ایمزٹی وی(تعلیم) سندھ بھر میں میٹرک کے سالانہ امتحان 28 مارچ جبکہ انٹرمیڈیٹ کے سالانہ امتحانات 28اپریل سے ہونگے۔ یہ فیصلہ جمعرات کوصوبائی محکمہ تعلیم کی اسٹیرنگ کمیٹی کے اجلاس میں کیا گیا ۔ اجلاس کی صدارت میں وزیر تعلیم سندھ نثار علی کھوڑو ، سیکریٹری تعلیم فضل اللہ پیچوہو ،اسپیشل سیکریٹری تعلیم عالیہ شاہد ،ڈائریکٹر جنرل کالجز سندھ پروفیسر نا صر انصار سمیت تمام تعلیمی بورڈ کے سر براہان چئیر مین تعلیمی بورڈ دیگر تعلیمی افسران نے شرکت کی۔اجلاس میں کئے گئے فیصلوں کے مطابق کراچی سمیت سندھ بھر میں انٹر سال اول کے داخلے کیپ کے تحت یکم اگست سے ہوں گے۔ اندرون سندھ کے تعلیمی بورڈ میٹرک کے نتائج 15جو لائی 2016 جبکہ کراچی بورڈ 31 جولائی 2016 تک جاری کرنے کا پابند ہوگا۔ اجلاس میں یوم اقبال 9نومبر کو سالانہ تعطیلات میں شامل کرنے کا بھی فیصلہ کیا گیا ۔

ایمز ٹی وی (اسلام آباد) ایران کے نئے سفیر مہدی ہنر دوست کی وزیر اعظم کے مشیر برائے خارجی امور سرتاج عزیز سے ملاقات ہوئی ہے۔ دفتر خارجہ کی جانب سے جاری کردہ پریس ریلیز کے مطابق سرتاج عزیز نے ایران کے نئے سفیر برائے پاکستان منتخب ہونے پر مہدی ہنر دوست کو مباکباد دی انہوں نے امید ظاہر کی کہ نئے سفیر کا دور کامیابی سے پورا ہوگا اس میں پیشہ وارانہ اور ذاتی تعلقات میں مزید بہتری آئی گی۔ اس موقع پر ایرانی سفیر کا کہنا تھا کہ وہ پاک ایران دو طرفہ تعلقات میں مثبت شراکت بنانے خاص طور پر اقتصادی تعاون بڑھانے اور تجارت کو فروغ دینے کے لئے کوشاں ہیں۔ ملاقات کے دوران ایرانی سفیر نے سرتاج عزیز کو ایرانی وزیر خارجہ جاوید زریف کی جانب سے دیا گیا خیر سہگالی کا پیغام بھی دیا ۔

ایمز ٹی وی (پنجاب) لاہور پولیس نے لاہور کے علاقے کینال روڈ ہنجروال کےقریب سے چھ کلو وزنی بم برآمد کیا ہے،وفاقی وزیرداخلہ چوہدری نثارکچھ دیرپہلےیہاں سےگزرے تھے۔ پولیس کو شبہ ہے کہ دہشت گردوں کو کسی وی آئی پی مومنٹ کاانتظارتھا۔ پولیس کے مطابق بم کا وزن چھ کلو تھا بم کو ریکورکرکے ناکارہ بنادیا گیاہے۔ پولیس نےمعمول کےگشت کےدوران بم ریکورکیا۔ ذرائع کےمطابق جس جگہ سے بم بر آمد ہوا وہاں سے کچھ دیر قبل چودھری نثار گزرے تھے۔ وزیر داخلہ چودھری نثارکو موٹروےسے اسلام آباد جانا تھا، ذرائع کے مطابق پولیس اس پہلوپربھی غورکررہی ہے کہ کہیں دہشت گردوں کا نشانہ چوہدری نثارتونہیں تھے

ایمزٹی وی(لاہور) ترجمان دفتر خارجہ کے مطابق وزیراعظم نوازشریف اور ان کے بھارتی ہم منصب نریندری مودی کی ملاقات میں پاکستان اور بھارت کے درمیان مذاکرات کا سلسلہ جاری رکھنے پر اتفاق کیا گیا ہے۔دفتر خارجہ کی جانب سے جاری اعلامیہ کے مطابق وزیراعظم نوازشریف نے بھارتی وزیراعظم نریندری مودی کے دورہ پاکستان کا خیر مقدم کیا اور دونوں وزرائے اعظم کی جانب سے امن عمل جاری رکھنے کی خواہش کا اظہار کیا گیا۔ اعلامیہ کے مطابق وزرائے اعظم کے درمیان ملاقات میں عوام کے مفاد میں مذاکرات کا سلسلہ جاری رکھنے اور باہمی تعلقات کو بہتر بنانے کے لیے مل کر کام کرنے پر اتفاق کیا گیا۔ اعلامیہ کے مطابق دونوں وزرائے اعظم نے کہا کہ امن عمل کا مقصد دونوں ممالک کے عوام کی خوشحالی ہے اس لیے دونوں ممالک کے درمیان دوطرفہ روابط بڑھانے پر بھی اتفاق کیا گیا۔

ایمزٹی وی (ایجوکیشن)آزاد کشمیر کے وزیر اعظم چوہدری عبدالمجیدنے ذوالفقار علی بھٹو شہید کیڈٹ کالج پلندری میں مقبوضہ کشمیر کے طلبہ کیلئے نشستیں مختص کرنے کی ہدایت کردی ۔اس حوالے سے ان کا کہنا تھا کہ وزیراعظم چوہدری عبدالمجید نے کہا کہ تحریک آزادی کے بیس کیمپ کی حکومت اداروں کے استحکام ، میرٹ کی بالادستی اورکارکردگی بہتر بنانے کے لئے کوشاں ہے ذوالفقارعلی بھٹوشہید کیڈٹ کالج پلندری کو مثالی ادارہ بنایا جائے گا ، ان خیالات کا اظہار انہوں نے کالج کے بورڈ آف گورنرز کے اجلاس سے خطاب کرتے ہوئے کیا ، اجلاس میں وزیر تعلیم اسکولز مطلوب انقلابی، ممبر قانون ساز اسمبلی ڈاکٹر محمد نجیب نقی،چیف سیکرٹری عابد علی عابد سمیت دیگر حکام نے شرکت کی ۔

ایمزٹی وی(اسلام آباد)سابق وزیر داخلہ مخدوم سید فیصل صالح حیات نے نئی سیاسی جماعت بنانے کا فیصلہ کرلیا ہے، نئی سیاسی جماعت میں پیپلز پارٹی کے متعدد رہنماؤں کی شمولیت کا امکان ہے۔مخدوم فیصل صالح حیات نئی سیاسی جماعت کیلیے اپنے قریبی معتمدین کے ساتھ صلاح مشوروں میں مصروف ہیں، نئی سیاسی جماعت کا نام پاکستان پیپلزپارٹی عوامی رکھے جانے کا امکان ہے تاہم نام کے بارے میں حتمی فیصلہ نہیں ہوا ہے، فیصل صالح حیات سے بلاول بھٹو زرداری نے بھی رابطہ کر کے پارٹی میں شمولیت کی دعوت دی ہے اور پنجاب کی صدارت کی پیشکش بھی کی ہے، نئی سیاسی جماعت کی تشکیل کے بارے میں عام انتخابات سے قبل فیصلہ کر لیا جائے گا۔ ذرائع نے بتایا ہے کہ سندھ کے سابق وزیر داخلہ ذوالفقار مرزا نے بھی فیصل حیات سے رابطہ کیا ہے اور نئے سیاسی اتحاد بنانے پر بات چیت کی گئی ہے۔

ایمزٹی وی(لاہور)سہالہ پولیس ٹریننگ کالج میں پاسنگ آوٹ پریڈ کے دوران تربیت مکمل کرنے والے جوانوں نے شاندار عملی مہارت کا مظاہرہ کیا۔ تقریب میں وزیر اعلیٰ پنجاب مصروفیات کے باعث شرکت نہ کر سکے جس کے بعد شجاع خانزادہ کے صاحبزادے جہانگیر خانزادہ بطور مہمان خصوصی شریک ہوئے۔ تفصیلات کے مطابق پولیس کالج سہالہ میں 634 جوانوں نے تربیت مکمل کر لی جن میں چار خواتین بھی شامل ہیں۔تربیت مکمل کرنے والے ریکروٹس اے ایس آئی کے طور پر خدمات سر انجام دیں گے۔تقریب میں پاس آوٹ ہونے والے جوانوں میں اسناد اور شیلڈز بھی تقسیم کی گئی۔

ایمزٹی وی(اسلام آباد)وزیرمملکت برائے انفارمیشن ٹیکنالوجی انوشہ رحمان کواقوام متحدہ کے 2 ذیلی اداروں یواین ویمن اورانٹرنیشنل ٹیلی کمیونیکیشن یونین کی طرف سے مشترکہ طور پر خصوصی اعزاز ’’جم ٹیک گلوبل اچیورزایوارڈ 2015ء ‘‘ دیا گیا ہے۔تفصیلات کے مطابق وزیرمملکت برائے انفارمیشن ٹیکنالوجی انوشہ رحمان کو یہ ایوارڈ انفارمیشن کمیونیکیشن ٹیکنالوجی خصوصاًخواتین کوخود مختاربنانے کے شعبے میں گراں قدر خدمات کے اعتراف میں دیاگیاہے۔ اس ضمن میں نیویارک میں اقوام متحدہ کی جنرل اسمبلی کے اعلیٰ سطح کے اجلاس کے موقع پرخصوصی تقریب ہوئی جس میں انوشہ رحمان کواس ایوارڈسے نوازاگیا۔

ایمز ٹی وی (کراچی)جم خانہ کلب میں لاڑکانہ روانگی سے قبل میڈیا سے گفتگو کرتے ہوئے وزیر اعلیٰ سندھ قائم علی شاہ کا کہنا تھا کہ عجیب بات ہے رینجرز کے معاملے کو بہت اچھالا گیا، رینجرز ہمارے ساتھ ہیں اور رہیں گے۔ انہوں نے پولیس کے ساتھ مل کر بہت اچھا کام کیا ہے اور امن قائم کرنے میں بہت کامیابی حاصل کی ہے، اس کو فراموش نہیں کر سکتے، یہ ایک قانونی بات ہے جس پر تھوڑی سی تاخیر ہوئی ہے، رینجرز اور سندھ حکومت ایک دوسرے کے ساتھ تعاون کر رہے ہیں۔انہوں نے مزید کہا کہ رینجرز پر سیاست چمکانا مناسب نہیں۔ نیب بغیر اطلاع کے کافی ایکٹو ہے۔ رینجرز وفاق کا ادارہ ہے لہٰذا آرٹیکل 147 کے تحت اسمبلی سے توسیع لینا ضروری ہے۔

ایمزٹی وی(اسلام آباد)وزیر اعظم نواز شریف دو روزہ دورے پر ترکمانستان پہنچ گئے۔ وزیراعظم اشک آباد میں بین الاقوامی کانفرنس میں شرکت کرینگے۔ہوائی اڈے پر ترکمانستان کے ترجمان کے مطابق وزیراعظم اشک آباد میں بین الاقوامی کانفرنس میں شرکت کرینگے۔ کانفرنس میں دیگر ممالک کے سربراہان بھی شرکت کرینگے۔ وزیر اعظم نواز شریف ترکمانستان کے صدرقربان علی محدوف کی دعوت پر دورہ کررہے ہیں۔ترجمان کا کہنا ہے کہ وزیر اعظم نواز شریف تاپی گیس پائپ لائن منصوبے کےسنگ بنیاد کی افتتاحی تقریب میں شرکت کرینگے۔ دورے کے دوران ترکمانستان سے دوطرفہ تعلقات اور خطے کی صورتحال پر تبادلہ خیال کیا جائے گا۔ پاکستان تجارت‘ توانائی‘ دفاعی شعبوں میں تعاون پر بھی ترکمانستان سے بات کریگا۔ذرائع کے مطابق وزیراعظم کی بھارتی ہم منصب نریندر مودی سے ملاقات کا بھی قوی امکان ہے۔ ملاقات پیرس‘ بنکاک اور اسلام آباد کی ملاقاتوں کا تسلسل ہے۔ ذرائع کے مطابق ملاقات سے دونوں ممالک کے درمیان جامع مذاکرات شروع کرنے میں مدد ملے گی۔ ملاقات سے دونوں ممالک میں اعتماد سازی کو فروغ اور رابطوں میں تیزی آئے گی۔