اسلام آباد : آج سے 16 اکتوبر تک کون کون سے راستے بند ہوں گے؟ اس حوالے سے ٹریفک پلان جاری کردیا گیا ہے۔

تفصیلات کے مطابق شنگھائی تعاون تنظیم سربراہ اجلاس کے لیے راولپنڈی اوراسلام آباد کے لیے ٹریفک پلان جاری کردیا گیا، آج سے سولہ اکتوبر تک مختلف شاہراہیں بند رہیں گی ۔

ٹریفک پلان پرعملدرآمد کیلئے 1100سے زائد ٹریفک اہلکار مامورہوں گے جبکہ وفاقی دارالحکومت میں ہرقسم کی بھاری ٹریفک کاداخلہ ممنوع ہوگا۔

پلان کے تحت ایکسپریس وے زیرو پوائنٹ سے کورال چوک تک بندہوگی ، راولپنڈی آنےاورجانےوالےنائنتھ ایونیواستعمال کریں گے جبکہ فیصل ایونیو پر زیرو پوائنٹ سے نائنتھ ایونیو کی طرف ڈائیورژن ہوگی۔

ٹریفک پلان میں بتایا گیا بارہ کہو سے راولپنڈی کیلئے کورنگ روڈ، بنی گالہ اور لہتراڑروڈاستعمال کیاجائےگا جبکہ آئی جے پی روڈ سے فیض آباد کیلئے نائنتھ ایونیوسگنل سےاسٹیڈیم روڈ کا راستہ مختص کیا گیا ہے۔

ٹریفک پولیس کا کہنا ہے کہ جی ٹی روڈ کے ذریعے پشاور سے لاہور جانے والی ہیوی ٹریفک کو ٹیکسلا سے موٹر وے موڑا جائے گا جبکہ گاڑیاں چکری انٹر چینج سے اتر کر براستہ روات دوبارہ جی ٹی روڈ استعمال کرسکتی ہیں۔

جڑواں شہروں اورپشاورکی طرف جانے والی بڑی گاڑیوں کیلئے بھی یہی روٹ ہوگا جبکہ جڑواں شہروں میں میٹرو بس سروس 14 سے 17 اکتوبر تک بند رہے گی۔

،آئی جی اسلام آباد سیدعلی ناصررضوی کاکہناہےتمام ادارے اپنی ڈیوٹی سرانجام دے رہے ہیں، عوام کا تعاون بھی درکار ہے۔۔

کراچی: مجوزہ آئینی ترامیم پر سیاسی جماعتوں کو اعتماد میں لینے کے معاملے میں متحدہ قومی موومنٹ (ایم کیو ایم) پاکستان اور پیپلز پارٹی کی قیادت کے درمیان رابطہ ہوا ہے۔

پیپلز پارٹی کا وفد شیری رحمان کی قیادت میں کل ایم کیو ایم کی قیادت سے ملے گا جس میں نوید قمر، ڈاکٹر عاصم حسین سمیت دیگر رہنما شامل ہوں گے۔

ملاقات کل صبح 11 بجے اسلام آباد میں ہوگی جس میں ایم کیو ایم کی طرف سے گورنر سندھ کامران ٹیسوری، فاروق ستار اور دیگرشریک ہوں گے۔ ملاقات میں مجوزہ آئینی ترمیمی پیکج پر گفتگو ہوگی اور دونوں سیاسی جماعتیں اس حوالے سے اپنے نکات سامنے رکھیں گی۔

ذرائع نے بتایا کہ پیپلز پارٹی وفاقی کے ساتھ صوبائی آئینی عدالت کا فارمولہ بھی ایم کیو ایم کے سامنے رکھے گی جبکہ ایم کیو ایم پیپلز پارٹی کے سامنے بلدیاتی ترمیمی بل مسودے کی حمایت کی بات کرے گی۔

ایم کیو ایم بلدیاتی ترمیمی بل پر پارلیمان میں ووٹنگ کروانے اور پیپلز پارٹی سے اس کو سپورٹ کرنے کا مطالبہ کرے گی۔ جلد پیپلز پارٹی کی مرکزی قیادت کا ایم کیو ایم مرکز کے دورے کا بھی امکان ہے۔

گزشتہ روز وزیر اعظم شہباز شریف اور ایم کیو ایم وفد کے درمیان ہونے والی ملاقات کا احوال سامنے آیا تھا۔ ذرائع نے بتایا تھا کہ ملاقات میں ایم کیو ایم نے آئین کے آرٹیکل 140 اے سے متعلق مجوزہ بل بھی ترامیم میں شامل کرنے کا مطالبہ کیا۔

ذرائع کے مطابق ملاقات میں آئی پی پیز کے معاہدوں، بجلی کے ریٹ میں کمی پر بات چیت ہوئی تھی۔ وزیر اعظم نے آئی پی پیز کے معاملے پر ایم کیو ایم کے کردار کو سراہا اور عوامی مفادات اور نچلی سطح تک اختیارات منتقلی کی ترامیم کی حمایت کی تھی۔

ایم کیو ایم وفد کا کہنا تھا کہ آئینی ترامیم کا مجوزہ مسودہ ڈاکٹر فاروق ستار کو مل گیا۔
شہباز شریف نے حکومتی وفد کو معاملات پر فوری ایم کیو ایم سے مشاورت کی ہدایت کی تھی۔

ملاقات میں اسحاق ڈار، احسن اقبال، رانا ثنا اللہ، ایاز صادق، اعظم نذیر تارڑ اور خواجہ سعد رفیق موجود رہے جبکہ ایم کیو ایم وفد میں فاروق ستار، امین الحق اور کامران ٹیسوری شامل تھے۔

اسلام آباد : چینی وزیراعظم لی چیانگ شنگھائی تعاون تنظیم کےسربراہان اجلاس میں شرکت کے لئے آج پاکستان پہنچ رہے ہیں۔

تفصیلات کے مطابق اسلام آباد میں شنگھائی تعاون تنظیم کے اجلاس کے لیے مہمانوں کی آمد کا سلسلہ شروع ہوگیا۔

چین کے ریاستی کونسل کے وزیر اعظم مسٹر لی چیانگ آج چار روزہ دورے پر اسلام آباد پہنچیں گے، وزیر اعظم لی کا وفد وزراء اور اعلیٰ حکام ہر مشتمل ہوگا، جن میں وزارت خارجہ، تجارت، نیشنل ڈیولپمنٹ اینڈ ریفارم کمیشن اور چائنا انٹرنیشنل ڈیولپمنٹ کوآپریشن ایجنسی کے نمائندے شامل ہیں۔

چین کا پندرہ رکنی وفد پہلےہی پہنچ چکا ہے،دورے کے دوران چینی وزیراعظم شنگھائی تعاون تنظیم کےسربراہان اجلاس میں شرکت کریں گے، اس موقع پر دونوں ممالک اپنے بنیادی مفادات پر باہمی حمایت کی توثیق کریں گے۔

شنگھائی تعاون تنظیم اجلاس سے قبل پاک چین دو طرفہ مزاکرات ہوں گے ، وزیر اعظم شہباز شریف اور وزیر اعظم لی چیانگ اپنے اپنے وفود کی قیادت کریں گے، ملاقات میں پاکستان اور چین کے تعلقات کے تمام پہلوؤں پر تفصیلی گفتگو کریں گے، جن میں اقتصادی، معاشی اور تجارتی تعلقات اور سی پیک کے تحت تعاون شامل ہے جبکہ دونوں فریقین علاقائی اور عالمی صورتحال پر بھی تبادلہ خیال کریں گے۔

چینی وزیر اعظم صدر آصف علی زرداری سے بھی ملاقات کریں گے جبکہ پاکستان کے پارلیمانی رہنماؤں اور اعلیٰ فوجی قیادت سے بھی بات چیت کریں گے۔

اسلام آباد: وفاقی دارالحکومت میں تعلیمی اداروں کے اطراف اینٹی نارکوٹکس فورس نے منشیات فروشی کے خلاف کریک ڈاؤن کرتے ہوئے خاتون کو گرفتار کرلیا۔

اے این ایف ترجمان کے مطابق اسلام آبادکی ایک بڑی یونیورسٹی کے قریب خاتون منشیات فروش سے ایک کلو گرام ہیروئن اور 200 گرام چرس برآمد کی گئی۔

ترجمان نے بتایا کہ ملتان میں ایک یونیورسٹی کے قریب ملزم سے 495 گرام آئس برآمد کی گئی، گرفتار ملزمان نے تعلیمی اداروں کے طلبہ کو منشیات فروخت کرنے کا اعتراف کیا ہے۔

ترجمان کے مطابق کوہاٹ میں الفیصل بس اسٹینڈ پر ملزم کے قبضے سے 550 گرام چرس اور ڈیرہ غازی خان میں 2 کارروائیوں میں 2 ملزمان سے 1200گرام آئس برآمد کرکے انہیں گرفتار کرلیا گیا۔

ترجمان نے مزید بتایا کہ ملزمان سے مجموعی طور پر44 لاکھ روپے سے زائد مالیت کی 3.445 کلوگرام منشیات برآمد کی گئی جب کہ خاتون سمیت دیگر ملزمان کے خلاف انسداد منشیات ایکٹ کے تحت مقدمات درج کرلیے گئے ہیں۔

چین کے وزیراعظم لی کیانگ تین روزہ دورے پر کل پاکستان پہنچیں گے وہ وزیراعظم شہباز شریف کی دعوت پر یہ دو طرفہ دورہ کر رہے ہیں۔

دفتر خارجہ کے جاری بیان کے مطابق چین کے وزیراعظم لی کیانگ 14 سے 17 اکتوبر تک پاکستان کا دورہ کریں گے۔ وزیراعظم شہباز شریف کی دعوت پر چینی ہم منصب دو طرفہ دورہ کر رہے ہیں۔

ترجمان دفتر خارجہ کا کہنا ہے کہ چینی وزیراعظم کے ہمراہ تجارت، نیشنل ڈیولپمنٹ اینڈ ریفارم کمیشن کے حکام، چائنا انٹرنیشنل ڈیولپمنٹ کو آپریشن ایجنسی کے وزرا سمیت دیگر اعلیٰ حکام بھی وفد میں شامل ہوں گے۔

وزیراعظم شہباز شریف اور چینی وزیراعظم لی کیانگ اپنے اپنے وفود کی قیادت کریں گے۔ اس موقع پر اقتصادی، تجارتی تعلقات اور سی پیک کے تحت تعاون پر بات کی جائے گی جب کہ دونوں فریقین علاقائی اور عالمی پیش رفت پر بھی تبادلہ خیال کریں گے۔

چینی وزیراعظم صدر آصف علی زرداری، اعلیٰ عسکری قیادت اور پارلیمانی رہنماؤں سے بھی ملاقاتیں کریں گے۔

اس کے علاوہ چینی وزیراعظم لی کیانگ شنگھائی تعاون تنظیم (ایس سی او) کے سربراہی اجلاس میں بھی شرکت کریں گے۔

ترجمان دفتر خارجہ کا کہنا ہے کہ یہ دورہ پاکستان اور چین کی جانب سے "آل ویدر اسٹریٹجک کو آپریٹو پارٹنر شپ” کی اہمیت کا اظہار ہے۔

چین کے وزیراعظم لی کیانگ تین روزہ دورے پر کل پاکستان پہنچیں گے وہ وزیراعظم شہباز شریف کی دعوت پر یہ دو طرفہ دورہ کر رہے ہیں۔

دفتر خارجہ کے جاری بیان کے مطابق چین کے وزیراعظم لی کیانگ 14 سے 17 اکتوبر تک پاکستان کا دورہ کریں گے۔ وزیراعظم شہباز شریف کی دعوت پر چینی ہم منصب دو طرفہ دورہ کر رہے ہیں۔

ترجمان دفتر خارجہ کا کہنا ہے کہ چینی وزیراعظم کے ہمراہ تجارت، نیشنل ڈیولپمنٹ اینڈ ریفارم کمیشن کے حکام، چائنا انٹرنیشنل ڈیولپمنٹ کو آپریشن ایجنسی کے وزرا سمیت دیگر اعلیٰ حکام بھی وفد میں شامل ہوں گے۔

وزیراعظم شہباز شریف اور چینی وزیراعظم لی کیانگ اپنے اپنے وفود کی قیادت کریں گے۔ اس موقع پر اقتصادی، تجارتی تعلقات اور سی پیک کے تحت تعاون پر بات کی جائے گی جب کہ دونوں فریقین علاقائی اور عالمی پیش رفت پر بھی تبادلہ خیال کریں گے۔

چینی وزیراعظم صدر آصف علی زرداری، اعلیٰ عسکری قیادت اور پارلیمانی رہنماؤں سے بھی ملاقاتیں کریں گے۔

اس کے علاوہ چینی وزیراعظم لی کیانگ شنگھائی تعاون تنظیم (ایس سی او) کے سربراہی اجلاس میں بھی شرکت کریں گے۔

ترجمان دفتر خارجہ کا کہنا ہے کہ یہ دورہ پاکستان اور چین کی جانب سے "آل ویدر اسٹریٹجک کو آپریٹو پارٹنر شپ” کی اہمیت کا اظہار ہے۔

لاہور: جنگ سے متاثر غزہ سے تعلق رکھنے والے میڈیکل کے 27 فلسطینی طلباء پاکستانی یونیورسٹیوں میں تعلیم کے حصول کے لئے قاہرہ سے لاہور پہنچ گئے ہیں۔ 

قاہرہ میں پاکستانی سفارتخانے سے جاری بیان کے مطابق قاہرہ انٹرنیشنل ایئرپورٹ سے پاکستانی سفارتخانے کے حکام اور الخدمت فاوٴنڈیشن کے نمائندوں نے فلسطینی طلباء کو لاہور روانہ کیا۔ غزہ کے طلباء کا یہ بیج ان 192 فلسطینی میڈیکل طلباء کا حصہ ہے جو پاکستان میں میڈیکل تعلیم جاری رکھیں گے۔

وزیراعظم شہبازشریف کی ہدایت پر ان طلباء کو پاکستان کی میڈیکل یونیورسٹیوں میں مکمل فنڈڈ پروگرام کے تحت تعلیم کی سہولت فراہم کی جائے گی۔ یہ اقدام گلوبل ریلیف ٹرسٹ، ڈاکٹرز آف رحمان اور الخدمت فاوٴنڈیشن کے اشتراک سے کیا جا رہا ہے۔

اسلام آباد: پیٹرولیم مصنوعات کی قیمتوں میں 10 روپے فی لیٹر تک اضافے کا امکان ہے۔

ذرائع کے مطابق عالمی منڈی میں خام تیل کی قیمتوں میں مسلسل اضافے کے باعث پاکستان میں بھی 16 اکتوبر سے پیٹرولیم مصنوعات کی قیمتوں میں 10 روپے فی لیٹر تک اضافے کا امکان ہے۔ پیٹرول کی قیمت 3 روپے 95 پیسے تک بڑھ سکتی ہے۔

اوگرا 14 اکتوبر کو پیٹرولیم مصنوعات کی قیمتوں کے حوالے سے اپنی ورکنگ مکمل کرے گا اور آئندہ 15 روز کے لیے نئی قیمتوں کی سمری وزارت خزانہ کوارسال کرے گا۔ وزارت خزانہ 15 اکتوبرکو پیٹرولیم مصنوعات کی نئی قیمتوں کا اعلان کرے گی۔

ہائی اسپیڈ ڈیزل کی قیمت میں 10 روپے 26 پیسے فی لیٹر تک اضافے کا امکان ہے۔ عالمی منڈی میں عرب لائٹ خام تیل کی قیمت 79.27 ڈالر فی بیرل تک پہنچ گئی جبکہ آئندہ ہفتے خام تیل کی قیمتوں میں مزید اضافے کا امکان ظاہر کیا جا رہا ہے

ممبئی: بھارتی سیاستدان بابا صدیقی کے قتل کے شبے گرفتار2 ملزمان کا کہنا ہے کہ ان کا تعلق لارنس بشنوئی گروپ سے ہے۔

بھارتی میڈیا کے مطابق ممبئی میں قتل ہونے والے بھارتی سیاستدان بابا صدیقی کے قتل کے شبے میں گرفتار 2 ملزمان کا کہنا ہے کہ وہ لارنس بشنوئی گروپ کے لیے کام کرتے ہیں۔ قتل سے پہلے کئی روز تک بابا صدیقی کی نگرانی کی گئی۔ لارنس بشنوئی گروپ بالی ووڈ اسٹار سلمان خان کو متعدد بار قتل کرنے کی دھمکیاں دے چکا ہے۔

رپورٹ کے مطاابق لارنس بشنوئی یا دیگر ذرائع نے ملزمان کے بیان کی اب تک تصدیق یا تردید نہیں کی ہے۔میڈیا رپورٹس میں مزید کہا گیا ہے کہ گینگسٹر لارنس بشنوئی کے قریبی ساتھی نے کچھ عرصہ قبل بیان میں کہا تھا کہ اداکار سلمان خان کے دوستوں کو بھی نہیں چھوڑا جائے گا۔

جو بھی سلمان خان کا دوست ہے وہ ہمارے نشانے پر ہے۔سلمان خان کی ممبئی میں واقع رہائش گاہ پر فائرنگ کا واقعہ بھی پیش آچکا ہے۔ سلمان خان اور ان کے اہل خانہ واقعہ میں محفوظ رہے تھے جبکہ فائرنگ کرنے والے موٹرسائیکل سوار دو لڑکوں کو گرفتار کرلیا گیا تھا۔

راولپنڈی: پاک آرمی کی ٹیم نے برطانیہ میں ہونے والی کیمبرین پیٹرول 2024 کی مشق میں شرکت کی اور گولڈ میڈل حاصل کیا۔

پاک فوج کے شعبہ تعلقات عامہ (آئی ایس پی آر) کے مطابق پاک آرمی کی ٹیم نے ویلز، برطانیہ میں کیمبرین پیٹرول مشق 2024 میں شرکت کی۔

آئی ایس پی آر کے مطابق پاک آرمی ٹیم نے 4 سے 13 اکتوبر تک مشق میں شرکت کی جس میں 42 ممالک کی 128 ٹیموں نے حصہ لیا۔

آئی ایس پی آر کا بتانا ہے کہ آرمی کی ٹیم نے شاندار کارکردگی کا مظاہرہ کرتے ہوئے گولڈ میڈل حاصل کیا جو پوری قوم اور پاکستان آرمی کے لیے ایک فخر کا لمحہ ہے۔

پاک فوج کے شعبہ تعلقات عامہ کے مطابق 65 ویں مشق کیمبرین پیٹرول نےاپنے پیشہ ورانہ معیار کو برقرار رکھا ہے، مقابلے میں 48گھنٹے میں 60کلومیٹر کافاصلہ طے کرتے ہوئے مخصوص ٹاسک مکمل کرنا تھے۔