ایمز  ٹی وی(کراچی)وزیراعظم نواز شریف نے کہا ہے کہ کراچی آپریشن کے اچھے نتائج برآمد ہورہے ہیں جب کہ آپریشن کسی جماعت کے خلاف نہیں بلکہ جرائم پیشہ افراد کے خاتمے کے لئے ہے جو ہر حال میں جاری رہے گا۔

سیالکوٹ چیمبر آف کامرس کی تقریب سے خطاب کرتے ہوئے وزیراعظم نواز شریف کا کہنا تھا کہ  ملک میں بندوق لے کر پھرنے کے کلچر کو ختم کرنے کا مصمم ارادہ کر رکھا ہے،کراچی آپریشن کے اچھے نتائج سامنے آرہے ہیں اور یہ کسی جماعت کے خلاف نہیں بلکہ شہر کو روشنیوں کا شہر بنانے کے لئے جرائم پیشہ افراد کے خلاف کیا جارہا ہے جو دہشت گردوں اور جرائم پیشہ افراد کے خاتمے تک جاری رہے گا جس سے کسی صورت پیچھے نہیں ہٹیں گے، جمہوری حکومت اور قوم کا یہی ایجنڈا ہے کہ ملک کو دہشت گردوں اور جرائم پیشہ افراد سے پاک کریں۔ انہوں نے کہا کہ دہشت گردی کے مسئلے پر پہلے کسی حکومت نے ہاتھ  نہیں ڈالا لیکن ہم نے پہلے مذاکرات کے ذریعے مسئلہ حل کرنے کی کوشش کی اور جب بات نہ بنی تو آپریشن ضرب عضب کا آغاز کیا جس کے نتیجے میں دہشت گردوں کی کمر توڑ کر رکھ دی گئی ہے جس میں خاص طور پر پاک فوج مبارکباد کی مستحق ہے۔

وزیراعظم نواز شریف کا کہنا تھا کہ ملک میں ہمیشہ ترقی جمہوری دور میں ہوئی اور آمروں کے دور میں ملک پیچھا کی جانب گیا اس کے باوجود صرف سیاستدانوں کی کوتاہیاں بتائی جاتی ہیں اور آمروں کی کیوں نہیں سامنے لائی جاتیں، اگر 1999 کی حکومت کو ہٹایا نہ جاتا تو آج ملک کو بحرانوں کو سامنا نہ کرنا پڑتا، 1997 میں دہشت گردی، گیس اور بجلی  جیسے بحران نہیں تھے اور ان پر وقت خرچ نہیں ہوتا تھا اور تمام تر توجہ ترقیاتی کاموں پر ہوتی تھی تاہم اب بیشتر وقت بجلی،گیس اور دہشت گردی جیسے مسائل پر خرچ کرنا پڑتا ہے جس کی وجہ سے ترقیاتی کاموں پر بہت کم وقت دینے کا موقع ملتا ہے۔ انہوں نے کہا کہ ہم چین سے4 ہزارمیگاواٹ بجلی خریدرہے ہیں، کوئلے اور ایل این جی سے سستی بجلی پیدا ہوگی اور 2017 کے اختتام تک 10 ہزار میگاواٹ اضافی بجلی پیدا ہوگی جس کے بعد بجلی کی تمام ترضروریات پوری کی جاسکیں گی۔

وزیراعظم نے سیالکوٹ سے لاہور ایکسپریس وے بنانے کا اعلان کرتے ہوئے کہا کہ اب سوچنا پڑتا ہے کہ پہلے بجلی بنائیں یا موٹروے، ہمیں اتنے بڑے چیلنجز کا سامنا ہے کہ ان کے تصور سے بھی خوف آتا ہے جب کہ انتخابی نعروں پر نہیں عملی اقدامات پر یقین رکھتے ہیں

ایمز ٹی ای(کراچی)ڈی جی رینجرز بلال اکبر نے کراچی کے عوام سے اپیل کی ہے کہ وہ حفاظت کے نام پر لگائے گئے گیٹ اور رکاوٹیں تین دن کے اند ہٹا دیں۔

ڈی جی رینجرز نے اپنی اپیل میں کہا ہےکہ راستوں میں بنی رکاوٹیں عوام اور آپریشن میں مشکلات پیدا کرتی ہیں، عوام انہیں تین دن میں خود ختم کردیں، تین دن کے بعد رکاوٹوں کیخلاف بلاامتیاز آپریشن کا آغاز کیا جائے گا۔

کراچی کے علاقے نارتھ ناظم آباد میں خود کش حملے پر رینجرز کے ترجمان کا کہنا ہے کہ موبائل پر دہشتگردوں کا حملہ رینجرز کی امن کیلئے کارروائیوں کا ردعمل ہے، اس حملے کا مقصد ریاست دشمن عناصر کیخلاف کارروائیوں کو روکنا ہے، رینجرز نے رواں سال چھ سو چونسٹھ کارروائیوں میں نو سو باسٹھ ملزمان کو گرفتار کیا، جن میں سے اٹھہتر دہشتگردوں ایک سو بارہ ٹارگٹ کلرز پر مقدمات قائم کیے۔

ترجمان کے مطابق اٹھارہ بھتہ خوروں، بائیس اغواء کاراور تینتالیس ڈاکوؤں پر مقدمات کیے، رینجرز سے بیس مقابلے میں اڑتیس دہشت گرد اور گینگسٹرز مارے گئے جبکہ نو کو گرفتار کیا گیا