ایمز ٹی وی (رحیم یار) رحیم یار خان میں جلسے سے خطاب کرتے ہوئے تحریک انصاف کے وائس چیئرمین شاہ محمود قریشی نے کہا کہ چیف الیکشن کمشنر کے عہدے کیلئے نہ جھکنے اور نہ بکنے والا شخص چاہیے جس پر سب کو اعتماد ہو۔ شاہ محمود قریشی وزیراعظم نواز شریف کو مخاطب کرتے ہوئے کہا کہ میاں صاحب! آپ کی کہانی مُک گئی ہے۔ آصف زرداری بھی سن لیں 21 نومبر کو لاڑکانہ آ رہے ہیں جتنی چاہے رکاوٹیں ڈال لیں،انھوں نے کہا کہ قومیں قرضوں سے نہیں، جذبوں سے بنتی ہیں۔
ایمز ٹی وی (تھر) تھرپارکر میں غذائی قلت کے باعث مزید دو بچے دم توڑ گئے،اس طرح 43 دنوں میں ہلاکتوں کی تعداد 49 ہوگئی۔دوسری طرف غذائی قلت اور مویشیوں کے چارے کے بحران سے متاثرہ علاقوں تھرپارکر، چھاچھرو اور ڈاھلی میں لوگوں کی نقل مکانی تیزی سے جاری ہے ، چھاچھرو اور ڈاھلی تحصیلوں سے نقل مکانی کرنے والے قحطہ متاثرین کے قافلے آئے روز در بدری کا شکار ہیں، حکومتی امداد سمیت تمام تر امدادی کارروائیوں کا رخ مٹھی شھر تک محدود ہیں۔ جبکہ چھاچھرو انتظامیہ نے 30 روز گزرنے کے باوجود کوئی نوٹس نہیں لیا، چھاچھرو تحصیل اور ڈاھلی تحصیل میں گذشتہ تین سال سے علاقہ مکینوں کا قحط مقدر بن چکا ہے، ان دیہاتوں میں غذائی قلت برقرار ہے، ریلیف کی گندم بھی دور دراز دیہاتوں تک نہیں پہنچ سکی ہے، مٹھی سول ہسپتال میں جہاں بچوں کی اموات میڈیا کی رپورٹ ہوتی ہیں وہاں پر تو امدادی کارروائیاں سرگرم ہیں مگر چھاچھرو کے دور دراز 675 گائوں میں جہاں نہ سڑکوں کی سہولیات ہیں وہاں پر جو بچے غذائی قلت سے موت کا شکار بنتے ہیں وہاں پر نہ ہی میڈیا کی رسائی ہوتی ہے،نہ کوئی امدادی ٹیمیں ، متاثرین کے قافلے آئے روز سسسک سسک کر گذر رہے ہیں ۔
ایمز ٹی وی (نیوز ڈیسک)
ابوظہبی میں پاکستان اور نیوزی لینڈ کے مابین پہلے کرکٹ ٹیسٹ میچ کے دوسرے دن پاکستانی ٹیم ایک مضبوط پوزیشن میں ہے۔
احمد شہزاد اور اظہر علی نے پاکستان کی پہلی اننگز دوبارہ شروع کی ہے
احمد شہزاد ٹیسٹ کرکٹ میں اپنا بہترین سکور بنانے کے بعد 156 رنز پر ناٹ آؤٹ ہیں۔
وہ پاکستانی کرکٹ کی تاریخ میں ایک ٹیسٹ اننگز میں 150 رنز بنانے والے سب سے کم عمر ٹیسٹ کرکٹر بن گئے ہیں۔ ان سے قبل یہ اعزاز حنیف محمد کے پاس تھا۔
پاکستان اور نیوزی لینڈ کے درمیان متحدہ عرب امارات میں نو نومبر سے 19 دسمبر کے دوران تین ٹیسٹ، دو ٹی ٹوئنٹی اور پانچ ون ڈے میچ کھیلے جائیں گے۔
پاکستانی ٹیم اگر تین صفر سے بھی یہ سیریز جیتنے میں کامیاب ہوتی ہے تب بھی وہ عالمی رینکنگ میں تیسرے نمبر پر ہی رہے گی البتہ اس کے اور نمبر دو ٹیم آسٹریلیا کےدرمیان پوائنٹس کا فرق کم ہوجائے گا۔
نیوزی لینڈ کی ٹیم جو اس وقت عالمی رینکنگ میں ساتویں نمبر پر ہے سیریز جیتنے کی صورت میں اپنی رینکنگ بہتر کر سکے گی -
ایمز ٹی وی (اسلام آباد) دفتر خارجہ کی جانب سے جاری کردہ بیان کے مطابق وزیراعظم نوازشریف دو روزہ سرکاری دورے پر آج جرمنی روانہ ہورہے ہیں ۔ انہیں اس دورے کی دعوت جرمن چانسلر انجیلا مرکیل نے دی تھی، اپنے دورہ جرمنی کے دوران وزیر اعظم جرمن چانسلر اور دیگراعلیٰ ترین حکومتی شخصیات سے ملاقات کریں گے، جس میں دوطرفہ دلچسپی کے امور،عالمی وعلاقائی صورت حال اور دیگر معاملات پر تبادلہ خیال کیا جائے گا۔ وزیر اعظم کے دورے سے دونوں ملکوں کے درمیان دو طرفہ تعلقات مزید مستحکم ہوں گے۔ یاد رہے کہ وزیر اعظم نواز شریف چین کے سرکاری دورے سے گزشتہ روز ہی وطن واپس پہنچے ہیں۔
ایمز ٹی وی (لاہور) ایوان اقبال میں شاعر مشرق کے 137ویں یوم پیدائش کے موقع پر خصوصی تقریب سے خطاب کے دوران گورنرپنجاب چوہدری محمد سرور کا کہنا تھا کہ موجودہ صورتحال میں ہمیں سوچنا چاہئے کہ ہم نے علامہ اقبال اور قائد اعظم کے ملک کو کہاں پہنچایا ہے، انتہاپسندی نے ملک کو بہت نقصان پہنچایا ہے، چوہدری محمد سرور نے کہا کہ گزشتہ دنوں کوٹ رادھا کشن میں مسیحی جوڑے کو زندہ جلانے کا واقعہ انتہائی افسوسناک ہے، اس طرح کا سلوک نہ اسلام سکھاتا ہے اور نہ ہی کوئی دوسرا مذہب، حکومت اس قسم کی بربریت کو کسی صورت برداشت نہیں کرے گی اور واقعے میں ملوث ملزمان کو کیفرکردار تک پہنچایا جائے گا۔مسلمانوں کے اعلیٰ اقدار اور روایات کے احیا کےلئے اقبال کا کلام ایک روشنی کی حیثیت رکھتا ہے، ہمیں علامہ اقبال کے فکرکو اپنانے کی ضرورت ہے۔
ایمز ٹی وی (خیبرایجنسی ) خیبرایجنسی میں وادی تیراہ کے علاقے اکاخیل میں سکیورٹی فورسز کی کارروائی کامیابی کے ساتھ جاری ہے ، جس سے کالعدم لشکر اسلام کے 5 دہشت گرد ہلاک ہوگئے ہیں ،سیکیورٹی ذرائع کے مطابق وادی تیراہ کے علاقہ اکاخیل میں سیکیورٹی فورسز کی کارروائی میں 5 دہشت گرد ہلا ک ہوگئے ۔ ہلاک ہونے والوں میں اہم دہشت گرد کمانڈر منور بھی شامل ہے،ہلاک ہونے والوں کا تعلق کالعدم لشکر اسلام سے ہے،دوسری جانب لیویز ذرائع کے مطابق وادی تیراہ کے علاقہ نیرے بابا میں دہشت گردوں اور امن لشکر کے درمیان جھڑپ ہوئی جھڑپ میں ایک دہشت گرد ہلاک جبکہ امن لشکر کا ایک رضا کار جاں بحق ہوگیا۔ جبکہ دہشت گردوں نے لنڈی کوتل ایف سی چھاؤنی کے شلمان دروازے پر دستی بم سے حملہ کیا گیا۔دھماکے سے کوئی جانی نقصان نہیں ہوا بلکہ چھاؤنی کے باہر واقع کمرے کو جزوی نقصان پہنچا۔ادھر تحصیل باڑہ کے علاقے شلوبرپرامن لشکرنے کنٹرول حاصل کرلیا، کالعدم لشکراسلام کے دہشت گرد شلوبرکے علاقے میں گاڑیاں چھوڑکرفرارہوگئے، رضا کاروں نے دہشت گردوں کے 3 کمانڈروں کے گھروں کو بھی جلادیا۔
ایمز ٹی وی (کراچی) متحدہ قومی موومنٹ کا وفد خشک سالی سے متاثرہ افراد کی مدد کے لئے خالد مقبول صدیقی کی قیادت میں تھر روانہ ہو گیاجبکہ قحط زدہ خاندانوں کی امداد کے لیے 2 ایمبولینسیں، دوائیں اور لاکھوں روپے کا امدادی سامان پہلے ہی روانہ کیا جا چکا ہے۔ ایم کیو ایم کے وفد میں قومی اور صوبائی اسمبلی کی ارکان کے علاوہ خدمت خلق فاﺅنڈیشن کی میڈیکل ایڈ کمیٹی کے ڈاکٹرز او رضاکاروں کی بڑی تعداد بھی شامل ہے۔ایم کیوایم کی ٹیم تھر میں بیماریوں سے متاثرہ افراد کو طبی سہولتیں فراہم کرے گی ۔
ایمز ٹی وی (پشاور) سینٹرل جیل پشاور میں دہشت گردی کے ممکنہ حملے کے پیش نظرکی سیکیورٹی بڑھا دی گئی ہے ۔ دہشت گردی کے ممکنہ حملے کے پیش نظر جیل کی سیکیورٹی بڑھادی گئی ہے۔سینٹرل جیل کے ذرائع کے مطابق جیل اور اطراف میں پولیس کے علاوہ ایلٹ فورس کے کمانڈوزبھی تعینات کر دیئے گئے ہیں۔
ایمز ٹی وی (اسلام آباد) وزیر اعظم نواز شریف نے حامد علی خان کو قومی ادارے انسداد دہشت گردی (نیکٹا) کا سربراہ مقرر کرنے کی منظوری دے دی ہے، حامد علی خان کو نیکٹا کا سربراہ مقرر کرنے کا فیصلہ جمعرات کو وزیر اعظم نواز شریف نے اس وقت کیا جب انھوں نے وزیر داخلہ چوہدری نثار علی خان سے ملاقات کی، واضح رہے کہ رواں سال جولائی میں اسلام آباد ہائی کورٹ کے جسٹس نور الحق قریشی پر مشتمل ایک رکنی بینچ نے نیکٹا کے 6 ملازمین کی درخواستوں پر فیصلہ سناتے ہوئے ادارے کے سربراہ خواجہ اشرف کو ہٹانے اور ادارے کو دوبارہ وزیر اعظم کے ماتحت کرنے کا فیصلہ سنایا تھا۔ عدالت کا برطرف 6 ملازمین کی بحالی کا بھی حکم دیتے ہوئے کہنا تھا کہ نیکٹا کے انتظامی امور وزارت داخلہ کے سپرد کرنے کا نوٹی فکیشن آئین سے متصادم ہے۔واضح رہے کہ حامد علی خان سیکریٹری کیپیٹل ڈویلپمنٹ اینڈ ایڈمنسٹریشن کے طور پر کام کر رہے ہیں جب کہ وہ وزارت داخلہ میں ایڈیشنل سیکریٹری بھی رہ چکے ہیں۔
ایمز ٹی وی (تھرپارکر) سندھ حکومت نے امدادی گندم کے نام پر مٹی سے بھری گندم کی بوریاں تھر پہنچا دی، زرائع کے مطابق مٹھی کے ریلیف گندم گودام میں جامشورو کے بولاڑی گودام سے لائی گئی گندم کی بوریوں میں سے 292 بوریاں ایسی نکل آئیں جن میں مٹی بھری ہوئی تھی جو کہ غریبوں میں تقسیم کی جانی تھی۔ گودام انچارج کا کہنا ہے کہ 4 نومبر کو جامشورو کے بولاڑی گودام سے گندم کی 4 ہزار 895 بوریاں مٹھی لائی گئی جن میں سے 292 بوریوں میں مٹی سے بھری ہوئی گندم تھی جبکہ اس حوالے سے ڈائریکٹر محکمہ خوراک کو اطلاع کردی گئی تھی اور 2 روز تک بوریوں سے لدے ٹرک گودام کے باہر ہی کھڑے رہے تاہم اعلی حکام کے دباؤ پرمٹی سے بھری بوریوں کو گودام میں رکھ دیا گیا۔ دوسری جانب ڈپٹی کمشنر تھرپارکر آصف جمیل نے ساری ذمہ داری محکمہ خوراک پر ڈالتے ہوئے کہا کہ گندم کی فراہمی محکمہ خوراک کی ذمہ داری ہے تاہم خراب گندم کو الگ کرلیا گیا ہے جسے جلد واپس بھجوادیا جائے گا جبکہ صاف گندم مٹھی تحصیل کے 1200 خاندانوں میں تقسیم کی جائے گی۔ ان کا کہنا تھا کہ معاملے کی تحقیقات کے لئے مٹھی گودام پہنچا ہوں اور خراب گندم کے حوالے سے ذمہ داروں کا تعین کیا جائے گا۔