کراچی:جامعہ کراچی کی قائم مقام وائس چانسلرڈاکٹرناصرہ خاتون کا کہناہے کہ ملک کی تقریباً نصف آبادی خواتین پرمشتمل ہوتی ہے۔لہذا ضرورت اس امر کی ہے کہ خواتین کو بھی ملک کی ترقی میں اپنا کرداراداکرنے کے لئے زیادہ سے زیادہ مواقع فراہم کئے جائیں 

جامعہ کراچی کے سینٹر آف ایکسیلینس فار ویمنز اسٹڈیزکے زیر اہتمام عالمی یوم خواتین کے موقع پر منعقدہ ایک روزہ بین الاقوامی کانفرنس بعنوان: ”پائیدار کل کے لئے صنفی مساوات:خواتین کے کردارکو سراہنا“ کی افتتاحی تقریب منعقد ہوئی۔

افتتاحی تقریب سے خطاب کرتے ہوئے قائم مقام وائس چانسلر پروفیسر ڈاکٹر ناصرہ خاتون نے کہا کہ خواتین اب اپنی روایتی ذمہ داریاں پورا کرنے کے ساتھ ساتھ مختلف شعبہ ہائے زندگی میں بھی نمایاں کردار ادا کر رہی ہیں۔ اس کی سب سے بڑی اور اہم وجہ خواتین میں تعلیم حاصل کرنے کا بڑھتا رجحان ہے۔ کسی بھی ملک کی ترقی کا دارومدار اس کی افراد ی قوت پر ہوتاہے اور افرادی قوت کی بات کی جائے تو اس بات کا خیال رکھنا چاہیئے کہ ملک کی تقریباً نصف آباد ی خواتین پر مشتمل ہوتی ہے۔لہذا ضرورت اس امر کی ہے کہ خواتین کو بھی ملک کی ترقی میں اپنا کردار اداکرنے کے لئے زیادہ سے زیادہ مواقع فراہم کئے جائیں۔

اس موقع پر رئیسہ کلیہ فنون وسماجی علوم جامعہ کراچی پروفیسر ڈاکٹر نصرت ادریس نے کہا کہ اسلام نے طبقہ خواتین کو جو عزت و توقیر بخشی اس سے متاثر ہو کر دوسری قوموں نے بھی عورتوں کو معزز سمجھنا شروع کیا۔عصر حاضر میں میں عورت مردوں کے شانہ بشانہ کھڑی ہے

فورمین کرسچین کالج فورمین کی پروفیسر ڈاکٹر عارفہ سیدہ زہرہ نے آن لائن خطاب کرتے ہوئے کہا کہ ۔ یہ حقیقت ہے کہ ترقی کے مواقع کو کسی نہ کسی وجہ سے سمجھوتوں اور تعصبات کا سامنا ہے۔بنیادی طور پر ہر شہری کی شراکت کی یکساں تعریف اور قانون کی تشریح کا فقدان، لاعلمی یا ناقص ارادے کی وجہ سے، بنیادی انسانی حقوق سے انکار اور امتیازی سلوک کی بنیاد بنتا ہے۔

ممبراسٹینڈنگ کمیٹی آن پرائمری ہیلتھ مہتاب اکبر راشدی نے کہا کہ صنفی مساوات بذات خود ایک اہم ترقیاتی مقصد ہے اور اس کا معاشی ترقی سے گہرا تعلق ہے۔خواتین اب بھی مختلف جہتوں میں جیسے وسائل تک رسائی، روزگار اور کاروباری مواقع کے ساتھ ساتھ سیاسی اور کارپوریٹ بورڈز میںمردوں سے پیچھے ہیں۔

نیشنل ڈیفنس یونیورسٹی اسلام آباد کی پروفیسر ڈاکٹر رفعت حق نے کہا کہ دنیا بھر میں خواتین کی جدوجہد کی بدولت خواتین کے حقوق اور صنفی مساوات میں تیزی سے بہتری آرہی ہے

کانفرنس کی کنوینروانچارج سینٹر آف ایکسیلینس فارویمنزاسٹڈیز جامعہ کراچی پروفیسر ڈاکٹر اسماء منظورنے کہا کہ پاکستان کی کل آبادی کا 48.54 فیصدخواتین پر مشتمل ہے۔پاکستان کی سماجی واقتصادی ترقی میں خواتین کے کردار کو فراموش نہیں کیاجاسکتا۔

آئی بی اے کراچی کی ایسوسی ایٹ پروفیسرڈاکٹر ہماء بقائی نے کہا کہ 1988 ء میں بینظیر بھٹو نے پانچ جامعات میں ویمن اسٹڈی سینٹر زجبکہ فرسٹ ویمن بینک کے ساتھ ساتھ سرکاری ملازمتوں میں خواتین کے لیے 5% کوٹہ مختص کیا۔ انہوں نے سندھ میں بے زمین خواتین کسانوں کو زرعی زمین کی ملکیت دے کر زمینی اصلاحات متعارف کروائیں۔

کراچی: ایڈمنسٹریٹر بلدیہ شرقی رحمت اللہ شیخ نےسپریٹنڈنگ انجینئر بی اینڈآرسلمان میمن اور ڈائریکٹرلائبریریزطلعت شکیل کے ہمراہ لائبریریزکادورہ کیا۔

اس موقع پر ایڈمنسٹریٹر بلدیہ شرقی رحمت اللہ شیخ نے کہا ہے کہ ماضی گواہ ہے کہ کتابوں کے اخراجات برداشت نہ کرنے والوں نے لائبریریوں سے استفادہ حاصل کر کے اعلی ڈگریاں حاصل کرکے ملک میں نام پیدا کیا، آج کے جدید دور میں بھی لائبریریوں کی اہمیت اپنی جگہ موجود ہے

انہوں نے اختر کالونی لائبریری، شفیع دہلوی لائبریری کے معائنے کے دوران ہدایت کی کہ مذکورہ لائبریریوں میں قارئین کو پرسکون ماحول فراہم کرنے کیلئے اقدامات بروئے کار لائے جائیں عمارتوں کو درست کرنے کے ساتھ ایسا ماحول فراہم کیا جائے کہ آنے والے پرسکون ماحول میں مطالعے کےذوق کی تسکین کے ساتھ حصول تعلیم میں مدد حاصل کر سکیں۔مزید براں انہوں نے لائبریریوں کو جدید خطوط پر استوار کرنے کے حوالے سے بھی ہدایات جاری کیں

اس موقع پر ڈائریکٹر لائبریریز طلعت شکیل نے انہیں بلدیہ شرقی میں موجود لائبریریوں کے حوالے سے بریفنگ دیتے ہوئے بتایا کہ بلدیہ شرقی میں قدیم لائبریریاں بھی موجود ہیں جس سے ان گنت لوگوں نے استفادہ حاصل کیا اور اب بھی لوگ اس سے مستفید ہورہے ہیں انہوں نے لائبریریوں کی حالت زار بہتر بنانے کے حوالے س احکامات صادر کرنےپر ایڈمنسٹریٹر بلدیہ شرقی کا شکریہ ادا کیا.

کراچی: پاکستان اور آسٹریلیاکےنیشنل اسٹیڈیم میں کھیلے جانے والے دوسرے ٹیسٹ میچ کے آغاز سے قبل حفاطتی انتظامات کا جائزہ لینے کے لیے آسٹریلیوی کرکٹ بورڈ کے سیکیورٹی وفد کے ارکان آج کراچی پہنچ گئےہیں، وہ شام کو اسٹیڈیم میں اقدامات کا جائزہ لینے کے ساتھ ٹیم کے سفری راستے کی ریکی بھی کریں گے جبکہ مقامی سیکیورٹی زمہ داران کی جانب سے ان کو بریفنگ بھی دی جائے گی۔

دوسری جانب 24 برس بعد دونوں ممالک کے درمیان کراچی میں کھیلے جانے والے ٹیسٹ کے لیے اسٹیڈیم میں تزئین و آرائش کے انتظامات کیے جارہے ہیں، مختلف انکلوژرز کے اسٹینڈز میں نشستوں کی دھلائی اور صفائی کی جارہی ہے،بعض اسٹینڈز میں تماشائیوں کو سہولت کی فراہمی کے لیے کرسیوں کا بھی اہتمام کیا جارہا ہے۔

کراچی ٹیسٹ کے لیے گراونڈ اسٹاف کی تیاریاں بھی جاری ہیں جنہوں نے مجموعی طور پر 8 وکٹیں تیار کرلی ہیں، ان میں سے 4 وکٹیں نیٹ سیشن کےلیے بنائی گئی ہیں، ہر ٹیم کو مشقوں کے لیے 2 وکٹیں میسر ہوں گی، ادھر میچ کے لیے ٹکٹوں کی آن لائن فروخت بھی امید افزا ہے، تاہم تماشائیوں کی تعداد میں اضافہ کے لیے اعزازی ٹکٹ بھی فراہم کیے جانے کا امکان ہے۔

کراچی: آسٹریلیا اور پاکستان کے مابین ہونےوالے دوسرے ٹیسٹ میچ کو نتیجہ خیز بنانے کے لیے سپورٹنگ وکٹ تیار کرلی گئی۔

ذرائع کےمطابق راولپنڈی میں سیریز کا پہلا ٹیسٹ میچ ڈرا ہونے کے بعد دونوں ٹیمیں بدھ کو چارٹرڈ فلائٹ کے زریعے کراچی پہنچ رہی ہیں، جس کے بعد جمعرات اور جمعہ کو صبح ساڑھے 11 بجے سے دوپہر ڈھائی بجے تک نیشنل اسٹیڈیم پر پریکٹس سیشنز میں شرکت کریں گی۔

دوسرے ٹیسٹ میچ کو نتیجہ خیز بنانے کے لیے دونوں ٹیموں کی نیشنل اسٹیڈیم آمد سے قبل سپورٹنگ وکٹ تیار کی گئی ہے جو بیٹرز کے لیے سازگار ہونے کے ساتھ اسپنرز کے لیے بھی معاون و مددگار ہوگی۔

اسلام آباد: پاکستان ٹیلی کمیونیکیشن نے فون سیٹوں کی عارضی رجسٹریشن کے لیے ایک نیا طریقہ کارتیارکرلیا۔

پاکستان ٹیلی کمیونیکیشن اتھارٹی (پی ٹی اے) نے موبائل رجسٹریشن کے حوالے سے بیرون ملک مقیم پاکستانیوں /غیر ملکیوں کو درپیش مسائل کے حل کے لیے ان سمندر پار پاکستانیوں /غیر ملکیوں جو مختصر مدت کے لئے پاکستان کے دورے پر آئے ہوں کے فون سیٹوں کی عارضی رجسٹریشن کے لیے ایک نیا طریقہ کارتیار کیا ہے۔

پی ٹی اے اس نئے نظام کی پائیداری اور اس کی تکنیکی فعالیت کو یقینی بنانے کے حوالے سے تیاری اور جانچ کے عمل میں ہے۔ جو کہ جلد ہی فعال کر دیا جائے گا۔

مزید تفصیلات پی ٹی اے کی ویب سائٹ: www.pta.gov.pk  پر نظام فعال ہو جانے پر دستیاب ہو ں گی۔ نئے طریقہ کار کے تحت موبائل ڈیوائسز 120 دنوں تک بغیر کسی ٹیکس/ڈیوٹی کے کام کرتی رہیں گی۔

درخواست دہندہ پی ٹی اے کے ڈیوائس آئیڈینٹی فکیشن رجسٹریشن اینڈ بلاکنگ سسٹم (ڈی آئی آر بی ایس) کے ذریعے اپنے کوائف اور ڈیوائس آئی ایم ای آئی داخل کرکے عارضی رجسٹریشن کے لیے درخواست دے سکیں گے۔

پی ٹی اے یہ نظام پاسپورٹ نمبر کی تصدیق کے لیے ایف آئی اے کے انٹیگریٹڈ بارڈر مینجمنٹ سسٹم (آئی بی ایم ایس) کے ساتھ ساتھ درخواست گزار کے موبائل نمبر سم کی تصدیق کے لیے موبائل آپریٹروں کے ساتھ منسلک کرے گا۔

کراچی: جامعہ این ای ڈی کےتحت سینڈیکٹ کی نشست کےلیے ضمنی الیکشن 2022 کا انعقاد کیا گیا.

الیکشن میں ایسوسی ایٹ پروفیسر ڈاکٹر محمد واصف اور ایسوسی ایٹ پروفیسر ڈاکٹر کاشف احمد کے مابین کانٹے دار مقابلہ رہا.جامعہ این ای ڈی کے ایسوسی ایٹ پروفیسرز نے حقِ رائے دہی کا بھرپور استعمال کیا.

ایسوسی ایٹ پروفیسر ڈاکٹر واصف احمد 27 ووٹ لے کر کامیاب ہوئےجس کے بعدان وہ دو برس کے لیے سینڈیکٹ کے رکن ہوں گے۔ شیخ الجامعہ این ای ڈی پروفیسر ڈاکٹر سروش حشمت لودھی، پرووائس چانسلر پروفیسر ڈاکٹر محمد طفیل اور ڈینز نے جیتنے والے امیدوار کو مبارک باد دی۔

ریٹرننگ آفیسر/رجسٹرار سید غضنفر حسین نقوی کی سرپرستی میں 46 ووٹ کاسٹ کیے گئے. اس ضمنی الیکشن کا ٹرن آؤٹ 85 فی صد سے زیادہ رہا. یاد رہے کہ یہ نشست ڈاکٹر شہنیلہ زرداری کی پروفیسر تعیناتی کے بعد خالی ہوئی ہے

واشگنٹن: خواتین کے عالمی دن کے موقع پر سرچ انجن گوگل نےاپنا ڈوڈل خواتین کے نام کردیا۔

پاکستان سمیت دنیا بھرمیں آج خواتین کا عالمی دن منایا جارہا ہے۔خواتین کوخراج تحسین پیش کرنے کے لئے سرچ انجن گوگل نے اپنا ڈوڈل خواتین کے نام کردیا۔

گوگل کے ڈوڈل میں خواتین کوزندگی کے مختلف شعبوں میں سرگرم عمل دکھایا گیا ہے جبکہ گھریلو سرگرمیوں میں مصروف خواتین بھی گوگل کے ڈوڈل کا حصہ ہیں۔عالمی یوم خواتین کا اس سال عنوان ’صنفی مساوات آج، پائیدارکل‘ ہے۔

انٹرنیشنل لیبر آرگنائزیشن کے اعداد و شمار کے مطابق پاکستان میں خواتین کی آبادی کا پانچواں حصہ مختلف شعبوں میں خدمات سر انجام دے رہا ہے ۔

عالمی یوم خواتین منانے کا مقصد گھریلو امور کے ساتھ ساتھ زندگی کے مختلف شعبوں میں خدمات انجام دینے پر خواتین کوخراج تحسین پیش کرنا ہے۔

کراچی: صوبے سندھ کے5 تعلیمی بورڈزکے لئےتاحال مستقبل وائس چانسلرز تعینات نہ ہوسکے۔

تفصیلات کے مطابق سندھ کے 5 تعلیمی بورڈز بھی گزشتہ کئی ماہ سے تلاش کمیٹی کی جانب سے انتخاب کئے جانے کے باوجود مستقل چیئرمین سے محروم ہیں جن میں سکھر تعلیمی بورڈ،نوابشاہ تعلیمی بورڈ ،سندھ بورڈ آف ٹیکنیکل ایجوکیشن، حیدرآباد تعلیمی بورڈ، اورمیرپور خاص تعلیمی بورڈ شامل ہیں۔

اس طرح سندھ کا اعلیٰ تعلیمی نظام ایڈہاک ازم کی بنیادوں پر چلایا جا رہا ہے

کراچی: سندھ میں اعلیٰ تعلیم کو نظر انداز کرنے اور اہمیت نہ دینے کے باعث ایک اور قائم مقام وائس چانسلر کا اضافہ ہوگیا ہےجس کے بعدصوبے میں قائم مقام وائس چانسلر کی تعداد بڑھ کر 12 ہوگئی ہے۔

سندھ بھرکے تعلیمی بورڈز میں بھی ایڈہاک ازم عروج پر ہے اور انتخابات کے باوجود 5تعلیمی بورڈزمستقل چیئرمین سے محروم ہیں ۔

بینظیر بھٹو شہید یونیورسٹی آف ٹیکنالوجی اینڈ اسکل ڈیولپمنٹ خیرپورکے وائس چانسلر ڈاکٹر مدد علی شاہ کی پہلی مدت ختم ہونے کے بعد ان کو دوسری مدت نہیں دی گئی۔ محکمہ بورڈز و جامعات کے سیکشن افسر کمال احمد کے مطابق اسی یونیورسٹی کے کمپیوٹر انسٹیٹیوٹ کے ڈائریکٹر ڈاکٹر نور احمد شیخ کو وائس چانسلر کے عہدے کی ذمہ داری دیدی گئی ہے۔

اس وقت سندھ میں جامعہ کراچی، جناح سندھ میڈیکل یونیورسٹی، دائود انجینئرنگ یونیورسٹی، لیاری یونیورسٹی، انیمل یونیورسٹی سکرنڈ، لاڑکانہ میڈیکل یونیورسٹی، مہران انجینئرنگ یونیورسٹی، شہید اللہ بخش یونیورسٹی جامشورو، آئی بی اے سکھر، ویمن یونیورسٹی سکھر، اروڑ یونیورسٹی سکھر اور ٹیکنالوجی یونیورسٹی خیر پور مستقل وائس چانسلر سے محروم ہیں۔

کراچی : ثانوی تعلیمی بورڈ کراچی نے سالانہ امتحانات2022 دہم جماعت سائنس گروپ کےامتحانی فارم بغیرلیٹ فیس کےجمع کرانےکی تاریخ میں توسیع کردی۔

کراچی میٹرک بورڈکے چیئرمین سید شرف علی شاہ کی خصوصی ہدایت پر سالانہ امتحانات2022 دہم جماعت سائنس گروپ کے امتحانی فارم بغیر لیٹ فیس کے جمع کرانے کی تاریخ میں 15مارچ 2022ء تک توسیع کر دی گئی ہے۔

انہوں نے بورڈ سے الحاق اسکولوں کے سربراہان اوروالدین کو ہدایت کی ہے کہ وہ طلباء و طالبات کے امتحانی فارم جلد از جلد جمع کرا دیں۔

تاریخ گزرنے کے بعد امتحانی فارم نئے شیڈول کے مطابق لیٹ فیس کے ساتھ وصول کئے جائیں گے۔ گورنمنٹ اسکول بھی بغیر فیس کے اسی شیڈول کے مطابق امتحانی فارم جمع کرا سکتے ہیں۔