ایمزٹی وی(تعلیم)جامعہ کراچی کے ڈائریکٹر ایڈمیشن پروفیسر ڈاکٹر خالد عراقی کے اعلامیہ کے مطابق کراچی یونیورسٹی بزنس اسکول کے تحت اسپیشلائزڈ ڈگری پروگرام جن میں ایم بی اے (ڈیڑھ سالہ اور دوسالہ ) مارکیٹنگ ،ایچ آرایم،فائنانس اینڈ انویسٹمنٹس،اسلامک بینکنگ،سپلائی چین مینجمنٹ اور ای ایم بی اے (ویک اینڈڈھائی سالہ پروگرام)میں داخلوں کے لئے فارم جمع کرانے کی تاریخ میں 27 جولائی 2016 ء تک توسیع کردی گئی ہے۔

داخلہ فارم جامعہ کراچی کی ویب سائٹ سے ڈائون لوڈ کرکے 1000 روپے کے عوض جمع کرائے جاسکتے ہیں۔فارم یوبی ایل بینک کائونٹر واقع سلور جوبلی گیٹ اور یوبی ایل مین کیمپس برانچ جامعہ کراچی کے علاوہ یوبی ایل برانچ ناظم آباد چورنگی اور پی آئی ڈی ہاؤس برانچ میں بھی جمع کرائے جاسکتے ہیں۔ پروفیشنل ڈگری( بی ای،ایم بی بی ایس،ایل ایل بی،سی پی اے ،اے سی سی اے اور سی اے )رکھنے والے بھی داخلہ فارم جمع کراسکتے ہیں۔

ایمزٹی وی(مظفرآباد)مسلم لیگ (ن) آزاد کشمیر کی پارلیمانی پارٹی کا اجلاس صدرآزاد کشمیرفاروق حیدر کی زیر صدارت ہوا۔ اجلاس میں مسلم لیگ (ن) آزاد کشمیر کے نومنتخب اراکین اسمبلی نے شرکت کی۔

پارلیمانی پارٹی کے ارکان نے راجا فاروق حیدر پر بھرپور اعتماد کا اظہار کرتے ہوئے وزیراعظم کے طور پر نامزد کرلیا ہے تاہم اس کی حتمی توثیق پارٹی کے صدر وزیراعظم نواز شریف کریں گے۔

ایمزٹی وی(تعلیم)ثانوی تعلیمی بورڈ کراچی نے سالانہ امتحان برائے سال 2017 جماعت نہم سائنس و جنرل گروپ (ریگولر) طلباءوطالبات کے انرولمنٹ فارم جمع کرانے کی تاریخ کا اعلان کر دیا ہے۔ اعلامیہ کے مطابق انرولمنٹ فارم 25جولائی سے 25اگست 2016تک بغیر لیٹ فیس کے جمع کئے جاسکیں گے یہ تمام فارمز اسکولوں کے سربراہان اپنے اتھارٹی لیٹر اورشناختی کارڈ کی فوٹو کاپی کے ساتھ سیکرٹری بورڈ کے نام پے آرڈر کے ذریعے جمع کرا سکتے ہیں۔

انرولمنٹ فارمز بورڈ آفس کے ایگزامینیشن اسٹور سے حاصل کئے جا سکتے ہیں جبکہ یہ فارمز نیشنل بینک، حبیب بینک، عسکری، بینک ،یونائیٹڈ بینک پر بھی دستیاب ہوں گے اس ضمن میں واضح کیا گیا ہے کہ25اگست 2016 کے بعد شیڈول کے مطابق لیٹ فیس کے ساتھ فارم وصول کئے جائیں گے اور بغیر لیٹ فیس کی وصولی کی تاریخ میں کسی بھی قسم کی توسیع نہیں کی جائے گی۔

ایمزٹی وی(مظفرآباد) پیپلزپارٹی آزاد کشمیر کی پارلیمانی کمیٹی کے اراکین کا اجلاس سابق وزیراعظم چوہدری عبدالمجید کی صدارت میں ہوا۔

اجلاس میں پارلیمانی کمیٹی کے اراکین نے بدترین شکست کا ذمہ دار ٹھہراتے ہوئے چوہدری عبدالمجید کو شدید تنقید کا نشانہ بنایا جس پرچوہدری عبدالمجید نے کہا کہ اگراراکین سمجھتے ہیں کہ انتخابات میں شکست کی ذمہ داری میری ہے تو میں پارٹی صدارت کا عہدہ چھوڑنے کو تیار ہوں۔

واضح ریے آزادکشمیر میں ہونے والے عام انتخابات میں مسلم لیگ ن نے واضح طور پر پاکستان پیپلزپارٹی کوبدترین شکست دی تھی۔

ایمزٹی وی(اسلام آباد) پاکستان قومی زبان تحریک کے زیر اہتمام قومی نفاذ اردو کانفرنس منعقد کی گئی۔ ایٹمی سائنسدان ڈاکٹرعبدالقدیر نےشرکاء سے خطاب کے دوران اردو زبان کی اہمیت کو اجاگر کرتے ہوئے کہا کہ ہر صوبے میں اردو اور علاقائی زبان پڑھائی جانی چاہیے جب کہ اردو زبان کو ہرجماعت میں لازمی قرار دے دیا جائے۔ ان کا کہنا تھا کہ اردو بڑی شیریں زبان ہے، اردو خوب پڑھیں لیکن تکنیکی چیزوں میں محدود نہ ہوں جب کہ میٹرک کے بعد تکنیکی نصاب پر زیادہ توجہ دی جانی چاہئیے، عالمی رینکنگ میں ٹاپ 500 یونیورسٹیز میں پاکستان کی کسی یونیورسٹی کا نام شامل نہیں۔

سیمینار میں خطاب کرتے ہوئے مشیروزیراعظم عرفان صدیقی کا کہنا تھا کہ ہمیں اس بات کا اعتراف کرنا ہوگا کہ ہم مسخ شدہ نظام تعلیم کو درست کرنے میں ناکام رہے اگر ہمارا نظام تعلیم اردو ک سانچے میں ڈھل جاتا توآج ہم بہت آگے ہوتے۔ پاکستان کے آئین میں اردو زبان کے نفاذ کا واضح طور پر لکھا ہوا ہے لیکن آج تک اس کا نفاذ نہیں ہوسکا جس کی بڑی وجہ بیورو کریسی کا تعاون نہ ملنا ہے جبکہ نفاذ اردو کے عدالتی فیصلے کے خلاف کابینہ اجلاس میں کئی وزرا نے بھی آوازیں بلند کیں۔ عرفان صدیقی نے مزید کہا کہ اردو ہماری یکجہتی کی علامت ہے اور اس کی ترویج کے لئے حکومت اقدامات بھی کررہی ہے ۔

وزیر اعظم نواز شریف نے بھی دس نکاتی ایجنڈا دیتے ہوئے کہا ہے کہ اردوزبان کو ملک میں جلد ازجلد نافذ کیا جائےاور تمام وزارتیں دس نکاتی ایجنڈے پر عملدرآمد کرتے ہوئے رپورٹ پیش کریں۔ تمام وزارتوں کی ویب سائٹس اردو زبان میں منتقل کی جارہی ہیں اور اس پر 80 فیصد عملدرآمد بھی ہوچکا ہے۔ عدالتوں میں بھی ہونے والی تمام کارروائی انگریزی میں ہوتی ہے لیکن اب عدالتوں میں کیسز اور سمریاں بھی اردو زبان میں ہوں گی۔

ایمزٹی وی(تعلیم)کراچی سمیت سندھ بھر میں موسم گرما کی چھٹیاں ختم ہوگئی ہیں، جس کے بعد سرکاری، نیم سرکاری اور نجی اسکولوں اور کالجوں میں درس وتدریس کا عمل بحال ہوگیا ہے۔ نجی اسکولوں میں پہلے ہی روز روایتی گہما گہمی نظر آئی جب کہ بچوں کی بڑی تعداد اپنے دوستوں سے 2 ماہ بعد ملنے پر خوش اور چھٹیوں کے دوران اپنی سرگرمیوں سے متعلق بتانے کے لیے بے تاب نظر آئے۔ سرکاری اسکولوں میں تدریسی عملہ تو حاضر ہوا لیکن طلبا کی تعداد نہ ہونے کے برابر رہی، اساتذہ کا کہنا تھا کہ تعطیلات کے بعدابتدائی دنوں میں طلبہ کی تعداد میں واضح کمی ہوتی ہے جبکہ بچے بھی پڑھنے میں دلچسپی نہیں لیتے۔

دوسری جانب کراچی سمیت سندھ کے شہری علاقوں میں درجنوں اسکول تاحال بند ہیں اور انہوں نے یکم اگست سے ہی تدریسی عمل شروع کرنے کا اعلان کررکھا ہے۔
ترجمان محکمہ تعلیم سندھ کی جانب سے جاری بیان میں کہا گیا ہے کہ نجی اسکول محکمہ تعلیم کے احکامات پر عمل کریں، احکامات نہ ماننے والے اسکول مالکان کے خلاف کارروائی ہوگی،چند نجی اسکولز کو زبردستی بند رکھا گیا ہے جواسکول بند ہیں انہیں شو کاز جاری کیے جا رہے ہیں۔
واضح رہے کہ سندھ میں ہر سال روایتی طور پر یکم جون سے 31 جولائی تک موسم گرما کی تعطیلات ہوتی ہیں لیکن رواں برس شدید گرمی کو دیکھتے ہوئے صوبائی حکومت نے 19 مئی سے 24 جولائی تک سالانہ چھٹیوں کا اعلان کردیا تھا۔

ایمزٹی وی(تعلیم) تحریک انصاف کے چئیرمین عمران خان کا کہنا ہے کہ پاک ترک اسکولوں کی بندش سے پاکستان میں شرح خواندگی میں مزید کمی آئے گی لہذاٰ اسکولوں کو بند نہیں ہونا چاہئے۔ سماجی رابطے کی ویب سائٹ ٹویٹر پر پاکستان میں موجود پاک ترک اسکولوں کی ممکنہ بندش پر رد عمل کا اظہار کرتے ہوئے چئیرمین تحریک انصاف کا کہنا تھا کہ ہم مضبوطی سے ترک جمہوریت کے ساتھ کھڑے ہیں تاہم پاکستان میں موجود پاک ترک اسکولوں کو بند نہیں ہونا چاہئے کیونکہ پاکستان میں پہلے ہی شرح خواندگی انتہائی کم ہے اوراگر ان اسکولوں کو بھی بند کردیا گیا تو یہ عمل ملک میں شرح خواندگی میں مزید کمی کا سبب بنے گا۔

While we stand firmly behind Turkish democracy, closing Pak-Turk schools in Pak, which has a high illiteracy rate, could be disastrous.

— Imran Khan (@ImranKhanPTI) July 24, 2016

واضح رہے کہ گزشتہ روز پاکستان میں تعینات ترک سفیر صادق بابر کا کہنا تھا کہ ترکی میں فوجی بغاوت کی ناکام کوشش کے پیچھے گولن تحریک تھی جس کے ترک حکومت کے پاس ٹھوس شواہد موجود ہیں، اس لیے انقرہ نے دوست ممالک سے درخواست کی ہے کہ وہ اپنے ممالک میں گولن گروپ کی سرگرمیوں کو روکیں اور پاکستان میں گولن کے تحت چلائے جانے والے اداروں کے حوالے سے ترک حکومت پاکستانی حکام کے ساتھ رابطے میں ہے،امید ہے کہ پاکستانی حکومت اپنے ملک میں فتح اللہ گولن کے تحت چلنے والے ادارے بند کردے گی

ایمزٹی وی(اسلام آباد) پاکستان نائیجیریا کو 10 سپر مشاق طیارے فراہم کرے گا، دفاعی معاہدے کیلیے لیٹر آف کریڈٹ کو ستمبر تک حتمی شکل دی جائے گی۔ طیاروں کی فروخت تقریباً ایک ارب 25 کروڑ 74 لاکھ روپے کے عوض کی جائے گی، ایک سپر مشاق طیارے پر لاگت کا تخمینہ 12 کروڑ 58 لاکھ روپے ہے. رپورٹ کے مطابق پاکستان نائیجیریا معاہدہ رواں سال کے اوائل میں طے ہوا۔

ذرائع کے مطابق سپر مشاق طیاروں کی فراہمی رواں سال شروع ہو گی اور آئندہ سال تک مکمل کر لی جائے گی، پاک فضائیہ کے پائلٹ نائیجیرین ہوا بازوں کو تربیت فراہم کریں گے، طیارے نائیجیرین فضائیہ کے301 ہوا بازی تربیتی اسکول کڈونا کا حصہ ہوں گے، نائیجیریا سپر مشاق طیارے استعمال کرنے والا چھٹا ملک بن جائے گا، اس سے قبل سعودی عرب، ایران، شام، اومان اور جنوبی افریقہ بھی سپر مشاق طیارے استعمال کر رہے ہیں۔

ایمزٹی وی(اسلام آباد)پاکستان نے جی ایس پی پلس اسٹیٹس برقرار رکھنےکےلیےمقامی قوانین میں مطلوبہ ترامیم کرکے چائلڈ پروٹیکشن کنونشن پرعمل درآمد یقینی بنا دیا ہے۔ بچوں سے مزدوری لینے اورجنسی تشددکے حوالے سے عالمی سطح پرحقوق انسانی کی تنظمیوں کی طرف سے پاکستان کوسخت تنقیدکاسامناتھا اوریورپی یونین نے بھی اس جانب مناسب اقدام نہ کرنے پر جی ایس پی پلس اسٹیٹس واپس لینے کی دھمکی دی تھی جبکہ قصور واقعے نے بھی حکومت کو بچوں کے تحفظ کیلیے مناسب قانون سازی کرنے پر مجبور کیا۔ 

چائلڈ پروٹیکشن ایکٹ مجریہ 2016 اورکرمنل لا سیکنڈ امنڈمنٹ مجریہ 2016 کی روسے تعزیرات پاکستان میں ترمیم کرکے جرم کرنے کی صورت میں بچوں کی عمرکی حدمیں اضافہ کیا گیا ہے۔ قانون میں ترمیم کے بعد جرم کی صورت میں بچے کی کم ازکم عمرکی حد 7 سال سے بڑھا کر10 سال کردی گئی ہے جب کہ زیادہ سے زیادہ عمر 12 سے بڑھا کر14 سال کردی گئی ہے۔ قانون میں ترمیم کے بعد10سال سے کم عمرکابچہ معصوم تصورہوگا اوراسے جرم میں ملزم نامزد نہیں کیاجاسکے گا جب کہ 12 سال سے بڑا اور14 سال سے کم عمرکا بچہ اپنی بے گناہی خودثابت کرے گا۔ 

قوانین میں ترمیم کے بعداب بچوں کی تصاویراوروڈیو بنانا۔ انھیں جنسی تعلق کی ترغیب، تشدد، بچوں کو جنسی مقاصد کیلیے اسمگل کرنا قابل گرفت جرائم میں شامل کردیا گیا ہے جس میں 7 سال سے عمرقید تک سزا ہوسکتی ہے جب کہ جنسی تشدد کے بارے قانون میں ترمیم کے نئے مجوزہ بل میں کم عمر بچوں کے ساتھ جنسی فعل کی صورت میں سزائے موت تجویزکی گئی ہے۔ قانون میں ترمیم کانیامجوزہ بل پارلیمنٹ کے آئندہ مشترکہ اجلاس میں منظوری کے لیے پیش کیاجائے گا۔ بچوں سے مشقت لینا قانوناً جرم قرار دیاگیا ہے، بچوں سے مزدوری کرانے والوں کوقیدوجرمانے کی سزائیں دی جاسکیں گی۔ ذرائع کے مطابق جی ایس پی پلس کا اسٹیٹس برقرار رکھنے کیلیے پاکستان کو27عالمی قوانین اورکنونشنزپرعمل درآمد یقینی بناناہے جن میں انٹرنیشنل لیبرلاکی توثیق اورسزائے موت کاخاتمہ شامل ہے۔ ذرائع کے مطابق یورپی یونین کی طرف سے سزائے موت کی تعدادمیں اضافے، جبری گمشدگیوں اورسویلین افراد کے فوجی عدالتوں میں ٹرائل پرسخت تحفظات سامنے آئے ہیں اوراس ضمن میں حکومت پاکستان کو متعدد بارتحریری طورپرآگاہ بھی کیاگیاہے۔ ذرائع نے بتایاکہ پاکستان کے حوالے سے موجود خدشات دورکرنے اوریورپی یونین کوقائل کرنے کے لیے قومی کمیشن برائے انسانی حقوق کے چیئرمین جسٹس (ر) علی نوازچوہان کوخصوصی مشن پریورپ بھیجا گیا تھا، انھوں نے برسلزاورجرمنی میں یورپی یونین کے اعلیٰ عہدے داروں کے ساتھ ملاقاتیں کرکے انھیں پاکستان کی صورت حال سے آگاہ کیا اور دہشت گردی کے خلاف جاری جنگ میں کامیابیوں کیلیے کچھ رعایتیں دینے کی درخواست کی۔

ایمزٹی وی(تعلیم)ثانوی تعلیمی بورڈ نے نویں جماعت کے سائنس اور جنرل گروپ کے انرولمنٹ فارم جمع کرانے کی تاریخ کا اعلان کردیا۔اعلامیہ کے مطابق انرولمنٹ فارم25 جولائی سے25اگست تک قائم کرائے جاسکتے ہیں۔