نئی دہلی: ریاضی کی استاد نے پہاڑہ نہ سنانے پر 9 سالہ لڑکے کے ہاتھ پر ڈرل مشین چلادی۔

بھارتی میڈیا کے مطابق طالب علم پر استاد کے تشدد کا واقعہ ریاست اترپردیش کے شہر کان پور میں پیش آیا۔ استاد نے ڈرل مشین طالب علم کے ہاتھ پر رکھ کرچلادی۔

ساتھی طالب علم نے صورت حال دیکھتے ہوئے فوری طور پر ڈرل مشین کا سوئچ بند کردیا جس سے ڈرل مشین نے ہاتھ کی ہڈی کو تو نقصان نہ پہنچایا تاہم طالب علم کا ہاتھ بری طرح زخمی ہوگیا۔ ساتھی طلبا اپنے زخمی ہم جماعت کو لیکر اسپتال پہنچے۔

اہل خانہ کو بھی اطلاع دی گئی جنھوں نے اسکول کے سامنے احتجاج بھی کیا۔ طلبا اور اہل خانہ کے احتجاج پر ایجوکیشن آفیسر نے ریاضی کے ٹیچر کو معطل کرکے تین رکنی انکوائری کمیٹی تشکیل دیدی۔

کولمبو: پاکستان نے سری لنکا کے شہر کولمبو میں جاری ساوتھ ایشین کراٹے چیمپیئن شپ میں دوسرا گولڈ اور ایک سلور میڈل بھی میڈل جیت لیا۔

ارشاد علی نے انفرادی کاٹا ایونٹ میں سینیئر اور انڈر 21 کیٹیگری میں شاندار پرفارمنس دیتے ہوئے سونے کا تمغہ اپنے نام کیا جبکہ آرزو نے ویمن انفرادی کاتا میں سلور میڈل حاصل کیا۔

گولڈ میڈلسٹ ارشاد علی نے سبز ہلالی پرچم بلند کرنے کو اپنے لیے ایک اعزاز قرار دیتےہوئے کہاکہ سخت محنت کا پھل ملا ہے، اس کامیابی کے لیے کوچ کے ساتھ کراٹے فیڈریشن کے محمد جہانگیر کا بھی بہت شکرگزار ہوں جن کی وجہ سے اس چیمپیئن شپ میں شرکت کا موقع ملا۔

کراچی: سرسید یونیورسٹی آف انجینئرنگ اینڈ ٹیکنالوجی کے شعبہ بزنس ایڈمنسٹریشن کے زیراہتمام ’’پائیدار ترقی میں کمیونٹی کا کردار اورزمہ داریاں ‘‘ کے عنوان پر سیمینار کا انعقادکیا گیا جس کے مہمانِ خصوصی معروف سماجی رہنما اور ایدھی فاءونڈیشن کے چیئرمین فیصل ایدھی تھے جبکہ مہمان مقررکمیونٹی ڈیولپمنٹ ایڈوائزر ساجد حسین خاصخیلی تھے ۔

شرکاء میں چانسلر کے ایڈوائزر سراج خلجی کے علاوہ طلباء، اساتذہ اور اسٹاف ممبرز کی ایک کثیر تعداد شامل تھی ۔مہمانِ خصوصی، چیئرمین ایدھی فاءونڈیشن فیصل ایدھی نے عام لوگوں خصوصاََ دیہی سندھ میں غربت،ناخواندگی، احساسِ محرومی اور مایوس کن صورتحال پر بات کی اور تعلیم کی اہمیت پر زور دیتے ہوئے کہا کہ پاکستان میں ناخواندگی کی شرح خطرناک حد تک بڑھ رہی ہے اور آج تقریباََ دو کروڑ بچے تعلیم سے محروم ہیں ۔ ایسے وقت جبکہ دوسری قو میں مریخ اور چاند پررہائش کے مواقع تلاش کررہی ہیں ، ہم ابھی تک لاکھوں بچوں کو تعلیم حاصل کرنے کے لیے جگہ تک فراہم کرنے میں ناکام ثابت ہوئے ہیں ۔

انہوں نے سرسید یونیورسٹی کی انتظامیہ اور فیکلٹی سے اپیل کی کہ وہ بچوں کی تقدیر بدلنے کے لئے آگے آئیں اور ان کا ساتھ دیں ۔سیمینار سے خطاب کرتے ہوئے سرسید یونیورسٹی کے وائس چانسلر پروفیسر ڈاکٹر ولی الدین نے کہا کہ ہم اس نیک مقصد میں ساتھ دینے کے لئے پوری طرح تیار ہیں ۔ بچوں کی تعلیم نہ صرف ان کی ذاتی زندگی کو محفوظ بناتی ہے بلکہ اجتماعی طورپرایک پُرِ اعتماد قوم کی تعمیر کرتی ہے ۔ تعلیم معاشرے کی سوچ کو عالمی تناظر کے مطابق ڈھالتی ہے اور معاشرتی برائیوں کو جڑ سے ختم کرنے میں بھی مدد دیتی ہے ۔ تعلیم کی اہمیت کو قطعی نظرانداز نہیں کیا جاسکتا کیونکہ یہ معاشرے سے عدم مساوات ختم کرکے ملک میں یکساں ترقی کو یقینی بناتی ہے ۔سنیئر کمپلائنس مینجمنٹ وکمیونٹی ڈیولپمنٹ ایڈوائزر ساجد حسین خاصخیلی نے کہا کہ ترقی پذیر ممالک میں وسائل ختم ہورہے ہیں اور بہت سے جانداروں کے ناپید ہونے کے امکانات قوی ہوگئے ہیں ۔ پوری دنیا عدم توازن کا شکار ہے کیونکہ دولت کا ارتکاز صرف چند ہاتھوں میں ہے جس کے نتیجے میں معاشرہ میں بھوک اور افلاس کا ڈیرہ ہے ۔

اس موقع پر شعبہ بزنس ایڈمنسٹریشن کے چیئرمین ڈاکٹر عماد الحق نے کمیونٹی کی ترقی کے لئے سازگار ماحول پیدا کرنے کی ضرورت پر زور دیتے ہوئے کہا کہ طلباء کے لئے ایک ایسا پلیٹ فارم مہیاکرنا ضروری ہے جو انھیں عالمی تناظر کے مطابق سماجی کلچر سے نہ صرف آگاہی دے بلکہ کمیونٹی ڈیولپمنٹ کو فروغ دینے کی تربیت بھی کرے ۔قبل ازیں خیرمقدمی کلمات ادا کرتے ہوئے سرسیدیونیورسٹی کے رجسٹرار سید سرفراز علی نے کہا کہ معاشرے کی ترقی کمیونٹی کے ارکان کو با اختیار بناتی ہے، اور کمیونٹی کو زیادہ مضبوط اور مربوط بناتی ہے ۔

مجھے امید ہے کہ ہمارے طلباء خدمت انسانی کے جذبہ سے سرشار ہوکررضاکارانہ طور پر انسانیت کی خدمت کے لئے متحرک ہوں گے ۔

کراچی: این ای ڈی یونی ورسٹی آف انجینئرنگ اینڈ ٹیکنالوجی، انسٹی آف انجینیرز پاکستان (آئی ای پی)، یونیسکو چیئر فار سسٹینیبل اربن ریجن اور ایس ڈی جیز سپورٹ یونٹ پلاننگ اینڈ ڈیوپلمنٹ بورڈ حکومت سندھ کے اشتراک سے دو روزہ عالمی کانفرنس بعنوان "International Conference On Sustainable Engineering and Development Towards Sustainable Built Environment and Communities" میں کیاگیا۔

جامعہ ترجمان فروا حسن کے مطابق اس کانفرنس کا مقصد موجودہ ماحولیاتی تبدیلیوں اور ان کے اثرات سے متعلق آگہی تھا. جس کے مہمانِ خصوصی ایڈمنسٹریٹر کراچی بیرسٹر مرتضی وہاب تھے.

تقریب کے مہمان خصوصی ایڈمنسٹریٹر کراچی بیرسٹر مرتضی وہاب تھے۔شیخ الجامعہ این ای ڈی نے کہا کہ اقوام متحدہ نے ماحولیاتی تبدیلیوں کے اثرات کو کم کرنے کے لیے اہداف مقرر کیے، میں سمجھتا ہوں کہ ڈیمج اینڈ لاس فنڈ تاریخی معاہدہ ہے لیکن اصل مرحلہ عمل درآمد ہے.

چئیرمین پاکستان انجینئرنگ کونسل نجیب ہارون، کی نوٹ اسپیکر پریکٹس مینجر Christophe Crepin ورلڈ بینک پاکستان اور چیئرپرسن پلاننگ اینڈ ڈیوپلمنٹ بورڈ حکومت سندھ سید حسن نقوی نے کانفرنس سے خطاب کرتے ہوئے کہا کہ حالیہ بارشوں کے پیشِ نظر پاکستان کو شدید نقصان کا سامنا رہا ہے، ماحولیاتی بحران ایک فرد کا نہیں بلکہ عالمی مسئلہ ہے، اس کے حل کے لیے بیک وقت سب کو کوشش کرنی ہوں گی.

اس دو روزہ کانفرنس میں سابقہ گورنر اسٹیٹ بینک عشرت حسین، یونیسکو چئیر ہولڈر سسٹنیبل اربن ریجن پروفیسر ڈاکٹر نعمان احمد، ایسوسی کانفرنس چئیر انجینئر محمد عباس ساجد، سیکریٹری کانفرنس پروفیسر ڈاکٹر عبدالجبار سانگی، چیف آرگنائزر کانفرنس ڈاکٹر فرخ عارف سمیت مقررین پینل کا حصہ رہے. اس عالمی کانفرنس کے اختتامی سیشن سے ایڈمنسٹریٹر کراچی بیرسٹر مرتضیٰ وہاب نے خطاب کیا.

بیرسٹر مرتضیٰ وہاب کا کانفرنس اختتامی سیشن سے خطاب کرتے ہوئے کہنا تھا کہ عالمی کانفرنس کوپ 27 میں ہونے والی پیش رفت ماحولیاتی آفات سے نمٹنے کے لیے اہم اقدام ہے. اُن کا کہنا تھا کہ فنڈ کا اعلان ایسے ممالک کے لیے اُمید افزا ہے جو موسمیاتی تبدیلیوں سے متاثر ہیں. انہوں نے حالیہ بارشوں سے متاثرہ افراد کا ذکر کرتے ہوئے کہا کہ مسائل سے نظر چرائی نہیں جاسکتی بلکہ اس موسمیاتی جنگ کو جیتنے کے لیے عملی کوششوں کی ضرورت ہے.

جب کہ ان کا کہنا تھا کہ ہمیں اگلی نسل کو بہتر دنیا دینی ہے تو جن منفی کاموں نے آج یہاں پہنچایا ہے ان سے اجتناب کرنا ہوگا. انہوں نے کہا کہ تعلیمی ادارے معاشرہ بناتے ہیں لہذا ماحولیاتی تبدیلی سے آگاہی کانفرنس کا انعقاد این ای ڈی کا قابل تحسین عمل ہے۔

کراچی: اسٹیٹ بینک آف پاکستان (ایس بی پی) کے جانب سے بین الاقوامی سروس فراہم کرنے والوں کو 3 کروڑ 40 لاکھ ڈالر کی ادائیگی منسوخ کرنے کے بعد موبائل صارفین یکم دسمبر 2022 سے پاکستان میں گوگل پلے اسٹور کی سروسز مفت میں ڈاؤن لوڈ نہیں کرسکیں گے۔

میڈیا رپورٹس کے مطابق گوگل پلے اسٹور کی سروسز معطل ہونے پر پاکستانی صارفین کریڈٹ کارڈ یا ڈیبٹ کارڈ کے ذریعے ادائیگی کرنے کے اہل ہوں گے، جس کے بعد انہیں گوگل اور دیگر بین الاقوامی ایپس کو ڈاؤن لوڈ کرسکیں گے۔

دوسری جانب اسٹیٹ بینک نے ڈائریکٹ کیرئیر بلنگ (ڈی سی بی) کے طریقہ کار کو تبدیل کیا جس کے بعد موبائل کمپنیوں کے ذریعے گوگل، ایمزون اور میٹا وغیرہ سمیت بین الاقوامی سروس فراہم کرنے والوں کو سالانہ بنیادوں پر 3 کروڑ 40 لاکھ ڈالرز کی ادائیگی رک گئی ہے۔

واضح رہے کہ وزارت انفارمیشن ٹیکنالوجی اور ٹیلی کمیونیکیشن، پاکستان ٹیلی کمیونیکیشن اتھارٹی (پی ٹی اے) اور 4 سیلولر موبائل آپریٹرز (سی ایم اوز) نے متفقہ طور پر اسٹیٹ بینک آف پاکستان کو جمعہ کو ایک مشترکہ خط لکھا ہے جس میں ڈی سی بی کے طریقہ کار کو منسوخ کرنے کے فیصلے کو واپس لینے کی درخواست کی گئی ہے۔

کراچی: وزیر تعلیم سندھ سید سردارعلی شاہ کا شانداراقدام سندھ میں پہلی بار کالج ایجوکیشن ڈیپارٹمنٹ نے نئی بھرتیوں کے لئے اپنا آن لائن سسٹم لاؤنچ کردیا ۔

1500 سیٹوں پر مختلف سبجیکٹ میں کالج انٹرنس بھرتی کئے جائیں ۔ وزیر تعلیم سندھ سید سردار علی شاہ سیکرٹری کالج ایجوکیشن ڈیپارٹمنٹ عبد العلیم لاشاری کے زیر نگرانی کالج ایجوکیشن ڈیپارٹمنٹ نے کالج ٹیچنگ انٹرنس پروگرام کے تحت آن لائن درخواستوں کا آغاز کر دیا ہے

22 مختلف سبجیکٹ میں 1500 سیٹوں پر کالج انٹرنس بھرتی کئے جائیں گے ۔ dgcs.gos.pk پر آن لائن درخواستوں کا آغاز ہو چکا ہے کالج انٹرنس پروگرام میں صرف وہی لوگ آپلائی کر سکتے ہیں جن کی عمر 35 سے یا اس سے کم ہو ماسٹر میں فرسٹ کلاس متعلقہ سبجیکٹ میں اپنے ڈومیسائل ڈسٹرکٹ میں پوسٹ ہونے کی صورت میں آپلائی کر سکتے ہیں۔

سندھ میں پہلی بار گورنمنٹ آف سندھ نے کسی دوسری کمپنی کے بجائے اپنا سسٹم لاؤنچ کیا ہے ۔

لاہور: پاکستان کرکٹ بورڈ (پی سی بی) کے چیئرمین رمیزراجہ ایشیاکپ کیلئے بھارتی ٹیم کے نہ آنے پر دو ٹوک موقف اپنالیا۔

اسلام آباد میں قومی کرکٹرز کے اعزاز میں تقریب کے دوران میڈیا سے گفتگو کرتے ہوئے چیئرمین پی سی بی رمیز راجہ نے کہا کہ اگر آئندہ پاکستان میں شیڈول ایشیاکپ کیلئے بھارت نہیں آتا تو پاکستان بھی جواب میں ورلڈکپ کیلئے انڈیا نہیں جائے گا۔

انہوں نے سوال اٹھایا کہ اگر پاکستان آئندہ برس انڈیا میں شیڈول ورلڈکپ میں شرکت نہیں کرے گا تو دیکھا گا کون؟، ہم جارحانہ انداز اپنائیں گے، گرین شرٹس پرفارمنس کر رہے ہیں، انھوں نے دنیا کے بڑے بزنس والی ٹیم کو ہرایا ہے۔

چیئرمین پی سی بی نے کہا کہ ہم ٹی20 ورلڈکپ کا فائنل کھیل کر آئے ہیں، چیئرمین نے کہا کہ بھارتی بورڈ یا ایشین کرکٹ کونسل سے پاکستان میں بلو شرٹس کے ایشیا کپ نہ کھیلنے کے حوالے سے تاحال کوئی بات نہیں ہوئی لیکن جب بھی موقع ملے گا ہم یہ ضرور کہیں گے۔

رمیز راجہ نے کہا کہ گزشتہ سال ورلڈکپ، پھر ایشیاکپ میں ہم نے بھارت کے بلین ڈالر اکانومی بورڈ کو شسکت دی۔

یاد رہے کہ ایشین کرکٹ کونسل کے صدر جے شاہ نے کہا تھا کہ ایشیا کپ کیلیے بھارتی ٹیم پاکستان نہیں جائے گی، ہوسکتا ہے ایونٹ کسی نیوٹرل مقام پر منتقل کردیا جائے۔

کراچی: سندھ حکومت نے نئے بھرتی اساتذہ کی چھٹیوں پرپابندی عائد کردی ۔

محکمہ تعلیم سندھ کی جانب سے نئے بھرتی اساتذہ کے بیرون ملک یا اسٹڈی لیو پر تین سال کے لئے پابندی عائدکردی۔

محکمہ تعلیم نے اسکول ایجو کیشن کے تمام ریجنل ڈائریکٹرز کو خط ارسال کردیا نئے اساتذہ کی تین سال تک تقرریاں و تبادلے اور چھٹیاں نہیں ہوسکتیں۔

کراچی: انٹر بورڈ کراچی نے انٹر سائنس پری میڈیکل سال دوم کے نتائج کا اعلان کردیا ہے۔

انٹر پری میڈیکل کے امتحانات میں 24608 نے رجسٹریشن کرائی، 24115 نے شرکت کی، جس میں سے 14193 کامیاب ہوئے اور نتائج کا تناسب 58.77 فیصد رہا۔

2684 امیدوار اے ون گریڈ میں کامیاب ہوئے اے گریڈ میں 3037 امیدوار، بی گریڈ میں 3296 ، سی گریڈ میں 3364 ، ڈی گریڈ میں 1744اور ای گریڈ میں 68 امیدوار کامیاب ہوئے۔

کراچی: انٹر بورڈ کمیٹی چیئرمین کے اجلاس میں نیا گریڈنگ سسٹم آئندہ تین برس کے لئے نافذکرنےکی منظوری دےدی گئی۔

ذرائع کے مطابق سندھ سمیت پورے ملک میں میٹرک اور انٹر کے سالانہ امتحانات برائے سال 2023 بالترتیب اپریل اور مئی میں ہوں گے،۔

اجلاس میں سندھ کی جانب سے بتایا گیا کہ سندھ کے تعلیمی بورڈز میں امتحانات کا سلسلہ عید الفطر کے فوری بعد شروع کیا جارہا ہے اور سیکریٹری یونیورسٹیز اینڈ بورڈز مرید راہیمو کی زیر صدارت منعقدہ اجلاس میں پہلے ہی یہ طے ہوچکا ہے کہ پورے سندھ میں میٹرک کے امتحانات 27 اپریل جبکہ انٹر کے امتحانات 15 مئی سے شروع کیے جائیں۔

مزید براں اس فیصلے کی منظوری وزیر تعلیم سندھ سردار علی شاہ کی زیر صدارت جلد متوقع اسٹیئرنگ کمیٹی کے اجلاس سے لی جائے گی، علاوہ ازیں آئی بی سی سی کے منعقدہ اجلاس میں پورے ملک میں میٹرک اور انٹر کی سطح پر “10 پوائنٹس گریڈنگ سسٹم” کے نفاذ کی منظوری دے دی گئی۔

سیکریٹری آئی بی سی سی غلام علی ملاح نے میڈیاکو بتایا کہ انٹر اور میٹرک کی سطح پر رائج موجودہ گریڈنگ سسٹم اب ختم کیا جارہا ہے اور آئندہ تین برسوں میں سال 2025 تک پورے ملک میں 10 پوائنٹس گریڈنگ سسٹم نافذ کردیا جائے گا تاہم اس کے نفاذ کا سلسلہ آئندہ امتحانات سے ہی شروع کردیا جائے گا۔

انہوں نے کہا کہ اس گریڈنگ سسٹم کے تحت اب طالب علم کے امتحانی ریمارکس کے ساتھ “ایف” یعنی فیل کی اصطلاح ختم کردی گئی ہے جس کی جگہ “U ” یعنی unsatisfactory لکھا جائے گا امتحانات کے پاسنگ مارکس 33 سے بڑھا کر 40 کردیے گئے ہیں اسی طرح 95 سے 100 فیصد تک مارکس لینے والے طلبہ کا گریڈ A++ ہوگا جسے exceptional کا نام دیا گیا ہے۔

اسی طرح 90 سے 95 فیصد تک A+ جسے outstanding کہا گیا ہے، 85 سے 90 تک A گریڈ جسے remarkable کہا گیا ہے اور 80 سے 85 تک B++ جسے excellent کہا گیا ہے۔

سیکریٹری آئی بی سی سی کے مطابق 75 سے 80 تک B+ جسے very good کہا گیا ہے، 70 سے 75 تک B جسے good اور 60 سے 70 تک C گریڈ جسے fair کہا گیا ہے جب کہ 50 سے 60 تک D گریڈ جسے satisfactory اور 40 سے 50 تک E گریڈ جسے sufficient کا نام دیا گیا ہے۔

سیکریٹری آئی بی سی سی کا کہنا تھا کہ چونکہ جامعات کی سطح پر پاسنگ مارکس پہلے ہی کہیں 40 اور کہیں 50 ہیں جبکہ رجحان ٹیسٹ کے پاسنگ مارکس بھی 50 ہوتے ہیں لہذا جامعات سے ان امتحانی نتائج کو ہم آہنگ کرنے کے لیے پاسنگ مارکس بڑھانے کا فیصلہ کیا گیا ہے۔