ایمز ٹی وی (کراچی) پاکستان پبلشر اینڈ بک سیلرزایسوسی ایشن کے تحت پانچ روزہ کراچی عالمی کتب میلے کا آغاز جمعرات 7 دسمبر سے کراچی ایکسپو سینٹر میں ہو گا۔یہ کتب میلہ11دسمبرتک صبح 10سے رات9بجے تکجاری رہے گا۔
پاکستان پبلشر اینڈ بک سیلرز ایسوسی ایشن کے چیئرمین عزیز خالد نے بتایا کہ کتب میلہ میں ایران‘ بھارت‘ ترکی‘ سنگاپور‘ چین ‘ ملائیشیا‘ برطانیہ اور متحدہ عرب امارات کے پبلشرز سمیت دیگر ممالک کے بین الاقوامی شہرت یافتہ بُک پبلشرز اپنے اشاعت شدہ مواد کی نمائش اس کتب میلے میں کریں گے۔
انھوں نے کہا کہ یہ کتب میلہ کراچی ایکسپو سینٹر کے ہال نمبر 1-2-3 میں لگایا جائے گا۔ کتب میلے میں 330سےزائد اسٹالز لگائے جائیں گے۔ کتب میلے میں ہر موضوع پر کتابیں دستیاب ہوں گی‘ اور عوام کو انتہائی کم قیمت پر فروخت کی جائیں گی۔
ایمز ٹی وی (صحت) قومی ادارہ برائے امراض قلب (این آئی سی وی ڈی ) کے تحت شہر میں چھٹا چیسٹ پین یونٹ رواں ماہ آئی آئی چندریگر روڈ پر نصب کیا جائے گاجس سےعوام سینے کے درد کی فوری طبی امداد حاصل کر سکیں گے ۔
اس سے قبل گلشن اقبال ، گل بائی ، ملیر ہالٹ ، قیوم آباداور ناگن چورنگی پر چیسٹ پین یونٹ نصب کیے جاچکے ہیں ۔ ناگن چورنگی پر یونٹ اتوار 19نومبر کو نصب کیا گیا جس کا افتتاح بدھ 22نومبر کو کیا جائے گا۔
اس ضمن میں گفتگو کرتے ہوئے این آئی سی وی ڈی کے ڈائریکٹر پروفیسر ڈاکٹر ندیم قمر نے بتایا کہ مئی سے شہر میں چیسٹ پین یونٹس لگانے کا سلسلہ شروع کیا گیا جو اب تک جاری ہے اور انشاء اللہ پورے شہر میں چیسٹ پین یونٹس لگائے جائیں گے تاکہ سینے کی تکلیف کی صورت میں عوام ان یونٹس سے رجوع کریں اور امراض قلب ہونے کی صورت میں انہیں قومی ادارہ برائے امراض قلب منتقل کرکے مفت سہولت فراہم کی جائے۔ واضح رہے کہ یہ یونٹس 24گھنٹے فعال رہتے ہیں۔
ایمز ٹی وی (تعلیم) اعلیٰ ثانوی تعلیمی بورڈ کراچی انٹر سائنس پری میڈیکل سال اول اور میڈیکل ٹیکنالوجی کے سالانہ امتحانات کے نتائج کا اعلان کردیا ہے
ایمز ٹی وی (کراچی) پاک بحریہ کے چیف ایڈمرل ظفر محمود عباسی نے جنگی بیڑے کا دورہ کیا اور کھلے سمندر میں بحریہ کی تیاریوں کا جائزہ لیا۔ اس موقع پر خطاب کرتے ہوئے نیول چیف کا کہنا ہے کہ ملک کو درپیش خطرات سے نمٹنے کے لیے تیار رہنا انتہائی ضروری ہے۔
ایڈمرل ظفر محمود عباسی نے پاک بحریہ کے جنگی بیڑے کا پہلا دورہ کیا، انہوں نے کھلے سمندر میں بحریہ کے مختلف جہازوں کی جنگی تیاریوں کا جائزہ لیا۔ انہوں نے افسروں اور جوانوں کی پیشہ وارانہ مہارت اور جنگی تیاریوں کو سراہا۔
نیول چیف ایڈمرل ظفر محمود عباسی نے کہا کہ ملک کو درپیش خطرات سے نمٹنے کے لیے تیار رہنا انتہائی ضروری ہے، پاک بحریہ کے جوان مہارت اور قومی خدمت کے جذبے کو ہمیش برقرار رکھیں۔ انہوں نےمزید کہا کہ بحری سرحدوں کی حفاظت اور مفادات کے تحفظ میں کوئی سمجھوتہ نہیں کریں گے۔
نیول چیف نے بحری جہازوں کے دورے کے دوران افسروں اور جوانوں سے ملاقات بھی کی۔
ایمز ٹی وی (انٹرٹینمنٹ) انقلابی شاعر فیض احمد فیض کو دنیا سے رخصت ہوئے 33 برس بیت گئے لیکن وہ آج بھی اپنے مداحوں کے دلوں میں زندہ ہیں۔ انقلابی شاعر فیض کو دنیا سے رخصت ہوئے 33 سال گزرچکے ہیں لیکن وہ آج بھی اپنے مداحوں کے دلوں میں زندہ ہیں، انقلابی شاعری کی تاریخ ان کے تذکرے کے بغیر مکمل ہی نہیں ہوسکتی۔ فیض احمد فیض نے اپنی انقلابی فکر اور عاشقانہ لہجے کوملا کر ایک ایسا لہجہ اپنایا جس سے اردو شاعری میں ایک نئی جمالیاتی شان پیدا ہوگئی، ان کے سیاسی خیالات و افکار آفاقی ہیں ۔اسی لیے ان کی شاعری آج کی شاعری نظرآتی ہے۔ فیض نے ثابت کیا کہ حق گوئی کسی ایک کے لیے نہیں بلکہ ہر خطے اور زمانے کے لیے ہوتی ہے،نقش فریادی، دست صبا، زندان نامہ، دست صبا، شام شہر یاراں اور میرے دل میرے مسافر ان کے کلام کے نادر مجموعے ہیں۔ سارے سخن ہمارے اور نسخہ ہائے وفا ان کے کلیات ہیں۔ فیض احمد فیض 13 فروری 1911کو سیالکوٹ میں پیدا ہوئے اور 20 نومبر 1984 کو لاہور میں انتقال ہوا، ان کی وفات کے بعد حکومت نے انہیں نشان امتیاز سے بھی نوازا۔
ایمزٹی وی(کراچی)شہر قائد میں چند روز کے دوران 15 سے زائد شہری لاپتہ ہوگئے۔ذرائع کے مطابق کراچی میں شہریوں کے گمشدگی میں ایک بار پھر اضافہ ہوگیا ہے اور چند روز میں 15 سے زائد شہری لاپتہ ہوگئے ہیں۔ سندھ ہائی کورٹ میں لاپتہ افراد کی بازیابی کے لیے دائر درخواستوں کی سماعت ہوئی۔ عدالت نے لاپتہ شہریوں کو بازیاب کراکر 20 دسمبر تک پیش کرنے کا حکم دے دیا۔ درخواستوں میں مؤقف اختیار کیا گیا کہ لاپتہ شہریوں کو پولیس، سادہ لباس اہلکار اور قانون نافذ کرنے والے اداروں نے حراست میں لیا، عدالت سے استدعا ہے کہ انہیں بازیاب کرایا جائے۔ لاپتہ شہریوں میں فیضان خان، انوار، معراج الدین، احسان، عرفان علی اور دیگر شامل ہیں۔ یہ شہری لیاقت آباد، عزیزآباد، شاہ فیصل، جوہرموڑ، کورنگی اور دیگر علاقوں سے لاپتہ ہوئے۔