ایمز ٹی وی (کراچی) 2 لاکھ ٹن کچرے کا بیک لاگ ختم کرنابحریہ ٹاؤن اوربلدیہ وسطی کا کارنامہ ہے حکومت کے ساتھ شہری بھی ذمہ داریاں پوری کریں،وسیم اختر کاخطاب میئرکراچی وسیم اختر نے کہا ہے کہ کراچی کو کچرے سے نجات دلانا اولین ترجیح ہے ،

ضلع وسطی سے کچرا اٹھانے کے بعد اب ضلع کورنگی سے کچرا اٹھانے کا آغاز کریں گے جہاں گزشتہ آٹھ برس سے لاکھوں ٹن کچرا جمع ہے ۔ سرکاری و نجی شعبے سے جو بھی تعاون کا ہاتھ بڑھائے گا اسے خوش آمدید کہیں گے حکومت کے ساتھ ساتھ شہری بھی اس حوالے سے اپنی ذمہ داریاں پوری کریں، ہم سب مل کر اپنے شہر کوصاف ستھرا اورسرسبز بنائیں گے ، یہ بات انہوں نے بحریہ ٹاؤن کے تعاون سے بلدیہ وسطی میں جاری صفائی مہم کے اختتام پر بلدیہ وسطی کی جانب سے منعقدہ تقریب اظہار تشکر سے بحیثیت مہمان خصوصی خطاب کرتے ہوئے کہی،

اس موقع پر چیئرمین بلدیہ وسطی ریحان ہاشمی، وائس چیئرمین شاکر علی، جنرل منیجر بحریہ ٹاؤن ذوالفقار میمن، کموڈور ریٹائرڈ نعیم اور دیگر افسران بھی موجود تھے ۔ میئر کراچی نے کچرے کی صفائی پر ضلع وسطی کے مکینوں کو مبارکباد دیتے ہوئے کہا کہ ڈیڑھ مہینے کی قلیل مدت میں بلدیہ وسطی کی حدود سے 2 لاکھ ٹن کچرے کا بیک لاگ ختم کرنابحریہ ٹاؤن اوربلدیہ وسطی کا بڑا کارنامہ ہے ، اس میں کوئی شک نہیں کہ ملک ریاض اور بحریہ ٹاؤن ہمیشہ پاکستان کی ترقی کے لئے تگ و دو کرتے ہیں اور اس کارخیر کی ذمہ داری اٹھانا بھی اس بات کا ثبوت ہے ۔ بحریہ ٹاؤن کے کموڈور(ر) نعیم نے حاضرین سے خطاب کرتے ہوئے کہا کہ بحریہ ٹاؤن کے روح رواں ملک ریاض نے جو ہدایت کی اْس پر خلوصِ نیت سے بلدیہ وسطی کے چیئرمین کی خواہش کے مطابق عمل کیا تاکہ ضلع وسطی کو صاف ستھرا ضلع بنادیا جائے ۔

ایمز ٹی وی (اسلام آباد) چیئرمین تحریک انصاف عمران خان کا کہنا ہے کہ سپریم کورٹ میں جمع ایک بھی دستاویز غلط ثابت ہوئی تو میں سیاست چھوڑ دوں گا۔ کوہاٹ میں میڈیا نمائندوں سے بات کرتے ہوئے پی ٹی آئی چیئرمین نے کہا کہ لندن فلیٹ بیچ کر پیسہ قانونی طور پر ملک میں لایا اور اس کی 60 صفحات کی ۔ دستاویزات سپریم کورٹ میں جمع کرائی ہیں تاہم اس میں سے ایک بھی چیز غلط ثابت ہوئی تو خود سیاست چھوڑ دوں گا۔ عمران خان کا کہنا تھا ' اگر نواز شریف منی ٹریل دیتے تو کیوں نکالا نہ کہتے پھرتے اور نہ ہی یہ کہتے کہ عوام میرا احتساب کرے گی بلکہ عوام احتساب نہیں کرتی، کارکردگی پر ووٹ دیتی ہے۔

انہوں نے کہا کہ نواز شریف 30 سال سے عوام کو بیوقوف بنا رہے ہیں، انہوں نے 300 ارب ملک سے باہر بھیجے جب کہ سپریم کورٹ میں ان کی جانب سے جمع کرایا گیا قطری خط بھی فراڈ نکلا ہے۔ قومی اسمبلی میں نااہل شخص کے پارٹی سربراہ بننے پر پابندی کا بل مسترد ہونے کے حوالے سے عمران خان نے کہا کہ نااہل شخص کو پارٹی چیئرمین بنانے والے 160 ارکان قومی اسمبلی شرم سے ڈوب مریں، قوم کا پیسا چوری کرنیوالے نااہل آدمی کوکون اپنا سربراہ بناتا ہے؟ انہوں نے کہا کہ ہم پولیس میں کسی قسم کی سیاسی مداخلت نہیں ہونے دیتے اور ہمارا کام بہترین آئی جی کو صوبے میں لگانا تھا۔

عمران خان کا کہا کہ خیبرپختونخوا پولیس کی کارکردگی میں بہتری آئی ہے جس سے لوگوں کو فائدہ ہو رہا ہے اور رواں سال پچھلے 10 سال میں سب سے پرامن سال رہا ہے۔

چیئرمین تحریک انصاف کا کہنا تھا کہ یہ نیا خیبر پختونخوا ہے جس میں سیاستدان بلٹ پروف شیشے کے بغیر جلسوں سے خطاب کر رہے ہیں، چند سال پہلے تک اس کا تصور تک نہ تھا، اسفند یار ولی تو صوبہ چھوڑ کر چلے گئے تھے اور آج وہ جلسوں سے خطاب کر رہے ہیں۔ ڈی آئی خان واقعے سے متعلق ان کا کہنا تھا کہ سیاسی مخالفین نے بہت بڑا ڈرامہ کیا لیکن کیس میں نامزد 9 میں سے 8 ملزمان کو 24 گھنٹے میں گرفتار کیا گیا جب کہ میں نے خود 24 گھنٹے کے اندر آئی جی پولیس کو کال کی اور واقعے کے بارے میں پوچھا۔

ایمز ٹی وی (اقوامَ متحدہ ) پاکستان نے عالمی برادری کو افغان جنگ کے خاتمے اور خطے میں استحکام کا حل مذاکرات کے ذریعے نکالنے پر زور دیتے ہوئے کہا ہے کہ کسی بھی جانب سے طاقت کے استعمال سے امن قائم نہیں ہوسکتا۔ اقوامِ متحدہ میں پاکستان کی مستقل مندوب ملیحہ لودھی نے جنرل اسمبلی کے اجلاس میں افغان صورتحال پر جاری اجلاس سے خطاب کرتے ہوئے کہا کہ افغان جنگ کے خاتمے کا حل بات چیت کے ذریعے نکالا جاسکتا ہے۔ انہوں نے کہا کہ اتحادی افواج، کابل انتظامیہ اور افغان طالبان ایک دوسرے پر طاقت کا استعمال کرکے مسئلے کا حل نہیں نکال سکتے۔

افغانستان میں فوج کی موجودگی کو برقرار رکھنے کے معاملے پر اعتراض کرتے ہوئے کہا کہ 16 برس سے دنیا کی طاقت ور فورسز کی جانب سے جنگ لڑنے کے باوجود امن قائم نہیں ہوسکا۔ انہوں نے مزید کہا کہ افغانستان میں سیاسی اور فوجی حل کے لیے باہمی مطابقت کا فروغ ضروری ہے۔ ملیحہ لودھی نے کہا ’میرے خیال میں عالمی برادری بھی اس بات پر متفق ہے کہ افغانستان میں پائیدار امن صرف مذاکرت کے ذریعے ہی آسکتا ہے‘۔

ان کا کہنا تھا کہ پاکستان نے افغانستان میں صدیوں سے جاری سیاسی معاملات اور تنازعات کے حل کے لیے مسلسل پیش کش کی ہے۔ اپنے خطاب میں پاکستان کی جانب سے مستقل مندوب نے افغان طالبان کو دعوت دی کہ وہ تشدد کو چھوڑ کر مذاکرات کی میز پر آئیں تاکہ امن کے لیے ایک سنجیدہ مذاکرات کیے جاسکیں۔ اس موقع پر انہوں نے افغان امن اور مصالحت کے پلان کو خوش آئند قرار دیتے ہوئے امید ظاہر کی کہ یہ سیاسی حل کی جانب پہلا قدم ہوگا۔ ملیحہ لودھی نے افغانستان میں طویل مدتی تنازعات کے باعث پاکستان میں ہونے والی دہشت گردی اور اور معیشت پر اس کے اثرات سے عالمی بعادری کو آگاہ کیا۔