Reporter SS
ایمز ٹی وی (انٹرٹینمنٹ)بالی ووڈ کی کامیاب اداکارہ رانی مکھرجی اپنی بیٹی کی پیدائش کے بعد سے اسکرین سے غائب ہیں اور اب آخرکار انہوں نے فلمی دنیا میں واپسی کرنے کا فیصلہ کرلیا۔کئی کامیاب فلموں میں اپنی بہترین کارکردگی کا لوہا منوانے والی رانی مکھرجی بہت جلد فلم ’ہچکی‘ میں کام کرتی نظر آئیں گی۔
رانی مکھرجی 3 سال کے وقفے کے بعد دوبارہ فلموں میں کام کرتی نظر آئیں گی، ان کی آخری ریلیز فلم ’مردانی‘ 2014 میں نمائش کے لیے پیش کی گئی تھی۔اس حوالے سے اداکارہ کا کہنا تھا، ’میں ایک ایسے اسکرپٹ کا انتظار کررہی تھی جو مجھے متاثر کرسکے اور پھر 'ہچکی' کا اسکرپٹ مجھے ملا، ہم سب میں ہی کوئی ایسی کمزوری ہے جو ہمیں پیچھے کردیتی ہے، یہ کوئی معذوری بھی ہوسکتی ہے یا کوئی شرط، لیکن اگر ہم اسے صرف ایک ہچکی سمجھیں، تو ہم اس سے جیت سکتے ہیں‘۔
رانی مکھرجی کے علاوہ ہدایت کار سدھارتھ پی ملہوترا بھی اس فلم کے ساتھ واپسی کرنے جارہے ہیں، یہ ان کی ہدایات میں بننے والی دوسری فلم ہوگی، اس سے قبل انہوں نے ’وی آر فیملی‘ کی ہدایات دی تھیں۔ اس فلم کے حوالے سے ہدایت کار سدھارتھ کا کہنا تھا، ’میں رانی مکھرجی کے ساتھ کام کرنے کے لیے بہت پرجوش ہوں، میں ان کا بہت بڑا مداح ہوں اور اب ان کی فلم کی ہدایات دوں گا، رانی اس فلم کے لیے بہترین انتخاب ہیں، مجھے ایسا لگ رہا ہے جیسے میں اپنی پہلی فلم کی ہدایات دینے جارہا ہوں‘۔
فلم ’ہچکی‘ کی شوٹنگ کا آغاز جلد متوقع ہے۔خیال رہے کہ رانی مکھرجی اور ادتیہ چوپڑہ 21 اپریل 2014 کو رشتہ ازدواج میں منسلک ہوئے تھے، جس کے بعد سے انھوں نے کسی فلم میں کام نہیں کیا۔
ایمز ٹی وی (انٹرٹینمنٹ)حال ہی میں بالی ووڈ کے اداکار شاہ رخ خان کو ممبئی میں 'یش چوپڑا میموریل ایوارڈ' سے نوازا گیا۔ اس تقریب میں شتروگھن سنہا، سیمی گریوال، ریکھا اور یش چوپڑا کی بیوی پامیلا چوپڑا بھی شریک ہوئیں۔ اس موقع پر ریکھا نے ایک واقعے کا ذکر کرتے ہوئے بتایا کہ شاہ رخ خان نے انہیں ایک بار نیند سے زبردستی جگایا تھا۔
ریکھا نے کہا: 'ایک بار ہم ہوائی جہاز میں تھے اور میں سو رہی تھی کیونکہ میں تھکی ہوئی تھی۔ مجھے شاہ رخ نے اٹھایا اور کہا کہ میں ڈوبتا ہوا سورج دیکھوں۔ لیکن چونکہ میں اتنی تھکی ہوئی تھی کہ سورج کی جگہ میں نے دیکھا کہ کون مجھے جگا رہا ہے، اور وہ تھے شاہ رخ خان۔' ریکھا نے کہا کہ میں نے سورج نہیں شاہ رخ کو دیکھا اس بات پر شاہ رخ خان نے کہا کہ وہ انھیں سورج نہیں دکھا رہے تھے۔ '
وہ دراصل میں ان سے بات کرنے کے بہانے ڈھونڈ رہا تھا۔ یہ میری زندگی کا سب سے المناک دن ہے کیونکہ ریکھا جی نے مجھے راکھی باندھ دی ہے۔' اس موقع پر شاہ رخ نے یش چوپڑا کو یاد کرتے ہوئے کہا: 'میرا کریئر بنا ہے تو یش چوپڑا کی وجہ سے بنا ہے۔ انھوں نے کہا کہ اگر میں نے رومانٹک فلمیں نہیں کیں تو میرا کریئر ختم ہو جاتا۔ حالانکہ مجھے نہیں لگتا تھا کی میں رومانٹک ہوں اور میری شکل ہیرو جیسی ہے تاہم میں نے ان کی بات سنی اور مجھے کامیابی ملی۔'
تقریب میں شتروگھن سنہا نے کہا کہ شاہ رخ خان 'توانائی کنگ' ہیں اور ان کی کہانی 'زیرو ٹو ہیرو' ہے شاہ رخ نے کہا: 'مجھ سے میرے والد نے کہا تھا کہ اگر کشمیر کبھی جاؤ گے تو میرے ساتھ جاؤ گے۔ پھر وہ ہمارا ساتھ چھوڑ کر چلے گئے۔ برسوں تک میں کشمیر نہیں گیا۔ پھر فلم 'جب تک ہے جان' کے لیے میرے والد کی ہی طرح یش چوپڑا نے کہا کہ چلو کشمیر اور میں ان کے ساتھ گیا۔' اس تقریب میں شتروگھن سنہا نے کہا کہ شاہ رخ خان 'توانائی کنگ' ہیں اور ان کی کہانی 'زیرو ٹو ہیرو' ہے۔
ایمز ٹی وی (بزنس)پاکستان اسٹاک ایکسچینج میں سال 2017 کی پہلی لسٹنگ ہوگئی، روشن پیکیجز نے اپنے حصص کاروبار کے لئے پیش کردیئے۔پاکستانی معیشت جیسے جیسے ترقی کررہی ہے ، پیکنگ مصنوعات کی ضرورت بڑھ رہی ہے۔
روشن پیکیجز نے اپنی پیداواری صلاحیت بڑھا نے کا فیصلہ کیا ہے۔ اس مقصد کے لئے رقم پاکستان اسٹاک ایکسچینج میں کمپنی کے 30 فیصد حصص 86 روپے 25 پیسے میں فروخت کرکے حاصل کی گئی۔
کمپنی کے شیئرز میں کاروبار کا آغاز روشن پیکیجز کے سی ای او طیب قریشی نے اسٹاک ایکسچینج کی روایتی گھنٹہ بجا کر کیا۔
اس موقع پر پاکستان اسٹاک ایکسچینج کے ڈپٹی مینیجنگ ڈائریکٹر ہارون عسکری نے کہا ہے کہ مارکیٹ میں نئی کمپنی کی لسٹنگ خوش آئند ہے۔
انہوں نے امید ظاہر کی کہ یہ سلسلہ آئندہ بھی جاری رہے گا ۔حکومت پاکستان کی کوشش ہے کہ اسٹاک مارکیٹ میں نئی کمپنیز لسٹ ہوں کیونکہ یہ ملک کا فارمل سیکٹر ہے جو حکومت کی ٹیکس آمدنی کا بڑا ذریعہ ہے اور عوام کو سرمایہ کاری کا موقع بھی فراہم کرتا ہے۔
ایمز ٹی وی (انٹرٹینمنٹ)معروف ہدایتکار آنند ایل رائے کی فلم میں بالی ووڈ اسٹار شاہ رخ خان کے مدمقابل دپیکا پڈوکون اور کترینہ کیف کو کاسٹ کرلیا گیا ہے۔ہدایتکار آنند ایل رائے کی فلم میں شاہ رخ خان کے مدمقابل اداکارہ کی کاسٹ کے لیے کئی اداکارائوں کا نام لیا جارہا تھا جب کہ فلم میں کترینہ کیف کی جگہ دپیکا کو لینے کی خبریں زیر گردش تھیں لیکن اب فلم کے ہدایتکار نے حیران کن فیصلہ کرلیا ہے۔
بھارتی میڈیا رپورٹس کے مطابق فلم میں کنگ خان کے مدمقابل دپیکا پڈوکون اور کترینہ کیف کو کاسٹ کرلیا گیا ہے جس کے بعد دونوں اداکارائیں پہلی بار ایک ساتھ سلور اسکرین پر نظر آئیں گی جبکہ فلم کی شوٹنگ رواں جلد ہی شروع کی جائے گی۔
ایمز ٹی وی(راولپنڈی)انسداد دہشت گردی کی خصوصی عدالت نمبر ایک راولپنڈی میں جج کی عدم تعیناتی کے باعث بے نظیر قتل کیس سمیت تمام مقدمات کی سماعت گزشتہ روز بھی بغیر کسی کارروائی کے ملتوی کر دی گئی.
ڈیوٹی جج نے راولپنڈی کے تھانہ سٹی میں درج 9برس سے زائد پرانے بینظیر بھٹو قتل کیس کے علاوہ تھانہ ریس کورس میں درج پولیس مزاحمت کے مقدمہ میں ملوث ملزمان محمد اشرف وغیرہ، تھانہ سول لائن میں درج پرائیویٹ اسکول کے پرنسپل مفتی عمران کو فائرنگ کرکے موت کے گھاٹ اتارنے کے مقدمہ میں ملوث ملزمان محمد علی وغیرہ اور تھانہ رتہ امرال میں درج قتل، اقدام قتل کے مقدمہ میں ملوث ملزمان انس قیوم وغیرہ کے مقدمات کی سماعت بھی بغیر کسی کارروائی کے چھ مارچ اور تھانہ سی ٹی ڈی میں درج دھماکہ خیزمواد برآمد ہونے کے مقدمہ میں ملوث واحد، الیاس، رب نواز، عدنان اور الطاف کیسوں کی سماعت 13مارچ تک ملتوی کردی۔
ایمز ٹی وی( تعلیم / کراچی ) آج کے ذہین طلبا وطالبات کل کے سائنسدان، صنعتکار اور قوم کے رہنما ہونگے، طلبا و طالبات قوم کی امیدوں کا محور ہیں ان کی تعلیم اور تربیت کے بغیر کوئی قوم حقیقت میں ترقی نہیں کرسکتی ۔
اِن خیالات کا اظہار چیئرمین بلدیہ وسطی ریحان ہاشمی نے،گلوبل اکیڈمی کی سائنس اور آرٹس نمائش کا افتتاح کرنے کے بعد گفتگو کے دوران کیا۔
انہوں نے مزید کہا کہ نئی نسل کو جدید دور کے مطابق تعلیم اور تربیت سے آراستہ کرنے کا مطلب انہیں نئے دور اور ترقی یافتہ قوموں سے قدم ملاکرچلنے کے قابل بنانا ہے
ایمز ٹی وی (انٹرٹینمنٹ)مشہور ہندوستانی کامیڈین کپل شرما اپنے کامیڈی شو میں دوسروں کو مذاق کا نشانہ بنانے کے لیے تو مشہور ہیں ہی، لیکن وہ خود اپنا اور بالخصوص اپنی انگریزی کا مذاق اڑانے سے بھی نہیں کتراتے۔ حال ہی میں کپل نے کرن جوہر کے شو 'کافی وِد کرن' سیزن 5 میں شرکت کی، اس شو کے پرومو آج کل ٹی وی پر دکھائے جارہے ہیں، جن میں کپل، کرن سے کہتے نظر آتے ہیں کہ برائے مہربانی انگریزی کے بجائے ہندی زبان میں بات کریں کیونکہ ان کی انگلش ڈکشنری صرف 700 الفاظ تک محدود ہے۔
شو کے دوران کپل نے سماجی رابطے کی ویب سائٹ ٹوئٹر کے حوالے سے بھی بات کی اور کہا کہ لوگ ٹوئٹر پر کچھ بھی لکھ دیتے ہیں، جن میں وہ خود بھی شامل ہیں۔ گذشتہ برس ہندوستانی وزیراعظم نریندر مودی کو کرپشن کے حوالے سے کی گئی ٹوئیٹ کا جب ذکر چھڑا تو کرن نے کپل سے پوچھا کہ اُس رات ایسا کیا ہوا تھا کہ آپ نے وہ ٹوئیٹ کی؟ جس پر کپل نے کہا کہ 'وہ لوگوں کو نصیحت کرنا چاہتے ہیں کہ نشے میں ڈرائیونگ نہ کریں اور نشے میں ٹوئیٹ بھی نہ کریں'۔ یاد رہے کہ گذشتہ برس ستمبر میں کپل شرما نے نریندر مودی کے نام اپنی ایک ٹوئیٹ میں لکھا تھا کہ ’میں انکم ٹیکس کے نام پر گزشتہ 5 سالوں میں 15 کروڑ روپے ادا کرچکا ہوں اور اب بھی مجھے نیا دفتر بنانے کے لیے بی ایم سی (بریہن ممبئی میونسپل کارپوریشن) کو 5 لاکھ روپے رشوت دینی ہوگی‘۔
انہوں نے ایک اور ٹوئیٹ میں اپنے غصے کا اظہار کرتے ہوئے سوال کیا تھا ’نریندر مودی کیا یہ ہیں آپ کے اچھے دن؟‘'کافی کوئز' کے دوران کپل اُس وقت مشکل میں پھنس گئے جب کرن نے ان سے انگریزی فلموں کے ناموں کو ہندی میں ترجمہ کرنے کو کہا۔ ہولی وڈ فلم 'فالٹ اِن آور اسٹارز' (Fault In Our Stars) کا نام کپل نے کچھ یوں ترجمہ کیا، 'شاہ رخ خان کی غلطیاں' یہاں کپل نے شاہ رخ کا نام بالی ووڈ اسٹار کی حیثیت سے مزاحیہ انداز میں لیا۔ دلچسپ بات یہ ہے کہ کپل اپنی انگریزی کا سب سے زیادہ مذاق خود ہی اڑاتے ہیں، گذشتہ برس کپل نے ایک موبائل فون کے اشتہار میں کام کیا تھا، جس میں وہ اپنی قومی زبان کی اہمیت پر لیکچر دیتے نظر آئے تھے۔ کپل شرما نے اشتہار میں لوگوں کو اس حوالے سے 'درس' دیا تھا کہ ہمیں اپنی زبان سے پیار کرنا چاہیے اور اگر کسی کو انگریزی نہیں آتی تو اس میں شرمندگی کی کوئی بات نہیں۔ ساتھ ہی ان کا کہنا تھا کہ کچھ لوگوں نے یہ روش اختیار کرلی ہے کہ 'جو انگریزی جھاڑے گا، وہی جھنڈے گاڑے گا'۔