:
ایمزٹی وی(راولپنڈی)این اے 60 میں الیکشن ملتوی کرنے کے معاملے پرعدالت نے فیصلہ محفوظ کرلیا جوکچھ دیربعد سنایا جائے گا۔
میڈیا ذرائع کے مطابق شیخ رشید نے لاہورہائی کورٹ کے راولپنڈی بینچ میں پٹیشن دائرکی جس میں درخواست میں الیکشن کمیشن آف پاکستان اورریٹرننگ افسرکوفریق بنایا گیا ہے۔
درخواست میں موقف اختیارکیا گیا ہے کہ آئین کے تحت الیکشن صرف کسی امیدوارکی وفات کی صورت میں موخرکئے جا سکتے ہیں، امیدوارکو سزا ہونے پرالیکشن ملتوی نہیں ہوسکتا، مریم نوازاورکیپٹن (ر) صفدر کو سزا پران حلقوں میں الیکشن ملتوی نہیں ہوئے تو حنیف عباسی کو سزا ملنے کے بعد این اے 60 پربھی انتخابی عمل کو روکا نہیں جاسکتا۔ کسی امیدوارکو عدالت سے سزا ہونے کا خمیازہ ووٹرز کیوں بُھگتیں؟ اس لئے این اے 60 کا الیکشن ملتوی کرنا غیرقانونی ہے اور یہ فیصلہ کالعدم کیا جائے۔
عدالت نے سماعت کے دوران ہی فیصلہ محفوظ کرلیا جوکچھ دیربعد سنایا جائے گا۔
واضح رہے کہ 21 جولائی کے روزانسداد منشیات کی عدالت نے مسلم لیگ (ن) کے امیدوار حنیف عباسی کو ایفیڈرین کیس میں عمرقید کی سزا سنائی تھی جس کے بعد الیکشن کمیشن نے این اے 60 راولپنڈی میں انتخابات مؤخر کردیئے تھے
ایمزٹی وی(ڈیرہ غازی خان)خودکش حملے میں شہید ہونے والے پی ٹی آئی رہنما اکرام خان گنڈہ پور کو سپرد خاک کردیا گیا۔
ذرائع کے مطابق ڈیرہ اسماعیل خان میں گزشتہ روزخودکش حملے میں شہید ہونے والے اکرام خان گنڈہ پورکی نمازجنازہ کلاچی ڈگری کالج کے گراؤنڈ میں ادا کردی گئی۔
اس موقع پر فوج، ایف سی اورپولیس کے دستے تعینات تھے جب کہ تحصیل بھرمیں سیکورٹی کے انتہائی سخت انتظامات کیے گئے تھے۔
دوسری جانب کلاچی خودکش حملے کا مقدمہ اکرام اللہ گنڈاپور کے صاحبزادے آریز خان کی مدعیت میں درج کرلیا گیا ہے جس میں نامعلوم افراد کو نامزد کیا گیا ہے۔
واضح رہے کہ گزشتہ روزخود کش حملے کے نتیجے میں تحریک انصاف کے امیدوار اور سابق وزیر اکرام اللہ گنڈاپورسمیت 2 افراد شہید جبکہ متعدد زخمی ہوگئے تھے
بلوچستان اور خیبرپختونخوا میں خودکش حملوں کے دوران قیمتی جانوں کے ضیاع پرآج ملک بھر میں یوم سوگ منایا جا رہا ہے جب کہ سرکاری عمارتوں پر قومی پرچم بھی سرنگوں ہے۔
ذرائع کے مطابق نگراں وزیراعظم نے بلوچستان اور خیبر پختونخوا کے شہدا کو خراج عقیدت اور غم زدہ خاندانوں سے اظہار ہمدردی کے لیے قومی سطح پر آج یوم سوگ کا اعلان کیا ہے۔ اس ضمن میں وزیر اعظم آفس کی جانب سے وزارت داخلہ کو ہدایت کی گئی جس پر عمل کرتے ہوئے وزارت داخلہ نے باقاعدہ نوٹی فکیشن جاری کردیا ہے جب کہ یوم سوگ کے باعث سرکاری عمارتوں پر قومی پرچم سرنگوں ہے۔
کوئٹہ، مستونگ، سبی، بولان، ڈھاڈر سمیت صوبے کے دوسرے علاقوں میں آ ج فضا انتہائی سوگوار ہے جب کہ مختلف سیاسی جماعتوں کی طرف سے سوگ کا اعلان اور انتخابی سرگرمیاں معطل کردی گئی ہیں۔ سراوان ہاؤس کوئٹہ میں واقعہ پر اظہار افسوس کیلئے آنے والوں کا سلسلہ جاری ہے، کمانڈر سدرن کمانڈ عاصم سلیم باجوہ، آئی جی ایف سی ندیم انجم سمیت کئی اہم شخصیات نے سراوان ہاؤس جاکر نواب اسلم رئیسانی اور نواب زادہ لشکری رئیسانی سے اظہار افسوس کیا۔
مستونگ دھماکے میں شہید ہونے والے پی بی 35 مستونگ سے عوامی پارٹی کے امیدوار سراج رئیسانی کی شہادت کے بعد حلقے میں الیکشن ملتوی کردیےگئے ہیں جب کہ اب پی بی 35 مستونگ میں انتخاب ضمنی الیکشن کے ساتھ ہوگا۔
واضح رہے کہ جمعہ کے روز بلوچستان کے ضلع مستونگ میں درینگڑ کے قریب بلوچستان عوامی پارٹی کی انتخابی مہم کے دوران خودکش حملے کے نتیجے میں سابق وزیراعلیٰ بلوچستان نواب اسلم رئیسانی کے چھوٹے بھائی سراج رئیسانی سمیت 128 افراد شہید جب کہ 150 افراد زخمی ہوگئے، سراج رئیسانی کو شدید زخمی حالت میں اسپتال منتقل کیا گیا جہاں وہ زخموں کی تاب نہ لاتے ہوئے جاں بحق ہوگئے۔
اس سے قبل بنوں کے علاقے میں جے یو آئی (ف) کے رہنما اکرم خان درانی کے قافلے کے قریب بم دھماکے کے نتیجے میں 5 افراد جاں بحق اور 30 زخمی ہوگئے تھے تاہم اکرم درانی اس حملے میں محفوظ رہے جب کہ منگل کے روز قبل پشاور کے علاقے یکہ توت میں عوامی نیشنل پارٹی کی کارنر میٹنگ کے دوران دھماکے میں عوامی نیشنل پارٹی کے مرحوم رہنما بشیر بلور کے بیٹے اور اے این پی کے ’پی کے 78‘ کے انتخابی امیدوار ہارون بلور سمیت 13 افراد شہید ہوگئے تھے۔
:
ایمزٹی وی(اسلام آباد)الیکشن کمیشن نے ملکی تاریخ میں پہلی بار انتخابی عملے سے حلف لینے کا فیصلہ کیا ہے۔
الیکشن کمیشن نے پولنگ عملے کیلیے ہدایات جاری کر دی ہیں جس کے مطابق پولنگ شروع ہونے سے قبل پریذائیڈنگ افسران ہر ضلع کے ریٹرننگ افسر سے عہدے کا حلف لیں گے، الیکشن کمیشن کے مطابق پریذائیڈنگ افسر پولنگ کے باقی عملہ سے حلف لیں گے جبکہ انتخابی عملے کو پولنگ کے وقت سے کم از کم 2 گھنٹے پہلے پولنگ اسٹیشن پر پہنچنے کی ہدایت کی گئی ہے۔
الیکشن کمیشن کا کہنا ہے کہ پولنگ عملے کو امیدوار کی جانب سے مالی معاونت یا تحفے کو رشوت تصور کیا جائیگا جبکہ پولنگ عملے پر فرائض کی ادائیگی کے دوران سیاسی رائے کے اظہار پر بھی پابندی ہوگی۔
الیکشن کمیشن کے مطابق پولنگ عملہ ایسا لباس یا علامت اختیار نہ کرے جس سے کسی جماعت سے وابستگی ظاہر ہو جب کہ فرائض میں کوتاہی کے مرتکب عملے کیخلاف الیکشن کمیشن براہ راست کارروائی کرسکے گا اور خلاف ورزی کا مرتکب عملہ 30 روز میں سروس ٹریبونل یا عدالت میں اپیل دائر کر سکے گا۔
ایمزٹی وی(واشنگٹن)ترجمان محکمہ خارجہ نے پاکستان میں انتخابی جلسوں میں دھماکوں کی شدید مذمت کرتے ہوئے کہا کہ خطے سے دہشت گردی کے خاتمے کے لئے پاکستانی عوام کے ساتھ ہیں۔
امریکی محکمہ خارجہ کی جانب سے پاکستان میں انتخابی جلسوں میں دھماکوں کی مذمت کی گئی ہے۔ ایسے حملے پاکستانی عوام کوجمہوری حقوق سے محروم کرنے کی کوشش ہے۔
ترجمان محکمہ خارجہ ہیتھرناورٹ نے کہا کہ خطے سے دہشت گردی کے خاتمے کے لئے پاکستانی عوام کے ساتھ ہیں جب کہ دھماکوں میں مرنے والوں کے اہلخانہ سے تعزیت اورزخمیوں کی جلد صحتیابی کے لئے دعا گوہیں۔
واضح رہے کہ گزشتہ روزبلوچستان عوامی پارٹی کی انتخابی مہم کے دوران خود کش حملے کے نتیجے میں سابق وزیراعلیٰ بلوچستان نواب اسلم رئیسانی کے چھوٹے بھائی سراج رئیسانی سمیت 128 افراد شہید جب کہ 150 افراد زخمی ہوگئے۔
