اور تعلیم ہی طبقاتی نظام کو نہیں مانتی ۔

وائس چانسلر خالد عراقی:
شیخ الجامعہ پروفیسر خالد محمود عراقی نے کہا کہ گریجویٹس کے پاس مسابقتی کارپوریٹ دنیا میں سبقت حاصل کرنے کے لیے ضروری مہارتیں اور صلاحیتیں ہوتی ہیں۔ صرف ایک پروگرام سے شروع ہونے والے انسٹی ٹیوٹ نے ان تمام سالوں میں قابل ذکر کام کیا ہے اور درست سمت میں آگے بڑھ رہا ہے۔ان کا ماننا ہے کہ فارغ التحصیل اب اپنی تعلیم کے دوران حاصل کیے گئے علم اور ہنر کو بروئے کار لا کر معاشرے کی خدمت کے لیے تیار ہیں.

چیئرمین بورڈ آف گورنرز نیئرعلی :
12سال قبل جب ہم نے ایمز کی بنیاد رکھی تو ہمارا مقصدتعلیم و تربیت کے جدیدتقاضوں کےسنگِ میل کوعبورکرنا تھا کیونکہ ہم جانتے ہیں تعلیم ہی ترقی کی کنجی ہےاور الحمداللہ! ہم اپنے مشن میں کافی حد تک کامیاب بھی ہوئے ہیں اور ہماری کوشش ہوگی کہ ہم آنے والے دنوں میں مزید بہتری لےکر آئے جوہمارے طلبا و طالبات کےبہترین مستقبل میں مفیدثابت ہونگے ۔
انہوں نے مزید کہا کسی بھی ملک وقوم کی ترقی کےلئے ضروری ہے کہ نوجوانوں کو تعلیم کے بہترین مواقع میسر ہوں لیکن بدقسمتی سےہمارے ملک کا صرف 3فیصد نوجوان طبقہ ہی اعلیٰ تعلیم حاصل کرپاتا ہےجوہماری ترقی کےلئےانتہائی ناکافی ہے۔آج کے اس پرُ مسرت موقع پرہم عہد کرتےہیں کہ ہم اپنے ادارے آواز انسٹیٹیوٹ میں زیرِ تعلیم طلبا و طالبات کوجدید تعلیم سےآراستہ کریں گے۔

ریکٹر آواز انسٹیٹیوٹ ڈاکٹر سلیم شہزاد:
آواز انسٹیٹیوٹ کے ریکٹر ڈاکٹر سلیم شہزاد نے جلسہ تقسیم اسناد کے موقع پرمہمان ِ خصوصی سینیٹر نثار کھوڑو، شیخ الجامعہ پروفیسر خالد محمود عراقی،بورڈ آف گورنرز، ایمز فیکلٹی ممبران ، والدین، ڈین فیکلی آف آرٹس وفنون ڈاکٹر نصرت ادریس، چارٹرانسپیکشن اینڈ ایوویلیشن (سندھ سی آئی ای سی) نعمان احسن کا شکریہ ادا کیا۔

اس موقع پر انہوں نے کہا کہ میں جامعہ کراچی کے وائس چانسلر پروفیسر خالد محمود عراقی کا شکریہ ادا کرتا ہوں کہ انہوں نے آواز انسٹیٹیوٹ کو تعلیمی اقدام میں بھر پور تعاون کیا اور میں امید کرتا ہوں کہ آئندہ بھی جامعہ کراچی بھر پور ساتھ دے گا جو خامیاں ہیں انہیں دور کرنے کی کوشش کریں گے۔آخر میں انہوں نےڈگری اور شیلڈ وصول کرنے والے طلبا کو مبارکباد دی۔

اسلام آباد: پی ایم سی میں میڈیکل امتحانات میں کرپشن کے شواہد ملنےپروزیراعظم شہباز شریف نےپاکستان میڈیکل کمیشن کے ارکان کو تبدیل کر دیا۔

ذرائع کے مطابق وزیراعظم نے آئین و قانون کے مطابق عمران خان کے پاکستانی نژاد امریکی کزن ڈاکٹر نوشیروان برکی کے منتخب پاکستان میڈیکل کمیشن کے ارکان کو صوابدیدی اختیارات استعمال کرتے ہوئے تبدیل کیا۔ جب کہ ٹیسٹنگ میں مبینہ کرپشن کا معاملہ تحقیقاتی ایجنسی کو دینے کا فیصلہ کیا گیا ہے۔

ذرائع کا کہنا ہے کہ پی ایم سی میں میڈیکل امتحانات میں کرپشن کی اطلاعات موصول ہوئی تھیں۔ گزشتہ سالوں میں بھی بڑے پیمانے پر ٹیسٹنگ میں بے ضابطگیاں اور مالی بدعنوانیاں رپورٹ ہوئیں، جس کا معاملہ نیب میں زیر التوا ہے۔

حکام کا کہنا ہے کہ کمیشن کے نئے ارکان آئین و قانون کے مطابق میرٹ پر تعینات ہوں گے جب کہ ٹیسٹنگ میں مبینہ کرپشن کا معاملہ تحقیقاتی ایجنسی کو دیا جائے گا۔ ایم ڈی کیٹ کے امتحانات شیڈول کے مطابق ہوں گے۔

اسلام آباد: قراقرم انٹرنیشنل یونیورسٹی شعبہ امتحانات نےنویں اوردسویں جماعت کےسالانہ امتحانات کےنتائج کااعلان کردیا۔

نتائج کے مطابق دسویں جماعت کے مجموعی رزلٹ 71فیصد جبکہ نویں جماعت کا49 فیصد رہا، جماعت دہم کے نتائج کے مطابق سائنس گروپ میں دنیور گلگت کی طالبہ تسلیم زہرا نے 1055 نمبر لے کر پہلی، نایاب 1015دوسری پوزیشن حاصل کی،1013 نمبرلےکر محمد رافع اور مہتاب حسین نے تیسری پوزیشن اپنے نام کرلی۔