قومی ٹیم کے نوجوان وکٹ کیپر بیٹر محمد حارث شادی کے بندھن میں بندھ گئے۔

کرکٹر محمد حارث کے ولیمہ کی تقریب تقریب پشاور میں ہوگی، جس میں کئی قومی کرکٹرز کی شرکت کا امکان ہے۔

بارات کی تقریب میں دوستوں اور رشتہ داروں نے شرکت کی، محمد حارث کی ولیمہ کی تقریب آج ہوگی۔

محمد حارث کے بھائی محمد انس کا کہنا تھا کہ حارث کی شادی فیملی میں ہوئی ہے، ہم حارث کی خوشحال زندگی کیلئے دعا گو ہیں۔

واضح رہے کہ گزشتہ ماہ 6 ستمبر کو محمد حارث نے انسٹاگرام پر اپنے نکاح کی خوشخبری سنائی تھی اور ساتھ ہی اپنی کچھ تصویریں بھی شیئر کی تھیں۔

شہید ذوالفقارعلی بھٹو میڈیکل یونیورسٹی کے ترجمان نے کہا کہ ایم ڈی کیٹ سے متعلق 209 شکایات موصول ہوئی تھیں۔

جنہیں قانون کے مطابق حل کر دیا گیا ہے اور ٹیسٹ کے نتائج جار ی کر دیئے گئے ہیں۔

یونیورسٹی کے زیرانتظام ایم ڈی کیٹ ٹیسٹ کیلئے 22ہزار طلبہ نے رجسٹریشن کروائی تھی اور 20 ہزار طلبہ نے امتحان میں شرکت کی تھی۔

پاکستان کرکٹ بورڈ (پی سی بی) کی جانب سے وکٹ کیپر بیٹر محمد رضوان کو تاحال کپتانی دینے کی کوئی پیشکش موصول نہیں ہوئی۔

میڈیا رپورٹس کے مطابق بورڈ کی جانب سے تاحال کپتانی کی کوئی بات نہیں کی گئی تاہم کرکٹر نے آفر ملنے پر جلد بازی میں فیصلہ نہ کرنے کا عندیہ دیا ہے کیونکہ کپتانوں کے ساتھ ماضی میں ہوئے سلوک کے حوالے سے تحفظات وہ پی سی بی کو آگاہ کرنا چاہتے ہیں۔

محمد رضوان سے سلیکشن کے حوالے سے بھی کوئی مشاورت نہیں کی گئی جبکہ ٹی20 ورلڈکپ اور بنگلادیش ٹیسٹ سیریز میں محمد رضوان کو کسی ٹیم مینجمنٹ کی میٹنگ میں مدعو نہیں کیا گیا۔

رپورٹس میں کہا گیا ہے کہ قومی ٹیم کے سینئر کھلاڑیوں میں پی سی بی کی پالیسیوں پر شدید تحفظات ہیں۔

خیال رہے کہ پاکستان کی وائٹ بال ٹیم کے کپتان بابراعظم نے گزشتہ روز کپتانی سے استعفیٰ دے دیا تھا جسے بورڈ نے گزشتہ روز منظور کرلیا تھا۔

قبل ازیں دعویٰ کیا جارہا تھا کہ بابراعظم کے کپتانی سے مستعفیٰ ہونے کے بعد محمد رضوان کو ٹیم کی قیادت کیلئے مضبوط امیدوار ہیں۔

اسلام آباد: علامہ اقبال اوپن یونیورسٹی نے سمسٹر بہار 2024 میں پیش کئے گئےڈگری پروگرامز کافائنل امتحانات کا شیڈول جاری کردیا گیا۔

ایسوسی ایٹ ڈگری، بی ایڈ، بی بی اے اور بی ایس (او ڈی ایل) پروگراموں کے فائنل امتحانات کا شیڈول جاری کر دیا ہے، یہ امتحانات ملک بھر میں ایک ساتھ 16 اکتوبر سے شروع ہوں گے۔

رول نمبر سلپس طلبہ کے سی ایم ایس پورٹلز پر اپ لوڈ جبکہ ڈیٹ شیٹ یونیورسٹی کی ویب سائٹ پر فراہم کردی گئی ہے۔

لاہوربورڈ نے پیپروں کی ری چیکنگ کا شیڈول جاری کردیا۔

امیدوار 16 اکتوبر تک ری چیکنگ کیلئے آن لائن درخواستیں جمع کراسکیں گے۔

ری چیکنگ کیلئے 1200روپے فی پیپر فیس رکھی گئی ہے ۔آن لائن درخواست جمع ہونے کے بعد امیدوار کو بذریعہ ایس ایم ایس مقررہ تاریخ بارے آگاہ کیا جائے گا۔

پاکستانی شوبز انڈسٹری کی معروف اداکارہ جویریہ سعود نےمقبول ڈرامہ سیریل ‘عشق مرشد’ کا گانا لکھنےکاانکشاف کیاہے۔

حال ہی میں نجی ٹی وی چینل کے مارننگ شو میں گفتگو کرتے ہوئے جویریہ سعود نے کہا کہ میں نے کئی پاکستانی ڈراموں کے ٹائٹل ٹریک لکھے ہیں لیکن مجھے کبھی کسی کا کریڈٹ نہیں دیا گیا۔

جویریہ سعود نے کہا کہ مجھے اپنے ہی دوستوں سے دھوکہ ملا، دوستوں کے دھوکے سے ہی انسان سیکھتا ہے اور مجھے اس بات کا کوئی پچھتاوا نہیں کہ مجھے میرے کام کا کریڈٹ نہیں دیا گیا۔

اداکارہ نے کہا کہ میں نے مقبول ڈرامہ سیریز ‘خدا اور محبت’ کا پہلا سیزن پروڈیوس کیا تھا جبکہ اس کا گانا بھی میں نے ہی لکھا تھا اور مقبولیت کی وجہ سے دوسرے سیزن میں بھی میرا لکھا گیا گانا شامل کیا گیا۔

اُنہوں نے کہا کہ بعد میں اس ڈرامے کے او ایس ٹی میں کچھ تبدیلی کرکے گانے کا کریڈٹ میرے بجائے کسی دوسرے فنکار کو دے دیا گیا تھا اور جب میں نے شکوہ ظاہر کیا تو مجھے کہا گیا کہ اگر گانا مقبول نہیں ہوتا تو آپ شکوہ نہیں کرتیں اور اب گانا مقبول ہوگیا ہے تو آپ کریڈٹ مانگ رہی ہیں۔

جویریہ سعود نے کہا کہ میں نے حالیہ بلاک بسٹر ڈرامہ سیریل ‘عشق مرشد’ کا گانا بھی لکھا لیکن مجھے اس کا کریڈٹ بھی نہیں دیا گیا۔

اداکارہ نے مزید کہا کہ میں نے دیگر ڈراموں کے بھی ٹائٹل ٹریک لکھے ہیں لیکن مجھے کبھی کسی کا کریڈٹ نہیں دیا گیا۔

پاکستان اور انگلینڈ کے درمیان تین میچز پر مشتمل ٹیسٹ سیریز کیلئے میچ آفیشلز کا اعلان کردیا گیا۔

پاکستان کرکٹ بورڈ (پی سی بی) کی جانب سے جاری کردہ اعلامیے میں کہا گیا ہے کہ دونوں ٹیموں کے درمیان سیریز کے پہلے ٹیسٹ میچ میں سری لنکا کے کمار دھرما سینا اور بنگلادیش کے شرف الدولہ سیکت آن فیلڈ امپائرز ہوں گے، دونوں امپائرز آئی سی سی ایلیٹ پینل میں شامل ہیں۔

ویسٹ انڈیز کے سر رچی رچرڈسن سیریز میں میچ ریفری کی حیثیت سے پلیئنگ کنٹرول ٹیم کے سربراہ ہوں گے۔آئی سی سی ایلیٹ پینل آف امپائرز میں شامل نیوزی لینڈ کے کرسٹوفر گیفینی اور پاکستان کے آصف یعقوب فورتھ امپائر کے فرائض انجام دیں گے۔

دوسرے ٹیسٹ کیلئے کمار دھرما سینا اور کرسٹوفر گیفینی آن فیلڈ امپائرز کے فرائض انجام دیں گے جبکہ شرف الدولہ سیکت تھرڈ امپائر ہوں گے۔ پاکستان کے راشد ریاض (آئی سی سی انٹرنیشنل پینل آف امپائرز کا حصہ ہیں) چوتھے امپائر ہوں گے۔

راولپنڈی کرکٹ اسٹیڈیم میں تیسرے ٹیسٹ کیلئے کرسٹوفر گیفینی اور شرف الدولہ سیکت آن فیلڈ امپائرز کے فرائض سرانجام دیں گے جب کہ کمار دھرما سینا تھرڈ امپائر ہوں گے۔ فیصل آفریدی فورتھ امپائر کے فرائض نبھائیں گے۔واضح رہے کہ پاکستان اور انگلینڈ کے درمیان سیریز آئی سی سی ورلڈ ٹیسٹ چیمپئن شپ کا حصہ ہے، جس کا پہلا میچ 7 سے 11 اکتوبر تک ملتان میں ہوگا۔

دوسرا ٹیسٹ 15 سے 19 اکتوبر تک ملتان کرکٹ اسٹیڈیم جبکہ آخری میچ راولپنڈی 24 سے 28 اکتوبر تک کھیلا جائے گا۔

جامعہ این ای ڈی کے شعبہ ٹیکسٹائل انجینئرنگ، اسٹوڈنٹ افیئرز اور ای ڈی یو کاسٹ گلوبل کے تحت ایڈلٹ کئیر (بزرگوں کی خدمت) کے لیے پروگرام تشکیل دیا گیا۔ جس کے تحت 140 طالب علموں اور آن لائن خواتین ڈاکٹرز کے بزرگوں سے رابطے کروائے گئے۔

استقبالیہ سے خطاب کرتے ہوئے ای ڈی یو کاسٹ گلوبل کے نمائندگان عبداللہ ڈار اور عبدالرؤف تابانی کہنا تھا کہ کمیونٹی سروسز کا مقصد بزرگوں کی تنہائی اور بیماریوں کی شکایات کو دُور کرنا ہے جب کہ نوجوانوں کو بزرگوں سے قریب کرکے بوڑھوں کی انرجی کو بحال کرنا ہے۔ ان کا کہنا تھاکہ گھر میں بیٹھے دو بڑے پیروں کو ہرگز نہ بھولیں۔ ان کا مزید کہنا تھا کہ این ای ڈی کے اشتراک سے ہمارا یہ پروجیکٹ بزرگوں میں نئی روح پھونک رہا ہے

اس موقعے پر خطاب کرتے ہوئے شیخ الجامعہ ڈاکٹر سروش لودھی اور پرووائس چانسلر ڈاکٹر محمد طفیل کا کہنا تھا کہ ہمارے طالب علموں میں کمیونٹی سروسز کے تصّور کا فروغ ازحد ضروری ہے کیوں کہ یہ گلوبل ایشو ہے اسی لیے اسے عالمی سطح پر تسلیم کیا جانا چاہیئے۔

اس موقعے پر ریجنل ڈائریکٹر ایچ ای سی انجینئر نذیر حسین کا دونوں اداروں کی کاوشوں کو سراہتے ہوئے کہنا تھاکہ ہم چاہتے ہیں کہ ہائر ایجوکیشن کمیشن کے ذریعے دیگر تعلیمی اداروں میں بھی اس سروس کا آغاز کیا جائے۔

یاد رہے کہ ڈاکٹرز کا کہنا تھا کہ بزرگوں میں بڑھتے ہوئے نفسیاتی مسائل زیادہ دیکھنے میں آئے ہیں۔ اس موقعے پر ٹیکسٹائل انجینئرنگ کے 140 طالب علموں میں سرٹیفیکٹس تقسیم کیے گئے جب کہ دیگر شعبہ جات سے 220 طالب علموں کو شامل کرنے کا اعادہ ظاہر کیاگیا۔

اختتامی کلمات ادا کرتے ہوے پرووائس چانسلر ڈاکٹر محمد طفیل نے ٹیم ای ڈی یو کے تمام ممبران سمیت ڈاکٹر علی حسن، ڈاکٹر قرات العین اور طالب علموں کی بے لوث خدمات کو سلام پیش کیا۔

ایم ڈی کیٹ کا پیپر لیک ہونے کے معاملے پر طلبہ نے سندھ ہائیکورٹ سے رجوع کرلیا۔

دائر درخواست میں موقف اپنایا گیا کہ گزشتہ سال کی طرح اس بار بھی ایم ڈی کیٹ کا پیپر وقت سے پہلے لیک ہوگیا۔

ایم ڈی کیٹ کا پیپر لاکھوں روپے میں فروخت کیا گیا۔ سندھ کے ہونہار طلبہ کے ساتھ ایک مرتبہ پھر نا انصافی ہو رہی ہے ، پرچہ لیک ہونے سے میرٹ کا قتل کیا گیا ہے ۔

درخواست میں استدعا کی گئی کہ عدالت ایم ڈی کیٹ پرچہ لیک ہونے پر انکوائری کا حکم دے اور ملوث ملزمان کے خلاف قانونی کارروائی کی جائے ۔

استدعا کی گئی کہ جب تک انکوائری نہیں ہوتی تب تک ڈاؤ میڈیکل یونیورسٹی کے وائس چانسلر کو معطل کیا جائے جبکہ انکوائری مکمل ہونے تک نتائج کو بھی روکا جائے

لاہور: پنجاب میں کالجز اور یونیورسٹی کے طلبہ کو ڈرائیونگ لائسنس جاری کرنے کا فیصلہ کیا گیا ہے ۔

اس سلسلے میں تمام سی ٹی اوز اور ڈی ٹی اوز کو مراسلہ جاری کردیا گیا ہے ، جس کے مطابق یونیورسٹی و کالجز کے طلبہ سمیت انتظامیہ کو لائسنس جاری کیے جائیں گے ۔

انہوں نے کہا کہ طلبہ کی بڑی تعداد بغیر لائسنس موٹرسائیکل اور گاڑیاں چلا رہی ہے ، جو کہ حادثات کا سبب بنتی ہے ۔ طلبہ اور فیکلٹی کو ڈرائیونگ لائسنس کے اجرا کے لیے پنجاب بھر میں خصوصی مہم کا آغاز کر دیا گیا ہے ۔

منصوبے کے تحت سی ٹی اوز اور ڈسٹرکٹ ٹریفک آفیسرز تمام تعلیمی اداروں کے سربراہوں سے فوری ملاقات کریں گے۔ اس کے علاوہ صوبہ بھر کی جامعات کی طرف سے فوکل پرسن بنائے جائیں گے ۔

یونیورسٹیز اور کالجز انتظامیہ طلبہ کو ٹیسٹنگ مراکز پر پہنچائیں گے ، جہاں ڈرائیونگ لائسنس کے حوالے سے طلبہ کو تمام سہولیات بہم پہنچائی جائیں گی۔ہائر ایجوکیشن کمیشن پنجاب کی جانب سے تعلیمی اداروں کو مہم کے حوالے سے ہدایات جاری کر دی گئی ہیں۔