ایمز ٹی وی (تجارت) وفاقی حکومت نے بنگلہ دیش کی طرزپرمقامی سگریٹ انڈسٹری سے زیادہ سے زیادہ ٹیکس وصولی کی غرض سے سگریٹ پیکٹس پرٹیکس ادائیگی کی مہریں لگانے پرغورشروع کردیا ہے۔اس اقدام سے سگریٹ کے شعبے کی ٹیکس چوری پر بھی نظررکھی جا سکے گی۔ اگلا وفاقی بجٹ کے قریب آتے ہی ایف بی آرسگریٹ انڈسٹری کی ٹیکس چوری کم کرنے کیلیے ہرممکن اقدامات کر رہا ہے۔ وزارت خزانہ کے سرکاری ذرائع نے بتایا کہ ٹیکس مہریں لگانے پر عملدرآمدسے نہ صرف اس شعبہ سے ٹیکس وصولی میں اضافہ ہوگابلکہ مقامی تیارہ کردہ سگریٹ پر ٹیکس ادائیگی کا ثبوت بھی ملے گا۔ پاکستان کی طرح بنگلہ دیش میں بھی مقامی غیر قانونی سگریٹ کی فروخت کا مسئلہ تھا ۔سال2000ء میں بنگلہ دیش کی حکومت نے سگریٹ کے تمام پیکٹوں پر ٹیکس مہریں لگائیں جس سے غیر قانونی سگریٹ کی فروخت 20فیصد سے کم ہوکرصرف 1.2فیصد رہ گئی اور ٹیکس وصولی میں اضافہ ہوا۔ایک تحقیق کے مطابق مقامی سگریٹ سازادارے ٹیکس چوری کرتے ہیں ۔ ان کے سگریٹ پیکٹس کی قیمت پندرہ سے بیس روپے ہے جبکہ قانون کے مطابق سگریٹ کے ایک پیکٹ پرکم ازکم 36 روپے ٹیکس عائدہوتا ہے،یہ کم قیمت ٹیکس نہ دینے کی واضح مثال ہے،ذرائع کے مطابق سگریٹ کے یہ برانڈ خیبر پختونخوا اورآزادکشمیر میں واقع فیکٹریوں میں بنائے جاتے ہیں ۔یہاں مینوفیکچررکم مقدارمیںسگریٹ تیاری ظاہرکرکے ٹیکس کی ذمے داری سے بچتے ہیں ۔ ان ذرائع نے بتایا مجموعی محاصل میں مقامی سگریٹ شعبے کاحصہ ایک فیصدسے بھی کم ہے اورقومی خزانہ کوہر سال تقریباً 25ارب روپے کانقصان پہنچایا جاتا ہے،مزید برآں ذرائع نے بتایا کہ سگریٹ پیکٹس پر ٹیکس ادائیگی کی مہر لگانے سے قانون نافذکرنیوالے ادارے سگریٹ کے کاروبارکی موثر طریقے سے نگرانی کرسکیں گے اورغیرقانونی سگریٹ کی فروخت روکی جاسکے گی ۔ان ذرائع نے بتایا حکومت سگریٹ پرٹیکس مہریں لگانے پر تو غورکررہی ہے لیکن اس کیلیے ایک شفاف اورقابل محاسبہ سرکاری ادارہ تلاش کرناابھی تک سوالیہ نشان ہے ۔پاکستان سیکیورٹی پرنٹنگ کارپوریشن جوکرنسی نوٹ،پرائز بانڈوغیرہ چھاپتا ہے کویہ کام سونپاجا سکتا ہے ۔

ایمز ٹی وی (تجارت) تھنک ٹینک انسٹی ٹیوٹ فار پالیسی ریفارمز (آئی پی آر) نے بجٹ 2016-17کے لیے تجاویز دیتے ہوئے کہا ہے کہ حکومت ٹیکس نادہندگی کو جرم قرار دے اور ٹیکس چوری کی تجویز کردہ سزا میں اضافہ کرے۔ گزشتہ روز جاری کردہ رپورٹ میں تھنک ٹینک نے کہاکہ ملک میں مالی جمودکی وجہ سے حکومت عوام کے لیے سہولتیں اور انفرااسٹرکچرمہیا نہیں کرپائی، عوام ملک میں ملازمتیں، معاشی ترقی اور بجلی کی قابل اعتماد ترسیل چاہتے ہیں، ہر ایک کو معلوم ہے کہ کم ٹیکس کی کیا وجوہ ہیں لہذا اب باتیں نہیں عمل کا وقت ہے، حکومت نے مالی مشکلات پر احسن طریقے سے قابو پایا ہے۔ ایف بی آر کافی حد تک اس سال ٹیکس وصولی کا ہدف حاصل کرتا ہوا نظر آرہا ہے نیزمالی خسارہ بھی اپنے ہدف 4.3 فیصد کے اندر ہی رہے گا جبکہ معیشت کی سرگرمیوں کو تیز کرنے اور سرمایہ کاری بڑھانے کے لیے حکومت کو اب بھی واضح اوربڑی اصلاحات کرنا ہونگی، حکومت نے ابھی تک پولیٹیکل اکانومی، طرز حکومت کی بہتری اور پیداوار میں اضافے کی طرف توجہ نہیں دی۔ اس کے علاوہ ملک میں گرتی ہوئی برآمدات کے ساتھ بیرونی قرضوں میں بھی اضافہ ہو رہا ہے ۔رپورٹ میں سفارشات پیش کی گئی ہیں کہ پاکستان کا آئی ایم ایف کے ساتھ معاہدہ ختم ہونے کو ہے لہٰذا معیشت نے جو پائیداری حاصل کی ہے اب اس کا تسلسل قائم رہنا چاہیے، ٹیکسوں میں اضافہ وسیع اور بنیادی ڈھانچے کے قیام کے ذریعے ہونا چاہیے، ملک کے اندر سرمایہ کاری کے لیے ضروری ہے کہ پیداوار میں بھی اضافہ کیا جائے نیز یہ بھی ضروری ہے کہ ملک کے اندر ڈیولپمنٹ کا احاطہ وسیع ہوناچاہیے جس میں اقتصادی راہداری منصوبہ بھی شامل ہے۔ بجٹ تجاویز میںکہاگیاکہ ٹیکس وصولیوں کے لیے اس کا دائرہ کار وسیع کرنا ہو گا، ٹیکس کی شرح بہت زیادہ ہے لیکن مسئلہ ٹیکس ادائیگی ہے جسے یقینی بنانا ہوگا، حکومت ٹیکس چوری کے بڑے کیسز کو نمایاں کرے، غیرمنقولہ جائیداد کی منتقلی کے لیے ٹیکس آئی ڈی تجویز کرے، ایف بی آر دوسرے محکموں اور اداروں کے ساتھ ٹیکس کے سلسلے میں معلومات کا تبادلہ کرے تاکہ ٹیکس نا دہندگان کی نشاندہی ہو سکے۔