Reporter SS
ایمز ٹی وی (انٹرٹینمنٹ ڈیسک) 'قوالی کو جدتوں سے روشناس کروانے والے مقبول احمد صابری کو مداحوں سے بچھڑے 5 برس بیت گئے۔ 1945 کوبھارت کےعلاقے کلیانہ میں پید اہونے والے مقبول صابری نے 11 برس کی عمر میں پہلی قوالی پڑھی۔ انہوں نے ابتدائی تعلیم اپنے والد عنایت حسین صابری سے حاصل کی، جو موسیقی و گائیکی کے استاد شمار ہوتے تھے اور انہیں سننے کے لئے لوگ دور دور سے آتے تھے اور پھر اپنے بڑے بھائی غلام فرید صابری کے ساتھ قوالی کی شروعات کی اور صابری براردز کے نام سے شہرت حاصل کی۔
قوالی کو نئی جدتوں سے روشناس کروانے والے مقبول احمد صابری اپنا کوئی ثانی نہیں رکھتے تھے۔ ان کا فن آج بھی زندہ ہے اور کانوں میں رس گھولتا ہے۔ انہوں نے نا صرف پاکستان میں اپنے فن کا مظاہرہ کیا بلکہ دنیا کے اکثر ممالک میں اپنی آواز کا جادو جگایا۔ مقبول صابری قوالی کی صنف میں ایک استاد کا درجہ رکھتے تھے، 70 اور80 کے دہائی میں صابری برادرزکو قوالیوں کی وجہ سے بہت پذیزائی ملی اوریہ وہ دورتھا جب ان کی قوالیوں کے بے شمار البم ریلیزہوئے اوران کی ریکارڈ فروخت ہوئی تاہم آفتاب رسالت، میرا کوئی نہیں ہے، تاجدارحرم اور بھردو جھولی میری یا محمد” کا شمار ان کی مشہور قوالیوں میں ہوتا ہے.
ایمز ٹی وی (انٹرٹینمنٹ ڈیسک) ہولی وڈ اسٹار انجلینا جولی نے بریڈ پٹ سے طلاق لینے کے لیے مقدمہ دائر کرتے ہوئے ہوئے اپنے چھ بچوں کی تحویل کی خواہش کا اظہار کیا ہے۔ ٹی ایم زی ویب سائٹ کے مطابق 41 سالہ انجلینا جولی نے پیر کو قانونی دستاویزات جمع کراتے ہوئے بریڈ پٹ سے ایسے اختلافات کو وجہ بتایا ہے جن کا حل ہونا ممکن نہیں۔ انجلینا جولی کی جانب سے علیحدگی کی تاریخ 15 ستمبر درج کی گئی ہے۔
رپورٹ میں مزید بتایا گیا کہ انجلینا کی جانب سے مقدمہ دائر کرنے کا فیصلہ بچوں کی تحویل کے لیے کیا گیا۔ رپورٹ کے مطابق انجلینا جولی بریڈ پٹ کی جانب سے منشیات اور الکحل کے استعمال سے تنگ آچکی تھیں اور ان کا ماننا تھا کہ بریڈ پٹ کا مشتعل رویہ بچوں کے لیے خطرناک ثابت ہوسکتا ہے۔ اس ہولی وڈ جوڑے کی شادی 2014 میں ہوئی تھی تاہم یہ دونوں 2004 سے اکھٹے رہ رہے تھے۔
ایمز ٹی وی (بزنس) پاکستان اسٹیل مل چلے نہ چلے گاڑیاں چلتی رہنی چاہئے۔ ذرائع کے مطابق پاکستان اسٹیل مل میں 92 کنٹریکٹ ملازمین کو بھرتی کر لیا گیا ہے جس میں سے 80 افراد کو بطور ڈرائیور بھرتی کیا گیا ہے ۔
پاکستان اسٹیل ملز کا پیداواری عمل جولائی 2015 سے مکمل طور پر بند ہے جبکہ لگ بھگ 16 ہزار ملازمین کو 4 ماہ کی تنخواہیں بھی جاری نہیں کی گئی ۔ ایسی صورتحال میں 92 کنٹریکٹ ملازمین کی بھرتیاں حکومتی کارکردگی پر سوالیہ نشان ہے۔
مستقل ملازمین نے حکومت سے سوال کیا ہے کہ جب ہماری تنخواہیں جاری کرنے کے لئے حکومت کو فنڈز کی قلت کا سامنا ہوتا ہے تو پھر ادارہ ان 92 کنٹریکٹ ملازمین کو تنخواہیں کہاں سے جاری کرے گا۔ اس وقت پاکستان اسٹیل ملز کو ماہانہ 2 ارب روپے کے نقصان کا سامنا ہے جبکہ کہ ادارے کا مالی خسارہ 150 ارب روپے سے بھی تجاوز کر چکا ہے۔
ایمز ٹی وی (کھیل) پاکستان نے ٹوئنٹی 20 سیریز میں عالمی چیمپئن ویسٹ انڈیزکو خاک چٹانے کی تیاری مکمل کر لی،کوچ مکی آرتھر نے نوجوان ٹیلنٹ سے امیدیں باندھ لی ہیں۔
ان کے مطابق عماد وسیم، بابر اعظم، حسن علی اور محمد نواز جیسے کرکٹرز کا چیلنجز قبول کرنا خوش آئند ہے، شکست سے بے خوف کھلاڑی محدود اوورز کی کرکٹ میں پاکستان کو نئی پہچان دینے کیلیے پُرعزم نظر آتے ہیں،انھوں نے کہا کہ حریف ٹیم کی صلاحیتیں ڈھکی چھپی نہیں لیکن عالمی چیمپئن کا سامنا کرتے ہوئے کسی گھبراہٹ کا شکار نہیں،پلیئرز ڈٹ کر مقابلہ کرنے کیلیے تیار ہیں۔
دوسری جانب پاکستانی خطرے سے ورلڈ چیمپئنزکی بھی نیندیں حرام ہونے لگیں، ویسٹ انڈیز نے ٹوئنٹی20 سیریز سے قبل ہی گرین شرٹس کوانتہائی خطرناک قرار دے دیا، اسپنر سموئل بدری نے کہاکہ گرین شرٹس اپنے دن کسی بھی ٹیم کو خاک چٹانے کی صلاحیت رکھتے ہیں، پرفارمنس میں عدم تسلسل کے لحاظ سے یہ بھی ہماری طرح ہی ہیں، ان کے مطابق پلیئرزمیدان میں اترنے سے قبل ہی کنڈیشنز سے ہم آہنگ ہوجائیں گے۔ تفصیلات کے مطابق پاکستانی ٹیم کے ہیڈ کوچ مکی آرتھر نے امید ظاہرکی کہ نیا ٹیلنٹ شامل ہونے کے بعد پاکستان ٹیم جارحانہ انداز میں کرکٹ کھیلتے ہوئے فتوحات کی راہ پر گامزن ہو گی، انھوں نے کہا کہ انگلینڈ کے خلاف کارڈف میں ون ڈے میچ میں گرین شرٹس نے جدید کرکٹ کی ایک جھلک دکھائی۔
بعد ازاں واحد ٹوئنٹی20 میچ میں یہ انداز عروج پر نظر آیا، ٹور کے آخری دنوں میں مہمان ٹیم کا نیا روپ خوشی اور اطمینان کا باعث تھا،امید ہے کہ کامیابیوں کا یہ تسلسل یو اے ای میں بھی جاری رہے گا،آرتھر نے کہا کہ عماد وسیم، بابر اعظم، حسن علی اور محمد نواز جیسے کھلاڑی چیلنجزکو قبول کر رہے ہیں، ان کے کھیل میں شکست کا خوف نظر نہیں آتا، یہ کھلاڑی محدود اوورز کی کرکٹ میں پاکستان کو نئی پہچان دینے کیلیے پُرعزم نظر آتے ہیں جو مستقبل کیلیے ایک شاندار علامت ہے، انھوں نے کہا کہ ویسٹ انڈیز کی ٹوئنٹی 20فارمیٹ میں صلاحیتیں کسی سے ڈھکی چھپی نہیں ہیں، البتہ ہم مہمان ٹیم کے عالمی چیمپئن ہونے کا کوئی خوف محسوس نہیں کر رہے اور ڈٹ کر مقابلہ کریں گے۔
گذشتہ چند ماہ ہم محدود اوورز کی کرکٹ میں فرسودہ انداز سے جان چھڑانے کیلیے کوشاں تھے، اب بہتری کی طرف گامزن ہو چکے، یہ تسلسل ٹوٹنے نہیں دیں گے،انھوں نے کہا کہ یو اے ای کی کنڈیشنز ویسٹ انڈیز سے زیادہ مختلف نہیں، کیریبیئنز سخت مقابلہ کریں گے،ان کا شکار کرنے کیلیے پاکستانی اسکواڈ بھی مختلف ہتھیاروں سے لیس ہے لیکن یہ بات بھی ذہن میں رکھنا ہو گی کہ گرین شرٹس کسی موقع پر بھی سہل پسندی کا شکار نہیں ہو سکتے، ایک سوال پر کوچ نے کہا کہ پلیئرز دورئہ انگلینڈ اور اس کے بعد ڈومیسٹک کرکٹ میں بھی کھیلتے رہے ہیں اس لیے فارم حاصل کرنے میں کوئی مشکلات پیش نہیں آئیں گی۔ یاد رہے کہ پاکستان نے ویسٹ انڈیز کے خلاف 4 میں سے2 ٹی ٹوئنٹی میچز میں فتح پائی ہے۔
دوسری جانب کیریبیئن ٹیم ورلڈ چیمپئن ہونے کے باوجود گرین شرٹس سے خوفزدہ دکھائی دیتی ہے، یہ اس سائیڈ سے قدرے مختلف ہے جس نے رواں برس کے شروع میںبھارت میں ورلڈ ٹوئنٹی 20 ٹائٹل جیتا تھا، قیادت بھی ڈیرن سیمی کے بجائے کارلوس بریتھ ویٹ کے ہاتھوں میں ہے۔ میڈیا سے بات چیت میں سموئل بدری نے کہا کہ میگا ایونٹ کے بعد ٹیم میں بہت سے نئے کھلاڑی آئے اور کچھ تو اس ٹور میں ہی ڈیبیو کریں گے، موسم بھی کافی مختلف ہے مگر چونکہ ہم یہاں پر پہلے آگئے اس لیے کنڈیشنز سے ہم آہنگ ہونے میں مدد مل رہی ہے، تمام کھلاڑی میدان سنبھالنے کیلیے100 فیصد تیار ہیں۔ انھوں نے کہاکہ میں اس سے قبل اسلام آباد یونائیٹڈ کی جانب سے یہاں پی ایس ایل کھیل چکا ہوں، اس میں ہماری ٹیم فاتح رہی تھی، مجھے یو اے ای میںکھیلنے کا تجربہ ہے، پچز بھی ٹی 20 کرکٹ کیلیے اچھی ہیں۔
پاکستانی کھلاڑیوں کے حوالے سے انھوں نے کہاکہ مستقل مزاجی نہ ہونے کے اعتبارسے حریف پلیئرز ہمارے جیسے ہی ہیں، ایک دن وہ اچھی کارکردگی پیش کرتے اور اگلے روز ہماری طرح ہمت ہارجاتے ہیں لیکن اپنے مخصوص دن گرین شرٹس کسی بھی ٹیم کو روند سکتے ہیں، ہمیں بھی ان کے چیلنج سے خبردار رہنا ہوگا، ہم اپنے پلان پر بہترین انداز میں عملدرآمد کی کوشش کریں گے کیونکہ سب جانتے ہیں کہ پاکستان انتہائی خطرناک سائیڈ ہے۔
سموئل بدری اس وقت ٹوئنٹی 20 رینکنگ میں ٹاپ پر موجود ہیں، انھوں نے کہاکہ میں بدستور مختصر ترین فارمیٹ کا نمبر ون بولر رہنا اور تسلسل کے ساتھ پرفارم کرنا چاہتا ہوں۔
ایمز ٹی وی (کھیل) پاکستان میں سیاحت کے فروغ کے لیے اسلام آباد سے شروع ہونے والی ونٹیج کلاسک کار ریلی ہنزہ پہنچ گئی۔ رات قیام کے بعد کار ریلی صبح سویرے خنجراب کے لیے روانہ ہوگی۔
اسلام آباد سےشروع ہونےوالی ونٹیج اینڈ کلاسک کار ریلی ناران اور گلگت سے ہوتی ہوئی ہنزہ پہنچ گئی ہے، منتظمین کا کہنا ہے کہ اس کاوش کا مقصد پاکستان کے سوفٹ امیج کو دنیا بھر میں اجاگر کرنا ہے۔
14 ونٹیج کلاسک گاڑیوں پر مشتمل ریلی میں غیرملکی سیاح بھی حصہ لے رہے ہیں۔ شرکاء رات ہنزہ میں گذار کر صبح پاک چین سرحد پر واقع خنجراب کے لیے روانہ ہوں گے۔
ریلی کے شرکا کی حفاظت کےلیے ریپیڈ رسپانس فورس اور ایلیٹ فورس کے جوان مامور ہیں۔
ایمزٹی وی( کوئٹہ) ملک بھر کی طرح کوئٹہ سمیت بلوچستان بھر میں بھی الیکشن کمیشن بلوچستان نے انتخابی فہرستوں پر نظر ثانی کے حوالے سے دوسرا مر حلہ شروع کر دیا گیا، چیف الیکشن کمیشنر بلوچستان بایزید نے میڈیا سے گفتگو کرتے ہوئے بتایاکہ ملک بھر کی طرح بلوچستان میں انتخابی فہرستوں پر نظر ثانی کے حوالے سے دوسرا مرحلہ شروع کر دیا گیاہے۔
تفصیلات کے مطابق مرحلہ 20ستمبر سے 10اکتوبر تک جاری رہے گا صوبہ بھر میں 1500 کے قریب ڈسپلے سینٹرز قائم ہیں ،جہاں فوت شدہ اور اندراج والے ووٹرز کی فہرستیں آویزاں کر دی گئی ہیں
ایمز ٹی وی (کھیل) کرکٹر محمد عامر نے زندگی کی نئی اننگز کا آغاز کردیا، وہ اپنی دلہن کو لے کر شادی ہال سے گھر پہنچ گئے۔
سہرے کے پھول کھل گئے، دلہا میاں کرکٹر محمد عامر سجی سجائی گاڑی میں سجی سجائی دلہنیا کو اپنے گھر بیاہ کر لے آئے۔
سنہری شیروانی، میرون کلے والے عامر، میرون جوڑا پہنی نرجس کے ساتھ زندگی بتائیں گے، خوشیوں کے گیت گائیں گے۔
ا س سے قبل کرکٹر محمد عامر دھوم دھام سے اپنی دلہنیا لے کر گھر پہنچ گئے، دلہا میاں بینڈ باجوں کی گونج میں بارت لے کر نکلے، کرکٹر محمد عامر کی زندگی کی نئی اننگز کا دھوم دھام سے آغازہوا ہے، شادی کے لیے بیوٹیشن گھر ہی بلالیا، پھر پہنی گولڈن شیروانی اور سر پہ سجایاپنجاب کا روایتی کُلا۔
محمد عامراپنے دوست احباب اوررشتہ داروں کے ہمراہ بارات لے کر گھر سے نکل۔ نیلے رنگ کی گاڑی کو رنگا رنگ پھولوں سے سجایا گیا، ڈھول کی تھاپ اور شہنائیوں کی روایتی گونج میں دلہا میاں باراتیوں کے جھرمٹ میں شادی ہال پہنچے جہاں ان کا پرتپاک استقبال کیا گیا۔
ہال میں داخل ہونے سے پہلے دولہے میاں کا راستہ روکنے کی رسم ہوئی جس میں دلہن کی سکھیوں اور کزنز نے خوب ہلہ گلہ کیا، دلہن نرجس سرخ جوڑے میں اسٹیج پر پہنچیں تو محمد عامر نے انہیں ریسیو کیا، جہیز دکھائی اور دودھ پلائی کی رسم نے بھی تقریب کی رنگینی بڑھا دی۔ آج لاہور میں محمد عامر کی دعوت ولیمہ ہے، تقریب میں نئے دولہا دلہن چار چاند لگائیں گے۔
ایمز ٹی وی (کھیل) ٹیسٹ کرکٹ کی نمبر ون ٹیم ، ٹیم پاکستان کو آئی سی سی کی جانب سے ٹرافی دینے کی تقریب آج لاہور کے قذافی اسٹیڈیم میں ہوئی۔
سات سال سے ہوم گراؤنڈ پر ٹیسٹ کھیلنے سے محروم ٹیم پاکستان کو ہوم گراؤنڈ پر نمبرون ہونے کی ٹرافی دی گئی۔
مصباح کی قیادت میں گرین شرٹس نے آسٹریلیا کو مارا، انگلینڈ کا پچھاڑا ،سری لنکا اور بنگلا دیش کو ہرایا۔ٹیم پاکستان نے بھارت سمیت ہر ٹیم کو پیچھے دھکیلا اور دنیا کی بہترین ٹیم کا تاج اپنے سر سجالیا۔
اس وقت آئی سی سی ٹیسٹ رینکنگ میں پاکستان ایک سو گیارہ پوائنٹس کے ساتھ سب سے اوپر ہے۔
انٹرنیشنل کرکٹ کونسل کے چیف ایگزیکٹو ڈیوڈ رچرڈسن نے آج قذافی اسٹیڈیم لاہور میں ہونے والی پُروقار تقریب یں گُرز نما ٹرافی پاکستان کے کامیاب ترین کپتان کو پیش کی
ایمزٹی وی(نیوز ڈیسک)وکی لیکس نے مقبوضہ کشمیر میں بھارتی مظالم کا پول کھولتے ہوئے بتایا ہے کہ بھارت منظم طریقے سے کشمیری عوام پر مظالم ڈھا رہا ہے اور امریکی حکام تمام صورتحال سے بخوبی واقف ہے۔
دنیا میں چھپے ہوئے راز افشا کرنے والے آسٹریلین شہری جولین اسانج کی مشہور ویب سائٹ وکی لیکس نے بھارتی مظالم کو دنیا کے سامنے پیش کردیا ہے۔
وکی لیکس میں بتایا گیا ہے کہ بھارت مقبوضہ کشمیر میں ایک منظم طریقے سے مظالم ڈھا رہا ہے جس میں بے گناہ و نہتے کشمیری عوام کو تشدد کا نشانہ بنایا جاتا ہے جب کہ امریکا اس تمام صورتحال سے بخوبی واقف ہے اور اس کے پاس بھارتی فوج اور پولیس کے شہریوں پر تشدد کے ٹھوس شواہد بھی موجود ہیں۔
وکی لیکس میں انکشاف کیا گیا ہے کہ عالمی سطح پر امداد کے حوالے سے مشہور تنظیم ریڈ کراس کے نمائندوں نے 2005 میں بھارت کی جانب سے ہونے والے مظالم کے حوالے سے امریکی سفارتکاروں کو تفصیلی بریفنگ دی تھی جس میں بتایا گیا تھا کہ 10 سال قبل تک مقبوضہ کشمیر میں بھارتی فوج کے 300 حراستی مراکز تھے اور ان حراستی مراکز میں شہریوں کو بجلی کے جھٹکے دیئے جاتے تھے جب کہ زیرحراست کشمیریوں کو جنسی تشدد کا نشانہ بھی بنایاگیا۔ بھارتی فوج کےمظالم،انسانی حقوق کی خلاف ورزی پرامریکی سفارتکاروں کوتشویش تھی۔
واضح رہے کہ گزشتہ دو ماہ سے مقبوضہ کشمیر میں بھارت کے مظالم میں تیزی آئی ہے اور قابض بھارتی فوج کی جانب سے چھروں والی گن کے استعمال سے اب تک متعدد کشمیری نابینا اور کئی شہید ہوچکے ہیں۔
ایمزٹی وی(راولپنڈی) انڈونیشیا کے چیف آف ڈیفنس فورسز نے چیئرمین جوائنٹ چیفس آف اسٹاف کمیٹی جنرل راشد محمود سے ملاقات کی جس دوران باہمی دلچسپی کے امور پر تبادلہ خیال کیا گیا۔
پاک فوج کے تعلقات عامہ کے ادارے (آئی ایس پی آر) سے جاری ہونے والے بیان میں بتایاگیا ہے کہ چیئرمین جوائنٹ چیفس آف سٹاف کمیٹی جنرل راشد محمود اور ملائیشین افواج کے سربراہ کی ملاقات کے دوران باہمی دلچسپی کے امور اور جیو اسٹریٹجک صورتحال پر تبادلہ خیال کیا گیا جبکہ سیکیورٹی فورسز کے درمیان تعاون بڑھانے پر بھی غور ہوا۔ افواج کے سربراہ نے دہشت گردی کے خلاف جنگ میں پاک فوج کی قربانیوں کو سراہا ۔