ایمز ٹی وی (بزنس)اوگرا نے پیٹرولیم مصنوعات کی قیمتوں میں اضافے کی سمری وزارت پیٹرولیم کو بھجوا دی ہے۔

اوگرا کی سمری میں پیٹرول کی فی لیٹر قیمت میں 2 روپے 96 پیسے،ڈیزل کی فی لیٹر قیمت میں 2 روپے 18 پیسے ،مٹی کے تیل کی قیمت میں 17 روپے 55 پیسے، جبکہ لائٹ ڈیزل کی قیمت میں 10 روپے 94 پیسے اضافے کی سفارش کی گئی ہے۔

واضح رہے کہ اوگرا کی جانب سے ہر 15دن بعد پیٹرولیم مصنوعات کی قیمتوں میں اضافہ اور ردو بدل کیا جا رہا ہے۔

ایمز ٹی وی(بزنس) ایران نے اپنے قومی تہوار ’نوروز‘ سے قبل پاکستانی کینو کی درآمد سے پابندی اٹھالی۔پابندی اٹھائے جانے کے حوالے سے وزیر تجارت خرم دستگیر نے کہا کہ ’ایران کی جانب سے یہ رعایت ایرانی صدر حسن روحانی کی ای سی او کانفرنس میں متوقع شرکت سے پہلے دی گئی ہے، جس سے دونوں ممالک کے درمیان تجارت میں تیزی سے پیشرفت ہوگی۔انہوں نے کہا کہ ’ایران میں پاکستانی کینو کی بے حد مانگ ہے اور ایران کے قومی تہوار جشن نوروز سے تین ہفتے قبل پاکستانی کینو سے پابندی اٹھانا خوش آئند ہے۔‘

وزیر تجارت کا کہنا تھا کہ ’پاکستانی کینو کے برآمد کنندگان کو چاہیے کہ وہ اس موقع سے فائدہ اٹھائے، جبکہ افغانستان کی سرحد بند ہونے سے کینو کی تجارت پر جو اثر پڑا تھا ایران سے ملنے والی رعایت سے وہ کافی حد تک زائل ہوجائے گا۔

‘انہوں نے کہا کہ ’ایران و پاکستان دونوں ممالک کے مرکزی بینکوں کے درمیان بینکنگ تعلقات استوار کرنے کے معاہدے پر بھی جلد دستخط ہوجائیں گے، جس سے دوطرفہ تجارت میں مزید اضافہ متوقع ہے۔‘وزیر تجارت خرم دستگیر خان کا رواں سال مارچ کے آخر میں مشترکہ اقتصادی کانفرنس کی سربراہی کے لیے تہران کا دورہ بھی متوقع ہے۔

ایمز ٹی وی(تعلیم کراچی )وفاقی اردو یونیورسٹی کی آفیسرز ویلفیئر ایسوسی ایشن کے انتخابات ہوئے جس کے مطابق صدر سید معز الدین واثق، سینئرنائب صدر محمد رفیق میمن،نائب صدر محمد تنویر الدین، جنرل سیکریٹری عطا محمد گورمانی، ڈپٹی جنرل سیکریٹری سید شبّر لئیق، جوائنٹ سیکریٹری جنید سعید، آفس سیکریٹری سجاد حسین، پریس سیکریٹری عامر شہزاد فاروقی، نائب پریس سیکریٹری آصف محمود رانا اور خزانچی محمد معروف نمایاں کامیابی حاصل کرکے کامیاب قرار پائے۔

آفیسرز ویلفیئرایسوسی ایشن کے صدرمعز الدین واثق اور تمام عہدیداران نے یقین دہانی کرائی کے ہم اپنی تمام کوششیں جامعہ کی ترقی اور تحفظ کیلئے استعمال کرینگے

ایمز ٹی وی (انٹرٹینمنٹ)آسکر ایوارڈ جیتنے والی بہترین فلم مون لائٹ میں کام پر بہترین معاون اداکار کا آسکر جیتنے والے مہرشالہ علی کے مذہب کے حوالے سے سوشل میڈیا پر بحث چھڑ گئی۔ مون لائٹ میں مہر شالہ علی نے ایک ہم جنس شخص کا کردار ادا کیا تھا۔ عالمی ذرائع ابلاغ میں مہرشالہ علی کو اداکاری کے شعبے میں آسکر جیتنے والا پہلا مسلمان قرار دیا گیا

جس کے بعد پاکستان کی اقوام متحدہ میں مستقل مندوب ملیحہ لودھی نے بھی اس بارے میں ٹویٹ کی جو کہ جلد ہی حذف کر دی گئی۔ ان کی جانب سے ٹویٹ حذف کیے جانے کی کوئی وجہ بیان نہیں کی گئی تاہم پاکستانی سوشل میڈیا پر اس کے بعد بات مہرشالہ علی کے جماعتِ احمدیہ سے تعلق کی ہونے لگی۔ واضح رہے کہ امریکہ میں ایک عیسائی گھرانے میں پیدا ہونے والے 43 سالہ مہرشالہ علی نے 2001 میں جماعت احمدیہ میں شمولیت اختیار کر لی تھی اور پاکستان کے آئین میں ایک ترمیم کے تحت سنہ 1974 میں احمدی جماعت سے تعلق رکھنے والوں کو غیر مسلم قرار دیا جا چکا ہے۔

ملیحہ لودھی کے ٹویٹ ہٹانے کے بعد سوشل میڈیا پر کافی ردعمل دیکھنے میں آیا اور بہت سے لوگوں نے اپنی ٹویٹس کے ذریعے انھیں تنقید کا نشانہ بنایا۔مصنفہ بینا شاہ نے اپنی ٹویٹ میں کہا کہ جو پاکستانی ایک مسلمان کے آسکر ایوارڈ جیتنے پر خوشی منانا چاہتا ہے وہ یاد رکھے کہ وہ شخص احمدی ہے۔ پاکستان کے سرکاری چینل پر چلنے والی خبر میں بھی مہر شالہ علی کو مسلمان قرار دیا گیا۔

انٹرنیٹ پر موجود انسائیکلوپیڈیا ویب سائٹ 'وکی پیڈیا' پر 27 فروری کو مہر شالہ علی کی نام کی انٹری میں سو سے زائد دفعہ تبدیلیاں کی گئی ہیں جن میں سے بیشتر ان کے مذہب کے بارے میں تھیں۔مہرشالہ علی کی جیت کی خبر عالمی میڈیا میں بھی کافی گردش میں رہی اور کئی نامور خبر رساں اداروں نے ان کے اعزاز کو سراہا۔