ایمز ٹی وی (ہیلتھ ڈیسک) موسمِ سرما جہاں جلد کو خشک کرتا ہے وہیں سردیوں میں چلنے والی خشک ہوائیں ہونٹوں کوخشک اورکھردرا کر دیتی ہیں۔ ہونٹوں کی خشکی اگرزیادہ ہوجائے تو وہ پھٹنے لگتے ہیں اوران میں خون بھی آنے لگتا ہے عموماً لوگ اس تکلیف سے بچنے کے لیے کریم یا لپ بام استعمال کرتے ہیں تاہم خشک ہوا کے باعث کچھ دیربعد ہونٹ پھر سے خشک لگنے لگتے ہیں۔

اس موسم میں ہونٹوں کو پھٹنے سے بچانے کے لیے مندرجہ ذیل احتیاطیں کرناضروری ہیں:

ہونٹوں کو قدرتی نمی فراہم کرنے کے لیے زیادہ سے زیادہ پانی پئیں ۔

صحت بخش غذا کھائیں ۔ خاص طور سے سبزیاں اور پھل جن میں اینٹی آکسیڈنٹ کی خصوصیات موجود ہوں ۔

جلد کو نرم و ملائم رکھنے کے لیے وٹامن اے اور سی کی ضرورت ہوتی ہے۔ دودھ، گاجر اور خوبانی میں وٹامن اے اور رسیلے پھل جیسے کہ لیمبو، موسمبی اور نارنجی میں وٹامن سی کثیر تعداد میں موجود ہوتا ہے ۔

ہونٹو ں پر زبان پھیرنے سے گریز کریں ۔ ایسا کرنے سے ہونٹ مزید خشک ہو جاتے ہیں ۔ ہونٹوں پر زبان پھیرنے سے ان کی قدرتی نمی جاتی رہتی ہے ۔

ہونٹوں کو بھی ایکسفولئیٹ کرنے کی ضرورت ہوتی ہے۔ کسی لائٹ سے اسکرب سے ہونٹوں کا انگلی کی مدد سے مساج کریں دھونے کے بعد لپ بام ضرور لگائیں ۔

اپنے ہونٹوں کو تیز دھوپ سے محفوظ رکھیں۔ ویسے تو سردیوں کی دھوپ لینا اچھا لگتا ہے لیکن تیز شعاؤں سے ہونٹوں کی حفاظت کرنا ضروری ہے ۔اس کے لیے ہونٹوں پر سن اسکرین لگایا جاسکتا ہے۔

بعض اوقات کچھ ٹوتھ پیسٹ ہونٹوں کو خشک کردیتے ہیں۔ اگر خشکی سے نجات حاصل نہیں ہورہی ہو تو ٹوتھ پیسٹ تبدیل کر کے دیکھیں ۔

اکثر دانتوں پر بریسز لگانے والوں کو خشک ہونٹوں کی شکایت رہتی ہے۔ ایسی صورت میں اپنے ڈینٹسٹ سے مشورہ کریں ۔

خواتین زیادہ تیز کیمیکل والی لپ اسٹکس سے اجتناب کریں ۔ قدرتی اجزا سے بنی لپ اسٹک خریدیں۔a

ایمز ٹی وی (ایجوکیشن) مہران یونیورسٹی آف انجینئرنگ اینڈ ٹیکنالوجی جامشورو میں سیلف فنانس، یونیورسٹی سپورٹ پروگرام اور اسپیشل اسکیم کے تحت مختلف شعبوں میں سیٹیں خالی ہیں۔ ڈائریکٹر ایڈمیشن کے اعلامیہ کے مطابق جن امیدواروں نے 11اکتوبر 2015ء کو ہونے والے داخلہ ٹیسٹ میں کم از کم 40مارکس حاصل کئے تھے اور صوبہ سندھ کے کسی بھی ضلع کا ڈومیسائل رکھتے ہوں وہ امیدوار اس موقع سے فائدہ حاصل کر سکتے ہیں۔ داخلے کے خواہشمند امیدوار11جنوری 2016ءتک ڈائریکٹر فنانس مہران یونیورسٹی کے نام پر ڈیمانڈ ڈرافٹ جمع کرائیں۔ مزید معلومات کے لئے مہران یونیورسٹی کی ویب سائٹ www.muet.edu.pk وزٹ کریں۔

ایمز ٹی وی (ایجوکیشن) جامعہ کراچی کے ناظم امتحانات پروفیسر ڈاکٹر ارشد اعظمی کے اعلامیہ کے مطابق ایم بی بی ایس فائنل پروفیشنل ضمنی امتحانات برائے 2015 کے امتحانی تاریخوں کا اعلان کردیا گیا ہےجس کے مطابق ایم بی بی ایس فائنل پروفیشنل کے امتحانات 08 جنوری تا15 جنوری 2016 ء نیو کلاس رومز فیکلٹی آف سائنس نزد شعبہ فزیالوجی صبح 10:00 تا دوپہر 1:00 بجے منعقد ہوں گے۔

ایمز ٹی وی (ایجوکیشن) پنجاب کے شہر ڈنگہ کے گورنمنٹ گرلز ہائی اسکول سے داعش کے دھمکی آمیز پمفلٹس برآمد ہوئے ہیں۔ ذرائع کے مطابق پنجاب کے ضلع گجرات کے شہر ڈنگہ کا گورنمنٹ گرلز ہائی اسکول 5 جنوری کو حسب معمول کھلا تو تدریسی حصے سے داعش کے دھمکی آمیز پمفلٹس برآمد ہوئے۔ پمفلٹس پر تحریر تھا کہ ’’ہم اسامہ بن لادن کے شاگرد ہیں، اسکول کو بند کردو ورنہ ایک ہزار بچیوں کے نقصان کی ذمہ داری تم پر عائد ہو گی۔ داعش زندہ باد‘‘۔ لڑکیوں کے سرکاری اسکول کو دھمکی آمیز خط کے بعد پولیس اور ایلیٹ فورس کے اہلکاروں کی بڑی تعداد نے اسکول کا محاصرہ کر لیا اور اسکول کی سیکیورٹی بڑھا دی گئی جب کہ واقعہ کے بعد طالبات کے والدین میں خوف و ہراس پھیل گیا ہے۔