کراچی : آل سندھ پرائیویٹ اسکولز اینڈ کالجز ایسوسی ایشن کے چیئرمین حیدر علی اور مرکزی رہنماؤں محمد یونس شہاب اقبال، ، محمد اسلم، ڈ اکٹر نجیب میمن ،مرتضیٰ شاہ، دوست محمد دانش اعجاز علی، محمد سلیم، محمد ساجد، مسعود شاہ، شکیل سومرو، اختیار مارکھانی، توصیف شاہ، مرزا اشفاق بیگ اور منیر عباسی نے وفاقی حکومت سے مطالبہ کیا ہے کہ ملک بھر کے تمام تعلیمی ادارے 15 ستمبر سے لازمی طور پر کھولے جائیں، 7 ستمبر کی بین الصوبائی وزرا کانفرنس میں دو ٹوک اور واضح پالیسی کا اعلان اور اسکول کھولنے کا نوٹیفکیشن جاری کیا جائے

رہنماؤں کا مشترکہ بیان میں کہنا تھا کہسے تعلیمی اداروں کی گزشتہ سات ماہ طویل بندش نے اسکولوں سے جامعات تک تعلیم، تعلیمی اداروں، طلبہ اور ان سے منسلک افراد کو نا قابل تلافی نقصان پہنچایا ہے ، بہتر صورتحال اور عالمی اداروں کی حوصلہ افزا رپورٹس کی روشنی میں اب تعلیمی ادارے کھولے جانے کی پالیسی کا فوری اعلان کیا جائے کیونکہ یہ معاملہ اب تعلیم کے ساتھ اداروں کی بقا کا مسئلہ بھی بن چکا ہے ۔

رہنماؤں نے کہا کہ اگر اب بھی مبہم اور غیر واضح پالیسی جاری رکھنے کی کوشش کی گئی تو بھرپور احتجاجی تحریک چلائی جائے گی۔رہنماؤں نے مطالبہ کیا کہ تعلیمی اداروں کو تمام ٹیکسز میں تین سال تک کیلئے چھوٹ دی جائے ، بلا سود قرضے دیئے جائیں اور کم از کم دو سال کیلئے رجسٹریشن اور بورڈ سے الحاق کی فیس معاف کی جائے ، اساتذہ، والدین اور طلبہ کے لئے احتیاطی تدابیر سے متعلق تحریری مواد کتابچے کی صورت میں فوری تیار اور تقسیم کیا جائے ۔

اسلام آباد: فیس بک نے پاکستان میں غلط معلومات کے پھیلاؤ کی روک تھام اور فیس بک استعمال کرنے والے صارفین کو اضافی پس منظر کے ہمراہ ایک سال سے زائد پرانی تصاویر شیئر کرنے والی ممکنہ نقصان دہ اور گمراہ کن معلومات پر مبنی پوسٹس کو محدود کرنے کے لئے نئی سہولت متعارف کرنے کا اعلان کیا ہے۔

دنیا بھر میں انٹرنیٹ تک رسائی بڑھنے کے ساتھ ساتھ تصاویر اور ویڈیوزکی شکل میں غلط معلومات پھیلنے کا خطرہ بڑھتا جارہا ہے اور اس کے حل کے لیے فیس بک پر کافی دباؤ بھی ہے۔ایسی تصاویر جن کا غیرمتعلقہ پس منظر ہے، وہاں فیس بک کی نئی سہولت غلط معلومات کو روکنے کے لیے تین جہتی طریقے ہٹانے، محدود کرنے، آگہی پر کاربند ہے۔

فیس بک کے ترجمان کا کہنا ہے کہ "ہم لوگوں کو گمراہ کن مواد کی پہچان کے لیے بااختیار بنا رہے ہیں۔"

اس نئی سہولت کے تحت پاکستان میں صارفین کو اس وقت ایک پیغام ظاہر ہوگا،جب وہ مخصوص اقسام کی تصاویر بشمول ایک سال پرانے فوٹوز شیئر کرنے کی کوشش کریں گے اور جو فیس بک کی پرتشدد مواد سے متعلق گائیڈ لائنز کی خلاف ورزی سے قریب ہوں گی۔

صارفین کو وقتاً فوقتاً انتباہی پیغام بھی ملیں گے کہ جو تصویر وہ شیئر کرنے والے ہیں وہ نقصان دہ یا گمراہ کن مواد پر مبنی ہے جس کی نشاندہی مصنوعی ذہانت اور انسانی جائزوں کے امتزاج سے کی جائے گی۔

ویب ڈیسک: کورونا کی وجہ سے کئی ماہ سے بنداسکولز چین، روس، برطانیہ، فرانس اور دیگر یورپی ممالک میں کھول دیے گئے۔

بچوں نے کئی ماہ بعد اسکول میں پہلا دن ماسک لگانے، ہاتھ دھونے اور فاصلے سے بیٹھنے کی لازمی ہدایات کے ساتھ گزارا، امریکی شہر نیویارک میں اسکول 21 ستمبر سے کھولنے کا فیصلہ کیا گیا ہے جبکہ پاکستان میں 7 ستمبر کو ہونے والے اجلاس میں اس حوالے سے فیصلہ کیا جائے گا۔

کورونا وائرس کا مرکز سمجھے جانے والے چین کے شہر ووہان میں بھی اسکولوں سمیت تمام تعلیمی ادارے کھل گئے۔گزشتہ سال دسمبر میں ووہان میں کورونا وائرس کے کیسز سامنے آنے کے بعد سخت لاک ڈاؤن کیا گیا تھا تاہم اپریل میں کیسز میں کمی کے باعث لاک ڈاؤن میں نرمی کردی گئی تھی۔ووہان میں تمام کورونا مریضوں کی صحت یابی کے بعد زندگی معمول پر آنا شروع ہوگئی تھی اور کئی تقریبات بھی منعقد کی گئیں تھیں تاہم اب شہر کے تمام اسکول و دیگر تعلیمی ادارے بھی کھول دیے گئے ہیں۔

غیرملکی خبررساں ادارے کے مطابق ووہان یونیورسٹی کو طالب علموں کے لیے پیر کو کھولا گیا تھا جس کے بعد آج شہر میں تمام 2842 نرسری، پرائمری اور سیکنڈری اسکولز کھول دیے گئے ہیں جہاں 10 لاکھ سے زائد طلبہ زیر تعلیم ہیں۔اسکول آنے والے طلبہ کا درجہ حرارت چیک کیا گیا اور ماسک پہننا لازمی قرار دیا گیا جب کہ سینیٹائزر، ماسک اور دیگر جراثیم کش اشیاء ہر کلاس میں موجود ہوں گی۔ اس کے علاوہ کلاسوں میں بھی روز جراثیم کش اسپرے کیا جائے گا۔طلبہ کو پبلک بس اور ٹرین سے سفر نہ کرنے کی ہدایات جاری کی گئی ہیں۔

واضح رہے کہ پاکستان میں رواں سال مارچ سے تعلیمی ادارے بند ہیں جب کہ حکومت کی جانب سے 15 ستمبر سے تعلیمی ادارے کھولنے کا اعلان کیا گیا ہے لیکن حتمی فیصلہ 7 ستمبر کو ہونے والے اجلاس میں کیا جائے گا۔

لاہور: پنجاب حکومت نے نویں اور دسویں جماعت کے امتحانات کا 6ماہ کے لئے مختصر نصاب جاری کردیا۔ اعلان کردہ شیڈول کے مطابق15 ستمبر سے تعلیمی سال کا آغاز کرنے کی تیاریاں شروع کردی گئی ہیں

جس کے مطابق نویں او ردسویں جماعت کے گیارہ مضامین کے مختصر باب اور صفحات نمبرز جاری کئے گئے ہیں جن کو مزید چھ ماہ پڑھانے کے بعدانہی میں سے امتحانات لئے جائیں گے۔ 11 کتابوں میں اردو، انگریزی، حساب (سائنس و آرٹس) ،اسلامیات، مطالعہ پاکستان، فزکس، کیمسٹری، بیالوجی، کمپیوٹر سائنسز اور جنرل سائنس شامل ہیں۔

ہوم ورک اور اسکول ورک کو علیحدہ سے جاری کیا گیا ۔نویں جماعت کی انگریزی کی پاکستان اسٹڈی متنازعہ ہونے کی وجہ سے شائع نہیں ہوسکی اوراس کے صفحات کو بھی نصاب کا حصہ بنایاگیاہےجس سے طلبہ اور اساتذہ میں تشویش ہے کہ تیاری کس کتاب سے ہو گی۔

دوسری جانب پنجاب ٹیچرز یونین کے جنرل سیکرٹری رانا لیاقت نے کہا محکمہ تعلیم بچوں کا نقصان نہ کرے کیونکہ ہمارے ٹیچرز کے اندر یہ صلاحیت موجود ہے کہ وہ ایک سال کا نصاب ان چھ ماہ کے اندر ختم کروا سکتے ہیں اس طرح نویں جماعت کا مختصر نصاب پڑھنے والے طالب علم کو دسویں جماعت اور دسویں جماعت کے طالب علم کو گیارہویں جماعت کانصاب پڑھنے میں مشکلات کا سامنا کرنا پڑیگا۔

شہرہ آفاق افریقی نژاد امریکی گلوکار ایکن نے سائنس فکشن طرز کا نیا سیاحتی شہر تعمیر کرنے کا اعلان کیا ہے۔

غیر ملکی خبر رساں ادارے کے مطابق 31 اگست کو ایکن نےاپنے آبائی ملک سینیگال کے ایک مقام کا دورہ کرنے کے بعد وہاں سائنس فکشن طرز کا نیا سیاحتی ’ایکن سٹی‘ تعمیر کرنے کا اعلان کیا۔

گلوکار ایکن کا کہنا تھا کہ ابتدائی طور پر نئے سیاحتی شہر کی تعمیر میں 6 ارب امریکی ڈالر یعنی پاکستانی تقریباً 10 کھرب روپے لاگت آئے گی۔
انہوں نے بتایا کہ نئے شہر کی تعمیر کا آغاز آئندہ سال کے اوائل میں ہوگا جب کہ ایکن کے اس نئے شہر کو ہالی وڈ فلم ’بلیک پینتھر‘ میں دکھائے گئے سائنس فکشن افریقی مقامات کی طرح بنایا جائے گا۔

افریقی نژاد امریکی گلوکار ایکن نے بتایا کہ وہاں کی علیحدہ کرپٹو کرنسی ’ایکوائن‘ بھی ہو گی جب کہ ’ایکون سٹی‘ میں علیحدہ اسپتال، پولیس اسٹیشن، علیحدہ تعلیمی نظام اور کئی سیاحتی پوائنٹس بھی ہوں گے۔

دوسری جانب ’ایکن سٹی‘ میں ایک ایسا ہوٹل تعمیر کیا جائے گا جس میں براعظم افریقا کے 54 ممالک کی ثقافت کو پیش کیا جائے گا، یعنی اس ہوٹل کے کمروں کو تمام افریقی ممالک کی ثقافتی طرز پر سجایا اور تعمیر کیا جائے گا۔

مانیٹرنگ ڈیسک : چینی ٹیکنالوجی کمپنی ہواوے نے اپنےصارفین کے لئے ’ہواوے واچ فٹ‘ پیش کرادی۔
غیر ملکی خبر رساں ادارے کے مطابق ہواوے کی جانب سے پیش کی جانے والی ’ہواوے واچ فٹ‘ میں دیر پا بیٹری لائف، بڑی اسکرین، اور بے شمار خصوصیات شامل ہیں۔
اسمارٹ واچ کی گوریلا گلاس کے ساتھ '1.64 AMOLED (اے ایم او ایل ای ڈی) اسکرین ہے جب کہ واچ تین مختلف رنگوں میں دستیاب ہوگی اور اس کے سیلیکون اسٹریپ کو باآسانی تبدیل کیا جا سکتا ہے۔

کمپنی کا دعویٰ ہے اگر بات کی جائے اسمارٹ فون کی بیٹری کی تو واچ ایک مرتبہ چارج کرنے کے بعد عام استعمال کرنے پر 10 دن جب کہ زیادہ استعمال کرنے پر 7 دن تک بیک اپ دیتی ہے،اس کے علاوہ مسلسل جی پی ایس کھلا رکھنے سے واچ کی بیٹری 12 گھنٹے تک چلتی ہے۔

کپمنی کے مطابق نے ’ہواوے واچ فٹ‘ 3 ستمبر سے فروخت کے لیے پیش کی جائے گی تاہم واچ کی قیمت بھی اس ہی وقت بتائی جائے گی۔

واضح رہے چینی ٹیکنالوجی کمپنی ہواوے اسمارٹ فونز بنانے کے ساتھ ساتھ جدید طرز کی اسمارٹ واچز بنانے میں بھی مشہور ہے اور حال ہی میں کمپنی نے ’ہواوے واچ فٹ‘ پیش کی ہے۔