ایمزٹی وی(اسلام آباد) قومی اسمبلی کے اسپیکر ایاز صادق کی سربراہی میں قومی اسمبلی کا اجلاس جاری ہے جس میں اپوزیشن کی جانب سے نااہل شخص کے سیاسی جماعت كے سربراہ بننے پر پابندی کا بل پیش كیا جائے گا۔ پاكستان پیپلزپارٹی كے رہنما سید نوید قمر الیکشن ایکٹ 2017 کے آرٹیکل 203 میں ترمیم کا بل منظوری كے لئے قومی اسمبلی میں پیش كریں گے۔ یہ بل ایوان بالا سینیٹ میں كثرت رائے سے پہلے ہی منظور ہوچکا ہے۔ اس بل کو ناکام بنانے کی حکمت عملی طے کرنے کے لیے مسلم لیگ (ن) کی پارلیمانی پارٹی کا اجلاس ہوا جس میں 167 ارکان قومی اسمبلی نے شرکت کی۔ اجلاس میں سابق وزیر داخلہ چوہدری نثار بھی شریک ہوئے جن کے پہنچنے پر ارکان نے ڈیسک بجا کر ان کا استقبال کیا۔ وزیراعظم شاہد خاقان عباسی نے حکمراں جماعت کے ارکان قومی اسمبلی کو ہدایت کی ہے کہ آج اپوزیشن کا بل کسی صورت پاس نہ ہونے دیں

۔ دوسری جانب قائد حزب اختلاف سید خورشید شاہ کی زیر صدارت پیپلزپارٹی كی پارلیمانی پارٹی كا اجلاس ہوا جس میں بل كی منظوری كی حكمت عملی طے کرلی گئی۔ واضح رہے کہ مسلم لیگ (ن) کو قومی اسمبلی میں عددی اکثریت حاصل ہے اور وہ اپنے تمام ارکان کے حاضر ہونے کی صورت میں باآسانی بل کو ناکام بناسکتی ہے۔ دوسری جانب پیپلز پارٹی کے اس بل پر پی ٹی آئی سمیت تمام اپوزیشن جماعتوں کا اتفاق رائے ہے جو سینیٹ کی طرح قومی اسمبلی میں بھی بل کو کامیاب بنانے کی پوری کوشش کریں گی۔

ایمزٹی وی(تعلیم/ساہیوال)کامسیٹس انسٹیٹیوٹ آف انفارمیشن ٹیکنالوجی کا 112 واں کانووکیشن ساہیوال کیمپس میں منعقد ہوا۔ تقریب میں 369 طلبہ و طالبات نے مختلف شعبہ جات میں ڈگریاں حاصل کیں ۔میڈلز حاصل کرنے والے طلبہ و طالبات میں سجیلہ غلام نبی، عمارہ تبسم، وجیہہ رحمان، مریم اشفاق، شفیق احمد، خالد مقصود خٹک، محمد عمر، محمد عمر دراز، سیدہ طاہرہ ، رانا ولید منظور، عرفاہ حسین، اذکا یوسف، عائشہ امجد، حنا ذوالفقار، کومل اعجاز، مریم اختر، حمزہ بابر، افتخار امجد، سمیرا مغل شامل ہیں۔

ایمز ٹی وی (اسپورٹس) مشہور باکسر محمد وسیم نے مالی مشکلات کے باعث پاکستانی شہریت چھوڑنے پر غور کردیا۔ کراچی میں ویڈیو پیغام جاری کرتے ہوئے محمد وسیم نے کہا کہ میں مالی مشکلات کا شکار ہوں، اپنے ملک پاکستان کے لیے کھیلنا چاہتا ہوں، تاہم مالی مشکلات کی وجہ سے شہریت ترک کرنے پر غور کررہا ہوں اور کوریا یا امریکا کی شہریت کے لیے درخواست دے سکتا ہوں۔ محمد وسیم نے کہا کہ اسپانسر نہ ہونے کے باعث بہت مسائل کا شکار ہوں، عالمی ٹائٹل کے لیے جلد ایک انٹرنیشنل فائٹ میں حصہ لوں گا جو شاید پاکستان کےلیے میری آخری فائٹ ہو۔ باکسر محمد وسیم کا کہنا تھا کہ وہ پاکستان کی شہریت ترک کرنا اور ملک کی نمائندگی کو چھوڑنا نہیں چاہتے لیکن مالی مشکلات کی وجہ سے مجبور ہیں۔ واضح رہے کہ محمد وسیم نے 8 پروفیشنلز فائٹ کھیلی ہیں اور سب مقابلوں میں کامیابی حاصل کی ہے۔ اب محمد وسیم ڈبلیو بی سی فلائی ویٹ کی ورلڈ رینکنگ میں نمبر ون پوزیشن برقرار رکھنے کے لیے امریکا روانہ ہورہے ہیں جہاں وہ کولمبیا کے باکسرز سے مقابلہ کریں گے۔

ایمزٹی وی(تعلیم/کراچی)ورچوئل یونیورسٹی کے زیرِاہتمام چوتھی انٹرنیشنل فاصلاتی نظام تعلیم کانفرنس کا باقاعدہ آغازایم اے جناح کیمپس میں ہوگیا۔کانفرنس میں 30سے زائد تحقیقی مقالات پیش کیے جارہے ہیں۔ ورچوئل یونیورسٹی کے ریکٹر ڈاکٹر نوید اے ملک نے کانفرنس کی افتتاحی تقریب سے خورطاب کرتے ہوئے تمام شرکا کوخوش آمدید کہا۔ایچ ای سی کے ایگزیکٹو ڈائریکٹر ڈاکٹر ارشد علی مہمانِ خصوصی تھے ۔پہلے روز تین تکنیکی سیشن منعقد کئے گئے۔