ایمز ٹی وی (رپورٹ) کینیڈا کے صوبے البرٹا کے جنگلات میں لگنے والی آگ کا متصل صوبے ساسکچیوان تک پھیلنے کا خدشہ ہے۔گرم اور خشک ہواؤں کی وجہ سے حکام اب تک آگ پر قابو پانے میں ناکام رہے ہیں اور 80 ہزار افراد اس آگ کے باعث نکل مکانی کر نے پر مجبور ہو چکے ہیں۔

جنگلات میں آگ کیسے لگتی ہے؟
آگ کے لیے تین چیزوں کا ہونا لازمی ہے، ایندھن، آکسیجن اور تپش۔
فائر فائٹرز جب آگ پر قابو پانے کی کوشش کر رہے ہوتے ہیں تو وہ اکثر ’فائر ٹرائنگل‘ کا ذکر کرتے ہیں۔ جس کا مطلب ہے کہ اگر ہم آگ کے لیے ضروری تین چیزوں میں سے ایک کو ہٹا لیں تو آگ پر قابو پایا جاسکتا ہے۔ گرمیوں میں جب درجہ حرارت بہت زیادہ ہوتا ہے اور خشک سالی جیسے حالات ہوتے ہیں تو ایک چھوٹی سی چنگاری سے آگ لگ سکتی ہے۔

کبھی کبھار آگ قدرتی طور پر سورج کی تپش یا پھر آسمانی بجلی کے گرنے سے لگ جاتی ہے۔ تاہم جنگلات میں آگ لگنے کی سب سے بڑی وجہ انسانوں کی جانب سے برتنے والی بے احتیاطی ہے۔ بعض اوقات جان بھوج کر بھی آگ لگائی جاتی ہے۔

آگ اتنی تیزی سے کیسے پھیلتی ہے؟
جب جنگل میں ایک بار آگ شروع ہو جائے تو وہ ہوا، اترائی، چڑھائی اور خشک درختوں کی شکل میں موجود ایندھن، آگ کے تیزی سے پھیلنے کا سبب بنتا ہے۔ لیکن جہاں یہ تینوں چیزیں ہوں تو آگ پر قابو پانا بہت مشکل ہو جاتا ہے اور یہ دیکھتے ہی دیکھتے بہت بڑے علاقے پر پھیل جاتی ہے۔جنگلات کی دیکھ بھال کرنے والے ادارے ’فارسٹری کمیشن‘ سے وابستہ راب گزارڈ کے بقول ’اترائی یا چڑھائی والی جگہ پر آگ کے پھیلنے کی رفتار تین گنا تک بڑھ سکتی ہے۔‘

کیا موسم کا کوئی کردار ہوتا ہے؟
جی ہاں موسم اس میں بہت اہم کردار ادا کرتا ہے۔ جب خشک سالی ہو اور موسم بھی بہت گرم ہو تو یہ حالات آگ لگنے کے لیے بہت ساز گار ہوتے ہیں۔ آپ کو ’فائر ٹرآئنگل‘ والی بات یاد ہے نا؟ خشک درخت، گھاس اور دیگر پودے وغیرہ آگ کے لیے ایندھن بن جاتے ہیں۔ جب زیادہ گرمی پڑتی ہے تو آگ کے پھیلنے کی رفتار میں بھی اضافہ ہوجاتا ہے، یہ ہی وجہ ہے کہ آگ کی شدت میں دوپہر کے وقت تیزی دیکھنے میں آتی ہے۔

سازگار حالات بنانے کی صلاحیت
راب گزارڈ کاکہنا ہے کہ ’آگ کے لیے ایندھن اور آکسیجن لازمی ہیں۔جب آگ پھیلتی ہے تو بعض اوقات وہ ایسی ماحولیاتی اور موسمی تبدیلیوں کا باعث بنتی ہے جو آگ کے پھیلنے کے لیے معاون ہوتی ہیں۔‘ ان کے بقول ’آگ سے پیدا ہونے والے دھویں کے بادلوں کے باعث آپ آگ کو صیح طریقے سے دیکھ نہیں سکتے جس کے باعث آگ پر قابو پانے میں مشکل پیش آتی ہے۔‘

آگ سے کیسے جیتا جاسکتا ہے؟
راب گزارڈ کہتے ہیں کہ ’آگ پر قابو پانے کے لیے ضروری ہے اس کے راستے میں موجود ایندھن کو ہٹا دیا جائے۔آپ یہ اندازہ لگانے کی کوشش کرتے ہیں کہ آگ اگلے چند گھنٹوں یا دنوں میں کسی طرف کا رخ کرے گی اور پھر اس کے راستے میں موجود ایندھن کو وہاں سے ہٹا کر آگ پر قابو پایا جاسکتا ہے۔‘

کن جگہوں پر آگ لگنے کا زیادہ خدشہ؟
راب کے بقول برطانیہ جیسے ملک جہاں بارش کثرت سے ہوتی ہے اور درجہ حرارت بھی زیادہ نہیں ہوتا وہاں کہ جنگلات میں آگ لگنے کا اندیشہ کافی کم ہوتا ہے۔اس کے برعکس وہ ممالک جہاں گرمی زیادہ ہوتی ہے اور بارش بھی کم ہوتی ہے وہاں کے جنگلات میں آگ لگنے کا زیادہ خدشہ ہوتا ہے۔

ایمزٹی وی (راولپنڈی)عوامی تحریک نے گذشتہ روز راولپنڈی ڈسٹرکٹ کے صدر سلطان نعیم کیانی کی سربراہی میں راولپنڈی-اسلام آباد پریس کلب کے باہر ایک احتجاجی ریلی نکالی۔ تفصیلات کے مطابق پاکستان عوامی تحریک (پی اے ٹی) نے بھی پاناما پیپرز لیکس کے معاملے پر حکمران جماعت مسلم لیگ (ن) کے خلاف مہم کا آغاز کرتے ہوئے ایک ایسی تنظیم کی تشکیل کا مطالبہ کیا ہے جو پاک فوج کے زیرِ انتظام کام کرے اور وزیراعظم نواز شریف اور ان کے اہلخانہ کے خلاف کرپشن الزامات کی تحقیقات کرے۔ مظاہرین نے حکومت کے خلاف نعرے بازی کی اور نواز شریف اور ان کے اہلخانہ کے خلاف تحقیقات کا مطالبہ کیا۔ عوامی تحریک کے سلطان نعیم کیانی کا کہنا تھا، 'اگر پاناما یپیرز معاملے کی تحقیقات ایک ایسی تنظیم کرے جو فوج کی زیر نگرانی کام کرے، تو وزیراعظم کو استعفیٰ دینے کی کوئی ضرورت نہیں ہے۔ تاہم اگر کوئی دوسری تنظیم اس معاملے کی تحقیقات کر رہی ہے تو وزیراعظم نواز شریف کو تحقیقات کے آغاز سے قبل استعفیٰ دے دینا چاہیے'۔ ان کا مزید کہنا تھا کہ پاناما پیپرز لیکس نے مقامی اشرافیہ کی مالیاتی خردبرد کو بے نقاب کیا ہے، ان کامزید کہنا تھا کہ اب یہی وقت ہے کہ ملکی سیاست کو کرپشن اور نااہلی سے پاک کیا جائے۔ کیانی کا کہنا تھا، 'حکمران خاندان کو عوام کے پیسے سے حاصل کی جانے والی آمدنی اوراس پیسے کی بیرون ملک منتقلی کے حوالے سے جواب دہ ہونا چاہیے۔

ایمزٹی وی(اسپورٹس)رائل چیلنجرز بنگلور کے کپتان ویرات کوہلی اور کرس گیل کے درمیان دوستی گہری ہونے لگی ہے دونوں اب میدان سے باہر ایک ساتھ گھومتے پھرتے اور موج مستی کرتے ہوئے دکھائی دیتے ہیں، رواں سیزن کے دوران انھوں نے ایک ساتھ مختلف اشتہارات میں بھی کام کیا ہے دلچسپ بات یہ ہے کہ دونوں پارٹیوں کے دلدادہ ہونے کے ساتھ تیز رفتار گاڑیوں کے بھی شوقین ہیں، دونوں کے درمیان تعلق نیا نہیں بلکہ کچھ سال قبل ویرات کوہلی نے ایک بہترین میزبان کا ثبوت دیتے ہوئے جمیکن کرکٹر کو اپنی آیوڈی اسپورٹس کار پر دہلی کی سیر کرائی تھی جس کی ویڈیو اب بھی سوشل میڈیا پر کافی مقبول ہے، گیل نہ صرف اس تجربے سے لطف اندوز ہوئے بلکہ اپنے اسٹائل میں خوشی بھی ظاہر کی تھی۔

ایمزٹی وی(اسپورٹس) ہیڈ کوچ کیلیے مقامی امیدواروں کے ’نخروں‘ پر وسیم اکرم آگ بگولہ ہوگئے، کوچ ہنٹ کمیٹی کے ممبر نے نام لیے بغیر محسن حسن خان اور عاقب جاوید پر تنقید کے تیروں کی بارش کردی تفصیلات کے مطابق پاکستان کرکٹ بورڈ کی جانب سے وقار یونس کی جگہ نئے ہیڈ کوچ کی تلاش کیلیے کمیٹی میں وسیم اکرم اور رمیز راجہ کو شامل کیا گیا تھا۔ تب اس ذمہ داری کیلیے مضبوط مقامی امیدوار محسن حسن خان نے میڈیا سے بات چیت میں واضح کیا تھا کہ وہ اپنے جونیئرز کے سامنے پیش ہونے کے بجائے اپنی درخواست براہ راست چیئرمین پی سی بی شہریار خان کو دیں گے جب کہ عاقب جاوید نے یہ کہہ کر درخواست دینے سے انکار کردیا تھا کہ رمیز اور وسیم پر مشتمل پینل پہلے ہی غیرملکی کوچ کی خدمات حاصل کرنے کیلیے ذہن بناچکا ہے وسیم اکرم نے اپنے ایک انٹرویو میں اگرچہ کسی کا نام نہیں لیا مگر ان کا اشارہ ان دونوں کی ہی جانب تھا۔ وہ کہتے ہیں کہ ایک سابق پلیئر کا کہنا تھا کہ وہ صرف چیئرمین کو ہی اپلائی کریں گے، جب آپ کی ذہنیت ایسی ہو تو پھر آپ پاکستان ٹیم کے ساتھ کیسے کام کریں گے؟ انھوں نے کہا کہ میں اپنے سینئر کی عزت کرتا ہوں مگر آپ جس کی عزت کریں گے ، اس سے یہ توقع رکھیں کہ وہ بھی آپ کی عزت کرے گا، وسیم اکرم نے واضح کیا کہ انھوں نے اور رمیز راجہ نے صرف بورڈ کو ہیڈ کوچ کیلیے امیدواروں کو شارٹ لسٹ کرنے میں مدد دی انھوں نے اس بات کی بھی تصدیق کی کہ کسی بھی ہائی پروفائل کوچ نے اس ذمے داری کیلیے درخواست ہی نہیں بھیجی۔ نئے کوچ مکی آرتھر کے بارے میں وسیم کا کہنا تھا کہ وہ کافی تجربہ کار اور پاکستان ان سے کافی فائدہ اٹھا سکتا ہے تاہم انھوں نے یہ بھی واضح کیا کہ آرتھر سے راتوں رات تبدیلی کی امید نہ رکھی جائے ، اس وقت ون ڈے میں ہماری ٹیم نویں نمبر پر ہے، چیزوں کوبہتر کرنے کیلیے انھیں وقت دیناہوگا، ویسے بھی دورئہ انگلینڈ پاکستان ٹیم کیلیے انتہائی مشکل ثابت ہونے والا ہے۔