ممبئی: بھارت سے تعلق رکھنے والی لیجنڈ گلوکارہ آشا بھوسلے نے مرنے سے قبل اپنی آخری خواہش کا اظہار کر دیا۔

گلوکارہ آشا بھوسلے نے اپنے انجہانی شوہر اور لیجنڈری میوزک کمپوزر آر ڈی برمن کو یاد کرتے ہوئے ان کی تعریفیں کیں اور بتایا کہ وہ غیر معمولی فطرت کے انسان تھے اور وہ ایک مشہور میوزک ڈائریکٹر ہونے کے باوجود خود کو ایسا نہیں سمجھتے تھے، ان میں کوئی غرور بھی نہیں تھا۔

اس کے علاوہ انہوں نے اپنی زندگی کی آخری خواہش کے حوالے سے بتایا کہ ایک ماں کی خواہش ہوتی ہے کہ اس کے بچے خوش رہیں، ایک نانی یا دادی کی خواہش ہوتی ہے اس کے پوتا پوتی یا نواسا نواسی خوش رہیں لیکن میں اپنی آخری سانس تک گانا چاہتی ہوں۔

لیجنڈ گلوکارہ نے مزید کہا کہ میری اب صرف یہی خواہش ہے کہ میں گاتے ہوئے مر جاؤں، میرے لیے سیکھنے کے لیے کچھ نہیں بچا، میں نے پوری زندگی گایا ہے، میں نے 3 سال کی عمر میں کلاسکیکل موسیقی سیکھنا شروع کی اور 82 سال سے پلے بیک گلوکارہ ہوں، اب یہی خواہش ہے کہ گاتے ہوئے میرا سانس نکل جائے، اور یہ ہی مجھے سب سے زیادہ خوشی دے گی۔