ایمز ٹی وی(فارن ڈیسک)

پاکستانی فوج کے سربراہ جنرل راحیل شریف نے افغانستان کے ایک روزہ دورے میں صدر اشرف غنی سے ملاقات کی ۔

پاکستانی فوج کے شعبہ تعلقات عامہ آئی ایس پی آر کے ڈائریکٹر جنرل میجر جنرل باجوہ نے ایک ٹویٹ میں کہا ہے کہ کابل میں صدارتی محل میں جنرل راحیل شریف اور صدر اشرف غنی کے درمیان ملاقات ہوئی ہے۔

جنرل باجوہ کے مطابق یہ ملاقات مثبت رہی۔

ترجمان پاک فوج کے مطابق افغان صدر اشرف غنی کے ساتھ ملاقات کے بعد جنرل راحیل شریف کی قومی سلامتی امور کے سربراہ کے ساتھ ملاقات شروع ہو گئی ہے۔

جنرل راحیل شریف اپنے ایک روزہ دورے میں چیف ایگزیکٹیو عبداللہ عبداللہ سمیت افغان وزیر دفاع اور افغان فوج کی اعلیٰ قیادت سے بھی ملاقاتیں کریں گے۔

جنرل راحیل شریف اور افغانستان کے اعلیٰ حکام کے درمیان ہونے والی ملاقاتوں میں خطے کی سکیورٹی کی صورت حال سمیت باہمی دلچسپی کے امور پر بھی تبادلہ خیال کیا جائے گا جبکہ اس دوران آپریشن ضرب عضب سے متعلق امور بھی زیر بحث آئیں گے۔

افغانستان میں نئی حکومت کے قیام کے بعد پاکستان کے کسی بھی اعلیٰ عہدیدار کا یہ پہلا افغانستان کا دورہ ہے-

جنرل راحیل شریف کا دورہ افغانستان ایسے وقت میں ہو رہا ہے جب امریکی محکمۂ دفاع نے ایک نئی رپورٹ میں الزام لگایا ہے کہ پاکستان اب بھی بھارت اور افغانستان کے خلاف شدت پسند تنظیموں کو استعمال کر رہا ہے اور یہ بات پورے خطے کے استحكام کے لیے خطرناک ہے۔

پینٹاگون کی طرف سے امریکی کانگریس کے لیے ہر چھ ماہ جاری کی جانے والی اس رپورٹ میں کہا گیا ہے کہ ’پاکستان ان پر کسی فورسز یا بالواسطہ لڑنے والی طاقتوں کا استعمال افغانستان میں اپنے گھٹتے ہوئے اثر رسوخ کی وجہ سے اور بھارت کی برتر فوجی طاقت کے خلاف حکمتِ عملی کے طور پر کر رہا ہے۔۔

ایمز ٹی وی (انٹرٹینمنٹ) گلوکارو اداکار علی ظفر کی فلم آنے والی فلم ’’کل دل‘‘کے نئے گانے ’’نخریلے‘‘ کی وڈیو ریلیز کردی گئی ہے۔ گلزار کے لکھے گئے گیت کو شنکر احسان لوئے نے علی ظفر ، مالا لکشمی اور اپنی آواز میں ریکارڈ کیا ہے، فلم  14 نومبر کو بھارت سمیت دنیا کے دیگر سینماؤں گھروں میں ریلیز کی جائے گی اور اس  میں علی ظفر رنویر سنگھ اور پرینتی چوپڑا کے ساتھ مرکزی کردار میں دکھائی دینگے جب کہ اپنی کامیڈی اورمنفرد ڈانس کی بدولت شہرت پانے والے  گووندا طویل عرصے بعد کسی فلم میں اداکاری کے جوہردکھاتے نظر آئیں گے لیکن اس فلم میں ان کا کردار منفی ہے، گووندا  اس سے قبل ’’شکاری‘‘ نامی فلم میں بھی منفی کردارادا کرچکے ہیں۔

ایمز ٹی وی (کراچی) کراچی میں تعمیر ہونیوالے ایٹمی بجلی گھروں کے خلاف درخواست کی سماعت سندھ ہائی کورٹ کے چیف جسٹس مقبول باقر اور جسٹس شاہنوار طارق پر مشتمل بینچ نے کی۔ ایٹمی بجلی گھروں کی تعمیرکے خلاف درخواست میں ایٹمی بجلی گھر کی تعمیر کو انسانی جانوں کے لئے خطرہ قرار دیا گیا ہے۔ درخواست میں موقف اختیار کیا گیا ہے کہ ایٹمی بجلی گھر شہر سے اٹھائیس کلو میٹر دور لگنا چاہئے، ایٹمی بجلی گھر کے منصوبے پر چین کام کررہا ہے جس نےکوئی کامیاب تجربہ نہیں کیاہے۔ ایٹمی بجلی گھر کےمنصوبے سے متعلق اٹامک انرجی کمیشن نے بھی اپنی رپورٹ عدالت میں جمع کرادی۔ رپورٹ میں کہا گیا ہے کہ ایٹمی بجلی گھروں کی تعمیر کا منصوبہ عوامی سماعت کے بغیر شروع کیا گیا۔ رپورٹ میں ایٹمی بجلی گھر کی تعمیر کو حساس معاملہ قرار دیتے ہوئے بتایا گیا ہے کہ منصوبے پروفاقی حکومت کی منظوری سےکام شروع کیا گیا، جس کے بعد عدالت نے حکم امتناع میں بارہ نومبر تک توسیع کرتے ہوئے سماعت ملتوی کردی۔

ایمز ٹی وی(فارن ڈیسک) ایبولا وائرس کے پھیلاؤ کو روکنے کے لیے اقوام متحدہ کے مشن کے سربراہ ٹونی بینبری کا کہنا ہے کہ اس مہلک بیماری کے خاتمے کے لیے وسائل موجود نہیں ہیں۔ ٹونی بینبری۔ کا کہنا تھا کہ اگرچہ برطانیہ، چین، کیوبا اور امریکہ کی جانب سے امداد دی گئی ہے لیکن ایبولا وائرس کے خاتمے کے لیے فوری طور پر مدد درکار ہے۔ واضح رہے کہ عالمی ادارہ صحت نے تصدیق کی ہے کہ ایبولا سے اب تک 4818 ہلاکتیں ہو چکی ہیں- ٹونی کا کہنا تھا کہ ایبولا کے خلاف لڑنے کی صلاحیت موجود نہیں ہے۔ عالمی ادارہ صحت کے بروس ایلیورڈ کا کہنا تھا کہ وہ پراعتماد ہیں کہ ایبولا پر قابو پایا جا رہا ہے، تاہم انھوں نے متنبہ کیا کہ اب بھی ایبولا بحران ختم نہیں ہوا۔ امریکی حکام نے کہا کہ امریکی صدر اس ضمن میں 5.4 ارب ڈالر فوری طور پر منظور کرنے کا کہیں گے۔