ایمزٹی وی(تجارت) قطر پر سعودی عرب سمیت 4 عرب ممالک کی پابندیوں کے نتیجے میں پاکستانیوں کی چاندی ہوگئی ہے۔ 4 عرب ممالک کی جانب سے قطر پر سمندری، زمینی اور فضائی پابندیاں عائد کرنے کے باعث قطری حکومت نے دیگر ایشیائی ممالک سے تجارتی تعلقات بہتر بنانے شروع کردیے جن میں پاکستان سرفہرست ہے۔ سرکاری قطری کمپنی میلاہا نے رواں ہفتے سے کراچی تا دوحہ تیز رفتار براہ راست بحری سروس شروع کرنے کا اعلان کیا ہے۔ پہلا بحری جہاز قطر کی حماد پورٹ سے چار روز کا سفر طے کرنے کے بعد 11 ستمبر پیر کے روز کراچی پہنچے گا۔ میلاہا نے اپنے بیان میں کہا ہے کہ ہم تاجروں، برآمد کنندگان اور درآمد کنندگان کی بڑھتی ہوئی مانگ کو پورا کرنے کے لیے قطر اور ایشیا کی اہم مارکیٹوں کے درمیان کاروبار کو فروغ دینے کی کوشش کررہے ہیں۔ اس سے پہلے کراچی سے شپمنٹس دبئی جاتی تھیں تاہم اب براہ راست دوحہ جائیں گی۔ قطر پاکستان سے کھانے پینے کی اشیا خریدے گا جبکہ پیٹروکیمیکلز مصنوعات فروخت کرے گا۔ پاکستانی تاجروں نے اسے زبردست اقدام قرار دیتے ہوئے کہا کہ قطر سے کاروبار میں اضافہ ہوگا۔ اعداد و شمار کے مطابق 2017 کی پہلی سہہ ماہی میں قطر نے پاکستان سے 2 کروڑ ڈالر کی اشیا خریدیں اور اسے 35 کروڑ 80 لاکھ ڈالر کی مصنوعات بشمول ایل این جی فروخت کی۔ واضح رہے کہ سعودی عرب، مصر، متحدہ عرب امارات اور بحرین نے قطر پر دہشت گردی کی حمایت کا الزام لگا کر اس سے تمام سفارتی و تجارتی تعلقات منقطع کرلیے ہیں۔
ایمزٹی وی (انٹرٹینمنٹ) نامور پاکستانی اداکار ہمایوں سعید کا کہنا ہے کہ انہیں بالی ووڈ میں کرینہ کپور بہت پسند ہیں اور اگر انہیں موقع ملا تو وہ کرینہ کپور کے ساتھ فلموں میں کام کرنا چاہیں گے۔ پاکستان شوبز انڈسٹری کے صف اول کے اداکار ہمایوں سعید ان دنوں اپنی فلم ’’پنجاب نہیں جاؤں گی‘‘ کی کامیابی کاجشن منارہے ہیں، عید کے موقعے پر ریلیز ہونے والی فلم ’’پنجاب نہیں جاؤں گی‘‘ میں ہمایوں سعید کے علاوہ مہوش حیات اور عروہ حسین نے مرکزی کردارادا کیے ہیں۔ ایک انٹرویو کے دوران فلم کی کامیابی کے بارے میں بات کرتے ہوئے ہمایوں سعید کا کہنا تھا کہ پنجاب نہیں جاؤں گی کی پوری ٹیم نے فلم کو بنانے میں کڑی محنت کی تھی جس کا ہمیں بہت اچھا نتیجہ حاصل ہوا ہے، فلم کو شائقین کی جانب سے بے حد پزیرائی مل رہی ہے، لوگ ہمیشہ اچھی اورمعیاری فلمیں دیکھنا پسند کرتے ہیں اورہماری فلم میں یہ سب کچھ موجود ہے۔ پاکستان کی تقریباً تمام بڑی اداکاراؤں کے ساتھ کام کرنے والے اداکارہمایوں سعید سے جب پوچھا گیا کہ اب وہ مزید کس اداکارہ کے ساتھ کام کرنا چاہتے ہیں تو انہوں نے کہا کہ وہ کرینہ کپورخان کے ساتھ کام کرنا چاہتے ہیں۔ ہمایوں نے مزید کہا کہ کرینہ بہت اچھی اور باصلاحیت اداکارہ ہیں ، کرینہ کے علاوہ انہوں نے بالی ووڈ کی باربی ڈول کترینہ کیف کے ساتھ بھی کام کرنے کی خواہش کا اظہار کرتے ہوئے کہا کہ کترینہ بے انتہا خوبصورت ہیں جب کہ ایشوریا رائے بھی اس فہرست میں شامل ہیں، ایشوریا رائے کی آنکھیں بہت خوبصورت ہیں لہٰذا اگر انہیں موقع ملا تو وہ ان تین اداکاراؤں کے ساتھ کام کرنا چاہیں گے۔ واضح رہے کہ عید الضحیٰ کے موقعے پر پاکستان کی دو بڑی فلمیں ’’پنجاب نہیں جاؤں گی‘‘ اور ’’نامعلوم افراد2‘‘ ریلیز ہوئی تھیں، دونوں فلمیں ریلیز کے ابتدائی دنوں میں مجموعی طور پر 8 کروڑ سے زائد کا بزنس کرنے میں کامیاب رہی تھیں۔
ایمزٹی وی(تجارت) وزیراعظم شاہد خاقان عباسی پی آئی اے کے لیے عنقریب بیل آئوٹ پیکج کا اعلان کریں گے اس کے لیے وہ وفاقی کابینہ کی اقتصادی رابطہ کمیٹی کے اجلاس سے منظوری لیں گے۔ پی آئی اے کا بیل آئوٹ پیکج کم وبیش 20 ارب روپے کا ہوگا اور یہ خطیر رقم پی آئی اے کو متعدد مراحل میں ملے گی۔ اس بیل آئوٹ پیکج کی رقم سے پی آئی اے نصف درجن کے لگ بھگ جدید مسافر بردار طیارے 6سے 8سال کی ڈرائی لیزپر حاصل کرے گی۔ اسی پیکج سے پی آئی اے کے زیراستعمال طیاروں کے لیے ضروری اوریجنل سپیئر پارٹس اور ایکوئپمنٹ خریدے گی جبکہ قومی ایئر لائن میں سٹیٹ آف دی آرٹ آئی ٹی انفراسٹرکچر بھی ڈویلپ کیا جائے گا۔ پی آئی اے کے پاس اس وقت 37 طیارے ہیں جن میں سے ویت نام ایئر لائن سے مختصر ویٹ لیز پر حاصل کئے گئے 4 طیارے 31 اکتوبر تک واپس کر دیئے جائیں گے۔ اس کے نتیجے میں پی آئی اے کے زیراستعمال طیاروں کی تعداد 33 رہ جائے گی ان میں سے ایک بوئنگ777 طیارہ ،ایک ایئر بس اے320 طیارہ، ایک اے ٹی آر طیارہ نارمل اوورہالنگ اور ٹیسٹ کے لیے فی الحال گرائونڈ ہیں۔ یہ تینوں طیارے اے کیٹگری کے ٹیسٹوں کے لیے ایک ہفتے تک گرائونڈ ہیں جو آئندہ ہفتے پی آئی اے کے زیراستعمال میں آجائیں گے۔
ایمزٹی وی (انٹرٹینمنٹ) ملالہ یوسف زئی کی زندگی پر بننے والی بھارتی فلم ’گل مکئی‘ کا پوسٹر سوشل میڈیا پر جاری کردیا گیا۔ لڑکیوں کی تعلیم اور انسانی حقوق کے لیے آواز بلند کرنے والی پاکستانی طالبہ ملالہ یوسف زئی کی زندگی پر مبنی فلم پوسٹ پروڈکشن کے مرحلے میں ہے جس کی ہدایت کاری امجد خان دے رہے ہیں جب کہ فلم میں ملالہ کا کردار بھارتی چائلڈ اسٹار ریم شیخ ادا کر رہی ہیں، فلم اسٹار دیویا دت اور آنجہانی بھارتی اداکار اوم پوری فلم کے نمایاں کرداروں میں شامل ہیں۔ بھارتی میڈیا رپورٹس کے مطابق فلم کے پروڈیوسر آنند کمار کا کہنا ہے کہ اوم پوری کی آواز میں ریکارڈ کیا ہوا گانا بھی فلم میں شامل ہے جو اُن کی یادوں کو تازہ کر دے گا جب کہ ریم شیخ نے کہا کہ وہ ملالہ کا کردار نبھاتے ہوئے بہت نروس تھیں کیونکہ ملالہ یوسف زئی عالمی شہرت کی حامل شخصیت ہیں۔
ایمزٹی وی (تعلیم)سربراہ انصار الشریعہ ڈاکٹرعبداللہ ہاشمی نے تحقیقات کے دوران سنسنی خیزانکشافات کرتے ہوئے کہا ہے کہ انصارالشریعہ نے 2015 کے آخرمیں تنظیم کاآغازکیا، ان کا گروپ 10 سے 12 اعلیٰ تعلیم یافتہ لڑکوں پر مشتمل ہے،تمام لڑکے کراچی یونیورسٹی،این ای ڈی،داؤدیونیورسٹی سے تعلیم یافتہ ہیں اورافغانستان کے علاقے شراوک سے تربیت لےکرآئے ہیں. میڈیا کے مطابق ڈاکٹر عبداللہ ہاشمی نے انکشاف کیا ہے کہ ہلاک ملزم حسان عرف ولیدکی عمر 27سال اور وہ گلزارہجری کارہائشی تھا،حسان الیکٹریکل انجینئرتھااوراین ای ڈی یونیورسٹی سے پی ایچ ڈی کررہاتھا۔ سربراہ انصار الشریعہ نے بتایا کہ القاعدہ سے الحاق کےلئے عبداللہ بلوچ سے رابطہ کیاگیااورسپورٹ کرنے کی درخواست کی گئی جس پر عبداللہ بلوچ نے اپنی مددآپ کے تحت کام کرنے کوکہا، عبداللہ ہاشمی نے انکشاف کرتے ہوئے بتایا کہ عبداللہ بلوچ 2012 میں کراچی میں تھا،2012میں چھاپے کے دوران عبداللہ کے ٹھکانے سے اسلحہ اوربارودملاتھاجس کے بعد وہ افغانستان فرارہوگیا،سربراہ انصار الشریعہ نے انکشاف کیا کہ کرا چی میں اپنے آپ کومنوانے کیلئے پولیس کی ٹارگٹ کلنگ کی۔
