ایمز ٹی وی (صحت) ماہرین کے مطابق نئی تحقیقات سے یہ بات سامنے آئی ہے کہ کھیرا تھائیرائیڈ سمیت کئی بیماریوں کا علاج ہے۔غیر ملکی رساں ایجنسی کی جانب سے جاری رپورٹ کے مطابق طبی ماہرین کا کہنا ہے کہ گرمیوں میں پائی جانے والی سبزی کھیرا تھائیرائیڈ سمیت کئی بیماریوں کا علاج ہے، جب کہ یہ شوگر کے مرض میں بھی مفید ہے۔ نئی تحقیقاتی رپورٹ کے مطابق لبلبے سے انسولین پیدا کرنے کیلئے ضروری ہارمونز بھی کھیرے میں پائے جاتے ہیں، شعبہ صحت کے ماہرین نے کا ہے کہ کھیرے میں مختلف اقسام کے وٹامنز اور معدنیات پائے جاتے ہیں جن میں تھائیامین ، نیاسین، فولیٹ، کیلشئیم، فولاد، وٹامن سی، کے، میگنیشیئم، میگانیز، فاسفورس، پوٹاشیئم، سوڈیم، جست اور فلورائیڈ وغیرہ شامل ہیں۔ انہوں نے کہا کہ کھیرا انسانی صحت کیلئے انتہائی اچھی سبزی ہے جو عطیہ خداوندی سے کم نہیں ہے۔ کھیرا تھائیرائیڈ سمیت کئی بیماریوں کا علاج ہے

ایمز ٹی وی (صحت)چلڈرن ہسپتال کااے سی پلانٹ خراب ہونے پر انتظامیہ نے جگاڑ لگادی۔ برف کے بلاکس منگواکراے سی پلانٹس کے بلوئرزمیں ڈالنا شروع کردیئے۔ عارضی طور پر ہوا تو ٹھنڈی ہوگئی مگر حبس نے لوگوں کی مشکلات اور بڑھادیں ۔ اس جگاڑ کے بعد وارڈزکیلئے درکار درجہ حرارت 24 کی بجائے 32 تک پہنچ گیا جس سے ننھے مریض گرمی سے زیادہ بے حال نظرآئے۔ اسپتال کے تین میں سے دواے سی پلانٹس مسلسل خراب رہنے لگے ہیں۔انتظامیہ نے اعتراف کیا ہے کہ 1998ء سے نصب شدہ پلانٹس اب مریضوں کے بڑھتے ہوئے رش کے سبب ناکافی ثابت ہورہے ہیں۔ ناکارہ اورناکافی کولنگ سسٹم سے جہاں مریض بچوں کی جان پر بن آئی ہے وہیں طبی عملے کیلئے بھی علاج معالجہ جاری رکھنا مشکل ہوگیاہے۔

ایمزٹی وی(تعلیم)صوبہ بھر کی طرح راولپنڈی میں بھی سرکاری تعلیمی اداروں میں طلبہ کے بوگس داخلوں کی روک تھام کیلئے ''اسٹوڈنٹس ٹریکنگ مینجمنٹ سسٹم '' متعارف کرانے کا حتمی فیصلہ کرلیا گیاہے جس کے لئے ضلعی محکمہ تعلیم نے باقاعدہ ہوم ورک شروع کردیا ہے ۔
تفصیلات کے مطابق سرکاری تعلیمی اداروں میں زیر تعلیم طلبا و طالبات کا ریکارڈ کمپیوٹرائزڈ کیا جائے گا ، پہلی جماعت سے ہی ہر طالب علم کو خصوصی نمبر جاری ہوگا جبکہ اسکول چھوڑنے اور داخلہ لینے کیلئے آن لائن تصدیق کی جائے گی ۔
''پڑھو پنجاب بڑھو پنجاب '' پالیسی کے تحت سرکاری تعلیمی اداروں میں بچوں کے داخلوں کے حوالے سے رپورٹ ملی ہے کہ اسکولوں میں کم داخلے کیے جاتے ہیں جبکہ ظاہر زیادہ کیے جاتے ہیں جس کا صوبائی حکومت نے نوٹس لیتے ہوئے فیصلہ کیا ہے کہ ضلع بھر کے پرائمری سکولوں میں داخل اورزیر تعلیم طلبہ بالخصوص پہلی کلاس کے طلبہ کو ایک ٹریکنگ نمبر جاری کیا جائیگا۔اس نمبر کے تحت طلبہ کاایک اسکول سے دوسرے اسکول میں داخلہ لینے ،اسکول چھوڑ نے سمیت دیگر ریکارڈ آن لائن ہو گا اور متعلقہ ریکارڈکسی بھی وقت چیک کیا جاسکےگااس اقدام کا مقصد اسکولوں میں بوگس داخلوں کی روک تھام ہے ۔

ایمزٹی وی(انٹرنیشنل) امریکی سینیٹ نے ملک بھر میں اسلحہ فروخت کرنے کے قوانین میں ردوبدل کرنے کی تجاویز کو مسترد کردیا، اورلینڈ کے نائٹ کلب میں ہلاکتوں‌کے بعد اسلحہ پر پابندی کا موضوع زیر بحث تھا. تفصیلات کے مطابق امریکی ریاست فلوریڈا میں نائٹ کلب پر حملے کے بعد گن کنٹرول ایک بار پھر اہم ترین موضوع بن گیا، صدر اوباما اپنی صدارتی مدت میں اس حوالے سے اہم پیش رفت کے خواہش مند ہیں تاہم ایسا ممکن ہوتا دکھائی نہیں دے رہا۔ امریکی سینیٹ میں اس حوالے سے ڈیمو کریٹس اور ری پبلکنز میں اس وقت شدید اختلافات دیکھنے میں آئے جب گن کنٹرول کے حوالے سے ڈیمو کریٹس کی جانب سے پیش کی گئی چاروں تجا ویز کو مسترد کر دیا گیا، ان تجاویز میں زیر نگرانی دہشت گردوں کی فہرست میں شامل افراد کو اسلحہ فروخت کرنے پر مکمل پابندی عائد کیا جانا بھی شامل تھا۔ سینیٹ میں ری پبلکن ارکان اور نیشنل رائفل ایسوسی ایشن کے ممبران کا موقف تھا کہ یہ تجاویز اسلحہ رکھنے کے لوگوں کے آئینی حق کی خلاف ورزی ہے ۔ ری پبلکن پارٹی کے سینیٹرز کا موقف ہے کہ ’’اورلینڈو میں جو کچھ ہوا اس کی جڑ اسلامی شدت پسندی ہے، گن کنٹرول تجاویز کا اس سے کوئی لینا دینا نہیں ہے‘‘۔ امریکا میں ذہنی امراض میں مبتلا اور جرائم میں ملوث افراد کو اسلحہ فروخت کرنے پر پابندی عائد ہے لیکن زیر نگرانی دہشت گردوں کی فہرست میں شامل لوگوں کیلئے ایسی کوئی پابندی عائد نہیں گئی، اس وقت زیر نگرانی افراد کی تعداد دس لاکھ سے زائد ہے جس پر ڈیموکریٹس سینیٹرز میں شدید تشویش پائی جاتی ہے۔