ایمز ٹی وی (پشاور) موسم سرما کی تعطیلات کے بعد چیف آف آرمی سٹاف جنرل راحیل شریف اہلیہ سمیت آرمی پبلک اسکول پہنچ گئے جہاں اُنہوں نے اسکول پہنچنے والے بچوں کو خوش آمدید کہا،پاک جنرل راحیل شریف کاکہناتھاکہ بچوں کے حوصلے بلند ہیں ، پاکستانی قوم ناقابل شکست ہے ، اعلامیہ کے مطابق آرمی چیف گیٹ پر کھڑے سانحہ پشاور کے بعد پہلی مرتبہ سکول کھلنے پر پہنچنے والے ’غازی ‘بچوں کو خوش آمدید کہتے رہے ، اُنہوں نے طلباءکے علاوہ ساتھ پہنچنے والے والدین سے بھی ملاقاتیں کیں ۔ آرمی چیف کا آرمی پبلک سکول کے دورے پر طلبہ و اساتذہ سے خطاب میں کہا کہ دہشتگردی کیخلاف جنگ میں ہر صورت کامیابی حاصل کرینگے ، اس قوم کو کوئی بھی چیز شکست نہیں دے سکتی ۔ دہشتگردی کیخلاف جنگ میں ہر صورت کامیابی حاصل کرینگے ۔ آرمی چیف کے بعد اب عمران خان بھی اپنی اہلیہ کے ساتھ آرمی پبلک اسکول جا نے کے لئے روانہ ہو گئے ہیں

ایمز ٹی وی (کراچی) ملک کے سب سے بڑے شہر کراچی سمیت سندھ بھر کے بیشتر نجی اور سرکاری تعلیمی ادارے کھل گئے ہیں تاہم بعض مزید نجی اسکول اور کالج تعطیلات میں مزید 2 روز تک بند رکھنے کے بعد 15جنوری سے تدریسی سلسلہ شروع کریں گے ، شہرقائد سمیت صوبے بھر کے اکثر تعلیمی اداروں میں سیکیورٹی کے مناسب انتظامات نہیں کئے گئے، بیشتر نجی تعلیمی اداروں نے حکومت کی آنکھوں میں دھول جھونکنے کے لئے حفاظتی انتظامات کے نام پرصرف خانہ پری کی ہے۔ ملک کے دیگر شہروں کی طرح 16 دسمبر کو دہشت گردی کے شکار آرمی پبلک اسکول میں بھی تدریسی عمل بحال ہوگیا ہے، آرمی چیف جنرل راحیل شریف نے اسکول میں بچوں کا استقبال کیا اور بچوں کے والدین سے ملاقات کی۔ باچاخان یونیورسٹی چارسدہ اور صوابی کے غلام اسحاق خان انسٹی ٹیوٹ میں سیکیورٹی انتظامات نامکمل ہونے کی وجہ سے موسم سرما کی  تعطیلات میں غیرمعینہ مدت تک توسیع کردی ہے۔ لاہور سمیت پنجاب بھر میں مشنری اسکولوں کے علاوہ تمام نجی اورسرکاری تعلیمی اداروں میں تدریسی عمل شروع ہوگیا ہے تاہم مشنری اسکول 19 جنوری سے تدریسی عمل کا آغاز کریں گے ۔اس کے علاوہ راولپنڈی کا آرمی پبلک اسکول بھی سیکیورٹی وجوہات کے باعث آج نہیں کھل سکا۔ بلوچستان کے صوبائی دارالحکومت کوئٹہ سمیت صوبے بھر میں تعلیمی اداروں میں تدریسی عمل بحال ہوگیا ہے۔

 .ایمز ٹی وی (ملتان) بھکر سے ملتان جانے والی مسافر بس صبح ساڑھے سات بجے کروڑ پھاٹک پہنچی تو محمود کوٹ جانے والی خالی ریل کے انجن سے ٹکرا گئی جس کے نتجے میں 35 افراد زخمی ہوگئے، زخمیوں کو ڈسٹرک ہیڈ کواٹر اسپتال لیہ اور تحصیل اسپتال کروڑ میں منتقل کردیا گیا۔ ریلوے ٹریک سے بس کے ملبہ کو ہٹاکر ٹریک بحال کرنے کا کام جاری ہے۔

.ایمز ٹی وی (کراچی) کے علاقے نارتھ ناظم آباد میں قلندریہ چوک کے قریب بم برآمد ہوا ہے۔بم جامع مسجد قلندریہ کے گیٹ کے سامنے سے ملا۔ذرائع کے مطابق قلندریہ چوک کے قریب مشکوک بیگ سےڈھائی سے 3 کلو وزنی بم برآمد ہوا جسے ناکارہ بنا دیاگیا۔ بم کو مسجد کے قریب رکھا گیا تھا۔قانون نافذ کرنیوالےاداروں کے اہلکاروں نے علاقے کا محاصرہ کرلیا۔ انڈا موڑسے قلندریہ آنے اورجانے والی سڑک پرٹریفک بند کردیا گیا ۔ علاقے سے مشکوک شخص کو حراست میں لے لیا گیا جو موبائل سے علاقے کی وڈیو بنارہا تھا۔ بم پرالقاعدہ برصغیرلکھا ہوا ہے

ایمز ٹی وی (میرپورخاص) پولیس کے مطابق مطلوب جرائم پیشہ افراد کی موجودگی خفیہ اطلاع پر میر پورخاص میں محمود آباد کے علاقے میں حیدرآباد پولیس نے کارروائی کی جس کے دوران ڈاکوؤں نے بھاری ہتھیاروں کا استعمال کیا جس سے پولیس افسران اور اہلکاروں کی ہلاکتیں ہوئیں جبکہ 8 اہکار زخمی بھی ہوئے۔آپریشن کے دوران پانچ خواتین بھی زخمی ہوئیں۔کارروائی میں 12 تھانوں کے پولیس اہلکاروں نے حصہ لیا۔پولیس کا دعویٰ تھا کہ ڈاکووں کے خلاف رات دو بجے آپریشن شروع کیا گیا تھا جو کہ صبح تک جاری رہا۔زخمی پولیس اہلکاروں اور خواتین کو طبی امداد کے لیے حیدرآباد منتقل کیا گیا۔ڈی آئی جی ثناء اللہ عباسی کے مطابق ملزمان اغواء برائے تاوان کی متعدد وارداتوں میں مطلوب تھے۔ثناء اللہ عباسی نے بتایا کہ کارروائی محمود آباد میں علی تالپور ٹاون میں کی گئی۔ان کا کہنا تھا کہ ڈاکوؤں کی فائرنگ سے ایس ایچ او مارکیٹ واحد بخش لغاری اور ایس ایچ او لطیف آباد حسن عابدی سمیت اہلکار انور جمیل اور دلبر ہلاک ہوئے۔انہوں نے کہا کہ ایس ایچ او ممتاز بروہی سمیت 8 اہلکار زخمی ہوئے جن کو اسپتال منتقل کر دیا گیا۔ثناء اللہ عباسی کا دعویٰ تھا کہ ہلاک ہونے والے ڈاکو اغواء، ڈکیتی سمیت کئی مقدمات میں ملوث تھے

ایمز ٹی وی (پنجاب) ذرائع کے مطابق سرائے عالم گیر کے دور دراز علاقے میں بولانی پولیس اسٹیشن کی حدود میں گاؤں ڈھوک کھجور کے ایک حجام نے  حجام اپنی دکان میں مبینہ طور پر رسالت مآب حضرت محمد ﷺ کی شان میں گستاخانہ الفاظ کہے۔اور مبینہ طور پر توہین رسالت ﷺ کا مرتکب ہوا، لیکن جب معاملہ پولیس اور علاقے کے دیگر لوگوں تک پہنچا تو ملزم آزاد کشمیر فرار ہوگیا، تاہم پولیس نے اسے گرفتار کرلیا۔ملزم کے خلاف محمد بوٹا کی مدعت میں سیکشن 295C کے تحت ایف آئی آر نمبر 6/15 درج کی گئی۔جمعے کو پولیس نے ملزم کو مقامی عدالت میں پیش کیا جہاں سے اسے جوڈیشل ریمانڈ پر ڈسٹرکٹ جیل بھیجنے کے احکامات جاری کیے گئے۔

ایمز ٹی وی (راولپنڈی)  راولپنڈی میں امام بارگاہ عون محمد رضوی کے قریب بم دھماکے میں آٹھ افراد ہلاک ہو گئے۔، جمعہ کو چٹیاں ہٹیاں میں ہونے والے دھماکے میں دو پولیس اہلکاروں سمیت 16 افراد زخمی بھی ہوئے دھماکے کے وقت امام بارگاہ میں محفل میلاد جاری تھی جبکہ شیعہ علما کونسل نے تین روزہ سوگ کا اعلان کیا ۔خبر رساں ادارے اے پی کے مطابق پولیس افسر راجہ عبدالرشید نے اسے خود کش حملے قرار دیا، تاہم بم ڈسپوزل سکواڈ کے مطابق دھماکا خیز مواد نصب کیا گیا تھا۔عینی شاہدین کے مطابق مبینہ خود کش بمبار نے امام بارگاہ میں داخل ہونے کی کوشش کی تاہم روکے جانے پر اس نے خود کو اڑا لیا۔بم ڈسپوزل اسکواڈ نے حملے کے بعد علاقے کی چیکنگ کے دوران امام بارگاہ کے قریب سے پانچ کلو وزنی بم برآمد کرتے ہوئے اسے ناکارہ بنا دیا۔وزیر داخلہ چوہدری نثار علی خان نے حملے کی رپورٹ طلب کرلی۔ ان کا کہنا تھا کہ 'ایسے واقعات پاکستانیوں کے حوصلے پست نہیں کرسکتے'۔دھماکے کے وقت راولپنڈی کے ڈسٹرکٹ ہیڈ کوارٹر اسپتال میں ایمر جنسی نافذ کردی گئی۔متحدہ قومی موومنٹ کے قائد الطاف حسین، پاکستان پیپلز پارٹی کے شریک چیئرمین آصف علی زرداری، مجلس وحدت مسلمین کے سربراہ علامہ راجہ ناصرعباس اورعوامی مسلم لیگ کے سربراہ شیخ رشید نے دھماکے کی مذمت کی 

ایمز ٹی وءی (ملتان ) سینئر سیاستدان جاوید ہاشمی نے کہا ہے کہ  عمران خان کی شادی سے  یہ تبدیلی آئی ہے کہ اب ہماری بیویاں بھی خوفزدہ ہوگئی ہیں کہ 64 سالہ شخص بھی شادی کررہاہے۔ملتان میں پریس کانفرنس کرتے ہوئے جاوید ہاشمی کا کہنا تھا کہ عمران خان کی شادی کے بعد میری بیوی اب پہلے سے زیادہ میری خدمت کررہی ہے کہ کہیں میرا شوہربھی شادی نہ کرلے۔ مجھے عمران خان کی شادی کا دعوت نامہ نہیں ملا اگر ملتا تو ضرور جاتا۔ بنی گالا کا راستہ مجھ سے چھپا ہوا نہیں ہے، میں انہیں یہیں سے ہی شادی کی مبارکباد دیتا ہوں جاوید ہاشمی کا کہنا تھا کہ فوجی عدالتوں کومتنازع نہ بنایاجائے اگر میں قومی اسمبلی میں ہوتا توفوجی عدالتوں کے حق میں ووٹ دیتا۔ فوجی عدالتیں اس وقت ملک کی ضرورت ہیں۔

ایمز ٹی وی (فارن ڈیسک) ورلڈ کپ کھیلنے کا خواب دیکھنے والے بنگلہ دیشی فاسٹ بولر روبیل حسین جنسی زیادتی کے کیس میں سلاخوں کے پیچھے پہنچ گئے۔میٹروپولیٹن مجسٹریٹ نے ان کی ضمانت منسوخ کرتے ہوئے اگلی سماعت تک جیل بھیجنے کا حکم دیا، نوجوان پیسر کی میگا ایونٹ میں شرکت پر بھی سوالیہ نشان کھڑا ہوگیا ہے۔واضح رہے کہ بنگلہ دیش کی 19 سالہ اداکارہ نازنین ہیپی نے الزام عائد کیا تھا کہ روبیل نے ان سے شادی کا جھوٹا وعدہ کیا اور جنسی زیادتی بھی کی، جس پرپولیس نے کرکٹر کے خلاف کرمنل کیس دائر کیا، عدالت کی جانب سے دونوں کا ڈی این اے ٹیسٹ بھی ہوچکا ہے۔ روبیل کا کہنا ہے کہ وہ جنسی زیادتی میں ملوث ہیں نہ ہی شادی کا وعدہ کیا تھا، ہیپی انھیں بلیک میل کررہی ہیں۔

ایمز ٹی وِی( کراچی) ٹیلی کام انڈسٹری کے مطابق 10 کروڑ سے زائد موبائل فون کی سموں کی بائیومیٹرک ری ویرفکیشن کا عمل 12جنوری سے شروع کردیا جائے گا۔ تصدیق کا عمل 2مراحل میں ہوگا پہلے مرحلے میں ملک کے حساس شہروں کراچی ،پشاور، ڈیرہ اسماعیل خان، ڈیرہ غازی خان، بلوچستان اور فاٹا کے علاقوں میں زیر استعمال 2کروڑ 10 لاکھ جبکہ ملک کے دیگر حصوں میں زیر استعمال2کروڑ 30لاکھ موبائل فون سموں کی تصدیق 12جنوری سے شروع کی جائے گی۔یہ عمل26فروری تک جاری رہے گا۔ غیر تصدیق شدہ تمام موبائل فون سمیں 27 فروری کو بلاک کردی جائیں گی۔ پہلے مرحلے میں مجموعی طور پر 4کروڑ 40لاکھ سموں کی تصدیق ہوگی۔ دوسرا مرحلہ 27 فروری سے شروع ہوگا جس میں ملک بھرمیں چلنے والی 5 کروڑ 90لاکھ سموں کی بائیومیٹرک تصدیق کی جائے گی اوردوسرے مرحلے میں غیرتصدیق شدہ موبائل فون کنکشن 14 اپریل کو بلاک کردیے جائیں گے۔موبائل فون سموں کی بائیومیٹرک ری ویریفکیشن کیلیے ملک بھر میں چلنے والی10کروڑ 30 لاکھ سموں کو 2حصوں میں تقسیم کیا گیاہے۔ ایک فہرست کو سفید جبکہ دوسری فہرست کوگرے کلر کی شناخت دی گئی ہے۔ سفید فہرست میں وہ صارفین شامل ہیں جو حساس علاقے سے باہر اور ایک شناختی کارڈ پر ایک یا 2موبائل فون سمیں استعمال کر رہے ہیں۔سفید فہرست میں شامل موبائل فون کنکشنزکی تعداد 5کروڑ 90لاکھ ہے۔ گرے فہرست میں پاکستان کے حساس شہروں بلوچستان اور فاٹا میں زیر استعمال 4کروڑ 40لاکھ سمیں شامل ہیں اس فہرست میں ایسے صارفین کو شامل کیا گیا ہے جنکے ایک شناختی کارڈ پر 2 یا اس سے زائد سمیں جاری کی گئی ہیں۔