Reporter SS
وزیراعظم عمران خان نے کورونا وائرس سے متعلق اہم اجلاس آج طلب کرلیا جس میں اہم وفاقی وزراء اور متعلقہ حکام شریک ہوں گے۔ اجلاس میں کورونا وائرس سے نمٹنے کے لیے انتظامات کا جائزہ لیا جائے گا، اس کے علاوہ قومی سلامتی کی تشکیل کردہ کورآڈینیشن کمیٹی بریفنگ دے گی جب کہ معاون خصوصی صحت ڈاکٹر ظفر مرزا تفصیلات سے بھی آگاہ کریں گے۔
واضح رہے کہ کورونا وائرس کے مزید 50 مریض سامنے آگئے جس کے بعد ملک میں کورونا وائرس کے کیسزکی تعداد 94 ہوگئی ہے، کورونا وائرس کے سب سے زیادہ کیسز سندھ میں رپورٹ ہوئے ہیں جہاں کیسز کی مجموعی تعداد 76 ہے، جن میں سے 25 کا تعلق کراچی، ایک حیدرآباد سے جب کہ 50 کیسزتفتان بارڈرسے آنے والے افراد میں رپورٹ ہوئے ہیں۔
معاون خصوصی برائے صحت ڈاکٹر ظفر مرزا کی زیر صدارت ایمر جنسی کور گروپ کا اجلاس ہوا جس میں این آئی ایچ کے ایگزیکٹو ڈائریکٹر میجر جنرل عامر اکرام اور پاک فوج کے نمائندوں نے شرکت کی۔
اس موقع پر ڈاکٹر ظفر مرزا نے کہا کہ قومی چیلنج سے نبرد آزما ہونے کے لیے مکمل تیار ہیں، 14لیبارٹریز میں کورونا وائرس کے ٹیسٹ کی سہولیات فراہم کی جارہی ہیں، قومی یک جہتی کے ساتھ قومی ایکشن پلان پر عملدرآمد ہو رہا ہے۔
ڈاکٹر ظفر مرزا نے کہا کہ حکومتِ پاکستان اور عالمی ادارہ صحت کی جاری کردہ احتیاطی تدابیر پر عمل کریں، صحت مند پاکستان کے لیے کورونا سے ڈرنا نہیں بلکہ لڑنا ہے۔
وزارت تعلیم نے پنجاب میں زیر تعلیم نرسری سے ساتویں کلاس تک کے تمام طلبہ طالبات کو بغیر سالانہ امتحانات کے پاس کرنے کا فیصلہ کیا ہے۔
وزارت تعلیم نے کورونا وائرس بچاؤ مہم کے تحت پنجاب کے تمام 53 ہزار سرکاری اسکولوں میں زیر تعلیم نرسری سے ساتویں کلاس تک کے تمام طلبہ طالبات کو بغیر سالانہ امتحانات کے پاس کرنے کا فیصلہ کیا ہے۔
نیا تعلیمی سیشن یکم اپریل سے شروع ہوتا ہے جبکہ 5 اپریل تک تمام اسکول بند ہیں، اپریل کے پہلے ہفتہ میں اسکول بند رہیں گے اس کے بعد سالانہ امتحانات کا وقت نہیں رہے گا۔
کورونا وائرس کے خدشات کے باعث سندھ حکومت کے اقدامات جاری ہیں۔ متعلقہ کمشنرز کو ہر ضلع میں قرنطینہ کیلیے قابل استعمال سرکاری عمارتوں کی نشاندہی کی ہدایت کردی ہے۔ وزیراعلی مرادعلی شاہ نے چیف سیکریٹری کو عمارتوں کی فہرست مرتب کرنے کی ہدایت کی ہے۔
سندھ کے مختلف اضلاع میں لیبر فلیٹس کو بھی آئسولیشن اور کوارنٹائن سینٹرز میں تبدیل کرنے پر غور کیا ہے۔ محکمہ لیبر نے حال ہی میں تیارکردہ 6 ہزار فلیٹس کی فہرست وزیراعلی ہاؤس کو ارسال کردی ہے۔ کورونا وائرس کے شبہے میں مریض کو 14 روز کیلیے قرنطینہ میں رکھا جاتا ہے۔
وزیر اعظم عمران خان کی ہدایت پر طویل القامت پاکستانی نصیر سومرو کو امداد فراہم کر دی گئی، صحت کارڈ بھی دیا جائے گا۔
وزیر اعظم کی ہدایت پر سربراہ بیت المال سندھ حنید لاکھانی نے طویل القامت پاکستانی شہری نصیر سومرو کی رہایش گاہ جا کر انھیں امدادی چیک دیا۔
شکارپور سے تعلق رکھنے والے پاکستانی طویل القامت شخصیت نصیر سومرو اس وقت شدید علیل ہیں، انھوں نے گزشتہ دنوں وزیر اعظم عمران خان سے مدد کی اپیل کی تھی۔
سربراہ بیت المال سندھ نے نصیر سومرو کو ان کی رہایش گاہ پر 1 لاکھ 20 ہزار کا چیک پیش کیا، حنید لاکھانی کا اس موقع پر کہنا تھا کہ نصیر سومرو پاکستان کا اثاثہ اور ملک کے سفیر ہیں، انھیں جلد صحت کارڈ بھی دیا جائے گا، نصیر سومرو پاکستان کے سفیر ہیں۔
سربراہ بیت المال سندھ نے کہا کہ سندھ حکومت کو بھی نصیر سومرو کی مدد کے لیے آگے آنا چاہیے، بیت المال کی ٹیم نصیر سومرو سے مسلسل رابطے میں رہے گی۔
خیال رہے کہ پاکستان کے سب سے طویل القامت شہری نصیر سومرو شدید علیل ہیں، ایک سال قبل بھی ان کی طبیعت خراب ہوئی تھی، جس پر انھوں نے علاج کے لیے مدد کی اپیل کی تھی۔ گزشتہ برس جولائی میں نصیر سومرو کے انتقال کی افواہ بھی اڑی تھی، بعد ازاں غیر ملکی میڈیا سے گفتگو کرتے ہوئے انھوں نے اس کی تردید کی۔
