ایمز ٹی وی (تجارت) پاکستان اسٹیل پیپلز ورکرز یونین سی بی اے نے یونین کے چیئرمین شمشاد قریشی کے توسط سے سپریم کورٹ آف پاکستان میں آئینی درخواست دائر کی ہے جس کی پیروی سپریم کورٹ بار ایسوسی ایشن کے صدر بیرسٹر سید علی ظفر کررہے ہیں۔ آئینی درخواست میں موقف اختیار کیا گیا ہے کہ مسلم لیگ نواز کی حکومت نے مخصوص مفادات کے حصول کی خاطر بدنیتی کی بنیاد پر جان بوجھ کر پاکستان اسٹیل کو تباہ کرنے کیلیے 10 جون2015 سے اس کی گیس سپلائی بند کردی ہے، پاکستان اسٹیل کو بند کرنے سے معیشت پر براہ راست منفی اثرات مرتب ہونگے ۔ ایک ایسے وقت جب چین پاکستان اقتصادی راہداری منصوبے پر عملدرآمد شروع ہوچکا ہے جس کی بدولت اسٹیل کی طلب میں بے انتہا اضافہ ہو گا‘ پاکستان اسٹیل جیسے ادارے کو بند کرنا مجرمانہ فعل ہے۔ درخواست میں بیرسٹر سید علی ظفر نے کہاکہ پاکستان اسٹیل کو انتظامی، معاشی اور مالی مسائل درپیش ہیں جن سے نہ صرف ادارے کے ہزاروں افراد اور ان کے خاندان بلکہ پاکستان کے عوام متاثر ہو رہے ہیں۔ عدالت اعظمیٰ سے درخواست کی گئی ہے کہ حکومت کوہدایات جاری کی جائیں کہ وہ پاکستان اسٹیل سے متعلق اقتصادی رابطہ کمیٹی کے 24 مئی2014 اجلاس کے فیصلوں پر ان کی اصل روح کے مطابق عملدرآمد کرے اور پاکستان اسٹیل ملک کے بہترین مفاد میں ادارے کے پیداواری ہدف یعنی 77 فیصد کے حصول کیلیے اقدامات کرے، پاکستان اسٹیل کو تباہی سے بچانے کیلیے ایس ایس جی سی کی جانب سے پاکستان اسٹیل کی گیس منقطع کرنے کیلیے 15جولائی2015کو جاری کردہ خط کو غیرقانونی قرار دیا جائے کیونکہ مذکورہ لیٹر24مئی 2014کے ای سی سی کے فیصلوں کیخلاف اور ملکی عوام کے بنیادی حقوق سے متصادم ہے۔ حکومت اورایس ایس جی سی کو یہ احکام دیے جائیں کہ وہ بقایا جات کی ادائیگی کے طریقہ کار کو ای سی سی کے فیصلوں کی روشنی میں طے کرتے ہوئے پاکستان اسٹیل کی گیس بحال کریں، حکومت کو یہ ہدایات بھی جاری کی جائیں کہ وہ پاکستان اسٹیل کے لیے قابل ڈائریکٹرز کابورڈ تشکیل اور اہل سی ای او تعیناتی کرے جو ادارے کو بحرانی کیفیت سے نکال سکے، حکومت کوہدایات دی جائیں کہ وہ پاکستان اسٹیل کے ملازمین کو موجودہ شرح سے گراس تنخواہیں جاری کرے جوای سی سی فیصلوں کے برخلاف گزشتہ 5 ماہ سے ادا نہیں کی گئیں۔

ایمزٹی وی (تعلیم)ایچ ای سی اور ایس ای سی پی نے گزشتہ روز جامعات کے طلباء میں معاشی خواندگی کے فروغ، سرمایہ کاری سے متعلق شعورکی بیداری، اورانٹرپرینیورشپ کی حوصلہ افزائی کے لئے باہمی شراکت داری کے مقصد کے تحت مفاہمت کی یادداشت پر دستخط کئے۔ چیئر مین ایچ ای سی پروفیسر ڈاکٹر مختار احمداور چیئر مین ایس ای سی پی ظفرالحق حجازی نے ایچ ای سی سیکرٹریٹ میں منعقد ہ ایک تقریب کے دوران مفاہمت کی یادداشت پر دستخط کئے ۔ اس موقع پر ایچ ای سی کے ایگزیکٹو ڈائریکٹر پروفیسر ڈاکٹر ارشد علی اور دیگر اعلیٰ عہدیدار بھی موجود تھے ۔

ایمزٹی وی(انٹرنیشنل) غیر ملکی خبر رساں ادارے کے مطابق وزیر اعظم احمد داؤد اوغلواور صدر رجب طیب اردوگان کے درمیان کئی ماہ سے جاری اختلافات شدت اختیار کرگئے تھے جب کہ سیاسی بحران اور اختلافات کے خاتمے کے لیے دونوں رہنماؤں کے درمیان صدارتی محل میں ملاقات ہوئی تھی لیکن اس دوران دونوں کے درمیان اختلافات کھل کر سامنے آگئے جس کا نتیجہ وزیرِ اعظم کے استغفیٰ کی صورت میں سامنے آیا ترک میڈیا کے مطابق جسٹس اینڈ ڈیولپمنٹ پارٹی ( اے کے پی) کے اعلیٰ سطح کے اجلاس کے بعد احمد داؤداوغلو نے باضابطہ طور پر وزارتِ عظمیٰ سے سبکدوش ہونے کا اعلان کیا۔ دوسری جانب یورپی یونین نے بھی ترک وزیراعظم کے مستعفی ہونے پر تشویش کا اظہار کیا ہے کیونکہ شامی پناہ گزین کو ترکی میں داخلے کی اجازت دینے کے حوالے سے احمد داؤد اوغلو یورپی یونین سے مذاکرات کر رہے تھے جو نتیجہ خیز مراحل میں داخل ہونے کے قریب تھے واضح رہے کہ اگست 2014 میں جب صدررجب طیب  اردوگان وزیرِ اعظم سے صدر بنے تھے تواحمد  داؤد اوغلو نے وزارتِ عظمیٰ کا منصب سنبھالا تھا۔

ایمزٹی وی (تعلیم)کالج آف نرسنگ جے پی ایم سی کی انتظامیہ کی غفلت اور عدم توجہ کے باعث5سال گزرنے کے باوجود کالج میں ماسٹرز پروگرام دوبارہ شروع نہیں کیا جاسکا جس کے باعث طلبا اور صوبے کی نرسز کو پریشانی کا سامنا کرنا پڑرہا ہے۔ ذرائع کے مطابق کالج میں ماسٹرز پروگرام 2008شروع کیا گیا تھا۔ اس دوران کالج کی پرنسپل مہوش نادرتھیں پہلے بیچ نے ان کی نگرانی میں ماسٹرز مکمل کیا۔ دوسرے بیچ کے دوران کالج کی پرنسپل ریحانہ افغانی رہیں جبکہ تیسرے بیچ میں پرنسپل افشاں نازلی تھیں جو تاحال پرنسپل ہیں انہی کے دور میں 2011میں ماسٹرز پروگرام بند کر دیا گیا جو5سال گزرنے کے باوجود تاحال شروع نہیں کیا جاسکا۔ تفصیلات کے مطابق افشاں نازلی نے چارج سنبھالنے سے قبل دعوے کیے تھے کہ وہ کالجمیں نئے پروگرامات متعارف کرائیں گی اور کالج کی حالت بہتر بنائیں گی لیکن چارج سنبھالنے کے بعد نئے کے بجائے انہوں نے جاری پروگرام بھی ختم کر دیے ۔ افشان نازلی کی ساری توجہ اپنے پرائیویٹ اسکول کو چلانے پر مرکوز ہے اس لئے وہ کالج کی طرف توجہ نہیں دیتی ہیں۔ اس سلسلے میں افشاں نازلی کا کہنا تھا کہ ان کے چارج سنبھالنے پر پاکستان نرسنگ کونسل (پی این سی) نے پروگرام ختم کردیا۔ جبکہ پی این سی کا موقف تھا کہ پروگرام بغیر اجازت کے شروع کیا گیا تھا اس لئے انسپیکشن کرائی جائے گی تاہم انسپیکشن کے بعد بھی پروگرام جاری رکھنے کی اجازت نہیں دی گئی۔ پی این سی کے حکام کا اس سلسلے میں کہنا تھا کہ کالج میں اہل اساتذہ نہیں تھے ۔ ماسٹرز کے طلبا کو وہ اساتذہ پڑھارہے تھے جنہوں نے خود ماسٹرز نہیں کیا نہ ہی کالج میں کوئی پی ایچ ڈی استاد موجود ہے ۔ کالج میں جو استاد پڑھارہے تھے وہی پڑھ بھی رہے تھے جبکہ گریجویشن کے طلبا کے بھی تھیسس پورے نہیں تھے کالج میں پڑھائی کا معیار ابتر تھا جس پر یہ پروگرام ختم کیا گیا۔