Reporter SS
ایمزٹی وی(پشاور)پاک چین اقتصادی راہداری میں مغربی روٹ پر خدشات کے حوالے سے خیبر پختونخواہ حکومت نے عدالت سے رجوع کر لیا ۔ کے پی کے اسمبلی کے اسپیکر اسد قیصر نے عدالت میں پٹیشن دائر کرادی جس میں وفاقی حکومت ،وزیراعظم نواز شریف اور چیئر مین این ایچ اے کو فریق بنایا گیا ہے۔
عدالت کے باہر میڈیا سے بات کرتے ہوئے اسد قیصرکا کہنا تھا کہ سی پیک کے مخالف نہیں، اسے کامیاب دیکھنا چاہتے ہیں لیکن تمام صوبوں کویکساں حقوق ملنے چاہئیں، اے پی سی کے فیصلوں پر عمل کیا جائے۔
دوسری جانب ن لیگ کے رہنما احسن اقبال کا کہنا ہے کہ انہیں سی پیک پر کے پی کے حکومت کے عدالت جانے پر افسوس ہے، وزیراعلیٰ کے پی کے سے مل کر معاملہ حل کریں گے۔خیال رہے کہ خیبر پختون خوا حکومت نے پاک چین اقتصادی راہداری میں مغربی روٹ کے معاملے پر عدالت سے رجوع کرنے کا فیصلہ کیا تھا۔
ایمزٹی وی(کراچی) وزیر اعلیٰ سندھ سید مراد علی شاہ نے کہا ہے کہ پولیس ، رینجرز اہلکاروں اور امجد صابری کی شہادت سمیت 28 مختلف وارداتوں میں ملوث لشکر جھنگوی نعیم بخاری گروپ سے تعلق رکھنے والے 2 ملزمان کو گرفتار کرلیا گیا ہے جن کے قبضہ سے بھاری مقدار میں اسلحہ برآمد ہوا ہے۔
میڈیا سے گفتگو کرتے ہوئے وزیر اعلیٰ سندھ کا کہنا تھا کہ کچھ لوگ دو فرقوں کو لڑانے کی کوشش کر رہے ہیں جس کی وجہ سے دونوں اطراف کے ان لوگوں کو گرفتار کیا جارہا ہے جوعوام کو اشتعال دلا سکتے ہیں ۔
فیصل رضا عابدی سے اسلحہ برآمد ہوا جس پر انہیں گرفتار کیا گیا جبکہ علامہ یوسف پر پہلے سے مقدمات تھے جس پر انہیں ضمانت نہیں ملی تھی ، حالیہ واقعات کے باعث انہیں گرفتار کیا گیا ہے۔ تاج حنفی کو بھی شہر کے بگڑتے ہوئے حالات کے پیش نظر ایم پی او کے تحت گرفتار کیا گیا ہے۔
انہوں نے بتایا کہ گزشتہ رات سی ٹی ڈی کی ٹیم نے لیاقت آباد سے 2 ملزمان کو ساتھیوں سمیت گرفتار کیا ہے جن کا تعلق لشکر جھنگوی نعیم بخاری گروپ سے ہے۔ ملزمان میں سے ایک کا نام اسحاق عرف بوبی اور دوسرا عاصم عرف کیپری ہے جن سے بھاری مقدار میں اسلحہ بھی برآمد ہوا ہے۔ دونوں دہشتگردوں سے برآمد ہونے والے اسلحہ کی فرانزک تصدیق کے بعد 28 کیسوں کا سراغ ملا ہے۔
مراد علی شاہ نے 9 اہم وارداتوں کا ذکر کرتے ہوئے بتایا کہ گرفتار دہشتگردوں کے گروپ نے 29 اکتوبرکو ناظم آباد میں خواتین کی مجلس میں فائرنگ کی جس سے 5 خواتین جاں بحق ہوئیں۔ 17 اکتوبر کو ایف سی ایریا میں گرنیڈ حملہ کیا،26 جولائی کو صدر میں آرمی کے 2 جوان شہید کیے، 23 جون کو امجد صابری کو شہید کیا ، 21 مئی کو عائشہ منزل پر 2 ٹریفک کانسٹیبلز کی شہادت، 20 اپریل کو پولیو مہم کے دوران 7 پولیس اہلکاروں کو شہید کیا گیا،25 دسمبر 2015 کو تبت سنٹر میں ملٹری پولیس کے 2 جوانوں کی شہادت، نومبر 2015 میں 4 رینجرز اہلکاروں کی شہادت اور 29 اگست 2015 کو سپریم کورٹ کے وکیل کو قتل کیا گیا۔ گرفتار ملزمان دیگر 12 پولیس اہلکاروں سمیت 19 قتل کی وارداتوں میں بھی ملوث ہیں۔
انہوں نے کہا کہ اہم ترین وارداتوں میں ملوث ملزمان کی گرفتاری پر سی ٹی ڈی کی ٹیم بالخصوص راجہ عمر خطاب کو دہشتگردوں کو پکڑنے پر مبارکباد پیش کرتا ہوں۔ شہری بھی دہشتگردی کے خلاف جنگ میں حکومت سندھ اور سکیورٹی فورسز سے تعاون کریں۔
ایمزٹی وی(کوئٹہ) کوئٹہ کے سول سیکرٹریٹ میں 202فراریوں کے ہتھیار ڈال کر قومی دھارے میں شامل ہونے کے حوالے سے منعقدہ تقریب سے خطاب کرتے ہوئے انکا کہنا تھا کہ پہاڑوں پر بیٹھے لوگوں کو بھی پیغام ہے وہ قومی دھارے میں شامل ہوجائیں کیونکہ ہتھیار دینے والے خود بیرون ملک عیاشی کر رہے ہیں مگر معصوم لوگوں کو ہتھیار دیکر سیکیورٹی فورسز کے سامنے کھڑا کر دیا گیا ۔
انہوں نے ہتھیار ڈال کر قومی دھارے میں شامل ہونے والوں کو مخاطب کرتے ہوئے کہا کہ قومی دھار ے میں شامل ہونےوالے بھائیوں اور بیٹوں کو خوش آمدید کہتاہوں ، آپ کے فیصلے سے آپ کے خاندانوں پر بھی اچھےاثرات مرتب ہوں گے
۔
نواب ثناءاللہ زہری نے مزید کہا کہ اس میں ہماری پوری نسل تباہ کردی گئی، حکومت پرامن بلوچستان کے تحت آپ کی بھرپور معاونت کرےگی۔”ہم سب محب وطن پاکستانی ہیں اور رہیں گے“۔جاوید مینگل کو بھی انہوں نے واپس آنے کی دعوت دیتے ہوئے کہا کہ یہاں آپکا استقبال ہو گا ۔ انہوں نے کہا کہ آپکا علاقہ بلوچستان ہے یہاں آکر کمانڈ کریں ۔ہم واپس آنےوالوں کو اپنے سینے سے لگائیں گے۔
وزیر اعلیٰ بلوچستان نواب ثناءاللہ زہری نے براہمداغ بگٹی کو واپس پاکستان آ نے کی دعوت دیتے ہوئے کہا ہے کہ یہاں سرفرا ز بگٹی آپ کے استقبال کرینگے ۔ پاکستان کا دل بہت بڑا ہے اور ہم سب سینے سے لگانے کیلئے تیار ہیں تاہم باہر بیٹھے لوگوں کا ایجنڈا ہی یہی ہے کہ وہ بھائی سے بھائی کو لڑائیں ۔ باہر بیٹھے لوگوں کواب یہ کھیل مزید کھیلنے کی اجازت نہیں دی جائےگی۔
ایمزٹی وی()سیکیورٹی اداروں کی جانب سے ٹارگٹ کلنگ اور دیگر سنگین جرائم میں ملوث دہشت گردوں کو میڈ یا کے سامنے پیش کرنے کی تیاری کر لی ،سیکیورٹی ادارے کچھ دیر بعد اہم پریس کانفرنس کر کے ملزمان کو میڈ یا کے سامنے پیش کریں گے۔میڈ یا رپورٹس کے مطابق دہشتگردوں میں امجد صابر ی کا قتل بھی شامل ہے ۔
تفصیل کے مطابق سی ٹی ڈی کی کارروائی میں گرفتار ہونے والے پانچ ٹارگٹ کلرز کو میڈ یا کے سامنے پیش کرنے کے لیے سی پی او آفس میں پریس کانفرنس کا اہتمام کیا گیا ہے جو کچھ دیر بعد متوقع ہے۔وزیر اعلیٰ سندھ مراد علی شاہ خود ان کارروائیوں سے متعلق پریس کانفرنس کریں گے ۔
سیکیورٹی اداروںنے گرفتار ملزمان کے قبضے سے برآمد ہونے والا بارودی مواد ،خود کش جیکٹس ،پسٹل بیگ اور خطرناک ہتھیار برآمد ہوئے ہیں ۔ذرائع کا کہنا ہے کہ ملزمان کا تعلق کالعدم تنظیموں سے تھا جو ٹارگٹ کلنگ سمیت سنگین کارروائیوں میں ملوث تھے ۔دنیانیوز کے مطابق گرفتار دہشت گردوں میں امجد صابری کا قاتل بھی شامل ہے۔
ایمزٹی وی(اسلام آباد)قومی سلامتی کمیٹی کی خبر لیک ہونے پر حکومت نے جسٹس ریٹائرڈ عامر خان رضا کی سربراہی میں کمیٹی قائم کردی جس میں آئی ایس آئی ،آئی بی اور ایم آئی کا بھی ایک ایک رکن ہو گا ۔
کمیٹی میں ڈائریکٹر ایف آئی اے عثمان انور ،سیکریٹری اسٹیبلشمنٹ طاہر شہباز اور محتسب اعلیٰ پنجاب نجم سعید بھی کمیٹی کے ممبر ہونگے ۔تحقیقاتی کمیٹی قومی سلامتی سے متعلق خبر لیک ہونے پر اس میں ملوث افراد سے تفتیش کرے گی ۔
واضح رہے کہ نجی اخبار میں متنازع خبر شائع کی گئی تھی جس سے دنیا میں فوج کی ساکھ کو نقصان پہنچا ،اس خبر کے لیک ہونے کے بعد حکومت نے آزادانہ تفتیش کے لیے پرویز رشید کو بھی وزارت اطلاعات سے سبکدوش کیا تھا ۔
ایمزٹی وی(کراچی) معروف مذہبی اسکالر علامہ مرزا یوسف کو اشتعال انگیز تقریر کرنے پر 14دن کے ریمانڈپر جیل بھیج دیا گیا ۔مسجد نورِامام کے خطیب اور مذہبی رہنما علامہ مرزا یوسف کو گزشتہ رات پولیس اور رینجرز نے ناظم آباد میں مشترکہ کارروائی کر کے گرفتار کیا تھا ۔
فرقہ وارانہ قتل و غارت گری کے بعد سیکیورٹی ادارے حرکت میں آگئے اور گزشتہ رات شہر قائد میں مختلف کارروائیوں کے بعد سیکیورٹی اداروں نے 40لوگوں کو گرفتار کر لیا ۔
ملیر 15میں حالات کشیدہ ہوگئے
ادھر ملیر کے علاقے میں گرفتاریوں کے خلاف شدید احتجاج کیا گیااور اس دوران مظاہرین نے پولیس پر پتھراﺅ بھی کیا جبکہ پولیس نے مظاہرین کو منتشر کرنے کے لیے آنسو گیس کی شیلنگ کی جس پر مظاہرین منتشر ہو گئے ۔مظاہرین نے پولیس کی جانب سے آنسو گیس پھینکنے کے بعد مشتعل ہو کر پتھراﺅ بھی کیا ۔
ایمزٹی وی(تعلیم/سندھ)سندھ یونیورسٹی جامشورو میں نئے وائس چانسلر کے لیے سرچ کمیٹی نے تین نام فائنل کر د یے ،ذرائع کے مطابق پروفیسر پروین منشی کا نام شارٹ لسٹ کر دیا گیا ہے ۔
تفصیلات کے مطابق سندھ یونیورسٹی جامشورو میں گزشتہ کئی ماہ سے وائس چانسلر کی تقرری نہیں ہو سکی ہے ،مرحوم وی سی عابدہ طاہر کے انتقال کے بعد خالی ہونے والی سیٹ پر قائم مقام وائس چانسلر ڈاکٹرصدیق کلہوڑو مقرر ہیں اور انہوں نے اپنی تقرری میں تمام تر اختیارات استعمال کرتے ہوئے یونیورسٹی میں بھرتیوں کے ساتھ ساتھ کروڑوں روپے کے ترقیاتی کام بھی شروع کیے ہیں
ذرائع کے مطابق سندھ یونیورسٹی میں نئے وی سی کی تقرری کے لیے سرچ کمیٹی نے تین نام فائنل کردیے ہیں جس میں سب سے سینئر نام کراچی یونیورسٹی کے پروفیسر فتح محمد برفت کا ہے ، دوسرا سندھ یونیورسٹی کے سابق پروفیسر عنایت علی شاہ اور تیسرا قائم مقام وی سی پروفیسر ڈاکٹر صدیق کلہوڑو کے ناموں کو فائنل کیا گیا ہے۔
سرچ کمیٹی کے چیئر مین جسٹس دیدار حسین شاہ نے وی سی کے لئے 30امیدواروں میں سے مذکورہ افراد کے نام فائنل کر کے وزیر اعلیٰ سندھ کو ارسال کردیے ہیں ۔ ذرائع کے مطابق فائنل کئے گئے ناموں کو نظر انداز کرکے پروفیسر پروین منشی کا نام شارٹ لسٹ کر دیا گیا ہے ۔
ایمز ٹی وی ( انٹر ٹینمنٹ )بالی ووڈ فلموں پر پابندی کے باعث مسائل کاشکار پاکستانی سینما گھروں کے لیے ہالی ووڈ فلم’’ڈاکٹراسٹرینج‘‘ تنکے کے سہارے کے مترادف ہے۔ اسکاٹ ڈیریکسن کی ہدایات میں بننے والی اس فلم میں بینڈکٹ کمبربیچ نے مرکزی کردار ادا کیا ہے جب کہ دیگر کاسٹ میں مائیکل اسٹال برگ، چیویٹل ایجیوفور، ریچل میکیڈم، میڈز میکلسین اورٹیلڈا سوائنٹن شامل ہیں۔ فلم کی کہانی سٹیون اسٹرینج نامی ایک ایسے ماہر نیورو سرجن پر مبنی ہے جس کا کیرئیر ایک خطرناک کار حادثے کے بعد تباہ و برباد ہو جاتاہے کیونکہ اس کے ہاتھ مکمل طور پر کام نہیںکرپاتے تاہم وہ ہار نہیں مانتا اور حالات کامقابلہ کرتے ہوئے مشرقی ادویات کے لیے کھٹمنڈو نیپال پہنچ جاتا ہے تاہم اس تلاش کے دوران وہ مشرقی فنون کی غیر معمولی طاقت حاصل کر کے برائی کے خاتمے کی جنگ پر نکل پڑتا ہے۔
اس فلم کی کہانی کا پلاٹ دیگر سپر ہروز فلموں کی طرح ہے لیکن اسکے مسحور کن ویژول ایفیکٹس اسے دیگر فلموں کی فرست میں نمایاں کرتے ہیں اس لیے یہ کہنا غلط نہیںکہ یہ سپر ہیروز فلم میں تازہ ہوا کا جھونکا ہے، فلم کی ایک اور خاص بات اس کے مزاح اور معنی خیز برجستہ مکالمہ دیکھنے والوں کو فلم سے باندھے رکھتے ہیں ۔فلم کے آخر میں یہ یقین دہانی بھی کروائی گئی ہے کہ ’’ڈاکٹر سٹرینج‘‘ کا دوسرا سلسلہ بھی جلد فلم بینوں کے لیے پیش کیا جائیگا جس میں وہ ’’تھور‘‘ کے ساتھ اسکرین شیئر کرتے نظر آئیں گے۔ فلم 4 نومبر سے ملک بھر کے سینما گھروں میں پیش کی جارہی ہے۔
ایمز ٹی وی ( انٹر ٹینمنٹ )بالی ووڈ اداکارہ کرینہ کپور اور اداکار سیف علی خان کے درمیان شادی کے بعد اب تک کوئی بھی ناخوشگوار خبر سننے میں نہیں آئی اور دونوں ہی بہت پرسکون زندگی گزارنے میں مصروف ہیں۔ تاہم کرینہ کپور نے ایک انکشاف کرکے سب کو حیران کردیا ہے بھارتی میڈیا کے مطابق ایک انٹرویو کے دوران کرینہ کپور خان کا کہناتھا کہ بہت سے لوگوں نے مجھے کہا کہ شادی کے بعد کسی بھی اداکارہ کا کیرئیر ختم ہو جاتا ہے اور ابھی سیف علی خان کے شادی نہ کرنا لیکن میں اپنے فیصلے سے پیچھے نہ ہٹی۔
اب جب میں ایک ماں بننے جا رہی ہوں، میں جانتی ہوں کہ لوگ اس پر بھی ایک لیبل لگا دیں گے لیکن اس سے مجھے کوئی فرق نہیں پڑتا۔ کوئی چیز مجھے کام کرنے سے نہیں روک پائی اور میں اچھی طرح جانتی ہوں کہ ذاتی اور پیشہ وارانہ زندگی کو ایک دوسرے سے الگ کیسے رکھنا ہے۔ میں جانتی ہوں کہ یہ بہت ہی بہترین تجربہ ثابت ہو گا لیکن میں یہ نہیں چاہتی کہ گھر بیٹھوں، ہم ہر آنیوالے دن کو نئے دن کی طرح ہی لیں گے۔
کرینہ کپور نے مزید کہا کہ ’’میں ہمیشہ کام کروں اور چھٹیاں بھی مناؤںگی، اس لیے کچھ بھی تبدیل نہیں ہونے جا رہا۔ جب میں بچے کیساتھ ایک روٹین میں آ جاؤں گی تب ہی جان پاؤں گی کہ میں کیا محسوس کرتی ہوں۔ فی الحال میں تو میں ایک اسکرپٹ پڑھ رہی ہوں جو بہت ہی زبردست ہے۔ لوگوں نے کہا تھا کہ شادی کے بعد مجھے کام نہیں ملے گا لیکن دلچسپ بات یہ ہے کہ میں نے زیادہ کام کیا۔ سیف نے ہمیشہ مجھ سے کہا کہ دیکھا تم نے شادی کے بعد زیادہ کام کیا اور بچہ پیدا ہونے کے بعد بھی ایسا ہی ہو گا۔
ایمزٹی وی(کراچی) ملیر 15نیشنل ہائی وے میدان جنگ بن گیا ، مظاہرین سے مذاکرات کیلئے ایس ایس پی کورنگی کی قیادت میں آئے پولیس اہلکاروں پر مظاہرین نے پتھراﺅ کر دیا جس سے متعدد اہلکار زخمی ہو گئے تاہم پولیس کی جانب سے مظاہرین کو منتشر کرنے کیلئے شدید شیلنگ اور لاٹھی چارج کیاگیا جبکہ ہوائی فائرنگ بھی کی گئی
اس دوران پولیس نے مجلس وحدت المسلمین کے متعدد کارکنوں کو حراست میں لے کر تھانے منتقل کر دیا ہے ۔ مظاہرین مجلس وحدت المسلمین کے رہنماﺅں اور کارکنوں کی گرفتاریوں کے خلاف احتجاج کرتے ہوئے نیشنل ہائی وے پر آگئے اور سڑک کو دونوں اطراف سے بند کر دیا جس کے بعد ایس ایس پی کورنگی ان سے مذاکرات کیلئے پہنچے تھے ۔
ذرائع کا کہنا ہے کہ پولیس نے مظاہرین کو منتشر کر کے نیشنل ہائی وے کا ایک ٹریک کھول دیا ہے جہاں پر ٹریفک کی روانی بحال ہو گئی ہے تاہم ابھی بھی دوسرے ٹریک پر مظاہرین اور اہلکاروں کے درمیان تصادم جاری ہے اور مظاہرین گلیوں سے پولیس اہلکاروں پر پتھراﺅ کر رہے ہیں ۔
دوسری جانب زخمی پولیس اہلکاروں کو قریبی ہسپتالوں میں منتقل کر دیا گیا ہے اور نیشنل ہائی وے پر حالات کشیدہ ہیں ۔ پولیس کے جانب سے مظاہرین کے ساتھ بار بار مذاکرات کیے گئے مگر احتجاج ختم نہیں کیا گیا اور آج مظاہرین نے نیشنل ہائی وے کو بھی بند کر دیا تاہم تصادم ہونے کے بعد پولیس کی مزید نفری طلب کر لی گئی ہے ۔
ذرائع کا کہنا ہے کہ پولیس اہلکاروں نے مظاہرین کو بار بار نیشنل ہائی وے کھولنے اور پرامن رہنے کی ہدایت کی مگر انہوں نے ایک نہ سنی اور دونوں ٹریک پر ٹریفک کی روانی بند کیے رکھی جبکہ پولیس اہلکاروں پر پتھراؤ بھی کیا جاتا رہا ۔