آئی سی سی نے پلیئرز کی رینکنگ جاری کردی۔
رینکنگ میں ٹاپ تھری میں کوئی پاکستانی کھلاڑی شامل نہیں، بیٹرز کی رینکنگ میں آسٹریلیا کے ٹریوس ہیڈ کی پہلی پوزیشن ہے۔
ٹریوس ہیڈ 881 پوائنٹس کے ساتھ پہلے جب کہ بھارت کے سوریا کمار یادیو 807 پوائنٹس کے ساتھ دوسرے نمبر پر موجود ہیں۔تیسرا نمبر انگلینڈ کے فل سالٹ کا ہے جن کے 800 پوائنٹس ہیں، پاکستان کے بابراعظم ایک درجے ترقی کے بعد چوتھے نمبرپرآگئے اور ان کے 755 پوائنٹس ہیں۔
ٹی ٹوئنٹی بولرز میں انگلینڈ کے عادل رشید کی پہلی پوزیشن برقرار ہے، دوسرا نمبر ویسٹ انڈین بولر عقیل حسین اور تیسرا نمبر افغان اسپنر راشد خان کا ہے۔بھارت کے ارشدیپ سنگھ 8 درجے ترقی کے بعد 9 ویں نمبرپر آگئے، ٹی ٹوئنٹی بولرز میں پاکستان کے شاہین آفریدی کا 13 واں نمبر ہے۔
ٹی ٹوئنٹی آل راؤنڈرز میں انگلینڈ کے لیام لیونگسٹن کا پہلا نمبر ہے، بھارت کے ہاردیک پانڈیا چار درجے ترقی کے بعد تیسرے نمبر پر ہیں۔
ون ڈے بیٹرز میں بابراعظم کی پہلی پوزیشن برقرار ہے، ٹریوس ہیڈ کی ایک درجے ترقی 10 ویں نمبرپرآگئے۔
ون ڈے بولرزمیں جنوبی افریقا کے کیشو مہاراج کا پہلا نمبر ہے، ون ڈے آل راؤنڈرز میں افغانستان کے محمد نبی کی پہلی پوزیشن ہے۔
ملک کے جڑواں شہر اسلام آباد اور راولپنڈی میں گزشتہ 24 گھنٹوں کے دوران ڈینگی کے 214 نئے کیسز رپورٹ ہوئے ان میں 147 راولپنڈی اور 67 اسلام آباد میں رپورٹ ہوئے۔
رواں سال رپورٹ ہونے والے کیسز کی مجموعی تعداد 2 ہزار143 ہوگئی۔ ڈسٹرکٹ ہیلتھ اتھارٹی کے مطابق نئے کیسز میں پوٹھوہار ٹاؤن پری اربن سے 74، میونسپل کارپوریشن راولپنڈی سے 26، راولپنڈی کنٹونمنٹ سے 25، چکلالہ کنٹونمنٹ 2، پوٹھوہار رورل 7، کلر سیداں 3، ٹیکسلا کنٹونمنٹ 5، کوٹلی ستیاں 2 جبکہ ٹیکسلا، مری اور گوجر خان اور سے ایک، ایک کیس رپورٹ ہوا، انہوں نے بتایا کہ اس وقت راولپنڈی ڈویژن کے 280 مریض شہر کے مختلف ٹیچنگ ہسپتالوں میں زیر علاج ہیں جن میں سے 92 بے نظیر بھٹو، 95 ہولی فیملی، راولپنڈی ٹیچنگ ہسپتال 50 جبکہ فوجی فانڈیشن میں 43 مریض زیر علاج ہیں، اسلام آباد میں گزشتہ 24 گھنٹوں کے دوران 67 کیسز رپورٹ ہوئے۔
اس کا انکشاف اسلام آباد ضلعی انتظامیہ کی جانب سے اجلاس میں بریفنگ کے دوران کیا گیا، ڈپٹی کمشنر اسلام آباد عرفان نواز میمن کی زیر صدارت ڈینگی جائزہ اجلاس میں جڑواں شہروں کی صورتحال کا تقابلی جائزہ لیا گیا ،بریفنگ میں بتایا گیا کہ پمز میں 104، پولی کلینک 50، کیپیٹل ہسپتال میں30 بیڈز ڈینگی مریضوں کیلئے مختص کئے گئے، بریفنگ میں بتایا گیا کہ اس طرح مجموعی متاثرہ مریضوں میں 67 فیصد مرد اور 33 فیصد خواتین ہیں۔
سندھ ہائی کورٹ میں میڈیکل میں داخلوں کے لیے ایم ڈی کیٹ ٹیسٹ میں ہونے والی بے قاعدگیوں کےخلاف کیس کی سماعت ہوئی۔
سماعت کے دوران سیکرٹری صحت اور چیف سیکرٹری کی الزامات کی تحقیقات کے لیے کمیٹی تشکیل دینے کی تجویزدی۔
عدالت نے کمیٹی تشکیل بنانے کاحکم دیتے ہوئے کمیٹی میں ڈاکٹر شیریں ناریجو ،سی ایم آئی ٹی ،ڈائریکٹر سائبر کرائم ایف آئی اے کراچی شامل کرنے کی ہدایت کی۔عدالت کامزید کہنا تھاکہ مرید علی راہموں سابق سیکرٹری بورڈ بھی کمیٹی کے ممبر ہوں گےکمیٹی کے تیسرے ممبر کا نام بتائیں ۔
عدالت نے کمیٹی کو تمام الزامات کی تحقیقات 15دن میں مکمل کرنے کے احکامات جاری کئےکمیٹی کسی بھی ادارے سے معاونت حاصل کرسکتی ہے ،کمیٹی ٹیسٹ لینے والی یونیورسٹیزاور پی ایم ڈی سی سے ریکارڈ طلب کرسکتی ہے ۔
عدالت نے تحقیقات مکمل ہونے تک میرٹ لسٹ شائع کرنے اور داخلےسے روک دیا ہے
لاہور بورڈ میٹرک اور انٹرکے سالانہ امتحانات میں ڈیوٹیاں کرنے والا نگران عملہ کو تاحال معاوضوں نہ مل سکا۔
ذرائع کا کہنا ہے کہ میٹرک اور انٹر کے مارچ اور اپریل میں ہونے والے امتحانات میں 12 ہزار سے زائد عملے نے ڈیوٹیاں سرانجام دی تھیں۔نتائج آنے کے باوجود عملے کو معاوضہ جاری نہ ہوسکا۔
اساتذہ کا کہنا ہے امتحانات ہوئے پانچ سے چھ ماہ گزر چکے ہیں،معاوضوں کے حصول کیلئے بورڈ کے چکر لگانے پر مجبور ہیں۔
چیئرمین بورڈ کے دستخط نہ ہونے کے باعث معاوضہ جاری نہیں کیا جا رہا۔
بورڈ حکام کا کہنا ہے نگران عملے کو مرحلہ وار معاوضوں کی ادائیگیوں کا سلسلہ جاری ہے ،سینکڑوں اساتذہ کو ادائیگیاں کی جاچکی ہیں۔
پنجاب ایجوکیشن فاؤنڈیشن نے اسکولوں کے طلبا کی ڈیجیٹل ویری فکیشن کا اعلان کر دیا۔
ویری فکیشن کا آغاز یکم دسمبر سے کیا جائے گا۔ پیف نے اسکولوں کو 31 اکتوبر تک طلبا کی تصاویر اپ لوڈ کرنے کا حکم دیدیا ۔
پیف حکام کا کہنا ہے کہ غیر تصدیق شدہ طلبا کے معاوضوں کی ادائیگی نہیں کی جائیگی۔
آئی سی سی چیمپئینز ٹرافی 2025 کی تیاریوں کے بیچ میگا ایونٹ کے فائنل میچ سے متعلق مختلف خبریں گردش کرنے لگیں۔
میڈیا رپورٹس میں دعویٰ کیا جارہا ہے کہ پاکستان میں شیڈول 2025 چیمپئینز ٹرافی کے فائنل کیلئے اگر بھارتی ٹیم کوالیفائی کرتی ہے تو ایونٹ کا فائنل لاہور سے دبئی منتقل کیا جاسکتا ہے۔
اگلے برس 19 فروری سے 9 مارچ 2025 تک ہونے والے ٹورنامںٹ کے وینیوز کی تصدیق ہوچکی ہے تاہم شیڈول کا باقاعدہ اعلان نہیں کیا گیا ہے کیونکہ بھارتی بورڈ اور حکومت اپنی ٹیم پاکستان بھیجنے سے انکاری ہیں۔
تاہم امید کی جارہی ہے کہ میگا ایونٹ میں بھارتی ٹیم پاکستان آئے گی، گرین شرٹس نے سال 2008 میں آخری مرتبہ بھارت کی میزبانی کی تھی۔
رپورٹس میں کہا گیا ہے کہ چیمپئینز ٹرافی کا فائنل 9 مارچ کو لاہور میں طے ہے تاہم دبئی بیک اپ وینیو کے طور پر کام کرسکتا ہے، جس سے ٹیموں، میچ آفیشلز، میڈیا اور شائقین کیلئے لاجسٹک چیلنجز پیدا ہوسکتے ہیں۔
دوسری جانب چیئرمین پی سی بی محسن نقوی چیمپئیننر ٹرافی پاکستان میں منعقد کرنے کیلئے پرعزم ہیں جبکہ تین بڑے اسٹیڈیمز کی اَپ گریڈیشن کا کام بھی تیزی سے جاری ہے۔واضح رہے کہ 1996 ورلڈکپ کی میزبانی کے بعد یہ دوسرا بڑا ایونٹ ہے جس کی میزبانی پاکستان کے سپرد ہے، چیمپئینز ٹرافی کا آخری ایڈیشن پاکستان نے 2017 میں سرفراز احمد کی قیادت میں اپنے نام کیا تھا اور ایونٹ کے فائنل میں روایتی حریف بھارت کو شکست سے دوچار کیا تھا۔
اسٹاک ہوم: نوبل انعام برائے طبعیات (فزکس) 2024 حاصل کرنے والے سائنس دانوں کے نام کا اعلان کر دیا گیا۔
رائل سوئیڈش اکیڈمی آف سائنسز کے اعلان کے مطابق رواں برس کا نوبل انعام آرٹیفیشل انٹیلی جنس کی بنیادیں فراہم کرنے والے امریکی سائنس دان جان ہوپ فیلڈ اور برطانوی کینیڈین کمپیوٹر سائنٹسٹ جیفری ہِنٹن کو دیا گیا ہے۔ دونوں محققین نے ایسی مشین لرننگ تکنیک پر کام کیا جو بعد ازاں چیٹ جی پی ٹی جیسی پاور پروڈکٹ کی صورت اختیار کر گئیں۔
مشین لرننگ کے متعلق اپنی مہارت کے علاوہ یونیورسٹی آف ٹورونٹو سے تعلق رکھنے والے کمپیوٹر سائنس کے ایمریٹس پروفیسر جیفری ہِنٹن ان ٹیکنالوجیز کے خلاف مؤقف رکھنے کے حوالے سے بھی جانے جاتے ہیں۔
گزشتہ برس وہ گوگل میں ایک دہائی تک خدمات انجام دینے کے بعد صرف اس لیے مستعفی ہوگئے تھےتاکہ وہ انسانیت کے وجود کو اس ٹیکنالوجی سے لاحق خطرات کے متعلق آزادانہ طور پر خبردار کر سکیں۔
سوئیڈن میں تقریب سے خطاب کرتے ہوئے پروفیسر جیفری کا کہنا تھا کہ انہیں اندازہ نہیں تھا کہ ایسا ہوگا۔ وہ بہت حیران ہیں۔
اس نوبل انعام کا ان کی جانب سے دی جانے والی تنبیہ سے کوئی تعلق نہیں بلکہ دونوں محققین کو یہ انعام اس ٹیکنالوجی کی بنیادی دریافتوں اور ایجادات کی بِنا پر دیا گیا ہے جس کی مدد سے آرٹیفیشل نیورل نیٹورکس کے ساتھ مشین لرننگ ممکن بنی۔
چنئی: بھارتی فضائیہ کے ایئرشو کے دوران شدید گرمی کی وجہ سے 5 افراد ہلاک ہوگئے۔
بھارتی میڈیا کے مطابق بھارتی ریاست تامل ناڈو کے وزیر صحت سبرامنین نے بتایا کہ ہجوم، حبس اور گرمی کے باعث 102 کے قریب افراد متاثر ہوئے تھے جن میں سے 93 کو فوری علاج کی ضرورت تھی۔
واقعے کی تحقیقات میں کہا گیا ہے کہ 15 لاکھ کا مجمع جمع ہو گیا تھا جب کہ مرینا بیچ میں اتنی گنجائش نہیں تھی۔ چھاؤں اور پانی کا انتظام نہیں تھا۔ زیادہ تر لوگ شو ختم ہونے کے بعد بے ہوش ہوئے۔
بی جے پی نے واقعے کی ذمہ داری ریاستی حکومت پر عائد کرتے ہوئے کہا کہ اگر اتنے بڑے پروگرام کے انتظام کی اہلیت نہیں تھی تو گریز کرنا چاہیے تھا۔ کسی کو عوام کی زندگی سے کھیلنے کی اجازت نہیں۔
ادھر تمل ناڈو کی ریاستی حکومت کا کہنا ہے کہ افسوس ناک واقعہ کی انکوائری مکمل کرلی ہے۔ ذمہ داروں کو سزائیں دی جائیں گی۔
لاہور: پاکستان کے معروف یوٹیوبر سعد الرحمان المعروف ڈکی بھائی اور اُن کی اہلیہ عروب جتوئی کواسلحے کی نمائش کرنا مہنگا پڑگیا۔
ڈل ٹاؤن آرگنائز کرائم یونٹ نے اسلحے کی نمائش پر ڈکی بھائی اور عروب جتوئی کو حراست میں لےلیا
ڈکی بھائی اور عروب جتوئی کے معافی نامے کے بعد دونوں یوٹیوبرز کو چھوڑ دیا گیا۔
پولیس ذرائع کا کہنا ہے کہ ماڈل ٹاؤن آرگنائز کرائم یونٹ نے اسلحے کی نمائش پر ڈکی بھائی اور عروب جتوئی کو حراست میں لیا تھا۔
وزیر اعلیٰ مریم نواز نے گرلز کالجز کیلئے چیف منسٹر ٹرانسپورٹ پروگرام فار وویمن کا افتتاح کر دیا۔
پروگرام کے تحت 19 وویمن کالجز کو بسیں دے دی گئیں جبکہ دوسرے اور تیسرے مرحلے میں مزید 57 کالجوں کوٹرانسپورٹ مل جائیگی۔
مریم نواز نے بسوں کا معائنہ کیا اور گرلز کالجز کے لئے ایئر کنڈیشنڈ بسوں کی فراہمی کی تجویز کا جائزہ لیا گیا جس کے بعدبسوں کی چابیاں خواتین کالجز کے پرنسپلز کے حوالے کیں۔
سیکرٹری ہائر ایجوکیشن ڈاکٹر فرخ نوید نے تفصیلی بریفنگ میں بتایا پنجاب کے 76 کالجز کو تین مراحل میں بسیں فراہم کی جائیں گی۔ پہلے مرحلے میں ٹرانسپورٹ سے محروم 19 تحصیلوں کو بسیں دی گئی ہیں جن میں بھکر،سیالکوٹ، چنیوٹ، کمالیہ، حاصل پور،ملکوال، فیروز والا، شور کوٹ،جتوئی، فتح جنگ، حسن ابدال ،کوٹ مومن، جلال پور پیر والا، کلر سیداں،پنڈی گھیب، منچن آباد،شرقپور شامل ہیں ۔ دوسرے مرحلے میں نوشہرہ ورکاں، دینہ، یزمان، پنڈی بھٹیاں، لالیاں، بھوانہ، کوٹ ادو، ٹیکسلا، سرائے عالمگیر، پپلاں کے گرلز کالجز کو بسیں ملیں گی۔
بریفنگ میں بتایا گیا علامہ اقبال ٹاؤن لاہور، عیسیٰ خیل، رائے ونڈ اور سوہاوہ کے گرلز کالجز کو بھی فروری 2025 تک بسیں مل جائیں گی۔ مارچ اپریل 2025 تک مزید22بسیں اور 32 کوچز 35 تحصیلوں کو فراہم کردی جائینگی۔ وزیر اعلیٰ نے وویمن کالجز کی طالبات سے ملاقات کی،طالبات نے گلدستہ پیش کیا۔