ایمزٹی وی (اسپورٹس)پاکستان کو ٹی 20 ورلڈ کپ کا ٹائٹل اپنے نام کیے ہوئے 8 سال مکمل ہوگئے۔ پاکستان نے 2009 میں یونس خان کی قیادت میں آئی سی سی ورلڈ ٹی ٹوئنٹی ٹرافی اپنے نام کی تھی۔ میگا ایونٹ 5 سے 21 جون تک انگلینڈ میں کھیلا گیا تھا جس میں 12ٹیمیں شریک ہوئی تھیں۔ سپر ایٹ فارمیٹ کے تحت پاکستان، سری لنکا، جنوبی افریقہ اور ویسٹ انڈیز نے سیمی فائنلز کے لئے کوالیفائی کیا تھا۔
پاکستان نے شاہد آفریدی کی شاندار کارکرد گی کی بدولت جنوبی افریقہ کو زیر کرتے ہوئے فائنل میں رسائی حاصل کی تھی اور لارڈز میں سری لنکا کو شکست دی تھی، آئی لینڈرز نے 6 وکٹ پر 138رنز اسکور کئے تھے، گرین شرٹس نے شاہد آفریدی کی دھواں دار اننگز کی بدولت 8 وکٹ سے کامیابی حاصل کرتے ہوئے ٹرافی پر قبضہ جمایا تھا۔ بوم بوم نے 54 رنز کی ناقابل شکست اننگز کھیلی تھی ایک وکٹ بھی حاصل کی تھی اور مین آف دی میچ قرار پائے تھے۔
واضح رہے کہ 18 جون کو قومی ٹیم سرفراز احمد کی قیادت میں چیمپئنز ٹرافی جیتنے میں کامیاب ہوئی اور پاکستان کیلیے ٹائٹل کے 8 سالہ قحط کو ختم کیا۔