این ای ڈی یونیورسٹی میں دو روزہ ناسا اسپیس ایپ چیلنج 2024 کا انعقاد کیا گیا۔

اسپیس ایپ چیلنج 2024 میں دو ہزار سے زاید اسکول، کالج اور یونیورسٹی کے طالب علموں نے شرکت کی۔ افتتاحی تقریب میں معروف سائنس دان ڈاکٹر عطا الرحمن نے بطور مہمان خصوصی شرکت کی۔

استقبالیہ سے خطاب کرتے ہوئے پرووائس چانسلر ڈاکٹر محمد طفیل کا کہنا تھاکہ تحقیق کی حیرت انگیز دنیا، آپ کی جستجو کو خوش آمدید کرتی ہے جب کہ چیلنج کا مقصد نوجوانوں کے آئیڈیاز کی حوصلہ افزائی ہے۔ ہماری پوری کوشش ہے ٹاپ تین میں پاکستانی آئیڈیا اپنی جگہ بنائیں۔

ناسا کراچی لیڈ ڈاکٹر مونا کنول اور افتخار یزدانی نے تقریب سے خطاب کرتے ہوئے کہاکہ ناسا نے تمام ممالک کو یکجہا کرنے کے لیے ایک اسپیس ایپ چیلنج متعارف کرایا ہے۔ اس وقت 184 ممالک میں ناسا، اسپیس ایپ چیلنج2024 کروا رہا ہے۔ پچھلے برس پاکستان کے 3 شہروں میں یہ چیلنج ہوا تھا، اب 10 شہروں میں بیک وقت چیلنج کا انعقاد کیا جارہا ہے۔ مریخ ڈائنامکس کے ڈاکٹر مہدی شاہ نے کہا کہ"چیلنج" نقطہ آغاز ہے، طالب علم کمفرٹ زون سے باہر نکلیں، بلندی آپ کی منتظر ہے۔

ناسا اسپیس چیلنج 2024 سے کلیدی خطاب کرتےہوئے معروف سائنس داں ڈاکٹر عطاالرحمن نے کہا کہ اس اسپیس چیلنج 2024 کے ذریعے آپ کو این ای ڈی میں طلسماتی دنیا کی سیر کرائی جارہی ہے۔ میں نوجوانوں کو اس طلسماتی دنیا کا عکس دکھاتا ہوں۔ انہوں نے نوجوانوں کےسامنے پرت دَر پرت طلسم کھولتے ہوئے کہا کہ اب ہم جگنو سے روشنی لے کر پودوں میں منتقل کرسکتےہیں، اب ہم بڑھتی عمر کے اثرات کو روک سکتےہیں۔

انہوں نے مزید کہا کہ اس افتتاحی تقریب میں طالب علموں کو تین تحائف ویب سائٹ، پی ڈی ایف ڈرائیو اور ویڈیو لیکچر کی صورت میں دے رہا ہوں کہ وہ تحقیقی اُفق پر پرواز کرسکیں۔ تقریب میں اختتامی کلمات ادا کرتے ہوئےکو لیڈ ناسا ایپ/ پروفیسر این ای ڈی ڈاکٹر نجید احمد خان نے تمام مہمانوں کا شکریہ ادا کرتے ہوۓ خوشی کا اظہار کیا کہ پاکستان میں ہم ان آئیڈیاز کو لیڈ کررہے ہیں۔

انہوں نے اس موقعے پر شیخ الجامعہ این ای ڈی ڈاکٹر سروش لودھی کی ٹیکنالوجی کے میدان میں کاوشوں کو سلام پیش کیا۔ ناسا اسپیس ایپ 2024 کے اختتام پر وائس چانسلر ڈاکٹر اطہر عطا نے آٹھ ٹیموں میں مومنٹوز جب کہ تمام طالب علموں میں سرٹیفیکٹ تقسیم کیے۔

صوبائی وزیر پلاننگ اینڈ ڈویلپمنٹ میر ظہور احمد بلیدی نے پاک چائنا ٹیکنیکل اینڈ ووکیشنل انسٹی ٹیوٹ، یونیورسٹی آف گوادر میں میر احمد بخش لہڑی آڈیٹوریم کا افتتاح کیا۔

صوبائی وزیر برائے منصوبہ بندی و ترقی بلوچستان ظہور احمد بلیدی نے پاک چائنا ٹیکنیکل اینڈ ووکیشنل انسٹی ٹیوٹ (PCT&VI) میں میر احمد بخش لہڑی آڈیٹوریم کا افتتاح کیا۔

اس موقع پر گوادر یونیورسٹی کے وائس چانسلر پروفیسر ڈاکٹر عبدالرزاق صابر، گوادر پورٹ کے چیئرمین پسند خان بلیدی، یونیورسٹی آف گوادر کے پرو وائس چانسلر اور ایگزیکٹو ڈائریکٹر پاک چائنہ ٹیکنیکل اینڈ ووکیشنل انسٹیٹیوٹ ڈاکٹر منظور احمد موجود تھے۔ صوبائی وزیر ظہور بلیدی نے گوادر یونیورسٹی اور گوادر پورٹ اتھارٹی کے انسٹیٹیوٹ کو فعال کرنے میں تعاون کرنے کی کوششوں کی تعریف کی، جو پیشہ ورانہ اور تکنیکی تعلیم کو بڑھانے میں اہم کردار ادا کرتی ہے۔

انہوں نے گوادر اور اس سے متصل اضلاع کے لیے ایک ہنر مند افرادی قوت پیدا کرنے کے لیے اس طرح کی سہولیات کی اہمیت پر زور دیا، انہوں نے کہا کہ یہ ادارہ سی پیک کے اقدامات کے لیے ترقیاتی وژن سے ہم آہنگ ہے۔پا ک چائنہ ٹیکنیکل ووکیشنل انسٹیٹیوٹ میں واقع میراحمد بخش لہڑی آڈیٹوریم جدید سہولیات سے آراستہ ہے اور اسے تعلیمی کانفرنسوں، سیمینارز اور دیگر تکنیکی تربیتی پروگراموں کی میزبانی کے لیے ڈیزائن کیا گیا ہے، جس سے یہ PCT&VI کے بنیادی ڈھانچے میں ایک اہم اضافہ ہے۔

افتتاحی تقریب میں یونیورسٹی کے کنٹرولر امتحانات ڈاکٹر رحیم بخش مہر، رجسٹرار دولت خان کے علاوہ ڈین فیکلٹی ،شعبہ جات کے سربراہان ،معززین، فیکلٹی ممبران، انتظامی عملہ، اور مقامی اخباری نمائندوں نے شرکت کی، جنہوں نے علم کے اشتراک اور پیشہ ورانہ ترقی کو فروغ دینے میں نئے قائم شدہ آڈیٹوریم کی اہمیت اجاگر کیا۔

پاک چائنا ٹیکنیکل اینڈ ووکیشنل انسٹی ٹیوٹ فنی تعلیم کو آگے بڑھانے اور اس خطے بطور خاص گوادر کے نوجوانوں کو تیزی سے ترقی کرتی عالمی معیشت میں مستقبل کے چیلنجز کے لیے تیار کرنے اور انہیں اپنے عملی زندگی میں اپنے اہداف کے حصول کے لیے تیار کرنا شامل ہے

کراچی: سرسیدیونیورسٹی آف انجینئرنگ اینڈ ٹیکنالوجی کے ایک اعلیٰ سطحی وفدنے قائم مقام وائس چانسلر ڈاکٹر منورحسین کی سربراہی میں وائرلیس اینڈ آپٹیکل ٹیکنالوجیز(GCWOT) 2024 کے موضوع پر اسپین کی مالاگا یونیورسٹی میں منعقد ہونے والی عالمی کانفرنس میں شرکت کی۔

اس سال کانفرنس میں 4 کلیدی تقریروں سمیت 60 ٹیکنیکل پریزنٹیشن دی گئیں جس میں وائر لیس، آپٹیکل اور زیرِآب مواصلاتی ٹیکنالوجیز میں اہم پیش رفت کا جائزہ لیا گیا۔اسپین میں تعینات پاکستان کے سفیر ڈاکٹر ظہور احمد نے کانفرنس کا افتتاح کیا اور مالاگا یونیورسٹی اور دیگر پاکستانی اداروں کے مابین دیرینہ تعاون کو سراہا۔ان کا کہنا تھا کہ کانفرنس نے تیکنیکی اور ماحولیاتی ترقی پر بامعنی بین الاقوامی تعاون کو فروغ دینے میں اہم کردار ادا کیا ہے۔

علاوہ ازیں عبوری وفد نے ACTIVE پروجیکٹ کے حوالے سے پائیدار ماحولیاتی تحفظ کے لیے ICT ایپلی کیشنز کی اسٹیئرنگ کمیٹی کے اجلاس میں بھی شرکت کی۔کانفرنس کے مہمانِ خصوصی اسپین میں تعینات پاکستان کے سفیر ڈاکٹر ظہور احمد تھے۔ایکٹیو پروجیکٹ، ایرسمس پلس کیپیسٹی بلڈنگ کا ایک منصوبہ ہے جسے یورپی یونین کی طرف سے مالی اعانت فراہم کی گئی ہے اور اس کی نگرانی مالاگا یونیورسٹی کررہی ہے۔اس پروجیکٹ کا مقصد ماحولیاتی چیلنجوں سے نمٹنے کے لیے ICT حل کو استعمال کرنا ہے۔

سرسید یونیورسٹی کے قائم مقام وائس چانسلر ڈاکٹر منور حسین نے اظہار خیال کرتے ہوئے کہا کہ سرسید یونیورسٹی اور مالاگا یونیورسٹی جیسی بین الاقوامی جامعات کے مابین باہمی تعاون کی کوششیں جدت کو آگے بڑھاتی ہیں اور ایسے حل کی ترقی میں اپنا حصہ ڈالتی ہیں جو تیکنیکی صلاحیتوں اور ماحولیاتی استحکام دونوں کو بڑھاتے ہیں۔یہ کانفرنس دورِ حاضر کے پیچیدہ چیلنجوں سے نمٹنے میں بین الاقوامی تعاون کی اہمیت کا ثبوت ہے۔

سرسید یونیورسٹی کے وفد کے شرکاء میں فیکلٹی آف الیکٹریکل اینڈ کمپیوٹر انجینئرنگ کے ڈین، پروفیسر ڈاکٹر محمد عامر، شعبہ الیکٹریکل انجینئرنگ کے چیئرپرسن پروفیسر ڈاکٹر ابرار الحق، ڈاکٹر محمد ریحان، اور مہران یونیورسٹی آف انجینئرنگ اینڈ ٹیکنالوجی کے پروفیسرڈاکٹر بھوانی شنکر چودھری شامل تھے جنھوں نے مختلف ممالک سے آنے والے وفود سے مواصلاتی ٹیکنالوجیز اور پائیدار حل کے بارے میں تبادلہ خیال کیا۔بین الاقوامی شہرت یافتہ اسکالرز پروفیسرپابلو اوٹیرو روتھ اور پروفیسراینرک ناوا بارو سمیت امریکہ کے پروفیسر ماریوفان، اٹلی کے پروفیسر ماریزیو میگارینی نے بھی کانفرنس میں بطورِ خاص شرکت کی

مانیٹرنگ ڈیسک : انسٹنٹ میسیجنگ ایپلی کیشن واٹس ایپ نے اسٹوری یا اسٹیٹس میں دوسروں کو مینشن کرنے کا فیچر پیش کردیا۔

کمپنی کے مطابق نئے فیچر کے تحت اب صارفین کسی بھی قریبی دوست کو اپنی اسٹوری یا اسٹیٹس میں مینشن کر سکیں گے اور مینشن ہونے والا شخص مذکورہ اسٹوری کو ری شیئر بھی کر سکے گا۔

اسی طرح اسٹوری یا اسٹیٹس کو لائیک کرنے کا فیچر بھی پیش کردیا گیا، اب تک صرف اسٹوری یا اسٹیٹس کو دیکھنے والے افراد کے ویوز دیے جاتے تھے لیکن اب دوسرے لوگ اسٹیٹس کو فیس بک پوسٹ کی طرح لائیک بھی کر سکیں گے۔

فیچر کے تحت کسی بھی اسٹوری یا اسٹیٹس کو لائیک کرنے والے شخص کا لائیک ری ایکشن کوئی تیسرا صارف نہیں دیکھ سکے گا، صرف اسٹوری شیئر کرنے والا شخص ہی لائیکس اور ری ایکشنز کو دیکھ سکے گا۔

نئے فیچر کے تحت جیسے ہی کوئی صارف دوسرے صارف کو اسٹوری یا اسٹیٹس میں مینشن کرے گا واٹس ایپ اسے ایک نوٹی فکیشن بھیج کر بتائے گا کہ اسے کسی اسٹوری میں مینشن کیا گیا ہے اور مینشن ہونے والا شخص اسٹوری کو ری شیئر بھی کر سکے گا۔

کسی بھی اسٹوری یا اسٹیٹس میں مینشن ہونے والے شخص سے متعلق بھی کوئی تیسرا فرد نہیں جان سکے گا۔اگرچہ واٹس ایپ نے مذکورہ فیچز کو پیش کرنے کا اعلان کردیا ہے، تاہم فوری طور پر یہ فیچر تمام صارفین کو دستیاب نہیں، لیکن جلد ہی ان تک تمام صارفین کو رسائی دی جائے گی۔

واٹس ایپ کے مطابق اگلے چند ماہ میں اسٹیٹس اور اپ ڈیٹس کی ٹیب میں مزید خصوصیات شامل کی جائیں گی تاکہ صارفین کیلئے اہمیت کے حامل لوگوں سے قریب رہنا آسان ہو سکے۔

فیڈرل بورڈ آف انٹرمیڈیٹ اینڈ سکینڈری ایجوکیشن اسلام آباد نے نئے گریڈنگ سسٹم اور پاس پرسنٹیج پالیسی کی منظوری کا باقاعدہ نوٹیفکیشن جاری کردیا ۔

اس طرح فیڈرل بورڈ پالیسی پر اطلاق کرنے والا ملک کا پہلا بورڈ بن جائےگا جس کے تحت اب طلبہ کو نمبروں کے بجائے گریڈز دیئے جائیں گے اور پہلی، دوسری اور تیسری پوزیشنز ختم کردی جائیں گی ۔نئی گریڈنگ پالیسی کا اطلاق 2025 سے ہوگا۔

دوسری جانب ضیاالدین یونیورسٹی امتحانی بورڈ کے ایگزیکٹو ڈائریکٹر ڈاکٹر ناصر انصار نے کہا ہے کہ نجی بورڈ ہونے کے ناتے ہمارا بورڈ نئے گریڈنگ پالسی کی مکمل تیاری کرچکا ہے اور ہم 2025 سے نویں جماعت اور گیارویں جماعت کے امتحانات لینے کے لیے تیار ہیں۔ آئی بی سی سی نے نئی گریڈنگ پالیسی کا جو فارمولا طے کیا اس کے مطابق 95 یا زائد نمبر کو A غیر معمولی گریڈ دیا جائے گا۔ 90 نمبر کو شاندار A دیا جائے گا، 85 نمبر کو بہترین A دیا جائے گا۔ 80 نمبر کو بہت اچھا B دیا جائے گا، 75 کو اچھا B گریڈ دیا جائے گا، 70 کو مناسب اچھا B دیا جائے، 60 کو اوسط سے اوپر C دیا جائے گا، 50کو اوسط D گریڈ دیا جائے گا، 40 تا 49 نمبر کو اوسط سے نیچے E گریڈ دیا جائے گا اور 40 سے کم نمبر والوں کو غیر تسلی بخش F گریڈ دیا جائے گا۔

اس حوالےسےسندھ کے سکریٹری بورڈز و جامعات عباس بلوچ نے کہا ہے کہ سندھ بھی نئی گریڈنگ پالیسی منظوری دے رہا ہے اور دو دن کے اندر اس کا باقاعدہ نوٹفکیشن جاری کردیا جائے گا جس کا اطلاق سندھ کے تمام تعلیمی بورڈز پر ہوگا اور وہ 2025سے وہ نویں اور گیارہویں جماعت کے امتحانات نئی گریڈنگ پالیسی مطابق لیں گے۔

صوبہ سندھ، پنجاب، خیبرپختونخوا خواہ اور بلوچستان کے تعلیمی بورڈز تاحال نئی گریڈنگ پالسی کی منظوری نہیں دے سکے ہیں۔

تعلیمی بورڈ میرپورخاص کے نئے تعینات چیئرمین ڈاکٹر ثمر رضا تالپورنےانتہائی احسان اقدام اٹھاتےہوئے کا کئی برس سے کاپیوں کی جانچ کرنے والے اساتذہ کی رکی ہوئی رقم کے چیک جاری کرنے کا سلسلہ شروع کر دیا۔

ناظم امتحانات کی جانب سے سینٹرالائزڈ اسسمنٹ سینٹر تو بنا دیا گیا ہے لیکن اس میں کاپیاں جانچنے والے اساتذہ کی جانب سے غیر سنجیدگی کا مظاہرہ کیا جارہا ہے ،جس کی وجہ سے نتائج میں تاخیر کا خدشہ ہے ۔

تفصیلات کے مطابق تعلیمی بورڈ میرپورخاص کے چیئرمین ڈاکٹر ثمر رضا تالپور نے گزشتہ دنوں حکومت سندھ کی جانب سے تعلیمی بورڈ کو ملنے والی گرانٹ سے ملازمین کو تنخواہیں جاری کرنے کے ساتھ ساتھ امتحانی کاپیوں کی جانچ کرنے والے اساتذہ کی رکی ہوئی رقم کے چیک بھی جاری کرنے کا سلسلہ شروع کر دیا ہے۔

واضح رہے کہ یہ رقم گزشتہ کئی سال سے تعلیمی بورڈ پر واجب الادا تھی جو کہ اب سیکڑوں اساتذہ کو دی جا رہی ہے ۔ دوسری جانب باخبر ذرائع سے معلوم ہوا ہے کہ رواں سال امتحانی کاپیوں کی چیکنگ کے لئے ناظم امتحانات تعلیمی بورڈ انجینئر انور علیم خانزادہ کی جانب سے سینٹرالائزڈ اسسمنٹ سینٹر تو بنا دیا گیا ہے لیکن اساتذہ کی غیر حاضر ی ان کی جانب سے غیر سنجیدگی کوظاہر کررہی ہے جس سے امتحانی نتائج میں مزید تاخیر ہو سکتی ہے ۔

اس ضمن پیرنٹس ایکشن کمیٹی کے رہنمائوں علی شیر، غنی صدیقی اور دیگر نے اساتذہ سے مطالبہ کیا ہے کہ وہ اسسمنٹ سینٹر میں اپنی حاضری کو یقینی بنائیں۔

وفاقی اردو یونیورسٹی کی نظامتِ اعلیٰ تعلیم وتحقیق(جی آر ایم سی) کا 61 واں اجلاس پروفیسر ڈاکٹرضابطہ خان شنواری کی زیرِ صدارت منعقد ہوا ۔

اجلاس میں پروفیسر ڈاکٹر محمد زاہد رئیس کلیہ سائنس وٹیکنالوجی،پروفیسرڈاکٹر مسعود مشکور صدیقی رئیس کلیہ نظمیاتِ کاروبار، تجارت و معاشیات، ڈاکٹرشاہد اقبال انچارج کلیہ فنون،ڈاکٹرحافظ محمد ثانی انچارج کلیہ معارفِ اسلامیہ،،ڈاکٹرراحت اللہ انچارج کلیہ الیکٹریکل انجینئرنگ ،ڈاکٹرصائمہ فراز شعبہ خرد حیاتیات، ڈاکٹر عبدالرحمن یوسف خان شعبہ عربی،ڈاکٹر محمد طارق محمود شعبہ معاشیات،ڈاکٹر راشد تنویر ڈائریکٹر ایڈ میشن،ڈاکٹر ثمرہ ضمیررجسٹرار (قائم مقام) بطور سیکرٹری شریک تھے ۔

کیلیفورنیا: یوٹیوب صارفین کیلئے ایک بڑی اپڈیٹ سامنے آئی ہے جس میں یوٹیوب نے اپنے شارٹس کی مدت 1 منٹ سے بڑھا کر 3 منٹ کردی ہے۔

یوٹیوب نے اپنے شارٹس کی مدت کو بڑھا کر ٹک ٹاک کی طرح زیادہ سے زیادہ کرکے 3 منٹ کردیا ہے۔

15 اکتوبر سے تخلیق کار صارفین 3 منٹ پر مبنی یوٹیوب شارٹس اپ لوڈ کر سکیں گے۔

یوٹیوب شارٹس کے پروڈکٹ مینجمنٹ کے ڈائریکٹر ٹوڈ شرمین نے ایک بلاگ پوسٹ میں لکھا کہ تبدیلی شارٹس پر اسٹوری شیئر کرنے کو مزید عمیق بنا دے گی۔ یہ تخلیق کاروں کی طرف سے سب سے زیادہ درخواست کردہ اپ ڈیٹ تھی، لہذا ہم یہ فیچر اپ ڈیٹ کے لیے مزید لچک فراہم کرنے پر پرجوش ہیں۔

تاہم یہ بات ذہن نشین رہے کہ ٹک ٹاک پہلے ہی اس پر کام کرچکا ہے۔ 2021 میں ٹک ٹاک نے ویڈیوز کی زیادہ سے زیادہ لمبائی کو 60 سیکنڈ سے بڑھا کر 3 منٹ کر دیا تھا۔ فی الحالTikTok میں ریکارڈ شدہ ویڈیوز 10 منٹ تک لمبی ہو سکتی ہیں اور ایپ پر اپ لوڈ کی جانے والی ویڈیوز 60 منٹ تک ہی لمبی ہو سکتی ہیں۔

کراچی: پاکستانی اداکار و گلوکارآغاعلی نےحنا الطاف سے اپنی طلاق کی تصدیق کردی۔

سوشل میڈیا پلیٹ فارمز پر احمد علی بٹ کے پوڈ کاسٹ کے کلپ وائرل ہورہے ہیں جس میں آغا علی نے اپنی طلاق کی تصدیق کی ہے۔

انٹرویو کے آغاز میں ہی احمد علی بٹ نے آغا علی کو ’’ہیپیلی ڈیوورس مین‘‘ کہہ کر پکارا، جس پر آغا علی نے قہقہہ لگاتے ہوئے کہا کہ ’آپ نے ایک دم کسی کو اونچائی سے نیچے پٹخ دیا‘۔

آغا علی نے اپنی طلاق کی تصدیق کرتے ہوئے کہا کہ یہ بہت مشکل فیصلہ تھا اور زندگی میں کبھی اس کا تصور نہیں کیا تھا۔ میں شکر گزار ہوں کہ ہماری وجہ سے کسی اور جان (بچے) کو مشکلات نہیں اٹھانا پڑیں گی۔ جب میں پانچ سال کا تھا تو میرے والد کا انتقال ہوگیا تھا، اس لیے میں سمجھ سکتا ہوں کہ بچہ ماں باپ کے بغیر کیسے رہ سکتا ہے۔ شکر ہے کہ ایسا کچھ نہیں ہے۔

آغا نے پوڈ کاسٹ میں مزید کہا کہ میرے خیال میں زندگی کا کوئی بھی رشتہ ہو جو آپ نے اپنی خوشی سے بنایا ہو تو اس کو قائم رکھنے کے لیے آپ کو جی جان لگاکر پوری کوشش کرنی چاہیے اور دعا کرنی چاہیے لیکن اگر چیزیں درست سمت میں نہ ہوں تو رشتہ ختم کردینا چاہیے۔

اداکار نے کہا اچھی چیز یہ ہے کہ ہم دونوں کبھی ایک دوسرے کی عزت کرنا نہیں چھوڑیں گے اور یہ سب سے اچھی بات ہے کیونکہ اکثر جب رشتہ ختم ہوتا ہے تو لوگ ایک دوسرے کی عزت نہیں کرتے اور نفرت پیدا ہوجاتی ہے، جب بری طرح رشتے ختم ہوں تو بغض اور نفرتیں ہوتی ہیں۔

واضح رہے کہ آغا علی اور حنا الطاف کی شادی مئی 2020 میں ہوئی تھی جب کہ 2022 میں ان کے درمیان علیحدگی کی افواہیں گردش کرنے لگی تھیں جسے آغا علی نے مسترد کردیا تھا۔

رواں برس اگست میں مارننگ شو میزبان مدیحہ نقوی نے بھی اپنے شو میں آغا علی اور حنا الطاف کی طلاق کا تذکرہ کیا تھا، لیکن بعدازاں انہوں نے اپنے بیان کی تردید کرتے ہوئے کہا تھا کہ ان کی زبان پھسل گئی تھی۔

ملتان: پہلے ٹیسٹ میچ کی پہلی اننگز میں میزبان انگلینڈ کے خلاف پاکستان نے کھانے کے وقفے تک ایک کھلاڑی کے نقصان پر 122 رنز بنا لیے۔

ملتان جاری ٹیسٹ میں پاکستان نے ٹاس جیت کر بیٹنگ کا فیصلہ کیا۔ اوپنر صائم ایوب 4 رنز بنا کر پویلین لوٹ گئے، کپتان شان مسعود اور اوپنر عبداللہ شفیق نصف سنچریاں بنا کر وکٹ پر موجود ہیں۔

قومی ٹیم کے کپتان شان مسعود کا کہنا تھا کہ بڑے اسکور کی کوشش کریں گے اور اندازہ ہے کہ بڑی دیر سے جیت نہیں سکے، ہم تین فاسٹ اور دو اسپنرز کے ساتھ کھیلیں گے۔

انگلش اولی پوپ نے کہا کہ پچ میں نمی موجود ہے لہٰذا جلد وکٹیں لینے کی کوشش کریں گے۔ ٹاس جیت جاتے تو پہلے بیٹنگ کا فیصلہ ہی کرتے۔

واضح رہے کہ ملتان میں اب تک دونوں ٹیمیں ایک دوسرے کے خلاف ایک ایک ٹیسٹ جیت چکی ہیں۔ انگلینڈ سے قبل بنگلا دیش نے پاکستان کو اسکی ہی سرزمین پر دو ٹیسٹ میچز کی سیریز میں وائٹ واش کیا تھا۔

پاکستان پلیئنگ الیون
صائم ایوب، عبداللہ شفیق، کپتان شان مسعود، بابر اعظم، نائب کپتان سعود شکیل، وکٹ کیپر محمد رضوان، سلمان علی آغا، عامر جمال، شاہین شاہ آفریدی، نسیم شاہ اور ابرار احمد۔

انگلینڈ پلیئنگ الیون
زیک کرالے، بین ڈکٹ، کپتان اولی پوپ، جو روٹ، ہیری بروک، وکٹ کیپر جیمی اسمتھ، کرس ووکس، گس ایٹکنسن، بریڈن کرس (ڈیبیو)، جیک لیچ اور شعیب بشیر۔